Yohanē 13

i Yēsu muras kanantu kuy na temakesi

1a pakangawayan kana palalavat na wariyan mu, i Yēsu malrazam kantaw za kiruwaaday i kani punapunan, mukuwa kani Amalri na wari mu meredek lra. nintawan i intaw lraman kana muravakan ziya kantaw na trau i punapunan, penakasa lraman kanazu i intaw.

2i Yēsu zi tu temakesi a keraravi mu, na palrar tu dikedikesay lra tu anger na Iskaliotē na trau tu alrak ni Simon i Yoda, kemuret kanantu anger meniwan kani Yēsu. 3i Yēsu malrazam kani Amalri za veray lra kana kezang peniya kantaw; i intaw malrazam kanintaw za maw zuwa kemay kana Viruwa i itras, zi uwavelaliyas ziya mukuwa kana Viruwa i itras i kazu. 4marahan i intaw kemay kanantu kinayanan, melapus kanantu kaytu, melak za saya himpu ru'esanay i pulunainan, 5zi 'emilra za zanum i vinetang, kemirakaz muras kanantu kuy kana temakesi, zi itrulay ziya kana himpu pakatrarangtrang. 6a zuwa i ngawayan kani Simon Pētēro mu, marengay i Pētēro: <<Luzu a, auras u kananku kuy ziyamaw?>>

7temuvang i Yēsu: <<ku kinakuda, 'azi u malrazam a harem, kalrazam u lra nu likuzan lra.>>

8marengay i Pētēro: <<'azi ku ka'azi pauras kannu kananku kuy!>>

marengay i Yēsu: <<nu 'azi ku muras kanannu kuy mu, i inu zi i inku 'azi ta lra marekieman.>>

9marengay i Simon Pētēro: <<Luzu a, nu kemani mu, amelri mawmau ku kuy, arusay ku lima zi tranguru' savesavay ku mu!>>

10marengay i Yēsu: <<na menimun lra na trau mu mukirungetr lra i zazek peniya, mawmau auras kana kuy#13.10 ulra pidaya awatranan lulun iniyan za <<mawmau paurasa kana kuy>>.. maw mu na mukirungetr lra, mawmu amelri mukirungetr na kurisaesa.>> (11i Yēsu malrazam lra za i eman na naniwan kantaw, semeneng marengay <<amelri mukirungetr na kurisaesa>>.)

12i Yēsu piya muras kanantu kuy nazu mu, mikaytu, zi mareveliyas mukuwa kanantu kakayanan. kiyumalr i intaw kana temakesi: <<ku kinakuda kanmu a haremay mu, malrazam mu ziyamaw? 13kemaira temu sinsi mu kaninku, temu Luzu, pamau i ini, 'alrana a maw ziya mu maw ku. 14maw ku nanmu Luzu, nanmu sinsi, arusay za muras ku kananmu kuy, i inmu kemaniya mu marepaurauras i kuy. 15muramawan ku kanmu patikezir za iyaturusan lra, ku i paruveli kanmu kemakuda mu iturusi kemakuda i inmu. 16penazangala ku marengay kanmu, na kuli 'azi marama'izang kana tawki, na pinakarun kuwaazu 'azi marapazangal kana pakarun kantaw na trau. 17nu malrazam lra kanini na lremak, nu maruwa mu miturus mu kemuda kana mika'inavayan a!

