Roma 6
6
minatray i pinamelriyan, kazu kani Kiristo vaaw
1kemazu, kemudaya ta marengay awa? patrutruwa ta kazu vaaw kana pinamelriyan i savakan, maruwaya kurena'u za puwapuwa merevaw nantu ikalraman na Viruwa i itras ziyamaw? 2tatena' amelri! marengay ta kemay kana pinamelriyan mu, minatray ta lra. kuwadakuda ta maruwa patrutru kazu mawayway kana pinamelriyan ziyamaw? 3'azi mu ka'azi malrazam, kisuwap ta kurelrang kani Kiristo Yēsu marepukasa, zi mawna kisuwap kurelrang mukasa kantaw minatray. 4pakalranganay za semuwap, mukasa ta lra kantaw marelrang minatray, mukasa itrevelr; penauwa kamawan kani Ama i itras pakalrang kanantu lihu na ma'izang na kezang parevaaw kani Kiristo kemay kana minatray, zi mararesan ta kazu kana vekal na wayway.
5nu kurelrang ta kani Kiristo marepukasa, makalrang lra kanantu kiyanatray, mararesan ta kaalrang kanantu marevaaw. 6malrazam ta, nanta awatranan i inku mu mukasa lra kani Kiristo itrehetreh kana ziyuzika, muramawan tremepu kanta i inta na mipinamelriyan, 'aziya ta lra masalr mutu kuli kana pamelriyan. 7'alrana nu minatray lra a trau mu kiruwaday lra kanantu pinikezangan kana pinamelriyan. 8anu kurelrang ta mukasa kani Kiristo minatray mu, pakutatena' ta, uwakasa ta kani Kiristo vaaw. 9'alrana malrazam ta, i Kiristo marevaaw lra kemay kana minatray, 'azi lra i aasalr minatray; na kiyanatrayan mu 'azi lra karuwa masalr demikedikes kantaw. 10nantu ikiyanatray, kimareput kana pinamelriyan, paresan zi mukipiya peniya na pauwayan; vaaw i intaw harem, muramawan kana Viruwa i itras zi vaaw. 11mararesan, marengay ta kemay kanini na pinamelriyan, minatray lra kemaya mu i inmu; mawmu kazu kanantu uwavaawan i savakan kani Kiristo Yēsu mu, muramawana mu kana Viruwa i itras zi vaaw.
12semeneng, amanan masasalr ki'arapaz kana pinamelriyan nanmu zazek na 'azika'azi mukuwatreng, zi tu piturusaw mu zantu alengatran na pauwayan; 13tu sa'az nanku zazek ipuwailus kana pinamelriyan, mutu kisi kana kuwatrengan. muveliyas, sunanan nanmu zazek kana Viruwa i itras, kamawan kana vinaaw kemay kana minatray na trau, taw sunanay peniya nantu zazek kantaw, mutu avakan kana paresaresan. 14kemay kani, amanan lra kidikedikes kana pinamelriyan; 'alrana 'azi mu lra kazu kana kuret i savak, mawna kazu kana tu ikalraman na Viruwa i itras.
kuli na patezelr
15kuwaniyaw marengay mu, 'alrana 'azi ta kazu kana kuret i savak zi maw na kazu kana tu ipuwavut na Viruwa i itras. zi karuwa ta lra pamelri ziyamaw? tematena' 'azi karuwa! 16tatena' mu malrazam mu, a mutu kuli mu za trau mukuwa kureturusa kana tawki mu, amaw nintaw kuli inmu. i ini maw marengay za, mutu kuli mu kana pamelriyan, i likuzan lra mawna kiyanatray; miturus mu kana Viruwa i itras mu, karuwa mu mutu patezelr a trau. 17lrayuwan kana Viruwa i itras! arusay lra aziyuziyan mutu kuli mu lra za pamelriyan, mawmu harem pakarasa mu miturus kana i palenak kanmu na ipanadam. 18kivakevak mu lra kemay kana pinamelriyan, zi mutu kuli kana patezelr. 19makaud ku za kakuwalengan mu malrazam kananku piniangeran, semeneng ku pakalranganay za kalre'ayan paruwalru marengay kanmu. aziyu ziyan mu pakalrawalrawayaw nanmu zazek, pimamelri kemuwatreng, mutu kuli kana pinamelriyan. harem sunanan nanmu zazek peniya, putu kuli kana patezelr, mutu mukirungetr na avakan.
20a mutu kuli mu ziyan kana pinamelriyan mu, 'azi kipanadam kana patezelr. 21kairaira na lremak kema mu harem mu, a azu piya lra kemakuda, i likuzan kiveray za eman 'inavayan ziyamaw? mawmau a kiyanatrayan lra! 22harem, kivakevak mu lra kemay kana pinamelriyan, zi mutu kuli kana Viruwa i itras; mu sunananay kantaw patulre'ay nanmu uwavaawan, na kiniyaverey mu mawna uwavaawan munayun. 23'alrana tu trima' na pinamelriyan mu mawna kiyanatrayan; mawmu na Viruwa i itras tu ikalraman na ipuwavut maw pikazu kanta kani Luzu Kiristo Yēsu tu uwavaawan i savak kiveray za uwavaawan munayun.
Currently Selected:
Roma 6: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023