Matay 24

putralri marengay kana mutrerev na vangesar ruma'

(Maruko 13.1-2; Luka 21.5-6)

1i Yēsu mupatraran kemay kana vangesar ruma', penauwa za muwaveruk, zuwa kantaw i ngawayan na temakesi, temuzu' kana pinarahan na vangesar ruma' pana'u kantaw. 2i Yēsu marengay kanazu: <<amelri mu mena'u lra kanini na pinarahan ziyamaw? penatezelra ku marengay kanmu, i kani na saya saya na varasa' aivasaw putani peniya, iniyan za sasaya za varasa' wavilin kana zuma na saya na varasa' i itras.>>

na kakuwatrengan zi na pakakuwatreng

(Maruko 13.3-13; Luka 21.7-19)

3i Yēsu kazu kemayan i Olēv zenan; zuwa mulrek kiyumalr na temakesi kantaw: <<'alrazi rengayaw mi, uwapana nu aidan nanni na lremak? nannu raredekan zi nantu uwaludusan i kani punapunan mu ulra a eman pakalralrazaman pungaway ziyamaw?>>

4temuvang i Yēsu: <<taranapaw i inmu, amanan ki'uli'ulid za trau. 5'alrana ulra kazuwan a trau venavetra' mingadan kananku ngadan zi zuwa, marengay: <maw ku i Kiristo>, kemazu zi 'emuli'ulid lra kazuwan za trau. 6kiyaanger mu i dalrep kana lrengaw na matatengez zi i dawilr na matengangetengez na lremak. ikakaud i inmu, ini na lremak 'azika'azi mupana, mawmu amelri marengay za meredek lra tu uwaludusan na pinakalrangan i punapunan. 7na saya 'alrayan kimatatengez kana zuma a saya na 'alrayan; saya na kanatal tatengez kana zuma a saya na kanatal; ulra i iyan ziya a savelawan zi ngunin. 8ini peniya na lremak tu uwapana mu kamawan kana miaalrak na vavayan tu nanayan za kemiyarakaz.

9<<nu azu, ki'a'evang mu, kisavung za pakirev, kipinatray. muramawan kananku nirekudayan, kawilesaw mu za trau ziyan i punapunan. 10kazuwan na trau na raretra' kanantu singko, marekavetravetra' kemuwatreng, marekaawiles; 11uwapana kazuwan a mavetra' na patralritralri, pazelengan kana anger za trau. 12'alrana matemuy a kuwatrengan i iyan ziyan, kazuwan na marekalralritek lra tu lramanan. 13mawmu, na kerevat semaseker patari puludus na trau mu 'azika'azi muvaaw. 14tu fukuing na kanatal i itras pinganguwayan paketrepay palenak kani punapunan, uwasay kana tratrautrau ziyan, kemazu zi na pinakalrangan i punapunan tu uwaludusan zi raredek lra.>>

ma'izang na kakuwatrengan

(Maruko 13.14-23; Luka 21.20-24)

15<<mena'u mu kana patralritralri i Daniēl kanantu nirengay izu na <palralremes zi kaawilewiles na eman> matikezir kana vangesangesar na kinazuwan mu (na maip na trau mu 'azika'azi malrazam kanantu pauwayan kanini na ngay), 16na kaazu i Yodaya mu, penusara piyazenan muliki za kuwatrengan; 17na kazu i sa'uv mu, iuwalusu musavak kana ruma' melak za eman; 18na kazu i 'uma'uma mu, kemazu iuwaruma' melak za pakatras za kavang. 19kanazu na wari, na malii na vavayan zi na pasusu kana vu'enin na tainayan mu kaulep lra! 20tarekiyanun i inmu kana Viruwa i itras za ka'aziyan mupana nanni na lremak nu vetriliyan zi nu katalaulepan na wari; 21'alrana nazu na wari na kakuwatrengan mu maw na kemay pinarevuwa'an i punapunan mu iniyan ziya za kemani, nu aziyu lra kemazu 'azi lra aasalr kazu. 22na Viruwa i itras nu 'azi tu kalriketrii nazu na kakuwatrengan na wari mu, iniyan za trau za kararuwa vaaw. mawmu muramawan kanantu pinalimi' na zinekalranan, na Viruwa i itras tu i kalriketriyaw nazu na wari.

23<<nu ulra a trau marengay kanmu: <na'uwi, ulra i kani i Kiristo! na'uwi, ulra i kaziyu i Kiristo!> amanan kiputatena' kantaw. 24'alrana mavetra' na Kiristo zi na mavetra' na patralritralri uri uwapana, puwapana za ma'izang na karepalripalri kirekamelri na lremak zi pazelengan za trau nazu; nu kararuwa mu, arusay za pazelengan kanantu pinalimi' na zinekalranan kana Viruwa i itras. 25piangeru! iyanguwayan ku lra pataranapaw kanmu.

26<<nu ulra a trau marengay kanmu: <na'uwi, i Kiristo ulra i alalas!> iuwapatraran i inmu; kaulra marengay: <na'uwi, i Kiristo ulra i savak kana ruma'!> zi amanan pakutatena' i inmu. 27'alrana nu meraredek na Alrak na trau mu kamawan kana truli', dika, kemay i lauz palru i zaya venarat semelrap kana lingatr.

