Roma 2
2
sayvang na Viruwa i itras
1'ali'an a, parevativati u za trau, anu maw u lra i eman, 'azi karuwa melapus peniya. parevativati u za trau, zi nannu kinakuda maresan kanazu, maw na kemuret u zannu pinamelriyan i inu. 2malrazam ta, na Viruwa i itras sayvang kana kemakuda za kemani na lremak na trau mu 'azi pamelri. 3mawmu, 'ali'an a, na parevativati za trau na lremak mu maw nannu kinakuda peniya! karuwa ku penusar zantu sayvang na Viruwa i itras kema u kemianger ziyamaw? 4demulu u aulra nay zantu lramanan, kalramanan, zi semaseker? kalralrazam u kana Viruwa i itras maw na lramanan, 'alrana pakavalisa u za anger kema kannu i intaw! 5mawmu maureng zi matru'a nu anger, muramawan u kannu penaiz za marasazu 'ilremesan, kemazu ziyanay kazu kana Viruwa i itras tu 'ilremesan zi paresaresan na sayvang za zuwa na wari kiyatuluz za mara aluzun tu pasavung. 6'alrana na Viruwa i itras tu paturusanay zantu pinaelrangan kana kurisaesa na trau venales kantaw. 7ulra a trau penakasa i anger za 'inavayan, penakasa kiyami kemay kana Viruwa i itras na pazangal, lalihu, zi na 'azi mararametr na uwavaawan, na kemani na trau mu, na Viruwa i itras uri vaveray za munayun na uwavaawan kanazu. 8kemazu zi nazu na alengatr, 'emazi kana tatena' vati, muveliyas kurelrang kana 'azi patezelr na trau, tu ka'iyalremes zi tu pasavung na Viruwa i itras raredek kanazu. 9na kemuwaatreng na trau mu 'azi pakapusar za kuwaatrengan zi za ulepan, inguwanguwayan maw na Yodaya na trau, i liyakuzan maw na sizumayan na trau. 10mawmu, ulra ziyan na 'inava tu paelrangan na trau, i intaw tu vaveray nazu za pazangalan, lalihu, zi ping-an i intaw, na iyanguwayan maw na Yodaya na trau, na iliyakuzan maw na sizumayan na trau. 11'alrana a Viruwa i itras 'azi parekamelrimelri za trau.
12i sizumayan na trau iniyan tu kuret ni Mosē, nu pamelri nazu mu 'azi kaazu kana kuret zi matrepu, na Yodaya na trau ular tu kuret, nu pamelri nazu mu tu paturusanay kana kuret kisayvang. 13'alrana na Viruwa i itras nu sayvang mutu iniyan za pinamelriyan, amelri pakarasa kinger kana kuret na trau, zi maw na pakakawang kana kuret na trau. 14na sizumayan na trau iniyan za kuret; mawmu nu kurelrang tu pauwayan nazu za kemakuda za lremak mu penauwa kana kuret, nazu mu maw a kuret nazu, ara iniyan tu kuret nazu. 15tu paelrangan nazu mu kurena'u lra za kiniyaami na kuret maw a vinavalrayan kanantu anger. tu 'inava na anger nazu uwasay kanini maw na tatena'; 'alrana tu niranganger mu nu eman maselru kantaw. nu eman mu melripu za ngay kantaw. 16semeneng, iturusanay zanku i palenak na fukuing, na Viruwa i itras kaazu kana waludusan na wari tu i pakalranganay kani Kiristo Yēsu, tremepa kana muvulri i anger na trau zi pakakawang sayvang.
Yodaya na trau zi na kuret
17kemazu mu, kemuda u i inu? maw ku a Yodaya na trau kema u, kurinakep za kuret, zi kamatrasan za ngay za ulra u za pakamelri kireeman kana Viruwa i itras. 18kituluz u lra za kakuwayanan na kuret, malrazam u tu nirangeran na Viruwa i itras, zi maruwa pareseneng za pamaw zi amelri. 19maw ku na kemakezeng kana mavutri' kema u. maw na senan za trau i 'aremeremeng, 20maw na pananadam kana iniyan za lrazaman na trau, zi maw tu sinsi na vangesaran. kema u ziya mianger, 'alrana ulra u tu kuret ni Mosē, zi demikes u lra kana lrazaman zi na tatena' vati. 21temuru u za trau, kemuda zi 'azi u tematuru kanu awa? panadam u za trau za itratrakaw, tremakaw u i inu awa? 22marengay u isasiya', semiya' u i inu? salaw u awiles za tinuviruwaruwa, tremakaw u za eman i biyo i innu? 23kamatrasan za ngay u ulra tu kuret na Viruwa i itras, 'azi u kemuwatreng tu kuret na Viruwa i itras zi pasiri temaraeman kantaw?. 24marengay na Sēysio: <<muramawan kanmu za nirekudayan na Yodaya na trau, temaraeman kanantu ngadan na Viruwa i itras kana sizumayan na trau.>>
25nu miturus u kana kuret, nannu kakuwayanan za kikeret mu mitrima'; semuveli u kana kuret, nu kikeret u za kakuwayanan mu iniyan za emaeman za pakakudayin. 26kuwaniyaw mena'u mu, na 'azi kikeret za kakuwayanan na trau nu miturus tu seratr na kuret mu, na Viruwa i itras kamelriya 'azi tu pakanu kikeret lra za kakuwayanan ziyamaw? 27inmu na Yodaya na trau tu i kuretanay mu za pamelriyan kana sizumayan na trau, 'alrana i inmu ara ulra mu valray na kuret; zi kikeret za kakuwayanan lra, mawmu nu kuwatrengaw lra na kuret; nu 'azi lra kikeret za kakuwayanan i zazek nazu, zi miyaturus kana kuret. 28kemazu mu, i eman na tatena' na Yodaya na trau, na tatena' kikeret za kakuwayan na trau awa? amelri makapanayan mutu Yodaya na trau, kineretan lra i zazek za kakuwayanan. 29na tatena' Yodaya na trau mu kemirakaz kemay i anger; veliyasayu marengay mu, kineretan lra za kakuwayanan tu anger, maw tu kiyakarunan tu Lu'em na Viruwa i itras, zi amelri pakalrang tu valray na kuret. na kemani na trau nantu kinipungadan mu amelri kemay kana trau, maw kemay kana Viruwa i itras.
Currently Selected:
Roma 2: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023