Yohanē 7

i Yēsu zi tu wadiyan

1i likuzan lra kanini na lremak, i Yēsu muwa'ivat i Galili siyo, 'azi muwai mukuwa i Yodaya kana pinidare'an, 'alrana tu yawan na Yodaya maranger pinatray kantaw. 2adalrep lra kana kaazuwan za talraviyaw na wariyan kana Yodaya na trau, 3semeneng tu wadiyan ni Yēsu marengay kantaw: <<uwaday i kani zi uwa i Yodaya lra, mena'uwa nu temakesi kanannu kinakudayan. 4nu maranger za mingadan na trau, zi 'azi maruwa mulrek kikarun. nu maruwa u kikarun kananni na lremak, zi kazuwa i ngawayan kana trau i punapunan kemakuda pana'u!>> (5mawna kemani tu wadiyan 'azi ziyan pakutatena' kantaw.)

6marengay i Yēsu kanazu: <<'azi ziyan penauwa ku wari; mawmu kalre'ayan mu wari marayas. 7na trau i punapunan 'azi awiles kanmu, mawmu awiles kaninku, 'alrana marayas ku marengay papatezelr kanantu paelrangan na kuwatreng nazu. 8uwa i inmu kurelrang kana semasaharan na wariyan mu, 'azi ku auwa harem,#7.8 <<'azi ku auwa harem>> ulra pidaya awatranan lulun vinavalray za <<'aku i awa>>. 'alrana 'azi ziyan penauwa ku wari.>> 9piya marengay i Yēsu kananni na ngay mu kemazu muvilin ziyan i Galili.

i Yēsu kurelrang kana kaazuwan za talraviyaw na wariyan

10a muveruk lra tu wadiyan ni Yēsu i likuzan mu, kemazu i Yēsu mukuwa kurelranga kana semasaharan na wariyan. 'azi kurepana'u za trau zi mupatraran, maw na mulrek mukuwa. 11kana semasaharan na wariyan, tu yawan i Yodaya na trau makaiyaniyan maaya' kani Yēsu, malrazama za ulra i iyan i intaw.

12mazayazayar kantaw kana zinekalranan i savakan, ulra na marengay: <<maw a 'inava na trau i intaw>>; ulra na marengay: <<'azi, pusuwasuwan kana trau i intaw.>> 13mawmu makaud mazayazayar mapiya i panayan kanantu lremak, 'alrana makakaud kanantu yawan i Yodaya na trau.

14a melavat lra za parekazuwa na semasaharan na wariyan, zi mukuwa i Yēsu kana vangesar ruma' panadam kana trau. 15tu yawan i Yodaya na trau salaw pakumelri, marengay: <<'azi ziyan kurelrang kana sinsi ini na trau, kemuda zi mitinakesiyan za kemani awa?>>

16marengay i Yēsu: <<nanku pinanadam amelri ninku, mawna mupana kemay kanizu na pazuwa kaninku. 17na trau nu mianger za miturus kanantu nirangeran na Viruwa i itras mu kalrazam: nanku pinanadam mu zuwa kemay kana Viruwa i itras, zi za maw pakalrang kananku nirengay i inku. 18izu na pakalrang kantaw i intaw zi marengay mu, maw maranger miya' kanantu lalihu i intaw; mawmu izu na maaya' kanantu lihu kanizu na pazuwa kantaw mu, maw na tatena' 'azi venavetra'. 19i Mosē 'azi pana'u pakalrazam kanmu kana kuret ziyamaw? mawmu iniyan za sasa kanmu za miturus kana kuret. kemuda zi maranger mu pinatray kaninku ziyamaw?>>

20temuvang na zinekalranan: <<ulra tu palraraw u, i eman na marenger pinatray kannu?>>

21marengay i Yēsu: <<kana katalaulepan na wari kemakuda ku za saya ma'izang na lremak, pakumelri mu mapiya. 22mawmu patalru i Mosē kanmu kana kakuwayanan za kikeret (tatena' mu na kakuwayanan za kikeret amelri kemay kani Mosē, mawna kemay kananmu temuwamuwan kemirakaz), zi kazu mu kana katalaulepan na wari mikakuwayanan za kemeret kana vu'enin. 23na trau anu kazu kana katalaulepan na wari mikakuwayanan za kemeret mu, tu pauwayan mu iya'elaw kanantu kuret ni Mosē, nu kemazu mu, kazu ku kana katalaulepan na wari paka'inava za trau mareveliyas dalikedik lra, kemuda zi masaselru mu ziya kaninku? 24amanan mena'u i panayan zi kemuret za pamaw zi za pamelri, paturusanay kana paresaresan penatezelr na vakesiyu kemuret mu pamaw.>>

mawna i Kiristo i intaw?

