Жаратылыу 38

Яхуда бла Тамар

1Ол заманда Яхуда къарындашларындан айырылып, Хира атлы бир адулламлы адамны къатында жерлешип тохтагъанды. 2Анда Яхуда Шуа атлы бир кенанлы адамны къызын кёргенди да, аны кесине алып, анга юйленнгенди. 3Тиширыу бууаз болуп, улан тапханды. Яхуда анга Эр атагъанды. 4Тиширыу дагъыда бууаз болуп, улан тапханды эмда анга Онан атагъанды. 5Дагъыда улан табып, анга Шела атагъанды. Ол Шеланы тапхан заманда Яхуда Кезиб шахарда эди.

6Сора Яхуда тюнгючю Эрге къатын алгъанды. Къатынны аты Тамар эди. 7Яхуданы тюнгючю Эр Раббийни кёз аллында аман эди да, Раббий аны жанын алгъанды.

8Яхуда Онаннга:

– Къарындашынгы къатынына бар, къайынча, аны къатыннга алып, къарындашынга урлукъ къура, – дегенди.

9Онан тууарыкъ сабий аныкъы болмазлыгъын биле эди. Ол себепден, къарындашыны къатыны бла жатханда, кесини къарындашына урлукъ бермез ючюн, жерге тёге эди. 10Аны этгени уа Раббийни кёз аллында аманлыкъ эди. Ол себепден Раббий аны да жанын алгъанды.

11Сора Яхуда келини Тамаргъа:

– Уланым Шела ёсгюнчю, атангы юйюнде тул къатын болуп жаша, – дегенди. Ол: «Бу да къарындашларыча ёлюп къалмагъа эди», – деп ойлай эди.

Тамар атасыны юйюне кетип, анда жашагъанды. 12Кёп заман озгъанды; Шуаны къызы, Яхуданы къатыны ёлгенди. Яхуда, къайгъысы чёкгенден сора, адулламлы шуёху Хира бла бирге Тимнагъа, кесини къойларын къыркъгъан адамлагъа баргъанды.

13Тамаргъа: «Ма, къайын атанг къойларын къыркъыргъа Тимнагъа барады», – деп билдиргендиле. 14Тамар юсюнден тул кийимин тешип, жабыугъа чулгъаннганды, бетин да кисей жаулукъ бла жапханды; сора Тимнагъа баргъан жолда болгъан Энайим шахарны къабакъ аллында олтургъанды. Ол, Шеланы ёсгенин, кеси уа анга къатыннга берилмегенин кёре эди.

15Тамар бетин жапханы ючюн, Яхуда аны кёргенде, аны саякъ тиширыу суннганды. 16Жолдан анга бурулгъанды да, бу аны келини болгъанын билмей:

– Кел, мен санга барайым, – дегенди.

– Манга келсенг, манга не берирсе? – деп соргъанды Тамар.

17– Санга сюрюуден улакъ иерме, – дегенди Яхуда.

– Аны ийгинчи уа жюкге бир зат берирмисе? – деп соргъанды Тамар.

18– Жюкге незат берейим? – дегенди Яхуда.

– Мухурунгу, белибауунгу эм къолунгдагъы таягъынгы, – дегенди Тамар.

Яхуда бу затланы берип, анга баргъанды. Тамар андан бууаз болгъанды. 19Сора ол, андан кетип, юсюнден жабыуун алып, биягъыча тул кийимин кийгенди.

20Яхуда уа жюкге берген затларын къайтарыр ючюн адулламлы шуёхуну къолу бла тиширыугъа улакъ ийгенди. Шуёху уа тиширыуну табалмагъанды. 21Ол жерни адамларына:

– Энайимде жол жанында олтургъан саякъ тиширыу къайдады? – деп соргъанды.

Ала уа:

– Мында саякъ тиширыу жокъ эди, – дегендиле.

22Ол Яхудагъа къайтып:

– Тиширыуну табалмадым, – дегенди. – Ол жерни адамлары да: «Мында саякъ тиширыу жокъду», – дейдиле.

23Яхуда уа:

– Охо ол затланы кесине къойсун, бизни хыликке этмесинле ансы. Ма, бу улакъны ийдим, алай а сен ол тиширыуну табалмадынг, – дегенди.

24Юч айгъа жууукъ озгъандан сора уа, Яхудагъа:

– Келининг Тамар, саякъ жюрюп, ма, саякълыкъдан бууаз болгъанды, – деп айтхандыла.

– Аны тышына чыгъарыгъыз да, кюйдюрюгюз! – дегенди Яхуда.

25Тамарны чыгъарып тебирегенлеринде уа, ол къайын атасына былай айтдыргъанды:

– Бу затла кимники эселе да, мен ол адамдан бууазма. – Эмда: – Бу мухур да, белибау да, таякъ да кимникидиле, бир къарачы?

26Яхуда ол затланы танып:

– Менден эсе ол тюздю, – дегенди. – Мен аны уланым Шелагъа къатыннга бермегенме.

Андан арысында Яхуда анга бир да бармагъанды.

27Тамарны къозлар заманы жетгенде уа, къарынында эгизле болгъаны билиннгенди. 28Ол къозлай тургъанда эгизледен бири къолун тышына чыгъаргъанды. Аначы къатын къызыл халы алып, аны къолуна къысып:

– Биринчиге бу чыкъгъанды, – дегенди.

29Алай а ол къолун артха къайтаргъанды да, аны къарындашы чыкъгъанды.

– Сен кесинге чырмауну къалай буздунг? – дегенди сора аначы къатын.

Алай бла анга Перес#38:29 Перес атны магъанасы – «чырмауну бузгъан». аталгъанды. 30Андан сора къолунда да къызыл халысы бла, аны къарындашы чыкъгъанды. Анга да Зерах#38:30 Зерах атны магъанасы – «къызыл». аталгъанды.

Currently Selected:

Жаратылыу 38: МалкъСК

Highlight

Copy