Лебийлиле 7
7
Терслик ючюн къурманны юсюнден башха жорукъла
1Ма терслик ючюн къурманны юсюнден адет. Ол – бек сыйлыды. 2Терслик ючюн къурманны толусунлай кюйдюрюлген къурманны союучу жерде этерге тийиншлиди. Аны къанын къурман жерни тёрт жанындан бюркерге керекди. 3Къурманнга аны битеу жауун: къуйругъун бла ич хантхыларыны юсюндеги жауну, 4эки бюйрегин бла аладагъы жауун, бутларыны юслериндеги жауларын эм баууруну жауун – айырып келтирсин. 5Дин къуллукъчу аланы Раббийге отда кюйдюрюлген къурманнга къурман жерни юсюнде кюйдюрсюн. Бу – терслик ючюн къурманды. 6Дин къуллукъчуну юйюрюнде хар эр киши аны ашаргъа эркинди. Аны сыйлы жерде ашаргъа керекди. Ол – бек сыйлы затды.
7Гюнях ючюн къурманнга да, терслик ючюн къурманнга да адет бирди: ала, аланы юсю бле тазалау этген дин къуллукъчуну юлюшюдюле. 8Дин къуллукъчу биреу толусунлай кюйдюрюлген къурманын келтиргенде, къурман малны терисин кесине къойсун. 9Печьде неда чоюнда, неда табада биширилген хар ётмек саугъа, аны келтирген дин къуллукъчуну юлюшю болсун. 10Зейтун жау къатышдырылгъан неда къуру болгъан хар ётмек саугъа уа битеу Харунну уланларына тенг юлешинсин.
Саламатлыкъ къурманны юсюнден башха жорукъла
11Ма Раббийге келтирилген саламатлыкъ къурманны юсюнден адет.
12Биреу аны Аллахха шукур этер магъанада келтирсе, ол адам шукур къурман бла бирге зейтун жау бла басылгъан ачымагъан ётмекле да, зейтун жау жагъылгъан ачымагъан халыула да, зейтун жау бла иги басылгъан бидиш ундан этилген ётмекле да келтирсин. 13Саламатлыкъ шукур къурман бла бирге ол адам, саугъагъа, мысты гюттюле#7:13 Гюттю – табада неда кюлде бишген гитче гыржынчыкъ; орус. лепёшка. да келтирсин. 14Ол Раббийге саугъагъа ётмеклени хар тюрлюсюнден бирерин келтирсин. Бу – саламатлыкъ къурманны къанын бюркген дин къуллукъчуну болсун. 15Саламатлыкъ шукур къурманны этин келтирилген кюн окъуна ашаргъа керекди, аны эрттенликге дери къояргъа жарамайды.
16Биреу къурманны нюзюр этгени себепли неда кеси ыразылыгъындан келтирсе, ол къурманны келтирген кюн ашаргъа керекди, къалгъанын а экинчи кюн да ашаргъа жарарыкъды. 17Къурман эт ючюнчю кюннге къалса, аны кюйдюрюрге керекди. 18Саламатлыкъ къурманны эти ючюнчю кюн ашалса, ол къабыл болмаз. Ол харам болгъаны себепли, аны келтирген адамгъа къурманы саналмаз. Ол этни ашагъан адам терслигине жууаплы болур.
19Харам затха тийген этни ашаргъа жарамайды, аны кюйдюрюрге керекди. Халал этни, таза болгъан хар адам ашаргъа эркинди. 20Алай а, юсюнде харамлыгъы болгъан бир адам Раббийге этилген саламатлыкъ къурманны этин ашаса, ол жанны ёз халкъындан жокъ этерге керекди. 21Бир адам харам затха: адамны харамлыгъына, харам хайыуаннга неда бир харам жаныуаргъа – тийгенден сора Раббийге этилген саламатлыкъ къурманны этин ашаса, ол жанны ёз халкъындан жокъ этерге керекди.
Малны жауу бла къаны
22Раббий Муссагъа былай айтханды:
23– Исраил улулагъа былай айт:
Тууарны, къойну неда эчкини ич жауун ашамагъыз. 24Ёлген хайыуанны неда жаныуар талагъан хайыуанны жауун хайырланыргъа жарарыкъды, ашагъан а этмегиз. 25Бир адам Раббийге отда кюйдюрюлген къурманнга келтирилген хайыуанны жауун ашаса, ол жан ёз халкъындан жокъ этилир. 26Жашагъан жерлеригизде не къанатлыны, не хайыуанны къанын ашамагъыз. 27Бир адам къан ашаса, ол жанны ёз халкъындан жокъ этерге керекди.
Дин къуллукъчуланы юлюшлери
28Раббий Муссагъа былай айтханды:
29– Исраил улулагъа былай айт:
Раббийге саламатлыкъ къурман этген адам ол къурманны бир кесегин Раббийге саугъагъа келтирирге керекди. 30Ол, кеси къоллары бла, Раббийге отда кюйдюрюлген къурманнга хайыуанны тёшюн бла жауун келтирирге керекди. Ол Раббийни аллында кётюрюлген саугъа болсун. 31Жауну дин къуллукъчу къурман жерни юсюнде кюйдюрсюн, тёш а Харуннга бла аны уланларына болсун. 32Саламатлыкъ къурманларыгъыздан хайыуанны онг бутун дин къуллукъчугъа саугъагъа беригиз. 33Харунну уланларындан саламатлыкъ къурманны къанын бла жауун къайсы келтирсе, анга юлюшге онг бутну беригиз. 34Мен Исраил улуларыны саламатлыкъ къурманларындан кётюрюлген тёшню бла саугъагъа берилген бутну алып, дин къуллукъчу Харуннга бла аны уланларына Исраил уланларындан дайым юлюшге бергенме.
35Харун бла аны уланлары Раббийни аллында дин къуллукъгъа кирген кюнден башлап, бу Раббийге отда кюйдюрюлген къурманладан аланы юлюшлери болсун. 36Ала майланнган кюнден башлап, бу юлюшню Исраил улула алагъа берирге керекдиле, деп буюргъанды Раббий. Бу – тёлюден тёлюге ёмюрлюк жорукъду.
37Толусунлай кюйдюрюлген къурманны, ётмек саугъаны, гюнях ючюн къурманны, терслик ючюн къурманны, дин къуллукъчуланы къуллукъгъа салгъанда къурманны эм саламатлыкъ къурманны юсюнден адет буду. 38Раббий аланы Муссагъа Синай тауда буюргъанды. Ол кюн, Синай къуу жерде, Ол Исраил улулагъа Раббийге къурманла келтирирге буюргъанды.
Currently Selected:
Лебийлиле 7: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
