Sito 8
8
1na pinatray kani Setifan ini na lremak mu, muwai paturus i Sawlo.
i Sawlo kemuwatreng kana kiyokay
kemay kanizu na wari, na kiyokay i Yērusalem kipakakuwatreng za salaw pakirev. pakazuma kana sito, na ulra ziya na sinziya maretepi'tepi' mukuwa i Yodaya zi Samaliya kana pinidare'an. 2ulra a penakasa penatezelr na trau tremevelr kani Setifan lra, pawnung trematrangis pakirev kantaw.
3a azu, pakakawang i Sawlo pakakuwatreng kana kiyakarunan i kiyokay; makaruma'ruma' 'ema'evang kana ma'inayan na vavayan na sinziya, imengaw i imengan nazu.
na fukuing mupalenak palru i Samaliya
4nazu na mutepi' na sinziya mukuwa i iyan ziya palenak kana fukuing. 5i Filip mukuwa i Samaliya, venavati kana i kazu na trau palenak kanantu lremak ni Kiristo. 6na zinekalranan ra'emetr penakasa kiyaanger kanantu iyarengay ni Filip. nazu kiyangkinger, zi menana'u kanantu pinupana na karepalripalri. 7ulra kazuwan na kipalrar, nazu na palrar kematamuni 'emuy'uy, kemay kanantu zazek nazu mupana; ulra ziya kazuwan na mutuwalre'ap, na matripu' mu kipaka'inava lra mapiya. 8misemangalan i Samaliya na kazekalran.
9ulra sasa a trau, mingadan kani Simon, tu pinalisi kazu lra mukalrazam kana zinekalranan i Samaliya. zi salaw matras i intaw; 10i kazekalran na marekamelrimelri na trau ziyan temarakinger kanantu ngay. marengay mapiya: <<ini na trau ulra tu kezang kana Viruwa i itras, maw <na mikezang za ma'izang>.>> 11'alrana i intaw sawariyan lra penalisi pazelengan kanazu, semeneng mukinger kantaw nazu. 12mawmu, kana pakutatena' lra tu ipalenak ni Filip na kireeman pinitrepa mikezang kana Viruwa i itras na fukuing zi ngadan ni Yēsu Kiristo mu, na ma'inayan na vavayan kisuwap lra mapapiya. 13i Simon pakutatena' lra i intaw; i intaw a kisuwap lra i likuzan mu marayas mukasa kani Filip, mena'u kanantu kinakudayan na ma'izang zi pakumelri na karepalripalri, salaw maherareher.
14na kazu i Yērusalem na sito kinger kana Samaliya na trau kituluz kanantu vati na Viruwa i itras, zi pakarun kani Pētēro zi Yohanē mukuwa kanazu i kazu. 15a meredek na zazuwa, zi paruveli kiyanun kana sinziya, karuwayan kituluz kana Vangesar Lu'em nazu. 16'alrana a azu na Vangesar Lu'em 'azi ziyan meredek kanazu i savakan kani eman; mawmau pakalrang za ngadan ni Luzu i Yēsu kisuwap nazu. 17kemazu zi i Pētēro zi Yohanē 'emaperez kanazu, zi kituluz lra kana Vangesar Lu'em nazu.
18i Simon mena'u kana ki'aperez kana sito na trau mapiya tu redekay lra kana Vangesar Lu'em, zi melak za paisu veray kana sito, 19marengay: <<'alrazi verayay ku kanini na kezang, maruwaya ku 'emaperez kani eman, zi tu redekay i eman kana Vangesar Lu'em.>>
20mawmu marengay i Pētēro kantaw: <<i inu zi nannu paisu ukasa matrepu a! maruwaruwa u maaulrang mianger za karuwayan tremima' kanantu iputrepa na Viruwa i itras! 21'azi u kipalrang kananiyam kiyakarunan; 'alrana kazu i ngawayan kana Viruwa i itras, 'azi penatezelr nu piniangeran. 22semeneng, uwasalr pakavekalr i inu, uwaday kana pimamelri kuwatrengan, kiyami kani Luzu za kiyalapusan kanannu kemani na nirangeran. 23malrazam ku mena'u kannu za kidadikus u kana sepelran, mudadikus kana pinamelriyan.>>
24i Simon marengay kani Pētēro zi Yohanē: <<'alrazi kiyanunay ku kani Luzu, nanmu niyarengay na lremak 'aziya mupana kaninku i zazek.>>
25i Pētēro zi Yohanē uwasay lra i kazu, venavati kanantu vati ni Luzu, zi muveruk mukuwa i Yērusalem. a muwaveruk i dalan mu, kazu i Samaliya kana zazekazekalr palenak za fukuing nazu.
