Sito 6

papitu na puwalrang

1kananni na wari, tu pinitrawan na temakesi marekakazuwan kana wariwari; nazu na mararengay kanantu ngay na Gilisiya i Yodaya na trau zi na mararengay kana kangayan na Hēburu i Yodaya na trau maziyakuzikul. na temara Gilisiya na Yodaya na trau mu 'ilrames kana sito nu panini kana wariwari na kavaawan na lremak mu, tu kalalupay lra i savakan na inavangalr nazu. 2mawna kemani, na papulu' zi zazuwa na sito parazuk kana temakesi mapiya, marengay kanazu: <<tra'an na kiyakarunan na palenak kana vati na Viruwa i itras kema kaniyam, uwa kikarun kana aekanan, ini 'azi penauwa za pauwayan. 3semeneng, na 'ali'an i savak kani Luzu, palimi' kemay kanmu i savakan za papitu kana mingadan na trau, kinatemuy za Vangesar Lu'em, zi misayhuwan ziya na trau, nazu na mizelreng kanini na lremak. 4kema ta kaniyam mu, pakarasa mi kana kiyanun zi palenak za vati na kiyakarunan.>>

5tu pinupana na ngay kana sito muwai paturus mapiya. kemazu mu semukun palimi' kani Setifan mapiya; arekez tu pakutatena'an i intaw, kitemuy kana Vangesar Lu'em na trau; zi palimi' ziya kani Filip, Porokorus, Nikanor, Timon, Parmēna, zi na muasalr musavak lra kana Yodaya na kiyo i Antiok na trau i Nikolaus. 6'alrazi katikezir i ngawayan kana sito kema mapiya; a piya kiyanun na sito, zi demikes za lima na kakuwayanan kanazu.

7tu vati na Viruwa i itras patrutru mupalenak; na kazu i Yērusalem na temakesi puwapuwa lra kazuwan tu pinitrawan, kazuwan na rahan kemazu kituluz lra kanini na singko.

ki'evang i Setifan

8i Setifan matemuy kana Viruwa i itras tu iputrepa zi kezang, kazu kana zinekalranan pupana za ma'izang a kirekamelri na lremak zi na karepalripalri. 9mawmu ulra a trau semuveli kantaw; nanni na trau mu maw na kinuwa za <<muvuwar na trau>> na waazukan ruma' na sevang, muravakan kemay Kulinay zi na zuwa kemay Alisanta i Yodaya na trau. nazu zi na zuma kemay Kilikiya zi i Asiya zuwa na Yodaya na trau maretatuvang kani Setifan. 10na Vangesar Lu'em veray za sayhuwan kani Setifan, semeneng nazu 'azi maruwa kemudakuda kanantu nirengay. 11kemazu zi nazu pulravatr za trau venavetra' kokso kantaw marengay: <<kinger mi kanini na trau marengay lra za ngay kemuwatreng kani Mosē zi semiri kana Viruwa i itras!>> 12nazu melak kana kemani pusuwasuwan kana zinekalranan, ciyoro, zi na sinsi kana Sēsiyo. zuwa miya'a kani Setifan nazu, 'emevang kantaw, murung kantaw mukuwa i gikay. 13tu pinulravatran na mavetra' na uwasay na trau mupana marengay: <<ini na trau marayas marengay semuveli kananiyam vangesar ruma' zi na kuret ni Mosē. 14kinger mi kantaw za marengay ini na Nazalē na trau i Yēsu aivas kana vangesar ruma', maasalr kana ipalenak kaniyam ni Mosē na kakuwayanan ziya!>> 15na kazu kemayan i gikay na trau ziya mu tremeketrek menana'u kani Setifan, mena'u kanantu mudingan kamawan za mudingan na tēnsi.

Currently Selected:

Sito 6: TPN

Highlight

Copy