Roma 9
9
na Viruwa i itras zi nantu pinalimi' na zinekalranan
1nanku nirengay maw a tatena' na ngay; muravakan ku kani Kiristo, 'azi ku venavetra'. nanku anger kazu kanantu i pasenan na Vangesar Lu'em wasay za 'azi ku venavetra': 2kemuda kana aluzun ku sipelengan, iniyan za paalruwan nana ku anger! 3muramawan zanku mawan, ku niruma'enan i savak, nu tematulis lra kaninku na Viruwa i itras, puwadayaw pareput kani Kiristo, mu wawai ku. 4nazu nintaw pinalimi' na zinekalranan kana Viruwa i itras; ulra mingadan kana Viruwa i itras mutu lralrak nazu, kisepad pa'inava kanantu lihu. kimakuret na Viruwa i itras kanazu, veray za kuret kanazu; milrazaman za semungal kana Viruwa i itras, zi kituluz zantu iyatuvang. 5nazu nintu temamuwan kanantu ma'izang na 'atayan, kurelranganay zantu kinatrauwan marengay, i Kiristo zi nazu maw mukasa za saya 'atayan. kiyalriman kanizu na demikes kana ulra ziyan na Viruwa i itras#9.5 <<kiyalriman kanizu na demikes kana ulra ziyan na Viruwa i itras>> karuwa marengay za <<kiyalriman kani Kiristo, maw kanizu na demikes kana ulra ziyan na Viruwa i itras>>. kisenay pulihu munayun, Amen!
6'azi ku marengay za tu iyatuvang na Viruwa i itras za iniyan lra. 'alrana, Iseraēl na trau amelri pinalimi' na zinekalranan mapiya kana Viruwa i itras; 7tu temamuwan ni Aburaham kemazu amelri nintaw kaalrakan mapiya. marengay lra na Viruwa i itras kani Aburaham: <<mawmau na pinialrak kemay kani Isak mu maw nannu temamuwan.>> 8ini kema marengay za, na pinialrak kemay nire'azinan amelri tu alrak na Viruwa i itras, mawmau na pinialrak kemay kanantu iyatuvang kana Viruwa i itras mu maw alrak na Viruwa i itras. 9'alrana nantu iyatuvang na Viruwa i itras mu maw kemani marengay: <<kazu za penauwa na wari mu,#9.9 <<penauwa na wari mu>> karuwa marengay za <<nu mari'ami kanini wari mu>>. zazuwa ku, i Sara piaalrak za sasa a ma'inayan.>>
10'azi mawmau kemani, alrak na zazuwa ni Rēbēka maw mukasa za temama, mawna tu pinialrak nanta temuwamuwan i Isak. 11-12mawmu, na muramawan zantu pakalralrazam za tatena' kinurelrang kanantu nirangeran i intaw palimi' i savakan sasa za alrak, na Viruwa i itras marengay kani Rēbēka: <<izu na ma'izang na alrak kipakarun kana makiteng na alrak.>> a marengay kanini na ngay i intaw mu, 'azi ziyan pinialrak nazu, 'azi ziya kemakuda za 'inava za kuwatreng; kakurena'uwan nantu ipalimi' na Viruwa i itras mu mupana kemay zantu nirangeran i intaw, 'azi kireeman kanantu paelrangan nazu. 13penauwa kamawan kana nirengay i Sēsiyo: <<lraman ku kani Yakob, semalaw za lraman kani Ēsaw.>>
14nu kemazu mu, karuwa ta marengay za 'azi paresaresan na Viruwa i itras ziyamaw? tatena' 'azi karuwa. 15'alrana marengay lra kani Mosē i intaw: <<nu kalraman ku kani eman mu kalraman ku kani eman, nu mianger ku kemirungetr kani eman mu mianger kemirungetr kani eman.>> 16kurena'u tu i palalimi' na Viruwa i itras amelri initurus zantu pinianger zi za ra'emetran na trau, mawna kemay kanantu lramanan. 17i savakan kana Sēsiyo, na Viruwa i itras marengay kana yawan i Ēzibuto: <<patikezir ku kannu mutu yawan, muramawan mimanay kannu za pakurenana'u kananku kezang, palenak zanku ngadan meredek kana rukup i iyan ziya.>> 18kuwaniyaw marengay mu, na Viruwa i itras nu kalraman kani eman mu kalraman kani eman; maranger pakaureng kani eman mu tu pakaurengaw i eman.
