Sito 18
18
kazu i Kolinto
1i likuzan lra, muwaday i Atēn i Pawlo, zuwa i Kolinto. 2kazu i kazu kiretrevung za pinialrak i Pontus a Yodaya a trau, mingadan kani Akila, maw ziyan marelrang kanantu 'azin i Puriskila kemay Italiya zuwa, 'alrana Hongti i Roma i Kelawti semeratr kana Yodaya na trau ziya puwaday i Roma. i Pawlo mukuwa mena'uwa kanazu, 3muvilin kurekasa kikarun kanazu; 'alrana i Pawlo muvaaw za demadaway za kupang, maresan tu kiniyakarun nazu. 4kana katalaulepan ziya na wari, mukuwa i waazukan ruma' i Pawlo, kimatatuvang kana trau, temuru kana Yodaya na trau zi Gilisiya na trau za pakutatena'an.
5i Sila zi i Timotē kemay i Makidoniya zuwa mu, kana wariwari ziya i Pawlo venavati za vati, tremepa kana Yodaya na trau wasay kani Yēsu maw i Kiristo. 6mawmu, nu semuveli nazu kantaw, kemuwatreng za ngay kantaw mu, tu trerevikaw na trevulr kana kavang, zi marengay kanzu: <<anu matrepu mu, na pinamelriyan iniyan kaninku, pizelrengu inmu! kemay harem na wari, auwa ku kana sizumayan na trau lra.>> 7kemazu zi muwaday i Pawlo kanazu, mukuwa kikazuwa tu ruma' sasa za kemaira kemakaud kana Viruwa i itras, mingadan kani Titius Yustus, tu ruma' adalrep kana waazukan ruma'. 8na ma'izang i waazukan ruma' i Kerispus zi tu niruma'enan pakutatena' lra kani Luzu; zi ulra ziyan kazuwan na Kolinto na trau kinger kana vati mu pakutatena' lra, pawnung kituluz zi kisuwap.
9ulra saya karauvan, kiredek i Pawlo za kirekamelri za nirekudayan. marengay i Luzu kantaw: <<ikakaud, pakasa marengay, ikaapeng. 10kurekasa ku kannu, iniyan za trau kararuwa kemuwatreng kannu, pawnung kanini na kazekalran ulra a kazuwan nanku zinekalranan.>> 11kazu i kazu i Pawlo za sa'ami mikazuwa za nanema vulan. nantu vati na Viruwa i itras tu panadam kanazu.
12a mutu sotok i Galiyo kana Akaya mu, na Yodaya na trau muwazuk temengez kani Pawlo, tu kezengaw intaw mukuwa i hoing, 13kokso kantaw: <<ini na trau pusuwasuwan panadam kana 'azi penauwa za kuret na kudayan sasungal kana Viruwa i itras!>>
14uri rarengay i Pawlo mu, i Galiyo marengay kana Yodaya na trau: <<ini lremak nu maw a pazalin awlra pamelri za kuret, kuwaazu ku semaseker kinger kanmu; 15nu maw kemazu na pinasakisakiyan anu maw nanmu kuret a pidaya vinavalray ipungadan, uwa i inmu papatezelru mu. 'azi ku wawai sayvang kana kemani na lremak!>> 16kemazu zi tu vawiyaw nazu pupatraran i hoing 17na mapapiya tu pingitraw nantu ma'izang kana waazukan ruma' i Sostēnēs, kazu i ngawayan kana hoing tu kelralrevengaw intaw. ini na lremak 'azi tu pilingawi ni Galiyo.
i Pawlo mareveliyas i Antiok
18i Pawlo zi na sinziya kazu ziya i Kolinto za pidawariyan, kemazu zi muwaday kanazu, salrangan kana Puriskila zi Akila muitras za sudang mukuwa i Siliya. pakangawayan masikasik mu, i intaw a kazu i Kēnkerēa tu heretimaw tu 'arevu, 'alrana kiyanun lra za kiyalriman. 19meredek i Ēpēso nazu, kazu i kazu, kiruwaday kani Puriskila zi Akila i Pawlo, mukuwa kana waazukan ruma' kimatatuvang kana Yodaya na trau i intaw. 20venavilin kantaw pikazu za pidawariyan nazu, mawmu 'azi temuvang i Pawlo. 21a kiruwaaday mu, marengay kanazu i intaw: <<nu maw tu nirangeran na Viruwa i itras mu, kavelaliyas ku ziyan zuwa kani kanmu.>> kemazu zi kemay i Ēpēso ziya muitras za sudang i Pawlo.
22meredek i Kaysaliya i Pawlo, zi mukuwa i Yērusalem mena'uwa kana kiyokay, zi mukuwa i Antiok. 23kazu i kaziyu kazekazu ziya pidawariyan zi muveruk. kemipiya mu'ivat lra i Kalatiya zi Fulika pinidare'an i intaw, pakaarekezaw tu i pakutatena'an na temakesi makaiyaiyan ziya.
kazu i Ēpēso zi Kolinto i Apolos
24ulra a Yodaya na trau mingadan kani Apolos, zuwa i Ēpēso. pinialrak i Alisanta i intaw, maw na sayhu venavati a trau, salaw misayhuwan kana Sēsiyo. 25i intaw kazu kanantu tinuzu' ni Luzu na dalan, kipatakesi lra za salaw asavak, zi pakasa tu anger, marayas penatezelr pakalrazam za trau tu lremak ni Yēsu. mawmu, mawmau malrazam kanantu sinasuwap ni Yohanē. 26kazu kana waazukan ruma' 'uringetr venavati i Apolos; i Puriskila zi i Akila a kinger lra, zi tu daulraw mukuwa i ruma' kantaw, marapatulre'ay venavati tu dalan na Viruwa i itras. 27likuzan lra mu kemuret za auwayan kana Akaya i Apolos, na sinziya i Ēpēso tu puwalrangay i intaw, patigami kana temakesi i Akaya, zi demaulr kanazu kiyatrevung kantaw. meredek lra kazu i intaw, nazu na kipuwavut pakutena' kani Luzu na trau mu salaw ma'izang tu kinipuwalrang. 28marayas kazu i lawas na kinazuwan mu mikezang kimatuvatuvang kiseker lra kana Yodaya na trau, kurelranganay kana Sēsiyo uwasay kani Yēsu maw i Kiristo.
Currently Selected:
Sito 18: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023