Isus Navin 2
2
O Isus Navin bičhalel e špijunen
1O Isus Navin e themesa utaborisajlo ando Šitim. Okotar bičhaldas duj dženen te tajno špijonirin e phuv.
Phendas lenđe: “Džan thaj proverin e phuv, a posebno o gav Jerihon.”
E špijunurja đele thaj dine ando ćher jećhe manušnjako savi sas bludnica a lako alav sas Raava, te okote raćaren.
2Ali vareko javisarda e Jerihonske carošće: “Arjat varesave manuša andar o Izrael aviline akate te špijonirin e phuv.”
3Askal o Jerihonsko caro bičhaldas ke Raava pire manušen e porukasa: “Inkal avri e manušen save aviline ande ćiro ćher, kaj aviline te špijonirin amari sasti phuv.”
4Ali, voj lija godole duj manušen, garada len thaj phendas: “Godola manuša čače aviline mande, ali či džanav katar si. 5A talerjat kana phandadonas e gavešće kapije, godola manuša đeletar. Či džanav kaj đeletar. Siđaren pale lende te aresen len.”
6A e Raava e špijunen majsigo inđarda po krovo thaj garada len maškar e snopurja e lanošće save sas buljarde po krovo.
7Gajda e carošće manuša teljardine ande potera pale špijunurja e dromesa karingal o Jordan, sa dži ke thana kaj si o paj plitko te šaj naćhel pe e reka Jordan. Čim okola save džanas pale lende inkljistine, e gavešći kapija phandadili.
8Majsigo nego so e špijunurja đele te soven, e Raava lija pe opre po krovo lende, 9pa phendas lenđe: “Džanav kaj o GOSPOD dija tumen akaja phuv, kaj lija men e bari dar tumendar thaj sa e manuša andar akava gav izdran e daratar angle tumende. 10Kaj, ašundam sar o GOSPOD angle tumende šućarda e paja ando Lole more kana inkljistine andar o Egipat thaj so tumen ćerdine e Sihonešće thaj e Ogošće, e duj amorejske caronenđe, pe istočno rig e Jordanošći, saven potpuno uništisardine. 11Kana godova ašundam, klonisardam e duhosa thaj hasardam e hrabrost zbog tumende. Kaj o GOSPOD, tumaro Del, Del si opre po nebo thaj tele pe phuv. 12Zato akana han manđe solah e GOSPODESA kaj poštedina mungre familija, gajda sago kaj me poštedisardem tumen. Den man znako ande savo šaj pouzdiman 13kaj poštedina o trajo mungre dadesko thaj mungre dejako, mungre phralengo thaj mungre phejengo thaj sa lenđe familijengo, thaj kaj spasina men katar o smrto.”
14E špijunurja phendine laće: “Amare trajosa garantujis pale tumare trajurja! Ako či izdajin amen, lačhe postupisa tusa kana o GOSPOD dela men akaja phuv.”
15Askal e Raava e dorjasa mukla len tele kroz e pendžera, kaj o ćher ande savo trajilas sas spojime pe gavešće zidurja.
16Thaj phendas lenđe: “Džan ande gore te či aresen tumen okola save progonin tumen. Okote garadon trin đes dok von či bolden pe palpale, a askal džan tumare dromesa.”
17Von phendine laće: “Avasa slobodne katar e solah savi dijan amen 18ako, kana das ande phuv či phandes akaja loli dori pe pendžera kroz savi muklan amen thaj ako či anes ćire dade thaj ćire deja, ćire phralen thaj ćire phejen thaj saste ćire familija ande ćiro ćher. 19Ako vareko inkljel avri andar ćiro ćher, korkoro avela došalo pale piro smrto, a na amen. Ali ako aven tusa ando ćher, pa vareko vazdel piro vas pe lende, amen avasa došale pale lengo smrto. 20A ako varekašće phenes so ćeras akate, avasa slobodne katar e solah savi dijan men.”
21Voj phendas: “Neka avel sar phendine!”
Pale godova ispratisarda len thaj von đeletar, a voj phanglas e loli dori pale pendžera.
22Von đeletar thaj aresline ande gore, okote garadonas trin đes, dok okola save rodenas len či boldine pe palpale, nakon so rodine len pe sa e riga ali či arakhline len. 23Askal e duj špijunurja teljardine palpale. Mukline pe tele katar e gora, nakhline prekal e reka thaj aviline ko Isus Navin, thaj phendine lešće sa so sas.
24Phendine lešće: “O GOSPOD čače dija men sasti godoja phuv ande vas. Sa e manuša andar godoja phuv daran amendar.”
Currently Selected:
Isus Navin 2: RČB
Highlight
Copy
Compare
Share
Want to have your highlights saved across all your devices? Sign up or sign in
