Roma 3
3
1nu kemani ta marengay mu, na Yodaya na trau ulra semalaw i iyan kana sizumayan na trau ziyamaw? zi na kikeret za kakuwayanan ulra a eman tu pauwayan ziyamaw? 2tatena' mu ulra peniya. na pukaisa, na Viruwa i itras tu tuluzanay nantu vati kana Yodaya na trau. 3nu kemuda lra ulra miyalikuz kanazu i savak mu, na Viruwa i itras mawna kemani 'azi tematena' ziyamaw? 4amelri kemazu! ara 'azi penatezelr na trau ziya mu, na Viruwa i itras maw tematena'; kamawan kana nirengay i Sēsiyo:
nu venavati u mu iniyan za kiyarengayan;
nu kikokso u mu 'azika'azi kiseker.
5nanta 'aziyan patezelr anu karuwa pakurena'u kanantu paresaresan na Viruwa i itras mu, a eman kakuwa ta marengay ziyamaw? pasavung kanta na Viruwa i itras mu, maw i intaw na 'azi patezelr ziyamaw? (ku paturusanay kanantu kiniyaanger na trau marengay.) 6tatena' amelri! anu maw na 'azi penatezelr na Viruwa i itras mu, kuwadakuda karuwa sayvang kana trau i punapunan i intaw ziyamaw?
7nanku vetra' nu karuwa puwapuwa pakurena'u kanantu tatena'an na Viruwa i itras mu, puwapuwa pilalihu, a eman kakuwa ta marengay awa? kemuda zi kisayvang ku ziya za mipinamelriyan na trau ziyamaw? 8kemuda zi 'azi marengay za <<kemuwatrenga ta zi pula'esi za 'inavayan>> ziyamaw? ulra a trau temuzu' marengay kaninku za marengay ku lra za kemani za ngay; kuretanay za mipamelriyan nazu mu pauwa.
iniyan za patezelr a trau
9nu kemazu, inta na Yodaya na trau marakerevat#3.9 <<kerevat>> karuwa marengay za <<apelr>>. kana sizumayan na trau ziyamaw? iniyan a kemani na lremak! kema ku lra pupana marengay, na Yodaya na trau zi na sizumayan na trau mararesan kazu kanantu kezang na pinamelriyan i savakan. 10kamawan kana nirengay na Sēsiyo:
iniyan za patezelr na trau, arusay za sasa sasa mu iniyana.
11iniyan za patulre'ay milrazaman na trau,
zi iniyan za maaya' kana Viruwa i itras na trau.
12na tratrautrau ziyan miyalikuz muwaday kana Viruwa i itras,
mukasa makawang mukuwa kana pamelri na dalan;
iniyan za kemakawang za 'inavayan na trau,
arusay za iniyan a sasa sasa.
13nantu tukeraw nazu mu kamawan kana mukiyutrav na trevelran;
nantu lidam kemazu lra marengay venavetra';
kamawan za padawak na unan mupana kemay kanantu virevir nazu;
14matemuy i udung nazu za kuwatrengan zi penunang.
15nu melihis nazu mu maresan za muwavii, temengez venuli' makaiyaiyan,
16tu niredekan ziya na kinazuwan mu muvilin a kinuwatreng zi na muranak na inlrangan.
17'azi malrazam nazu za ulra a ping-an na dalan;
18zi 'azi malrazam kemaira kemakaud kana Viruwa i itras nazu.
19malrazam ta, tu seratr na kuret mu maw marengay kana kazu i savakan kana kuret na trau, muramawan kana trau ziyan i punapunan hemelrepa kanantu sayvang na Viruwa i itras, 'aziya lra masasalr 'emalang marengay na trau. 20'alrana iniyan za trau maruwa kurenakep miturus za kuret zi kazu i ngawayan kana Viruwa i itras kipakalrazam marengay za maw patezelr. nantu pauwayan na kuret mawna maruwaya malrazam na trau za mipamelriyan lra.
na Viruwa i itras tu karuwayaw na trau mikireeman kantaw za pamaw penauwa
21mawmu harem, pakalrazam lra na Viruwa i itras kana trau za kuwadakudayan ulra penauwa na parekireeman kantaw; ini mu 'azi kireemen kana kuret. na kuret ni Mosē zi na patralritralri kemani a wasay peniya. 22na Viruwa i itras tu karuwayaw na trau mikireeman kantaw za pamaw penauwa maw na kurelranganay kanantu i pakutatena' kani Yēsu Kiristo. na Viruwa i itras tu kuwaniyaw temara na ulra ziyan pakutatena' kani Kiristo na trau, iniyan za pinarekamelri: 23'alrana mipamelriyan na tratrautrau ziyan, mikiyam lra tu lihu kana Viruwa i itras. 24mawmu, na Viruwa i itras veray za ipuwavut, pakalranganay kani Kiristo Yēsu venaaw kanazu, zi maruwa nazu ulra a penauwa za kireeman kantaw. 25na Viruwa i itras 'azi melraman gisē kani Yēsu, mimanay kantaw putu patavang puwatrima' kana pinamelriyan, pakalranganay zantu ikiyanatray, zi maruwaya na trau 'alrana pakutatena' kantaw zi kilapus za pinamelriyan. kemani kemakuda na Viruwa i itras mu mawna maranger pakurena'u kanantu paresaresan i intaw. 26'alrana penezepez za anger i intaw, meravak zantu pinamelriyan a aziyuziyan za trau. aramawana a harem, intaw pakalranganay puelak za pinamelriyan za pana'u zantu paresaresan i intaw. kemani mu, pakurena'u lra na Viruwa i itras za maw a paresaresan i intaw, zi na pakutatena' ziyan kani Yēsu na trau mu maruwa ulra a penauwa za kireeman kantaw.
27nu kemazu, ulra a eman nanta kamatrasan venavati awa? iniyan za makitekiteng! i kurelrang za eman pauwayan awa? maw na miturus kana kuret ziyamaw? amelri! maw mukuwa za pakutatena'. 28nanta puwaludus mu maw: na trau maruwa ulra a penauwa za kireeman kana Viruwa i itras mu mawmau pakalrang za pakutatena', zi amelri pakalrang za miturus kana kuret tu kiniyaami. 29kamelriya lra mawmau nintaw Viruwa i itras kana Yodaya na trau ziyamaw? zi amelri tu Viruwa i itras kana sizumayan na trau ziyamaw? tatena' maw! 30mawmau a sasa a Viruwa i itras, intaw kuwazu kema kana Yodaya na trau pakalranganay za pakutatena', na sizumayan na trau kemazu pakalrang za pakutatena' zi ulra a penauwa za kireeman kantaw. 31kemani ta marengay mu, ta pakutatena' malremes kanantu kezang na kuret ni Mosē ziyamaw? tatena' 'azi! muveliyas za, puwapuwa ta kemaarekez kana kuret.
Currently Selected:
Roma 3: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023