i Filip zi na niraikan na pakarunan i Ēsopiya
26ulra a tēnsi ni Luzu a sasa marengay kani Filip: <<kasikasik piyakedet kemakawang, uwa kanizu na kemay Yērusalem na makuwa i Kasa na dalan.>> (ini na dalan mu iretra' 'azi inaalrang lra.#8.26 <<ini na dalan mu iretra' 'azi inaalrang lra>> karuwa marengay za <<ini na dalan mu melavat za alalas>>.) 27-28zi i Filip masikasik mukuwa. kazu i dadalan, kiretrevung za sasa a niraikan na pakarunan i Ēsopiya. maw a kiyakarun za atras i sēhu ini na trau, kazu i Ēsopiya kana yawan na vavayan i Kantakē demadikes za piniemanan. mukuwa i Yērusalem semungala kana Viruwa i itras; a muwaveruk lra i dadalan, kemayan i itras kanantu palizing maip kana valray ni Isaya na patralritralri. 29na Vangesar Lu'em marengay kani Filip: <<uwa i inu, kakawang udalrep kanizu na palizing.>> 30pavekas mukuwa i Filip, kinger kana niraikan na pakarunan maip kanantu valray ni Isaya na patralritralri, zi kiyumalr kantaw: <<nannu inaip, malrazam u?>>
31temuvang i intaw: <<nu 'azi ulra a trau panadam, kemudaya ku malrazam?>> kemazu zi tu arelrayaw i Filip papuitras kana palizing, mukasa kantaw kemayan. 32nantu inaip izu na vati na Sēsiyo maw:
i intaw kamawan za saya takulris kinezeng mukuwa tremuwaka,
kamawan za kazu i lima kana hemararetim za humulr za saya siri na trau mapeng 'azi pulrengaw;
mararesan, i intaw 'azi pupana za saya ngay.
33semaseker kitariyaeman i intaw;
iniyan za trau paruveli kantaw marengay papatezelr,
zi iniyan za trau maruwa marengay kanantu trungutrungulran,
'alrana nantu uwavaawan i punapunan paalru lra.
34na niraikan na pakarunan kiyumalr kani Filip: <<'alrazi panadamaw ku, ini tu ngay na patralritralri mararengay kani eman? maw mararengay kantaw i intaw ziyamaw, aulra mararengay kana trau?>> 35zi marengay i Filip, kemay kanini na Sēsiyo kemirakaz, venavati marengay kantaw za kireeman kana fukuing ni Yēsu. 36makalrang za saya a kinazuwan nazu, i ngaydiran kana dadalan ulra a zanum, marengay na niraykan na pakarunan: <<ulra a zanum i kani, kararuwa ku kisuwap i kani ziyamaw?>>#8.36 ulra pidaya awatranan lulun puwayay za 37 vatras <<marengay i Filip kantaw: <anu pakutatena' nu anger mu, karuwa u kisuwap.> temuvang i intaw: <pakutatena' ku nintu Alrak na Viruwa i itras i Yēsu.> >>
38na niraikan na pakarunan patalru paziyazi kana palizing; i Filip salrangan kantaw mulusu kana zanum i savakan, zi semuwap kantaw. 39a mukaitrasan kana zanum nazu mu, tu Lu'em ni Luzu tu urungaw muveruk i Filip; na niraykan na pakarunan zi 'azi lra mena'u kantaw. patrutru mahelrahelr makawang i intaw, matemuy za semangalan i anger. 40i likuzan lra ulra a trau kazu i Azotus kiretrevung kani Filip; paketrepay kemakawang i kazu na kinazuwan i intaw, kazu i makazekazekalr palenak kana fukuing, palru za zuwa i Kaysaliya.
Currently Selected:
Sito 8: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023