Жаратылыу 46

Якъуп юйюрю бла Мисирге кёчеди

1Сора Исраил, битеу малын-мюлкюн алып, жолгъа чыкъгъанды да, Беэр-Шебагъа келип, атасы Исхакъны Аллахына къурманла кесгенди. 2Сора Аллах Исраилге кечеги кёрюнюуде сёлешип:

– Якъуп! Якъуп! – дегенди.

– Мен мындама, – дегенди ол да.

3Аллах анга:

– Мен Аллах, атангы Аллахыма, – дегенди. – Мисирге барыргъа къоркъма; Мен анда сени уллу миллет этерикме. 4Мен сени бла бирге Мисирге барлыкъма, сени артха да къайтарлыкъма. Сени кёзлеринги Юсюп кеси къолу бла жабарыкъды.

5Якъуп Беэр-Шебадан тебирегенди. Исраилни жашлары, аланы келтирирге фыргъауун ийген арбала бла, аталары Якъупну да, кеслерини сабийлерин да, къатынларын да алып, жолгъа чыкъгъандыла. 6Якъуп да, аны бла бирге битеу аны тукъуму да, Кенанны жеринде жыйгъан малларын-мюлклерин алып, Мисирге келгендиле. 7Якъуп биргесине уланларын да, къызларын да, туудукъларын да – битеу тукъумун Мисирге келтиргенди.

Якъупну туудукълары

8Мисирге келген Исраил улуланы – Якъупну бла уланларыны – атлары быладыла:

Якъупну тюнгючю Рубен.

9Рубенни уланлары: Ханох бла Паллу, Хесрон бла Кармий.

10Шимонну уланлары: Емуел, Ямин, Охад, Яхин, Сохар эмда кенанлы къатыныны уланы Шаул.

11Лебийни уланлары: Гершон, Кохат эм Мерарий.

12Яхуданы уланлары: Эр, Онан, Шела, Перес, Зерах. Эр бла Онан а Кенанны жеринде ёлген эдиле.

Пересни уланлары Хецрон бла Хамул эдиле.

13Иссахарны уланлары: Тола бла Пууа, Яуб бла Шимрон.

14Зебулунну уланлары: Серед, Элон, Яхлеел.

15Была Леяны уланларыдыла, Лея аланы да, къызы Динаны да Якъупха Паддан-Арамда тапханды. Якъупну битеу уланлары бла къызлары – отуз юч жан эдиле.

16Гадны уланлары: Цифион бла Хаггий, Шуний бла Эсбон, Эрий бла Ародий эм Арелий.

17Ашерни уланлары: Имна, Ишба, Ишбий, Брия эмда аланы эгечлери Серах.

Брияны уланлары: Хебер бла Малкиел.

18Была, Лабан къызы Леягъа берген Зилпаны уланларыдыла. Зилпа Якъупха оналты жанны тапханды.

19Якъупну къатыны Рахелни уланлары: Юсюп бла Бенямин.

20Юсюпге да Мисирни жеринде Манаше бла Эфрайим туугъандыла, аланы уа анга, Он атлы шахарны дин къуллукъчусу Потифераны къызы Аснат тапханды.

21Беняминни уланлары: Бела, Бекер, Ашбел, Гера, Нааман, Эхи, Рош, Муппим, Хуппим, Ард.

22Была Рахелни уланларыдыла, андан Якъупха туугъанла бары да онтёрт жан эдиле.

23Данны уланы: Хушим.

24Нафталийни уланлары: Яхсеел, Гуний, Есер, Шиллем.

25Была, Лабан къызы Рахелге берген Билханы уланларыдыла. Билха Якъупха тапханла барысы да жети жан эдиле.

26Якъуп бла бирге Мисирге келгенле, андан туугъанла, Якъупну уланларыны къатынларын санамай, бары да алтмыш алты жан боладыла. 27Юсюпню Мисирде туугъан уланлары эки жан эдиле. Якъупну юйюрюню Мисирге кёчген битеу адамлары жетмиш жан саналадыла.

Исраил улула Гошенде жерлешедиле

28Якъуп Яхуданы, Гошеннге баргъан жолну кёргюзтюр ючюн кесинден алгъа Юсюпге ийгенди. Сора Гошенни жерине келгендиле. 29Юсюп файтонун жекдирип, атасы Исраилни аллына, Гошеннге чыкъгъанды. Сора, аны кёрюп, аны боюнундан къучакълап, аны боюнунда кёп жилягъанды.

30Исраил Юсюпге:

– Мен сени сау болгъанынгы кёрдюм; энди ырахатлыкъ бла ёлюрме, – дегенди.

31Сора Юсюп къарындашларына бла атасыны юйюрюне былай айтханды:

– Мен барып, фыргъаууннга билдирейим; анга: «Манга Кенанны жериндеги къарындашларым бла атамы юйюрю келгендиле. 32Бу адамла къой кютюучюледиле, малчыладыла; къой-эчкилерин да, тууар малларын да эм битеу мюлклерин да алып келгендиле», – деп айтайым. 33Фыргъауун сизни чакъырып: «Ишигиз неди?» – деп сорса уа, 34анга: «Къулларынг, биз аталарыбыз кибик, жаш заманыбыздан эндиге дери да малчыла бола келгенбиз», – деп айтырсыз. Сора сизге Гошенни жеринде жерлеширге эркинлик берирле. Нек дегенде, мисирлиле къойчуланы кёрюп болмайдыла.

Currently Selected:

Жаратылыу 46: МалкъСК

Highlight

Copy