Roma 15
15
'azi kiyami papakumaw kantaw i intaw
1inta na arekez za pakutena'an na trau pauwayanay mu puwalranga kana apelr tu pakutena'an na trau, semepad kanantu aluzunan, zi 'aziya kiyami papakumaw i intaw kantaw. 2inta kurisaesa na trau miangera ta tu ka'iyanavayan kana zuma na sinziya, patikezir kana uwakasayan za pakutena'an na wayway. 3'alrana i Kiristo 'azi kiyaami za papakumaw kantaw i intaw, muveliyas kamawan kana nirengay i Sēsiyo: <<na semiri maselru kannu na trau nantu i sasiri maselru mu mukuwa kaninku peniya.>> 4na ngay i savakan kana Sēsiyo peniya muramawan za panadam kanta zi vinavalray, tu pauawayan mu maruwaya pakalrang za sasekeran zi kanantu ipukezang na Sēsiyo kiveray za talrimayan. 5kiyalriman kanizu na veray za sasekeran zi pukezang na Viruwa i itras puwalrang kanmu ulraya a mararesan nanmu iyana'u, menadanadam kani Kiristo Yēsu na iyaturusan, 6'inava maruwaya mukasa mapapiya, mukasa semenay pulihu kani Temamataw kananta Luzu i Yēsu Kiristo na Viruwa i itras.
palenak za fuking kana sizumayan na trau
7semeneng, muramawan za pulihu kana Viruwa i itras, maretulutuluza mu, maresan kani Kiristo za kituluz kanmu. 8marengaya ku kanmu, i Kiristo muramawan za pakurena'u kanantu tatena'an kana Viruwa i itras, zi mutu pakarunan lra kana Yodaya na trau, muramawan pula'esi kanantu iyatuvang kana ma'izang na 'atayan. 9kurelranga na sizumayan na trau zi maruwaya semenay pulihu kanantu lramanan kana Viruwa i itras. penauwa kamawan kanantu nirengay na Sēsiyo:
mawna kemani, kaazu ku kana sizumayan na trau i savakan semenay palenak kannu;
sasenay ku kanannu ngadan.
10marengay ziya na Sēsiyo:
na sizumayan na trau a! kurelrang kanantu zinekalranan na Viruwa i itras mukasa semangal!
11masalr ziya marengay:
na ulra ziya sizumayan na trau a! senay pakasemangal kani Luzu!
na tratrautrau ziyan a! senay pulihu i inmu kantaw!
12zi marengay ziya i Isaya:
uwapana tu trungulran ni Yēsi,
karahan i intaw demikes kana sizumayan;
na sizumayan na trau tatavang kantaw mapiya!
13kiyalriman kana Viruwa i itras, maw izu na rakaz za talrimayan, mukuwa kananmu pakutatena'an kantaw, zi matemuya mu kana marekamelrimelri na semangalan, ping-an, zi nanmu talrimayan, pakalrang kanantu kezang kana Vangesar Lu'em zi marekasaazu 'azi muwareput.
penatezelr marengay 'azi venavulri i Pawlo
14na wadadiyan, tatena' ku malrazam za 'inava nanmu pauwayan, zi milrazaman za atras, zi mipinadang za merevaw nantu lrazaman maruwa marepanadanadam. 15mawmu, kanini na tigami i savakan, kana pidaya a kiyaumalran, kemazu ku kema'uringetr papuanger kanmu. kemazu ku penatezelr marengay 'azi venulri, 'alrana maw na Viruwa i itras veray kaninku za pinakamelri a kezang, 16zi na mutu pakarunan ku kani Kiristo Yēsu, kazu kikarun kana sizumayan na trau. kamawan ku kana rahan venavati kanantu fukuing na Viruwa i itras, muramawan kana sizumayan na trau za mutu isunan kana Vangesar Lu'em na ipatavang. tu kinasahar kituluz na Viruwa i itras. 17kemani mu, 'alrana kazu ku kani Kiristo Yēsu i savak, maruwa ku kikarun kana Viruwa i itras zi milihu kema ku kaninku. 18-19nanku kina'uringetr marengay mu mawmau ini na saya na ngay: i Kiristo pakalrang kananku piningayan paelrangan, zi mimanay ziya za karepalripalri na lremak zi tu kezang na Lu'em kana Viruwa i itras zi na sizumayan na trau maruwa iturus kurelrang kana Viruwa i itras. mawna kemani, kemay Yērusalem palru i Ilirikum kana kinazuwan, palenak ku makaiyaiyan ziya kana kireeman kanantu fukuing ni Kiristo. 20nanku kiniyalriman mu kazu kana 'azi ziyan mikingeran kani Kiristo na kinazuwan palenak za fukuing, nanku kiyakarunan 'aziya mupatikezir kanantu kinikarun na trau i itras. 21marengay lra na Sēsiyo:
na 'azi ziyan malrazam kantaw na trau mu nana'u;
na 'azi ziya mikingeran kantaw na trau mu kalrazam.
i Pawlo mianger mukuwa mumalra i Roma
22mawmu, parepidapidan ku mutala', 'azi ku maruwa mukuwa kanmu i kazu. 23mawmu a harem, nu maw piya ku lra kana kiyakarunan i kani mu, pawnung pidaya 'ami lra ku marangeran mukuwa mumalra kanmu, 24kiyalriman ku za mukuwa harem, kazu za makuwa ku i Sipaniya kana dalan, 'emaliyuwa ku mena'u kanmu, kazu kanmu i kazu mukasa semasaharan za pidaya wariyan, kemazu zi patununa mu kaninku. 25mawmu, muramawan za vavaawan kana sinziya na lremak mu, 'azi ku ka'azi mukuwa i Yērusalem harem. 26'alrana na kiyokay i Makidoniya zi Akaya semangal muwai paranuv za paisu, puwalrang i Yērusalem kana sinziya i savak na kalramalraman na trau. 27ini kemazu maw semangal kikarun nazu mu, tatena' mu maw nantu zelreng nazu. nu kemazu i Yodaya na Kiristo sinziya sempad veray kana iputrepa na ka'ulasan kana sizumayan na trau, na sizumayan na trau pauwayanay mu kapuwalrang za pinieman kanazu. 28ngangara za piya ku kikarun kanini na lremark, nantu kiniyazuk na paisu nazu za ituluz patulre'ay peniya lra mu, zi 'emaliyuwa ku lra i kazu kanmu, mukuwa i Sipaniya. 29malrazam ku, nu mukuwa ku mena'uwa kanmu mu kemazu aurung ku kanantu ipuwavut na merevaw ni Kiristo veray kanmu.
30na wadadiyan, pakalranganay kananta Luzu i Yēsu Kiristo, zi pakalranganay ziya kanantu iveray na lramanan kana Vangesar Lu'em, 'alrazi kiyamiya ku kanmu, muramawan kananku nirekudayan kurelrang mukasa kaninku pakirungetr kiyami kana Viruwa i itras, 31'aziya ku muelep kanantu i pakakuwatreng na kazu i Yodaya nazu na 'azi pakutatena' na trau, zi semangala pakumaw na sinziya kananku kiniyakarun na puwaalrang kana kalramalraman i Yērusalem. 32nu wawai paturus na Viruwa i itras mu, karuwa ku semangamangal mukuwa mena'uwa kanmu, kazu kanmu temalaulep za pidaya wariyan.
33kiyalriman kana veray za ping-an na Viruwa i itras kurekasa kanmu kurisaesa! Amen.
Currently Selected:
Roma 15: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023