Лебийлиле 11
11
Халал бла харам
(Эсг. 14:3-21)
1Раббий Муссагъа бла Харуннга былай айтханды:
2– Исраил улулагъа былай айтыгъыз:
Жер юсюнде жашагъан битеу хайыуанладан ашаргъа жараулула ма быладыла. 3Туякълары бёлюннген, неда экиге айырылгъан, кеслери да ышныр этген хар хайыуанны ашаргъа эркинсиз.
4Алай болгъанлыкъгъа, ышныр этген неда туякълары экиге бёлюннген хайыуанладан ма быланы ашамагъыз. Тюени ашамагъыз, нек дегенде, ол ышныр этеди, алай а аны экиге бёлюннген туякълары жокъду. Ол сизге харамды. 5Къая борсукъну ашамагъыз, нек дегенде, ол ышныр этгенликге, аны экиге бёлюннген туякълары жокъду. Ол сизге харамды. 6Къоянны да ашамагъыз, ол да ышныр этгенликге, аны да экиге бёлюннген туякълары жокъду. Ол сизге харамды. 7Тонгузну ашамагъыз, нек дегенде, аны бёлюннген, экиге айырылгъан туякълары болгъанлыкъгъа, ол ышныр этмейди. Ол сизге харамды. 8Бу хайыуанланы этлерин ашамагъыз, ёлюклерине да тиймегиз. Ала сизге харамдыла.
9Сууда жашагъанладан быланы ашаргъа эркинсиз. Тенгизде неда черекде жашагъанладан сиз чабакъ къанатлары бла чабакъ къабукълары болгъанланы ашаргъа эркинсиз. 10Алай а битеу тенгизледе бла суулада жашагъан, чабакъ къанатлары бла чабакъ къабукълары болмагъанладан, сюркелип жюрюгенледен эм аны кибик башха жаныуарладан жийиргенигиз. 11Ала сизге харамдыла. Аланы этлерин ашамагъыз, ёлюклерине да тиймегиз. 12Сууда жашагъанладан чабакъ къанатлары бла чабакъ къабукълары болмагъанлары сизге харамдыла.
13Къанатлыладан а, ма быладан жийиргенигиз, быланы харамгъа санап, ашамагъыз: къушну, сакъаллы къушну, суу къушну, 14мыгъый къушну, бир тюрлю бир илячинни, 15къаргъаны не тюрлюсюн да, 16укуну, кечеги къушну, чарлакъны#11:16 Чарлакъ – орус. чайка., къыртчыгъаны#11:16 Къыртчыгъа – орус. ястреб. бир тюрлюсюн да, 17чорбат къушну, къарабайны, байкъушну, 18акъ укуну, тюзде жашагъан укуну, мыллыкчы къушну, 19чиллеаякъны, бир тюрлю бир къыллеаякъны, байрамжакъны#11:19 Байрамжакъ – орус. удод. эм биттирни ашаргъа жарамайды.
20Учхан да, сюркелген да этген къурт-къумурсханы барысы сизге харамды. 21Битеу учхан неда сюркелген къурт-къумурсхадан жалан да аякълары секирирге жараулуланы ашаргъа боллукъсуз. 22Аладан быланы ашаргъа эркинсиз: мачаланы хар тюрлюсюн, акридлени хар тюрлюсюн, цикадаланы хар тюрлюсюн эм сенгирчгени хар тюрлюсюн. 23Учхан да, сюркелген да этген, къалгъан къурт-къумурсха сизге харамды.
24Ала сизни харамлы этерикдиле. Аланы ёлюклерине тийген адам ингирге дери харамлы болур. 25Аллай ёлюкню къолуна алгъан хар адам кийимин жууаргъа керекди эм ингирге дери харамлы боллукъду.
26Туякълары бёлюннген, алай а экиге аыйрылмагъан, неда кеси ышныр этмеген хайыуан сизге харамды. Анга тийген адам харамлы болур. 27Тёртаякълы хайыуанладан туякъсыз, аякълары бла жюрюгенле сизге харамдыла. Аланы ёлюклерине тийген адам ингирге дери харамлы болур. 28Ёлюклерин къолуна алгъан адам кийимин жууаргъа керекди эм ингирге дери харамлы боллукъду. Бу хайыуанла сизге харамдыла.
29Жер юсюнде сюркелгенледен сизге была харамдыла: агъаз, чычхан, гургунну хар тюрлюсю, 30къаршаякъ#11:30 Къаршаякъ – орус. геккон., самсар#11:30 Самсар – орус. варан., къабыргъа гургун, аякъсыз гургун эм хырбай. 31Битеу сюркелгенледен была сизге харамдыла. Алагъа тийген адам ингирге дери харамлы болур. 32Аладан бирини ёлюгю бир затха тюшсе, ол зат харам болур: агъач сауут болсун, кийим болсун, тери болсун, тулукъ болсун, башха бир тюрлю ишге жараулу зат болсун. Аны суу ичине салыргъа керекди. Ол ингирге дери харам болур, андан сора уа, биягъы, таза болур. 33Быладан бирини ёлюгю топуракъ сауутха тюшсе, саууутну ичиндеги хар зат харам болур. Ол саууутну ууатыргъа керекди. 34Ол сауутну ичиндеги суудан къошулгъан хар бир азыкъ харам болур, ол саууутну ичинде суусап болса да, харам болур. 35Быланы ёлюклери не затха тюшсе, ол зат харам болур. Печь неда ожакъ болса, аланы бузаргъа керекди. Ала харамдыла, ала сизге да харам болургъа керекдиле. 36Алай а шаудан неда къую таза къалырла, ичлеринде ёлюк тийген хар зат а харам болур. 37Ёлюк, салыргъа хазырланнган урлукъну юсюне тюшсе, ол урлукъ таза къалыр. 38Алай а, юсюне ёлюк тюшген урлукъ сугъарылса, ол урлукъ харам болур.
39Эти ашаргъа жараулу хайыуанладан бири ёлгенде, аны мыллыгына тийген адам ингирге дери харамлы болур. 40Хайыуанны ёлюгюнден ашагъан адам кийимин жуусун эм ингирге дери харамлы болур. Ёлюкню алып элтген адам да кийимин жуусун эм ингирге дери харамлы болур.
41Жер юсюнде сюркелген хар зат да сизге харамды. Аны ашаргъа жарамайды. 42Сюркелген затланы ашамагъыз: быдыр юсюнде жюрюген болсун, тёрт аякъ юсюнде жюрюген неда аякълары кёп зат болсун – ала харамдыла. 43Сюркелген затладан жанларыгъызны харамлы этмегиз, аланы юсю бла харамлы болмагъыз. 44Мен – Раббийме, сизни Аллахыгъызма. Кесигизни сыйлы тутугъуз эм сыйлы болугъуз, нек дегенде, Мен сыйлыма. Жер юсюнде сюркелген бир зат бла да харамлы болмагъыз. 45Мен – Раббийме. Сизни Аллахыгъыз болур ючюн, Мен сизни Мисирден чыгъаргъанма. Аны себепли, сыйлы болугъуз, нек дегенде, Мен сыйлыма.
46Хайыуанла, къанатлыла эм сууда бла жер юсюнде жашагъан хар жаныуарны юсюнден адет буду. 47Харамны бла халалны айырыгъыз, эти ашаргъа жараулу хайыуанны бла ашаргъа жарамагъан хайыуанны айырыгъыз.
Currently Selected:
Лебийлиле 11: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
