Лебийлиле 8
8
Харунну бла аны уланларын дин къуллукъгъа салыу
(Чыгъ. 29:1-37)
1Раббий Муссагъа былай айтханды:
2– Харунну бла аны уланларын келтир, аланы кийимлерин, майлау#8:2 Майлау – орус. помазание. жауну, гюнях ючюн къурманнга бир бугъа, эки къочхар эм бир четен ачымагъан ётмек ал да, 3битеу жамауатны Тюбешиу Чатырны эшигини аллына жый.
4Мусса Раббий анга буюргъаны кибик этди да, жамауат Тюбешиу Чатырны эшигини аллына жыйылды.
5Сора Мусса жамауатха:
– Раббий былай этерге буюргъанды, – деди.
6Мусса Харунну бла аны уланларын алгъа чыгъарып, аланы сууда жууундурду. 7Сора Харуннга кёлекни кийдирди, белибауну къысды, тыш кийимни кийдирди, аны юсюне эфодну#8:7 Эфод – ботагъа ушаш, баш дин къуллукъчу киюучю, гетен къумачдан тигилген, сыйлы тыш кийим. кийдирди, эфодну белибауун къысып, эфодну бегитди. 8Аны юсюне ёшюнлюкню салды, ёшюнлюкге уа Урим бла Туммим ташланы#8:8 Урим бла Туммим ташла Аллахны буйругъун билир ючюн хайырланнгандыла. салды. 9Башына сарых байлады, сарыхны аллындан а алтын жасауну, сыйлы тажны бегитди. Бу, Раббийни Муссагъа буюргъаны эди.
10Сора Мусса майлау жауну алды да, Сыйлы Чатырны бла аны ичиндеги хар затны майлап, сыйлы этди. 11Ол жауну жети кере къурман жерге бюркдю да, аны битеу адырлары бла бирге эм суу орунну аякъ тюбю бла бирге майлап, аланы сыйлы этди. 12Сора майлау жаудан Харунну башына къуюп, майлап, сыйлы этди. 13Сора Мусса Харунну уланларын алгъа чыгъарып, кёлекле кийдирди, белибаула къысды, башлыкъла байлады. Бу, Раббийни Муссагъа буюргъаны эди.
14Сора Мусса гюнях ючюн къурманнга бугъа келтирди. Харун бла аны уланлары къолларын гюнях ючюн къурманлыкъ малны башына салдыла. 15Мусса бузоуну сойду да, къанындан алып, къурман жерни хар мюйюзюне жагъып, аны таза этди. Къалгъан къанны ол къурман жерни тюбюне тёкдю. Алай бла ол, къурман жер таза болур ючюн, аны сыйлы этди. 16Сора битеу ич жауун, бауурну жауун, эки бюйрегин бла аланы жауун алып, Мусса аланы къурман жерни юсюнде кюйдюрдю. 17Бугъа тананы кесин а – терисин, этин эм ич хантхыларын – ол къонушну тышында кюйдюрдю. Бу, Раббийни Муссагъа буюргъаны эди.
18Сора Мусса толусунлай кюйдюрюлген къурманнга къочхар келтирди. Харун бла аны уланлары къолларын къочхарны башына салдыла. 19Мусса аны сойду да, къанын къурман жерни тёрт жанына бюркдю. 20Мусса къочхарны сан-сан этип, башын да, этин да, жауун да кюйдюрдю. 21Мусса, къочхарны ичин бла аякъларын жуууп, саулай къурман жерде кюйдюрдю. Бу – толусунлай отда кюйдюрюлген къурманды, Раббийге жагъымлы ийис берген от къурманды. Бу, Раббийни Муссагъа буюргъаны эди.
22Сора Мусса бирси къочхарны, къуллукъгъа салыу къочхарны келтирди. Харун бла аны уланлары къолларын къочхарны башына салдыла. 23Мусса къочхарны сойду да, къанындан алып, Харунну онг къулагъыны къыйырына, онг къолуну баш бармагъына эм онг аягъыны баш бармагъына жакъды. 24Сора Мусса Харунну уланларын келтирди да, аланы да онг къулакъларыны къыйырына бла онг къолларыны баш бармакъларына эмда онг аякъларыны баш бармакъларына жакъды. Сора Мусса къанны къурман жерни тёрт жанына бюркдю. 25Сора жауну, къуйрукъну, ич жауун, бауурну жауун, эки бюйрегин бла аланы жауун эм онг бутун алды. 26Сора Раббийни аллында тургъан, ачымагъан ётмекле болгъан четенден, бир ачымагъан ётмекни, зейтун жау басылгъан бир гюттюню эм бир халыуну алды да, къочхарны жаууну бла онг бутуну юсюне салды. 27Мусса аланы барын да Харунну бла аны уланларыны къолларына берди да, Раббийни аллында кётюрюлген саугъагъа келтирди. 28Сора Мусса аланы къолларындан алып, толусунлай кюйдюрюлген къурманны юсюнде кюйдюрдю. Бу – дин къуллукъчуланы къуллукъгъа салыр ючюн къурманды, ариу ийис берип, Раббийге жагъымлы ийис берген, отда кюйдюрюлген къурманды. 29Сора Мусса къочхарны тёшюн алды да, кётюрюп, Раббийни аллына кётюрюлген саугъагъа келтирди. Ол, къуллукъгъа салыуну къурман къочхарындан Муссаны юлюшю эди. Бу, Раббийни Муссагъа буюргъаны эди.
30Мусса майлау жауну бла къурман жерни юсюндеги къанны алды да, Харуннга бла аны кийимлерине эмда аны уланларына бла аланы кийимлерине бюркдю. Алай этип, Харунну бла аны кийимлерин эмда аны уланларын бла аланы кийимлерин сыйлы этди.
31Мусса Харуннга бла аны уланларына былай айтды:
– Этни Тюбешиу Чатырны эшигини къатында биширигиз да, аны алайда къуллукъгъа салыугъа жораланнган четенден ётмек бла бирге ашагъыз. Манга: «Аны Харун бла уланлары ашасынла», – деген буйрукъ берилгенди. 32Къалгъан этни бла ётмекни кюйдюрген этигиз. 33Къуллукъгъа салыуну кюнлери толсун деп, жети кюнню Тюбешиу Чатырны эшигини аллындан кетмегиз. Сизни къуллукъгъа салыннганыгъыз жети кюн барлыкъды. 34Бюгюн этилген хар затны Раббий буюргъанды. Ала сизни тазалар ючюн этилгендиле. 35Тюбешиу Чатырны эшигини аллындан кетмей, жети кюнню – кече да, кюндюз да Раббийни айтханын этип туругъуз. Алай этмесегиз, ёллюксюз. Манга аллай буйрукъ берилгенди.
36Харун бла аны уланлары, Раббий Муссаны юсю бла берген хар буйрукъну толтургъандыла.
Currently Selected:
Лебийлиле 8: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
