Roma 1
1
1maw ku a pakarunan ni Kiristo Yēsu i Pawlo; na Viruwa i itras palimi' demaulr kaninku putu sito, pakamelriyaw ku pakarun palenak kanantu fukuing.
2-4ini na fukuing maw na Viruwa i itras kazu a aidan ziya mu tu pakalranganay za kazuwan kanantu patralritralri kazu kana Sēsiyo tu iyatuvang, tu pauwayan na valray ulra kireeman nantaw Alrak -- nanta Luzu Yēsu Kiristo. kemay kana kinatrauwan marengay mu, maw na trungulran ni Davidē i intaw; kemay kana mukirungetr na kaviruwa marengay mu, 'alrana Viruwa i itras parevaaw kantaw kemay kana minatray, pakalrangan za ma'izang kezang pakurena'u kantaw maw tu Alrak na Viruwa i itras. 5pakalrang kantaw mu, kituluz ku kana pakamelri na iputrepa na kezang, muramawan kanantu ngadan mutu sito, kemezeng za trau i makakanatanatal pakutatena' miturus kantaw. 6ini tatena' maw muwaravakan inmu na kazu i Roma, pinalimi' demaulr kana Viruwa i itras muravakan kani Yēsu Kiristo na trau.
7mumalra ku za 'inavayan kana ulra ziyan i Roma, tu kinalraman na Viruwa i itras, pinalimi' demaulr putu zinekalranan kantaw na trau.
kiyalriman kani Ama na Viruwa i itras zi i Luzu Yēsu Kiristo veray kanmu za ipuwavut zi za ping-an!
lrayuwan na kiyanun
8ngawangawyan, pakalrang kani Yēsu Kiristo, muramawan ku kanmu mapiya lrayuwan zanku Viruwa i itras, 'alrana mupalenak lra nanmu i pakutatena'an i punapunan. 9malrazam na Viruwa i itras kazuku marayas kiyaanun salrengeseng ku kanmu. peniya ku anger peniya na niranganger kikarun kantaw, palenak za kireeman kanantu Alrak na fukuing; kararuwa wasay intaw kananku nirengay na ngay maw tatena'. 10kiyami ku kana Viruwa i itras, iturusay nantu niranger na 'inava pudadalan kaninku, tivutivus kazu ku wari mukuwa mumalr kanmu. 11salaw ku kiyalriman za kirepana'u kanmu, zi semepad pa'inava za muravak kana lu'em tu iputrepa na kezang kanmu, maruwaya mu kerevat arekez. 12kaulra kakuwa ku marengay za, 'alrana innu zi i inku na pakutatena'an, zi maruwa ta marepukezakezang.
13wadadiyan a, malrazama mu kema ku, parepidan ku lra mianger mukuwa mumalra kanmu, aramawana kazu a pidaya a lremak meringiz temala', 'azi ku maruwa masikasik. nanku pauwayan mu kazuwa ku kanmu i savak kemezeng za trau kurenakep kani Luzu, kamawan kazu za zuma i sizumayan i savak. 14'alrana nu kemuda lra na trau, kurelrang za lrazaman, na 'azi ziyan kurelrang za lrazaman, na mitinakesiyan, iniyan za tinakesiyan, mikiyam ku kanazu mapiya. 15semeneng, maahelr ku palenak kanini na fukuing kanmu na kazu i Roma na trau.
ma'izang tu kezang na fukuing
16'azi ku pakanukairayan na fukuing: ini na fukuing maw na ma'izang tu kezang na Viruwa i itras, venavaaw kana pakutatena' ziya na trau, iyanguwayan maw na Yodaya na trau, likuzan mu maw na sizumayan na trau. 17'alrana ini na fukuing i pakalrazam pana'u na Virua i itras kumudayaw na trau ulra penauwa na parekireeman kantaw: maw kemay kana pakutena', zi mukuwa za pakutatena'. mararesan tu nirengay na Sēsiyo: <<mawna pakutatena' zi maruwa ulra penauwa na parekireeman kana Viruwa i itras na trau uri kiveray za uwavaawan.>>#1.17 <<mawna pakutatena' zi maruwa ulra penauwa na parekireeman kana Viruwa i itras na trau uri kiveray za uwavaawan.>> karuwa marengay za <<maruwa ulra mareka'ianava na kireeman kana Viruwa i itras na trau uri pakutatena' i anger zi kiveray za kavavaawan>>.