tu 'ilremesan na patezelr zi lramanan na Viruwa i itras
19kaulra kakuwa u marengay kaninku: <<nu maw kemani mu, na Viruwa i itras kuwadakuda maselru za trau? i eman na karuwa semuveli zantu nirangeran ziyamaw?>> 20mawmu ali a, i eman u, maruwaruwa u kimatuvang kana Viruwa i itras awa? na ngelrulr kemuda marengay kana demaway kantaw na trau za: <<kemuda zi dawayaw ku kemani ziyamaw?>> 21na sayhu kana ngelrulr mikezang za melak kana dare' demaway kanantu niranger; maruwa manay kana saya maresan na dare' demaway za zuzuwaya avakan i intaw, pazangal na saya, madulu na saya.
22nantu kinakuda ziyan na Viruwa i itras maw kemani. intaw pakurenana'u za 'inava tu 'ilremesan, pakurenana'u zantu pinikezang, mawna kemani zi intaw pakalranganay za saseker melawas meravak zantu kina 'ilremes kana trau, maw nazu na a mawziya nantu raramesen lra na kisi. 23nantu lihu na salaw merevaw tu i pupanayaw pakurena'u kanta. maw ta nantu kalramanan na trau, pawnung maw nantu pinadang zuwa kituluza kanantu lihu na trau. 24'alrana inta amelri mawmau nantu kemay Yodaya na trau, maw kemay kana trau i sizumayan i savak penaiz demaulr pupana. 25ini mu maw intaw kazu kana valray ni Hosēa tu nirengay:
a maw ziyan ara amelriya nanku zinekalranan mu,
rarengay ku kanazu za <<ninku zinekalranan>>;
a maw ziyan mu amelri nanku kinalraman na kanatal,
rarengay ku kantaw za ninku <<kinasahar>>.
26kazu ku lra kanay i iyan na dare' marengay kanazu za:
amelri mu nanku zinekalranan;
zi kazu kanizu na dare' nazu kinuwa za:
lralrak na vaaw munayun na Viruwa i itras!
27kireeman kana trau i Iseraēl, i Isaya 'emuy'uy lra: <<ara kazuwana kamawan kana vutrek i lrevek na Iseraēl mu, mawmu mawmau ulra kaytayan na musama' muvaaw. 28'alrana i Luzu kadadika zi patuwalre'ay sayvang kana trau ziya.>> 29kamawan kanantu nirengay ni Isaya aziyu ziyan: <<anu i Luzu -- na demikes kana hitay peniya nu 'azi muramawan kanta venilin za trungulran pakalikuzan, kapiya ta lra a aidan ziyan kamawan kana Sotoma, Gomora kemazu lra.>>
Iseraēl na trau zi na fukuing
30nu kemazu mu, kemudaya ta marengay awa? nazu na maw ziyan 'azi maaya' kanantu patezelran na Viruwa i itras i sizumayan na trau, 'alrana mukuwa kanantu pakutatena' zi mutu patezelr a trau; 31zi nazu na maaya' pakalrang za kuret mutu patezelr a trau na Iseraēl na trau, muveliyas za 'azi maruwa paredek zantu pauwayan. 32kemuda ziyamaw? 'alrana 'azi kuretalrima za pakutatena'an nazu, zi kuretalrima za paelrangan, likuzan mu penauwa za malradu' kanizu na <<palradu' na varasa'>> i itras. 33penauwa kamawan kana nirengay i Sēsiyo:
na'uwi! meretra' ku i Sion za saya varasa' a palradu',
maw palradu' kanazu na varasa'!
mawmu, na kuretalrima kantaw na trau mu 'azi kasipeleng.
Currently Selected:
Roma 9: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023