18<<ku ngay i ini amelri mararengay kanmu mapiya, malrazam ku kananku pinalimi' na trau. mawmu marengay kana Sēsiyo <izu na mekan kananku maderu na trau mu karuwaruwa tremapi'i kaninku> ini na ngay 'azika'azi mula'esi. 19'azi ziyan mupana na lremak a pakangawayan mu marengay ku kanmu, muramawan nu mupana na lremak mu maruwaya mu pakutatena' kaninku za maw izu na <taw ku na kazu lra zi kazu munayun>. 20penazangala ku marengay kanmu, na temara ziya kananku pinakarun mu, mawna temara kaninku; na temara ziya kaninku mu, mawna temara kanizu na pakarun kaninku.>>

putralri marengay i Yēsu uri kinaniwan

(Matay 26.20-25; Maruko 14.17-21; Luka 22.21-23)

21a marengay i Yēsu kanini na ngay mu, salaw nana i anger, zi marengay pakalrazam: <<penazangala ku marengay kanmu, kanmu i savak ulra a sasa naniwan kaninku.>>

22marepana'una'u na temakesi, 'azi malrazam kantaw za mararengay kani eman. 23na temakesi i savakan ulra a sasa kinalraman ni Yēsu, kemayan i trapingiran kani Yēsu. 24i Simon Pētēro pakalrazam kantaw, marengay: <<kiyumalri i intaw za mararengay kani eman.>>

25kemazu zi izu na temakesi mudalep kani Yēsu, kiyumalr kantaw: <<Luzu a, i eman?>>

26temuvang i Yēsu: <<temimus ku za saya na pang veray kani eman mu, maw lra i eman.>> marengay kanini na ngay, melak za saya kana pang temimus i intaw, temuluz veray kana Iskaliotē na trau i Simon tu alrak i Yoda. 27a kituluz kana pang i Yoda, zi na satang musavak kantaw. marengay i Yēsu kantaw: <<nu kakudayan, anamuni kemakuda lra!>> 28na kazu ziya na trau mapiya 'azi malrazam tu pauwayan na nirengay ni Yēsu kantaw. 29'alrana maw na demadikes kana paisu i Yoda, ulra na temakesi kema za kaulra pakarun i Yēsu kantaw mukuwa tremima'a za eman nu semasaharan na wariyan, zi za paurung kantaw za eman mukuwa paniniya kana kalramalraman na trau.

30a mekan lra i Yoda kanizu na pang, payas mupatraran. a azu mu penauwa za 'aremeng.

na vekal na seratr

31a mupatraran i Yoda mu, marengay i Yēsu: <<harem kipulihu lra na Alrak na trau; tu lihu na Viruwa i itras kemazu kazu kurena'u i zazek kana Alrak na trau. 32nu kemazu na Viruwa i itras pakalrang kana Alrak na trau pakurena'u kanantu lalihu, i intaw kuwaazu pakurena'u kanantu lihu kana Alrak na trau, pawnung payasaw pulihu kantaw. 33lralrak a, i inku zi i inmu ta uwakasayan na wari 'azi lra tatelraw. uri aaya' mu kaninku; mawmu rarengay ku kanmu harem, kamawan kananku nirengay kana yawan i Yodaya na trau: <nanku auwayan, 'azi mu pakauwa.> 34veray ku kanmu za saya a vekal na seratr: parekalramalraman. kemuda ku lraman kanmu mu, kemudaya mu marekalramalraman. 35nu marekalramalraman mu mu, na trau i punapunan zi kalrazam za ninku mu temakesi.>>

putralri marengay i Yēsu 'azi pakanumaw i Pētēro kani Luzu

(Matay 26.31-35; Maruko 14.27-31; Luka 22.31-34)

36i Simon Pētēro kiyumalr kani Yēsu: <<Luzu a, auwa u i iyan?>>

temuvang i Yēsu: <<ku auwayan, harem 'azi u karuwa kurelang kaninku mukuwa, mawmu i likuzan lra kuwarelrang u kaninku mukuwa.>>

37marengay i Pētēro: <<Luzu a, kemuda zi 'azi ku karuwa kurelrang kannu mukuwa harem? muwai ku muramawan kannu gisē!>>

38marengay i Yēsu: <<muwai u muramawan kaninku gisē ziyamaw? penazangala ku marengay kannu, pakangawayan za maruni na terukuk mu, paretatelun u 'azi pakanu malrazam kaninku.>>

Currently Selected:

Yohanē 13: TPN

Highlight

Copy