Жаратылыу 37
37
Юсюпню тюшлери
1Якъуп, атасы кёчюп айланнган жерде, Кенанны жеринде жашай эди.
2Ма Якъупну тукъум тарыхы:
Юсюп онжети жыллыкъ жаш болуп, атасыны къатынлары Билханы бла Зилпаны жашлары болгъан къарындашлары бла бирге сюрюу кюте эди. Аланы этген аманлыкъларын Юсюп аталарына билдире эди. 3Ол къартлыкъ уланы болгъаны ючюн, Исраил уланларыны барындан да бек Юсюпню сюйюучю эди. Ол анга багъалы къолан кийим тикдирип берген эди. 4Аталары Юсюпню къарындашларындан эсе бек сюйгенин эслегенде, ала Юсюпню кёрюп болмай къалып, анга ариу сёлешалмай эдиле.
5Бир жол Юсюп тюш кёреди. Аны къарындашларына айтханды да, ала аны андан да бек кёрюп болмай къалгъандыла.
6Юсюп алагъа:
– Мен кёрген тюшге тынгылачыгъыз! – дегенди. – 7Ма, биз сабанда гыстыла къыса тура эдик. Билмей тургъанлай мени гыстым туруп, ёрге сюелип къалды. Сизни гыстыларыгъыз а тёгерегине туруп, мени гыстыма баш урдула.
8Къарындашлары анга:
– Сен бизге патчахлыкъмы этерик болурса да? Бизге башчылыкъмы этериксе да? – дегендиле да, Юсюпню бу сёзлери эм тюшю ючюн, аны андан да бек кёрюп болмай тебирегендиле.
9Сора Юсюп дагъыда башха тюш кёреди, аны да къарындашларына айтады:
– Тынгылачыгъыз, мен энтта бир тюш кёрдюм. Ма, кюн да, ай да, онбир жулдуз да манга баш ура эдиле, – дегенди.
10Юсюп бу тюшню атасына да, къарындашларына да айтханды. Атасы анга урушуп:
– Бу кёрген тюшюнг неди? Мен да, ананг да, къарындашларынг да жерге дери ийилип, санга баш урургъамы келлик болурбуз да? – дегенди.
11Къарындашлары Юсюпге зарланнгандыла, атасы уа аны эслеп къойгъанды.
Къарындашлары Юсюпню къуллукъгъа сатадыла
12Бир жол Юсюпню къарындашлары аталарыны сюрюуюн кютерге Шекемге кетген эдиле. 13Исраил Юсюпге:
– Къарындашларынг сюрюуню Шекем тийресинде кюте болурла. Кел, мен сени алагъа иейим, – дегенди.
– Барайым, – деп жууап бергенди Юсюп.
14– Къарындашларынг тынч эселе, мал да сау эсе, барып кёр да, манга хапар келтир, – деп, Якъуп аны Хеброн ёзенинден ашыргъанды.
Юсюп Шекемге келгенди. 15Ол аулакъда ажашып айлана тургъанлай, анга бир адам тюбеп:
– Не излейсе? – деп соргъанды.
16– Къарындашларымы излейме, – дегенди Юсюп. – Ала сюрюуню къайда кюте болурла? Аны манга айтсанг эди.
17– Ала мындан кетгендиле, – дегенди ол адам. – Мен аланы: «Дотаннга барайыкъ», – дегенлерин эшитген эдим.
Алай бла Юсюп къарындашларыны ызындан барып, аланы Дотанда тапханды. 18Къарындашлары аны узакъдан кёргендиле. Ол алагъа жууукълашхынчы окъуна, аны ёлтюрюрге къаст этип башлагъандыла.
19Бир-бирлерине:
– Ма, тюш кёрюучю келеди! – дегендиле. – 20Хайдагъыз, аны ёлтюрейик да, бир уругъа атып къояйыкъ. Аны жыртхыч жаныуар ашагъанды деп айтырбыз. Тюшлеринден бир зат болур эсе, кёрюрбюз сора!
21Рубен муну эшитип:
– Аны ёлтюрмейик, – дегенди да, Юсюпню аланы къолларындан къутхаргъанды
22Дагъыда Рубен алагъа:
– Къан тёкмегиз, аны бу къуу жерде къуюгъа атыгъыз, кесине уа тиймегиз, – дегенди.
Ол аны къутхарып, атасына къайтарыр умут эте эди.
23Юсюп къарындашларыны къатына келгенде, ала аны тутуп, ол къолан кийимин юсюнден тешгендиле. 24Сора Юсюпню къуюгъа атхандыла. Ол къуюну ичи къуру эди, сууу жокъ эди.
25Ала аш ашаргъа олтургъандыла. Сора къарап, Гиладдан исмаиллыланы кериуаны#37:25 Кериуан – орус. караван. келе тургъанын кёргендиле. Аланы тюелерине стиракс#37:25 Стиракс, мюр – багъалы, ариу ийисли затла., балхам эм мюр жюкленип эди. Ала бу затланы Мисирге элтип бара эдиле. 26Яхуда къарындашларына:
– Къарындашыбызны ёлтюрюп, аны къанын тёкгенибизни жашыргъандан не файда? – дегенди. – 27Келигиз, аны исмаиллылагъа сатайыкъ, анга къол кётюрмейик: ол къарындашыбызды, бизни этибизди.
Къарындашлары аны сёзюне тынгылагъандыла.
28Мидиянлы саудюгерчиле озуп баргъан заманда, Юсюпню къуюдан чыгъарып, исмаиллылагъа жыйырма кюмюш шекелге сатхандыла. Исмаиллыла уа Юсюпню Мисирге элтгендиле.
29Рубен къайтып къуюгъа келип, Юсюпню къуюда болмагъанын кёргенде, жарсып кесини кийимлерин жыртханды 30эм къарындашларына къайтып:
– Жаш жокъ. Мен а? Мен а къайры кетейим? – дегенди.
31Сора Юсюпню кийимин алгъандыла да, теке союп, кийимни къаннга боягъандыла. 32Сора ол къолан кийимни ийип, аталарына тапдыргъандыла эмда:
– Биз муну тапхан эдик. Бир къара, бу уланынгы кийимимиди, огъесе тюйюлмюдю, – дегендиле.
33Якъуп аны танып:
– Бу уланымы кийимиди! Аны жыртхыч жаныуар ашагъанды! Баям, Юсюп таланып ёлген болур! – дегенди.
34Сора Якъуп, бушуу этип, кесини кийимлерин жыртханды эмда белине зыбыр кийим къысып, уланына кёп кюнлени жиляу этип тургъанды. 35Аны жапсарыргъа битеу уланлары да, битеу къызлары да жыйылгъан эдиле, ол а бушууун тыяргъа унамай:
– Уланыма ахыратха бушуу бла барлыкъма, – дегенди.
Атасы анга алай жиляу этип тургъанды.
36Ол кезиуде мидиянлыла Юсюпню Мисирде фыргъауунну ёзюрюне, аны бегеуюллерини башчысы Потифаргъа сатхандыла.
Currently Selected:
Жаратылыу 37: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
