Жаратылыу 47
47
Фыргъауун Юсюпню жууукълары бла тюбешеди
1Сора Юсюп барып, фыргъаууннга:
– Атам бла къарындашларым Кенанны жеринден къой-эчкилери бла, тууарлары бла эмда битеу мюлклери бла келгендиле. Ма, ала энди Гошенни жериндедиле, – деп билдиргенди.
2Ол къарындашларындан бешисин алгъанды да, аланы фыргъауунну аллына элтгенди.
3Сора фыргъауун аны къарындашларына:
– Ишигиз неди? – деп соргъанды.
– Биз, сени къулларынг, аталарыбыз кибик къойчулабыз, – дегендиле ала. 4Сора дагъыда фыргъаууннга: – Биз бу жерде бираз турур ючюн келгенбиз, нек десенг, Кенанны жерине уллу ачлыкъ киргенди, къулларынгы сюрюулерине да отлау жер жокъду. Ол себепден къулларынга Гошенни жеринде тохтаргъа эркинлик берсенг эди, – дегендиле.
5Сора фыргъауун Юсюпге былай айтханды:
– Санга атанг бла къарындашларынг келгендиле. 6Ма, Мисирни жери сени къолунгдады. Атангы бла къарындашларынгы къыралны эм иги жеринде жерлешдир. Ала Гошенни жеринде жашасынла. Аланы араларында къолларындан келлик адамла барды деп биле эсенг а, аланы мени малыма къош таматала этип сал.
7Сора Юсюп, атасы Якъупну келтирип, фыргъаууннга танытханды. Якъуп фыргъаууннга алгъыш этгенди. 8Фыргъауун Якъупха:
– Санга ненча жыл болгъанды? – деп соргъанды.
9Якъуп фыргъаууннга:
– Мени жолоучулукъда айланнган ёмюрюм 130 жылды. Мени жашау кюнлерим аздыла эм насыпсыздыла, эмда аталарымы жолоучулукъда айланнган ёмюрлерини жылларына жетмегендиле, – дегенди.
10Сора Якъуп фыргъаууннга алгъыш этип, фыргъауунну аллындан чыгъып кетгенди.
11Юсюп атасын бла къарындашларын жерлешдиргенди, фыргъауун буйрукъ этгенча, алагъа Мисир къыралда, жерни эм игисинде, Рамсесни жеринде жер юлюш бергенди. 12Юсюп атасын бла къарындашларын эмда атасыны битеу юйюрюн, сабийлерини санларына кёре, мирзеу бла жалчытып тургъанды.
Ачлыкъ бек къысхан заманда Юсюп Мисирде этген башчылыкъ
13Къыралны бир жеринде да мирзеу жокъ эди. Ачлыкъ бек къысхан эди, Мисирни жери да, Кенанны жери да ачдан къарыусуз болгъан эдиле. 14Юсюп, сатып алгъан мирзеулерини багъасын, Мисирни жеринде бла Кенанны жеринде болгъан битеу ахчаны жыйып, фыргъауунну тоханасына салгъанды. 15Мисирни жеринде бла Кенанны жеринде ахча да тауусулгъанды. Битеу мисирлиле Юсюпге келип:
– Бизге мирзеу бер, биз сени кёз аллынгда ёлюп къалмайыкъ. Ахчабыз тауусулгъанды, – дей эдиле.
16Юсюп алагъа:
– Ахчагъыз тауусулгъан эсе, малыгъызны сюрюп келтиригиз, мен сизге малыгъызны багъасына мирзеу берирме, – дегенди.
17Ала малларын сюрюп Юсюпге келтире эдиле, Юсюп да алагъа, атларыны, ууакъ аякълы мал сюрюулерини, тууар сюрюулерини эмда эшеклерини багъасына мирзеу бере эди. Аланы битеу малларыны багъасына ол жыл аланы мирзеу бла жалчытып тургъанды.
18Ол жыл ётгенде, ала экинчи жыл да анга келип:
– Бийибизден не жашырайыкъ? Ахчабыз тауусулгъанды, мал сюрюулерибиз да бийибиздедиле, – дегендиле. – Санларыбыздан бла жерлерибизден башха, бийибизге берирге бир затыбыз да къалмагъанды. 19Сени кёз аллынгда биз да, жерлерибиз да жоюлуп къалмайыкъ. Бизни да, жерлерибизни да мирзеу багъасына сатып ал. Биз жерлерибиз бла фыргъаууннга къул болайыкъ, сен а бизге урлукъ бер, биз ёлмей сау къалайыкъ, бу жер да бош къалмасын.
20Сора Юсюп битеу Мисирни жерин фыргъаууннга сатып алгъанды. Ачлыкъ мисирлилени асыры онгсуз этгенден, хар бири кеси сабанын сатхан эди. Алай бла жер фыргъауунну мюлкю болгъанды. 21Юсюп халкъны да Мисирни бир къыйырындан бирси къыйырына дери фыргъауннга къул этгенди. 22Дин къуллукъчуланы жерлерин а алмагъанды, нек дегенде, дин къуллукъчулагъа фыргъауундан юлюш тийишли эди эмда ала фыргъауун алагъа берген юлюшлери бла кечинип жашай эдиле. Ол себепден ала жерлерин сатмагъандыла.
23Сора Юсюп халкъгъа былай айтханды:
– Ма, бюгюн сизни да, жеригизни да фыргъаууннга сатып алдым; ма сизге урлукъ, жерге урлукъ себигиз. 24Оргъан заманыгъызда, беш юлюшден бирин фыргъаууннга берип туругъуз; тёрт юлюшю уа, сабанлагъа урлукъ себерге, сизге эм юйдегилеригизге, сабийлеригизге ашарыкъгъа къалсын.
25– Сен бизни жаныбызны къутхардынг, – дегендиле ала. – Бийибизни кёз аллында ыразылыкъ табайыкъ эмда фыргъаууннга къул болайыкъ.
26Сора Юсюп, Мисирни жерини юсюнден бегим этгенди: бюгюннге дери окъуна тирликни беш юлюшден бири фыргъаууннукъуду, жаланда дин къуллукъчуланы жерлеринде ёсген тирликден фыргъаууннга зат келмейди.
Якъупну ахыр тилеги
27Исраиллиле Мисир къыралда, Гошенни жеринде жашап тургъандыла. Ол жерге ие болуп тургъандыла; жайылып, бек кёп болуп баргъандыла.
28Якъуп Мисирни жеринде 17 жыл жашагъанды. Аны жашау жыллары 147 жыл эди. 29Исраилни ёлюр ууахтысы жууукълашхан заманда, ол, уланы Юсюпню чакъырып, анга былай айтды:
– Сени кёз аллынгда ыразылыкъ тапхан эсем, къолунгу мени бутуму тюбюне салып, сен манга ахшылыкъ эм кертилик этип, мени Мисирде асырамазлыгъынга ант эт. 30Мен аталарымы къатларында жатайым, мени Мисирден чыгъарып, аланы къабыр орунларында асырарса.
– Сен айтханча этерме, – деди анга Юсюп.
31– Манга ант эт, – деди Якъуп.
Сора Юсюп анга ант этди. Исраил а жатхан жерини баш жанына сеждагъа ийилди.
Currently Selected:
Жаратылыу 47: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
