Roma 12
12
na kikarun kana Viruwa i itras na wayway
1semeneng, wadadiyan a, anu kemani kana lraman na Viruwa i itras kanta, pukezanga ku vaavaaw u temupatavanen semunan nanmu zazek veray kana Viruwa i itras, pakarasa kikarun kantaw, kikasemangal kantaw, i ini mu maw nanmu kapauwayan semunan na tatena' na iyasungal. 2amanan na kurelrang za kakuwayanan kanini na punapunan, tuwa valisaw mu demaway na Viruwa i itras, maravekal nanmu nirangeran, maruwaya patulre'ay mena'u za a eman nantu nirangeran, malrazam kana 'inavayan za a eman, mutulre'ay, karuwayan kikasemangal kituluz.
3pakalrang kanantu iveray na Viruwa i itras kaninku na lramanan, rarengay ku kanmu kurisaesa: amanan na kemaatras mena'u kanmu i inmu, muveliyasa za kemaira temaranapaw, i inmu kurisaesa paturusan kanantu iveray na Viruwa i itras kantaw na pakutatena' kemuret kantaw i intaw. 4saya na zazek maw a sazu na sa'az na zazek zi mudaway, zi na kurisaesa na sa'az na zazek ulra nantu pimanayan. 5mararesan, ara ulra kazuwan ta, kazu ta kani Kiristo i savakan mutu sazazekan ta, madaudaulr nazu, mudaway na zazek za 'azi maresaresan zuma. 6semeneng, iyaturus ta kanantu iveray na Viruwa i itras na lramanan, temaranapaw melraman manay kana marekamelrimelri na iputrepa, kikarun kana kapauwayan na lremak. nu nanta kiniputrepa maw na palenak za vati, zi iturusanay za pakutatena'an tu pinalruwan palenak venavati; 7maw a kiyakarunan, zi pauwayanay kikarun; maw a panadaman, zi pauwayanay panadam; 8maw a venavati pukezang marenagy, zi pauwayanay mu pukezang marenagay; maw a vaveray kana kalramalraman, zi pauwayanay mu 'azi pasala' veray; mutu kemakezeng, 'azi mataraulepan; maw a melraman za trau, zi pauwayanay semangamangal.
9tematena' lraman za trau. awiles za kuwatrengan, patrutru mi'inavayan. 10parekalramalraman na maruwadiyadi; penatezelr marekairaira. 11amanan na maratrang, kara'emetr kikarun, penakasa za anger kikarun kani Luzu. 12semangal kazu za talrimayan. semaseker kazu za kuwaatrengan, pakirungetr kiyanun. 13maruwaya kisepad pa'inava na kalramalraman na wadadiyan kanannu piniemanan; temara kana sizumayan na trau.
14'aperezu na pakakuwatreng kannu na trau; ai, 'aperez, amanan na penunang. 15kurekasa kana misemangalan na trau semamangal, kurekasa kana trematrangis na trau trematrangis. 16nu kani eman lra na trau, maresan za anger marekalramalraman. amanan na matras raramu', muveliyas iluwasulusu kemaira; zi amanan na salaw ku sayhu kema.
17na kuwatreng mu amanan kuwatrengaw valesaw za kuwatreng; nu mena'u mapiya zi 'inava kema mu, semangal kimasalaw mukuwa kikaruna. 18rukezangu kima'inava kana trau mapiya. 19'ali'an a, iauwa muramawan kannu venales za 'alra i inmu, mara'inava nu tu paruveliyay zantu 'ilremesan na Viruwa i itras puwalrang marengay papatezelr, 'alrana marengay na Sēsiyo: <<marengay i Luzu: na puwalrang marengay papatezelr ulra kaninku; 'azi ku ka'azi venales.>> 20marengay ziya na Sēsiyo: <<nu savelaw nannu 'alra, paekani i intaw, nu 'aw mu, pa'awi i intaw; nu kemani u mu kamenezan tu mudingan, kasamaz zi puwapuwa maira.>> 21semeneng, amanan pakakiseker kana kuwatrengan, na 'inava pakakisekeru kana kuwatrengan.
Currently Selected:
Roma 12: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023