25ulra papida i Yērusalem na trau marengay: <<i ini na trau amelri tu kinaranger pinatray nanta yawayawan ziyamaw? 26na'uwi, venavati kana trau i ngawayan, kemuda zi iniyan a trau za mupana veneliyas! maw lra nay nazu za tatena' malrazam kantaw za maw i Kiristo? 27mawmu a mupana i Kiristo mu, iniyan za trau kalrazam kantaw za zuwa kemay i iyan, zi ini na trau patulre'ay mi malrazam kanantu pinakalrangan.>>

28a azu, i Yēsu kazu kana vangesar ruma' panadam kana trau, kematamuni marengay i intaw: <<tatena' mu za malrazam kaninku, malrazam za zuwa ku kemay iyan? zuwa ku, amelri pakalrang kananku niranger. na pazuwa kaninku izu na sasa mu maw a tatena'. 'azi mu malrazam kantaw, 29mawmu malrazam ku kantaw; 'alrana zuwa ku kemay kantaw i kazu, maw i intaw na pazuwa kaninku.>>

30kemazu zi. nazu maranger 'emevang kantaw, mawmu iniyan a trau za 'emevang, 'alrana 'azi ziyan meredek tu wari. 31na zinekalranan i savakan ulra kazuwan na pakutatena' lra kantaw, marengay nazu: <<nu zuwa i Kiristo mu parasazu kanini na trau tu pinupana na karepalripalri ziyamaw?>>

na ki'alra'alra 'emevang kani Yēsu

32a kinger na Palisay na trau kana zinekalranan za mazayazayar kanantu lremak ni Yēsu mu, nazu zi na ma'izang na rahan pakarun kana ki'alra'alra mukuwa 'emevanga kani Yēsu. 33marengay i Yēsu: <<ulra ziya lriketri ku wari mukasa kanmu, zi uwaveruk ku mukuwa kanizu na pazuwa kaninku i kazu. 34aaya' mu kaninku, mawmu 'azi mu pakaaya'; 'alrana ku auwayan mu, 'azi mu pakauwa.>>

35tu yawan na Yodaya na trau marekiumaumalr: <<maranger mukuwa i iyan i intaw, zi 'azi ta pakaaya'? kamelriya lra auwa i intaw kana kuretepi' i Gilisiya na kazekalran kana Yodaya na trau i kazu panadam kana Gilisiya na trau ziyamaw? 36tu nirengay <aaya' mu kaninku, mawmu 'azi mu pakaaya'> zi <ku auwayan, 'azi mu pakauwa> a eman tu pauwayan ini na ngay awa?>>

na verelruwan za vaaw na zanum

37talikuzakuzan kana semasaharan na wariyan mu maw marapazangal zi kina'izang na saya wari. matikezir i Yēsu, kematamuni marengay pakalrazam: <<nu 'aw lra na trau mu, zuwaya kaninku i kani 'emawa. 38marengay i Sēsiyo: <na pakutatena' kaninku na trau mu ulra na verelruwan a vaaw na zanum kemay kanantu anger mupana.#7.38 <<nu 'aw lra na trau mu ... mupana>> karuwa marengay za <<na i 'a'aw na trau mu, alamu i kani kaninku; na pakutatena' kaninku mu, alamu 'aw. marengay na Sēsiyo: <ulra na verelruwan a vaaw na zanum kemay kanantu anger mupana> >>.> >> 39marengay i Yēsu kanini na ngay maw kema kana pakutatena' kantaw na trau uri kiyatuluz kana Vangesar Lu'em. a azu na Vangesar Lu'em 'azi ziyan mulusu, 'alrana 'azi ziyan kipulihu i Yēsu.

na zinekalranan mureha kani Yēsu maziyakuzikul

40na zinekalranan i savakan kazuwan na kinger lra kanini na ngay, zi marengay: <<tatena' maw izu na patralritralri ini na trau!>>

41kemazu ulra a trau marengay: <<maw i Kiristo i intaw!>>

ulra zuma a trau marengay: <<i Kiristo kemuda zi zuwa kemay i Galili? 42'alrana vinavalrayan i Sēsiyo: i Kiristo maw temuwan ni Davidē, piyaalraken kanantu zekalr ni Davidē i Bētlēhēm.>> 43kemazu zi mureha kani Yēsu na zinekalranan maziyakuzikul. 44ulra a trau maranger 'emevang kantaw, mawmu iniyan a trau za 'emevang.

'azi pakutatena' kani Yēsu na yawan i Yodaya na trau

45na ki'alra'alra muveruk mukuwa kirepana'uwa kana ma'izang na rahan zi na Palisay na trau; kiyumalr kana ki'alra'alra nazu: <<kemuda zi 'azi murung kani Yēsu zuwa awa?>>

46temuvang na ki'alra'alra: <<iniyan ziya za trau kamawan kantaw kemazu venavati!>>

47marengay na Palisay na trau: <<ki'uli'ulid mu lra kantaw ziyamaw? 48kamelriya lra ta yawan zi na Palisay na trau ulra na pakutatena' kantaw ziyamaw? 49nanni na 'azi malrazam kanantu kuret ni Mosē na mapungaw na zinekalranan maw kipapunang!>>

50i savakan kanazu ulra i Nikotēmu; a aziyu ziyan mukuwa lra kirepana'uwa kani Yēsu i intaw. pataranapaw kanazu i intaw: 51<<nanta kuret maruwa za 'azi ziyan kinger za nirarengay zi za patulre'ay malrazam kanantu nirekudayan a pakangawayan mu kemuret za pinamelriyan za trau ziyamaw?>>

52marengay nazu: <<kamelriya lra maw u i Galili na trau ziyamaw? uwa tarena'uwi na Sēsiyo zi kalrazam, 'azi uwapana a patralritralri i Galili#7.52 <<'azi uwapana a patralritralri i Galili>> zuma ulra pidaya awatranan lulun vinavalray za <<iziyu na patralritralri 'azi karuwa wapana kemay i Galili>>..>>

Currently Selected:

Yohanē 7: TPN

Highlight

Copy