tu pamelriyan na trau ziyan
18na trau tu 'aziyan pakasa zi na 'azi patezelr tu lingezaw lra na tatena' vati, zi na Viruwa i itras tu pakurena'uwaw kemay i itras nantu 'ilremesan na patezelr. 19na Viruwa i itras tu pasavungaw nazu; 'alrana kireeman kanantu lremak kantaw, kararuwa malrazam na trau, zi patulre'ayanay mayar i ngawayan kanazu, maw na Viruwa i itras tu pakurena'uwaw kanazu. 20na 'azi kurena'u tu pauwayan na pakamelri na Viruwa i itras, mawna munayun tu kezang na ma'izang zi tu kakuwayanan na viruwa, tatena' mu kemay pinarevuwa'an i punapunan mu kurena'uwan lra peniya, maw kemay kanantu dinawayan na eman ziyan zi kurena'u mukalrazam. semeneng iniyan za pa'alangan marengay na trau. 21ara malrazam nazu kana Viruwa i itras, zi 'azi pulalihu veray kantaw, zi 'azi lrayuwan kantaw; kareulraulrang tu nirangeran kanazu, kama'ulidan tu anger. 22sayayhuwan mi kema mianger nazu, tatena' ma'ulid. 23'azi semasungal kana vaaw munayun na Viruwa i itras nazu, muveliyas mukuwa semungal kana tinuviruwaruwa, maw nazu na initurus kana 'azika'azi minatray na trau, tu dawayaw na pinizazek pupana za 'aya'ayam, dobuc i alalas, na haramehaman elra.
24semeneng, na Viruwa i itras tu kalrawalrawayay tu alengatran i anger kemakuda pimamelri za lremak, marepulritralritra' i zazek. 25retra'anay lra tu tatena' vati na Viruwa i itras, maramuwai kituluz kana amelri tatena'; semungal kana dinadaway, zi 'azi semungal kana demaway na Luzu, i Luzu maw na kirepa'uwa kisenay pulihu munayun, Amen!
26'alrana kemani, na Viruwa i itras taw pakalrawalrawayaw tu alengatran nazu; 'azi mawmau na vavayan manay za semuveli kana pauwayan za alengatr ki'avalr venalis kana tatena' na pauwayan kire'avalr, 27kemazu na ma'inayan meretra' kana pauwayan mi'avalr kana vavayan, zi marekisupesup za alengatran, na ma'inayan zi na ma'inayan manay za kairairayan na lremak, talikuzan mu penaiz kana kemani kakuwatrengan zi kiputrepa za kipasavungan.
28nu maw kemazu mianger a trau za amanan pakanumaw kana Viruwa i itras, na Viruwa i itras mu tu pakalrawalrawayaw nazu pimamelri i anger, kemakuda kana amelri na kakudain na lremak. 29matemuy za marekamelrimelri za 'azi penatezelr, kuwatrengan, alengatr, kemuwatreng za ngay; zi matemuy za sepelran, temengez pinatray, maziyakuzikul, 'emuli'ulid veneliyas, zi mulrek kemuwatreng. puwa'ivat kemuwatreng za ngay, 30marepakakuwatreng. awiles kana Viruwa i itras nazu,#1.30 <<awiles kana Viruwa i itras nazu>> karuwa marengay za <<nazu maw tu kinawiles na Viruwa i itras>>. maretemaraemen, matras, kemaatras kantaw, venasuk za paziyakuzikulan, 'azi kemiyarungetr za ma'izangan. 31kainiyanan za anger, marengay iniyan za tatena', iniyan za lramanan, 'azi lraman za trau. 32malrazam nazu, iturusay nantu seratr na Viruwa i itras, na kemakuda ziya kanini na lremak na trau mu kakiyanatray; mawmu, amelri mawmau intaw kemazu nazu, zi paturus kana zuma na trau kemani kemakuda.
Currently Selected:
Roma 1: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023