Жаратылыу 45

Юсюп кесин къарындашларына танытады

1Юсюп, жумушчуларыны аллында мындан кёп тёзюп турургъа болалмай, алагъа:

– Барыгъыз да мени къатымдан кетигиз! – деп къычырып жибергенди.

Къатында жумушчуларындан бири да къалмагъанда, Юсюп кесин къарындашларына танытханды. 2Ол уллу къычырыкъ этип жилягъанды, мисирлиле да эшитгендиле, аны хапары фыргъауунну юйюндегилеге да жетгенди.

3Юсюп къарындашларына:

– Мен Юсюпме, атам саумуду? – дегенди.

Къарындашлары уа жунчуп къалып, анга жууап бералмагъандыла.

4Сора Юсюп къарындашларына:

– Къатыма келигиз, – дегенди.

Ала къатына келгенде, ол алагъа былай айтды:

– Сиз Мисирге сатхан къарындашыгъыз Юсюпме. 5Алай а энди мудах болмагъыз, мени бери сатханыгъыз ючюн жарсымагъыз. Аллах жаныгъызны сакълар ючюн, мени аллыгъызда ийгенди. 6Къыралгъа ач киргенли энди эки жыл болады: энтта беш жылны ичинде не сюрлюк, не орлукъ тюйюлдюле. 7Аллах тукъумугъузну жер башында сау къалдырыр ючюн, жаныгъызны уллу къутхарыу бла сакълар ючюн мени аллыгъызда ийгенди. 8Алайды да, мени бери сиз иймегенсиз, Аллах ашыргъанды. Ол мени фыргъаууннга ата этгенди, битеу аны мюлкюне бий этгенди, битеу Мисирни жерине да башчы этип салгъанды. 9Теркирек атама барып, анга: «Уланынг Юсюп былай айтады: „Аллах мени битеу Мисирге бий этип салгъанды; мычымай, манга кел. 10Сен Гошенни жеринде жашарыкъса; сен да, сабийлеринг да, туудукъларынг да, къой-эчкинг бла тууар малынг да, битеу болгъан затынг да мени къатымда турлукъсуз. 11Сени анда кечиндирип турлукъма, нек десенг, энтта беш жыл ачлыкъ боллукъду; сен да, юйюрюнг да, битеу болгъан затынг да жарлылыкъ сынамагъыз“», – деп айтыгъыз. 12Ма, сизни бла сёлешген мен кесим болгъанымы, сиз да, Бенямин къарындашым да кеси кёзлеригиз бла кёресиз. 13Мени Мисирде сыйым нечик уллу болгъанын, мында битеу кёргенигизни да атама айтыгъыз да, атамы теркирек бери келтиригиз.

14Сора ол, къарындашы Беняминни къучакълап, жилягъанды; Бенямин да аны къучагъында жилягъанды. 15Битеу къарындашларын да уппа этип, аланы къучакълап, жилягъанды. Андан сора къарындашлары да аны бла сёлешип башлагъандыла.

Фыргъауун Якъупха Мисирге кёчерге эркинлик береди

16Юсюпню къарындашлары келгендиле деп, фыргъауунну юйюне хапар жетгенди. Фыргъауун да, аны къуллары да къууаннгандыла.

17Сора фыргъауун Юсюпге былай айтды:

– Къарындашларынга айт: «Ма былай этигиз: хайыуанларыгъызны жюклеп, Кенанны жерине барыгъыз 18эм атагъызны да, юйдегилеригизни да алып, манга келигиз. Мен сизге Мисирни жеринде эм игисин беририме, сиз жерни битиминден ашарсыз». 19Санга уа алагъа былай айтыргъа буйрукъ береме: «Былай этигиз: сабийлеригизге бла къатынларыгъызгъа Мисирни жеринден арбала алыгъыз, атагъызны да келтирип, келигиз. 20Хапчукларыгъызгъа да къайгъырмагъыз: битеу Мисирни жеринден эм игисин сизге берирме».

21Исраилни жашлары алай этгендиле. Сора Юсюп алагъа, фыргъауунну буйругъу бла арбала бергенди, алагъа жол азыкъ да салгъанды. 22Аланы хар бирине да ол бирер къат кийим, Беняминнге уа ючжюз кюмюш бла беш къат кийим бергенди. 23Аны кибик атасына да, Мисирни эм иги затларындан жюкленнген он эшек, мирзеу, ётмек эм атасына жол азыкъ жюкленнген да он тиши эшек ийгенди. 24Сора къарындашларын жибергенди. Ала кетип тебирегенде, алагъа:

– Жолда бара, бир зат ючюн жарсымагъыз! – дегенди.

25Сора ала Мисирден чыгъып, Кенанны жерине, аталары Якъупха келгендиле. 26Анга:

– Юсюп сауду! Энди ол битеу Мисирни жерине бийлик этеди, – деп билдиргендиле.

Алай а аны жюреги жунчугъанды: ол алагъа ийнанмай эди. 27Ала анга Юсюпню битеу айтхан сёзлерин къатлагъанларында эмда аны келтирирге Юсюп ийген арбаланы кёргенинде уа, Якъупха жан киргенди. 28Сора Исраил:

– Тамамды! Балам Юсюп сауду; мен ёлгюнчю, барып аны кёрейим, – дегенди.

Currently Selected:

Жаратылыу 45: МалкъСК

Highlight

Copy