Maruko 7

kakuwayanan na temuwamuwan

(Matay 15.1-20)

1na Palisay na trau zi na kemay Yērusalem na papida na sinsi kana Sēsiyo mukasa zuwa kirepana'uwa kani Yēsu. 2nazu mena'u kana temakesi ni Yēsu ulra a trau manay za 'azi mukirungetr na lima mekan -- mawna 'azi kamawan kana Palisay na trau kemazu iyanguwayan muras za lima.

3tu kemazuwan na Palisay na trau zi Yodaya na trau pangetrengetr miturus kanantu kakuwayanan na temuwamuwan, nu 'azi miturus kana kuret iyanguwayan muras za lima mu 'azi maekan; 4na trinima'an kemay tiyam na eman mu nu 'azi piyanguwayan semavesav mu 'azi maekan#7.4 <<na trinima' kemay tiyam na eman mu nu 'azi piyanguwayan semavesav mu 'azi maekan>> karuwa marengay za <<kemay dadalan muruma', nu 'azi muras zantu lima mu, nu 'azi piyanguwayan semavesav tu lima mu 'azi aekan za emaeman>>.. nazu pakasa ziya miturus za sazu a zuma kana kakuwayanan na kuret, kamawan kana kemuda melrisaw za takilr, melrisaw za deruwan, melrisaw za do na avakan zi na sa'esa'#7.4 ulra pidaya na awatranan lulun iniyan za <<sa'esa'>>. zi na zuma lra.

5mawna kemani na Palisay na trau zi na sinsi kana Sēsiyo kiyumalr kani Yēsu: <<kemuda zi nannu temakesi 'azi miyaturus kananta temuwamuwan na kakuwayanan, maruwaruwa manay kana 'azi mukirungetr na lima mekan ziyamaw?>>

6marengay i Yēsu: <<i Isaya kema kanmu ini na kitu'inavanava na trau tu nirengay putralri mu pamaw; marengay i intaw:

na Viruwa i itras kemani marengay:

ini na zinekalranan kemaira kaninku kanantu udung,

mawmu nantu anger nazu mu mudawilr kaninku.

7tu kuret na trau maruwaruwa kamawanaw kananku seratr nazu;

semungal kaninku nazu iniyan za pauwayan peniya!>>

8marengay i Yēsu: <<pangetrengetr mu miturus kana kakuwayanan za trau, zi 'ematelr lra kanantu seratr na Viruwa i itras.>>

9marengay ziya i intaw: <<kemasayhu mu 'emazi kanantu seratr na Viruwa i itras, mawili za pangetrengetr miturus kana kakuwayanan. 10semeratr i Mosē kanmu: <kirungetru mena'u na ma'izangan>; zi kemuret ziya: <na penunang maselru kana ma'izangan mu, 'azika'azi piyanatrayin.> 11muveliyas mu marengay, nu ulra a trau na ivavaaw kana ma'izangan na eman mu kamawanaw za <keepan> (tu pauwayan mu maw na isunan veray kana Viruwa i itras na patavangan), 12zi i intaw maruwa lra 'azi nana'u paekan kana ma'izangan. 13nu kemani mu kemakuda, maresan kana melak kananmu ipanadam za trau na kakuwayanan venalis palremes kanantu vati na Viruwa i itras. zi kemakuda mu ziya a sazu za mararesan na lremak.>>

na puwalritr'a kana trau na eman

(Matay 15.10-20)

14i Yēsu puwazuk ziya masalr kana zinekalranan zuwa i ngawayan kantaw, marengay kanazu: <<i inmu mapapiya kingeri nanku ngay, zi kalrazam. 15izu na kemay panayan musavak kana trau i savakan mu 'azi pulralritra' za trau; muveliyas, izu na kemay kana trau i savakan mupana mu maruwa pulritra' za trau.>>#7.15 ulra pidaya na awatranan lulun puwayay za 16 vatras <<na ulra mitralinga mu, kingeri mapiya!>> (na'u kana Maruko 4.23)

17a muveruk i Yēsu kana zinekalranan musavak kana ruma' mu, kiyumalr na temakesi kantrini na paruwalruwan tu pauwayan. 18marengay i Yēsu kanazu: <<maresan mu kanazu za 'azi malrazam ziyamaw? 'azi mu malrazam ziyamaw? izu na kemay panayan musavak kana trau i savakan mu 'azi pulralritra' kantaw; 19'alrana kemay panayan musavak mu amelri mukuwa kanantu anger i savakan, maw musavak kanantu tiyalr i savakan, zi mupana i'atelr.>> (i Yēsu kema kana aekanen ziya maw a mukirungetr.)

