Yohanē 20

iniyan za avak na trevelran

(Matay 28.1-8; Maruko 16.1-8; Luka 24.1-12)

1a semavalr kana kasungalan na wari, 'azi ziyan 'idenan, na Motara i Maliya mukuwa i trevelran, mena'u kana sulray na trevelran na varasa' musaninin lra. 2zi pavekas i intaw mukuwa miya'a kani Simon Pētēro zi kanantu kinalraman ni Yēsu na zuma a sasa na temakesi, marengay kanazu: <<ulra a trau kemay trevelran melak lra kani Luzu, 'azi mi malrazam kanazu za meretra'a i iyan kantaw!>>

3i Pētēro zi izu na temakesi mu mukuwa i trevelran. 4marelrang pavekas na zazuwa, mawmu izu na temakesi mara'elrepat pavekas kani Pētēro, iyanguwayan meredek i trevelran. 5mihelrep piyasavak mena'u, mena'u kana muwa na inuwan kazu ziya i kazu, mawmu 'azi musavak i intaw. 6zi i Simon Pētēro kurelrang meredek lra, i intaw patezelr makawang musavak kana trevelran, menau' kana muwa na inuwan kazu ziya i kazu, 7zi mena'u ziya kana iliputr kani Yēsu na himpu 'azi pinukasa kana muwa na inuwan iretra', a nilulun, iretra' i sannin. 8izu na iyanguwayan meredek na temakesi mu kurelrang musavak kana trevelran, a mena'u i intaw mu pakutatena' lra. (9nazu 'azi ziya malrazam na nirengay i Sēsiyo <<'azika'azi marevaaw kemay kana minatray i intaw>> tu pauwayan izu na ngay.) 10kemazu zi na zazuwa na temakesi muveruk lra.

i Yēsu kurepana'u kani Motara i Maliya

(Matay 28.9-10; Maruko 16.9-11)

11i Maliya kazu ziya matikezir kana trevelran i panayan trematrangis. i intaw trematrangis, zi mihelrep piyasavak menana'u kana trevelran, 12mena'u za zazuwa mikavang za vulretri' na tēnsi, kemayan kana niretra'an kana zazek ni Yēsu na kinazuwan, na sasa kazu i tranguru'an, na sasa kazu i kakuyan.

13kiyumalr kani Maliya nazu: <<tainataw, kemuda zi matrangis u?>>

temuvang i intaw: <<nazu tu elakaw ku Luzu, 'azi ku malrazam kanazu za meretra' i iyan kantaw!>>

14marengay lra kanini na ngay mu, marepiles i Maliya, mena'u kani Yēsu kazu matikezir i kazu, mawmu 'azi ziyan malrazam kantaw za maw i Yēsu. 15kiyumalr i Yēsu kantaw: <<tainataw, kemuda zi matrangis u? maaya' u kani eman?>>

i Maliya mianger za mawna mailran kana 'uma na trau kema kantaw, semeneng marengay kantaw: <<sinsi, nu maw i inu na melak kantaw mu, 'alrazi rengayaw ku, nu tra'anay i iyan i intaw, zi maruwaya ku mukuwa melaka kantaw.>>

16i Yēsu venina kantaw: <<Maliya!>>

marepiles i Maliya, temara Hēburu marengay: <<Raboni!>> (tu pauwayan mu maw a <<sinsi>>.)

17marengay i Yēsu: <<ikakezengay ku, 'alrana 'azi ku ziyan mukaitrasan mukuwa kani Amalri. uwa i kaziyu kananku wadadiyan i inu, marengay kanazu: <ukaitrasan ku mukuwa kirepana'uwa kani Amalri, a maw i Temama; mukuwa kirepana'uwa kananku Viruwa i itras, zi mawna nanmu Viruwa i itras.> >>

18kemazu zi, na Motara i Maliya mukuwa marengaya kana temakesi, marengay kantaw za mena'u lra kani Luzu, zi marengay ziya kana ipaparengay ni Luzu kantaw.

i Yēsu kurepana'u kana temakesi

(Matay 28.16-20; Maruko 16.14-18; Luka 24.36-49)

19a kasungalan na wari za 'aremengan, na temakesi ni Yēsu muwazuk mukasa, 'alrevay patulre'ay na 'alrevan, 'alrana makaud nazu kana yawan i Yodaya na trau. a azu, kurepana'u i Yēsu, matikezir i savakan kanazu, marengay: <<kiyalriman kanmu ping-an!>> 20marengay lra kanini na ngay, tu pana'uwanay kanazu kanantu lima zi valava. mena'u lra kani Luzu na temakesi, kasemangalan. 21marengay ziya i Yēsu kanazu: <<kiyalriman kanmu za ping-an! penauwa kamawan kani Amalri za pakarun pazuwa lra kaninku, zi kuwaazu ku pakarun kanmu.>> 22piya marengay kanini na ngay mu, miyup kanazu i intaw, marengay: <<kituluz kana Vangesar Lu'em mu! 23nu melapus mu tu pinamelriyan ni eman, zi uwalapus tu pinamelriyan ni eman; nu 'azi mu melapus tu pinamelriyan ni eman, zi 'azi uwalapus tu pinamelriyan ni eman.>>

i Yēsu zi i Tomas

24a kurepana'u i Yēsu mu, na papulu' zi zazuwa na sito a sasa i Tomas (pu'avalray kani 'idar) 'azi kurekasa kanazu. 25semeneng zuma na temakesi marengay kani Tomas kanantu nina'uwan kani Luzu na lremak.

marengay i Tomas kanazu: <<nu 'azi ku mena'u kanantu pinasekan i lima, zi dikesay kananku tatimus kanizu na pinasekan, dikesay kananku lima kanantu valava, 'azi ku pakutatena'.>>

26pakalikuzan lra za saliyusan, na temakesi kazu ziya muwazuk i ruma', zi i Tomas kazu mukasa kanazu. 'inalrevan, mawmu maherareher za kurepana'u i Yēsu, matikezir i savak kanazu, marengay: <<kiyalriman kanmu za ping-an!>> 27zi marengay kani Tomas i intaw: <<tra'an nu tatimus i kani, na'uwi ku lima, pupanayu ziya nu lima, dikesi ku valava mu! amanan malrivak, pakarasa pakutatena'!>>

28marengay i Tomas: <<ku Luzu, ku Viruwa i itras!>>

29marengay i Yēsu: <<'alrana mena'u u lra kaninku zi pakutatena' ziyamaw? nazu na 'azi mena'u zi pakutatena' mu kemuda kana mika'inavayan a!>>

tu pauawayan ini na valray

30i Yēsu kazu kanantu temakesi i ngawayan pupana ziya a sazu za karepalripalri, mawmu 'azi vinavalrayan kanini na valray i savakan. 31tu pauawayan ini na valray mu mawna pakutatena'a mu#20.31 <<pakutatena'a mu>> ulra pidaya awatranan lulun vinavalray za <<pakutatena'a mu patrutru>>. kani Yēsu za maw i Kiristo, maw Alrak na Viruwa i itras, pawnung pakutatena'a mu kantaw zi kiveray za uwavaawan.

Currently Selected:

Yohanē 20: TPN

Highlight

Copy