28<<na inulid nu kazu i iyan mu, kazu muwazuk na ma'unal na 'adawisan.>>

tu i zazuwa na Alrak na trau

(Maruko 13.24-27; Luka 21.25-28)

29<<nazu na kakuwatrengan na wari nu melavat lra, uwavalis ka'uwaze'uzem na kadaw, 'azi lra sasenan na vulan, na vitu'en uwatrerah kemay i lingatr, na nirekudayan i rukup mu uhiyalrehilr. 30nu azu mu, tu i zazuwa na Alrak na trau nantu kalrazaman uwapana i lingatr. i dare' na 'atayan zi na tratrautrau ziyan tratrangis mapiya; nana'u nazu kana Alrak na trau matemuy za kezang zi lihu muitras kana kutrem i lingatr mulusu zuwa. 31tu lrengaw na patiyupan katamuni maruni, pakarun kana tēnsi mukuwa makaiyaiyan i intaw, kemay kana punapunan i kani palru kana punapunan i kaziyu, puwazuk kanantu pinalimi' na zinekalranan.>>

tu ipanadam na tepur na kawi

(Maruko 13.28-31; Luka 21.29-33)

32<<kipanadam kemay kana tepur na kawi i inmu. na sa'az nu mupana mangidi mera'at na dilrang, temelriyu na ulane' na vira' mu, zi kalrazam mu za raredek lra na derun. 33mararesan, nu mena'u mu kanini na nirekudayan peniya mu kalrazam mu raredek lra na wari#24.33 <<raredek lra na wari>> karuwa marengay za <<raredek lra i intaw>>., ulra lra i sulrasulray. 34piangeru i inmu: na trau kana ziday harem nu 'azi ziyan minatray pakangawayan mu, ini na lremak peniya uri uwapana lra. 35uwalremes na lingatr na dare', mawmu nanku ngay 'azi uwalremes munayun.>>

izu na wari izu na tuki 'azi kalrazam na trau

(Maruko 13.32-37; Luka 17.26-30, 34-35)

36<<kema ta kanizu na uri zazuwa na wari zi na tuki, iniyan za trau za kalrazam; na tēnsi i itras 'azi malrazam; zi na Alrak mu 'azi malrazam#24.36 ulra pidaya awatranan lulun iniyan za <<na Alrak 'azi ziya malrazam>>, mawmau i Ama na malrazam. 37tu raredekan na Alrak na trau kamawan kani Nowa na ziday na mupana na lremak maresan. 38na ngalun 'azi ziyan zuwa a pakangawayan, na trau kemazu mekan tremekel zi mi'azi'azin, palru za musavak kana sudang i Nowa izu na wari; 39penungaw lra nazu, zuwa lra na ngalun, tu lra'udaw nazu mapiya. na Alrak na trau tu i raredek mu maw kemani. 40nu azu mu, zazuwa na kiyakarun i 'uma, na sasa tu i kiyatuluzaw, na sasa muvilin; 41zazuwa a vavayan mukasa mailang, tu i kiyatuluzaw na sasa, na sasa uwavilin. 42semeneng, kasenekin, 'alrana 'azi mu malrazam kani Luzu za raredek nu aidan kana wari. 43piangeru i ini na saya: na ma'izang i ruma' nu malrazam kana male'es zazuwa nu 'aremeng za aidan mu, 'azika'azi kasenekin temaranapaw, 'azi paparivas za 'alrevan kana male'es zi papusavak. 44semeneng, maruwaya mu marayas penadang, 'alranu na Alrak na trau kazu nu 'azi mu parangeranger kana tuki zi maherareher za meredek.>>

na katalrimayan zi na 'azi katalrimayan na pakarunan

(Luka 12.41-48)

45<<nu kemazu mu, i eman na katalrimayan zi misayhuwan 'elrepat na pakarunan awa? mawna pinakarunan kana tawki pailran kana zuma na pakarunan, paturus kana wari panini za aekanan i izu na trau. 46nu muruma' na tawki mu, mena'u kanini na pakarunan kemani kana pakasa za kiyakarunan, ini na pakarunan kemudakuda kana mika'inavayan a! 47penatezelra ku marengay kanmu, pakakarun na tawki kantaw pana'u kana piniemanan peniya. 48mawnu, i intaw nu maw na kuwatreng na pakarunan mu, i intaw kazu kemiangeanger, <kaulra 'azi kadadika muruma' na tawki>, 49zi temengez kana zuma na lralrang, kurelrang kana parakutra na trau mekan tremekel kivangavang semangamangal. 50mawmu kazu za 'azi parangeranger na wari i intaw, kazu za 'azi malrazam i intaw mu, muruma' lra na tawki. 51tu i pakirevay penukepuk i intaw#24.51 <<pakirevay penukepuk i intaw>> karuwa marengay za <<verelranganay pupatraran kantaw>>. na tawki, pukasayaw kana kitu'inavanava na trau kipasavung; kazu i kazu, tratrangis i intaw, pakakaratr za walri.>>

Currently Selected:

Matay 24: TPN

Highlight

Copy