20patrutru marengay i intaw: <<izu na pulralritra' kana trau mu maw na kemay kana trau i savakan mupana. 21'alrana kemay i savakan mu, mawna kemay kana trau i anger mupana a marekudakuda na kuwatreng na piniangeran; nanni na kuwatreng na piniangeran kemakezeng kantaw mukuwa semiya'a, tremakaw, piyanatray, 22zemanga masiya', alengatr, pimamelri kuwatreng, 'emuwali'ulid, maulrang, masepelr, marengay kemuwatreng, matras, kapalavatan kemamatras zi zuma na pinamelriyan. 23ini peniya na kuwatrengan mu maw na kemay kana trau i savakan mupana zi tatena' za pulralritra' kana trau.>>

tu pakutatena'an na sasa a vavayan

(Matay 15.21-28)

24muveruk i Yēsu kanizu na kinazuwan, mukuwa i Taēr kana pinidare'an. kaazu za saya tu ruma' za trau i intaw, 'azi muwai pakalrazam za trau, mawmu 'azi maruwa venulri. 25payas, ulra a sasa vavayan, kipalrar tu alrak na vavayan, kinger za lremak ni Yēsu zi zuwa kirepana'uwa kantaw, malrituzu i kakuyan kantaw. 26ini na vavayan mu maw a trau kana zuma na kanatal, pinialrak kani Siliya i Finiki. i intaw kiyami kani Yēsu za venerelrang pupana kana palrar i zazek kanantu alrak na vavayan. 27i Yēsu marengay kantaw: <<piyanguwayanu pakavetreker na lralrak. melak kanantu aekanen na lralrak 'ematelr veray kana suwan paekan mu maw pamelri.>>

28temuvang izu na vavayan: <<ai, Luzu a, mawmu na suwan mekan kana etu i makalusu kanantu sama' na lralrak na karekitekiteng a!>> 29marengay i Yēsu kantaw: <<pakalranganay kanini na ngay, karuwa u lra muruma'; na palrar mupatraran lra kemay kanantu zazek kanannu alrak na vavayan!>> 30kemazu zi muruma' izu na vavayan, mena'u kana alrak na vavayan mi'ezeng i sa'esa'; muwaday lra na palrar kantaw.

i Yēsu paka'inava za sasa na matrule' ma'umuy na trau

31muveruk i Yēsu i makadalrep kana Taēr na pinidare'an, makalrang i Siton, kemay Dēkapulis mukuwa i Galili kana danaw. 32ulra a trau pilralrang za sasa a matrule' ma'umuy na trau mukuwa kani Yēsu i ngawayan, kiyami kani Yēsu za demikes kantaw. 33i Yēsu kemezeng kantaw kemay kana mulepun na trau i savakan pupana, pilralrangaw i saninin, pusavakaw tu tatimus i intaw kanantu tralinga, zi manay ziya za ngalay mitrul kanantu lidam. 34i Yēsu teme'ang piyaitras, pasavak mengaz za paresan, marengay kanizu na trau: <<Ēvata!>> na pauwayan mu maw <<kinganga!>>

35tu tralinga izu na trau payas mutruwalr lra, apelr lra nantu lidam, zi mararengay lra i intaw, 'azi lra kakuwalengan. 36patalru i Yēsu kanazu mapiya iyauwauwa marengaya kana trau kanini na lremak; mawmu tu tarengayay temuru i intaw mu, puwapuwa pakirungetr pu'ivat za ngay nazu. 37na kinger ziya na trau mu salaw maherareher; marengay nazu: <<nantu kinakuda na lremak peniya pasalaw lra 'inava! arusay na matrule' maruwa pakinger i intaw, na ma'umuy maruwa parengay!>>

Currently Selected:

Maruko 7: TPN

Highlight

Copy