Жаратылыу 43

Якъуп Беняминни Мисирге жибереди

1Кенан жерде ачлыкъ андан да бек къысхан эди. 2Сора Мисирден келтирилген мирзеу бошалгъан заманда, Исраил уланларына:

– Энтта барып, бизге бираз мирзеу сатып алыгъыз, – деди.

3Яхуда уа анга былай айтды:

– Ол адам бизге: «Къарындашыгъыз сизни бла болмаса, мени кёзюме кёрюнмегиз», – деп, бек къаты айтханды. 4Къарындашыбызны бизни бла ийсенг, барып, санга аш сатып алырбыз. 5Иймесенг а, барлыкъ тюйюлбюз, нек десенг, ол адам бизге: «Къарындашыгъыз сизни бла болмаса, мени кёзюме кёрюнмегиз», – деп айтханды.

6Исраил а:

– Сизни дагъыда къарындашыгъыз болгъанын ол адамгъа айтып, манга аманлыкъ нек этдигиз? – деди.

7– Ол адам бизден бизни эм жууукъларыбызны юсюнден: «Атагъыз саумуду? Башха къарындашыгъыз бармыды?» – деп, бек сора эди, – дедиле ала. – Биз анга ол соруулагъа кёре айтхан эдик. Ол бизге: «Къарындашыгъызны келтиригиз», – деп айтырыгъын къайдан биле эдик?

8Яхуда уа атасы Исраилге:

– Жашны мени бла ий, – деди. – Биз туруп барайыкъ, сора биз да, сен да, сабийлерибиз да ёлмей, сау къалырбыз. 9Жаш ючюн мен жууаплы болурма, аны мени къолумдан излерсе. Мен аны санга къайтарып, аллынгда сюемесем, битеу ёмюрюмде аллынгда гюняхлы болуп къалырма. 10Биз мычымасакъ эди уа, энди эки кере да барып келир эдик.

11Сора аталары Исраил алагъа былай айтды:

– Алай эсе уа, ма былай этигиз: тулукъларыгъызгъа бу жерде ёсген эм иги затладан салып, ол адамгъа саугъагъа бираз балхам бла бираз бал да, стиракс бла мюр да, фисташкала бла бадам чертлеуюкле да элтигиз. 12Къолугъузгъа эки кере кёп ахча да алыгъыз. Аны бла тулукъларыгъызгъа къайтарылып салыннган ахчаны да ызына берирсиз. Бир жангылычлыкъ болгъан болур. 13Къарындашыгъызны да алыгъыз да, мычымай, биягъы ол адамгъа барыгъыз. 14Къудуретли Аллах ол адамны сизге мархаматлы#43:14 Мархаматлы – орус. добросердечный, сердобольный, милосердный. этдирсин, ол сизге бирси къарындашыгъызны да, Беняминни да жиберсин. Мен а сабийлеримден айырыллыкъ эсем, айырылайым.

Къарындашла Мисирге экинчи кере келедиле

15Къарындашла бу саугъаланы да, къолларына эки кере кёп ахча да, Беняминни да алып, мычымай, Мисирге кетгендиле эмда Юсюпню аллына келгендиле. 16Юсюп Беняминни биргелерине болгъанын кёргенинде, кесини юй таматасына:

– Бу адамланы юйге элт, малладан бир мал кесип, ашарыкъ эт; кюн ортада ала мени бла ашарыкъдыла, – деди.

17Сора ол адам, Юсюп айтханча этип, аланы Юсюпню юйюне келтирди. 18Къарындашла аланы Юсюпню юйюне келтиргенлерине къоркъуп: «Бизни алгъын тулукъларыбызгъа салынып къайтарылгъан ахча ючюн келтиргендиле, бизге чурум этип, чабыуул этип, эшеклерибизни да алып, бизни къул этер умутлары болур», – дедиле.

19Сора ала, Юсюпню юй таматасыны къатына барып, юйню эшиклерини къатында анга былай сёлешдиле:

20– Жюйюсханыбыз, тынгыла, мирзеу сатып алыргъа биз алгъын да келген эдик. 21Биз кече къалыр жерге жетип, тулукъларыбызны ачхан заманда уа, хар бирибизни ахчасы саулай тулугъунда эди. Биз аны да къайтарып беребиз. 22Мирзеу сатып алыргъа башха ахча да келтиргенбиз. Ахчабызны тулукъларыбызгъа ким салгъанын а билмейбиз.

23– Аны ючюн къайгъы этмегиз, къоркъмагъыз, – деди ол. – Аллахыгъыз, атагъызны Аллахы, сизге тулукъларыгъызда хазна бергенди. Ахчагъыз манга келгенди.

Сора алагъа Шимонну келтиргенди.

24Аланы Юсюпню юйюне кийирип, аякъларын жууаргъа суу бергенди, эшеклерине да аш салгъанды. 25Къарындашла уа Юсюпню кюн ортада келир заманына саугъаларын хазыр этип тургъандыла; ала анда аш ашарыкъларын эшитген эдиле.

26Юсюп юйюне келгенде ала къолларындагъы саугъаланы юйге келтирип, анга жерге дери баш ургъандыла. 27Юсюп аладан саулукъ соруп:

– Сиз айтхан къарт атагъыз къалайды? Сау-саламатмыды? – деди.

28– Сени къулунг, бизни атабыз сау-саламатды, – дедиле ала да.

Сора ийилип, баш урдула. 29Юсюп къарап, анасыны уланы, кесини къарындашы Беняминни кёрюп:

– Ол сиз манга айтхан гитче къарындашыгъыз бумуду? Аллахны мархаматы сени бла болсун, балам! – деди.

30Сора къарындашына сюймеклиги къайнагъандан, Юсюп алайдан ашыгъып чыкъды. Алай бла ол жиляр жер излеп, отоууна кирди да, анда жиляды. 31Сора, бетин жуууп, биягъы чыкъды да, тёзюмюн басып:

– Ашарыкъ салыгъыз! – деди.

32Ашарыкъ келтирип, анга башха, алагъа да башха, ала бла ашагъан мисирлилеге да энчи салдыла. Мисирлиле чюйютлюле бла бирге ашамай эдиле, бу мисирлилеге жийиргенчлиди. 33Сора аланы аны аллында таматасын таматалыгъына кёре, кичисин да кичилигине кёре олтуртхандыла, ала уа бир-бирлерине къарап сейирсине эдиле. 34Юсюп алагъа кесини аллындан ашарыкъ юлюшле жибере эди; Беняминни юлюшю уа аланы хар бирини юлюшюнден беш кере кёп эди. Ичген да этгендиле; Юсюп бла бирге иги кесек олтургъандыла.

Currently Selected:

Жаратылыу 43: МалкъСК

Highlight

Copy