Жаратылыу 32

Якъуп Эсау бла тюбеширге хазырланады

1Якъуп кесини жолуна кете туруп, аны аллына Аллахны мёлеклери чыкъгъандыла. 2Якъуп аланы кёргенде:

– Бу Аллахны аскериди! – деп, ол жерге Маханаим#32:2 Маханайим – атны магъанасы «эки аскер», неда «эки къонуш» (къонуш – лагерь). атагъанды.

3Сора Якъуп кесинден алгъа къарындашы Эсаугъа, Сеир атлы жерге, Эдом тийресине келечиле ийгенди. 4Алагъа быллай буйрукъ этгенди:

– Бийим Эсаугъа былай айтыгъыз: «Ма былай айтады къулунг Якъуп: Эндиге дери Лабанны юйюнде къонакъ болуп тургъанма. 5Тууарларым, эшеклерим, къойларым бла эчкилерим, къулларым бла къарауашларым да барды. Сен манга ыразы болур ючюн, бийиме бу хапарны иеме».

6Келечиле Якъупха къайтып:

– Къарындашынг Эсаугъа бардыкъ. Ол санга тюберге келе турады, аны биргесине да тёртжюз адам барды, – дегендиле.

7Якъуп бек къоркъгъанды эм жунчугъанды. Аны бла болгъан адамланы да, къой-эчкилерин да, тууар малын да, тюелерин да бёлюп, эки къонуш этгенди. 8«Эсау бир къонушха чабыуул этип, аны къырса, къалгъан къонуш къутулургъа болур», – деп ойлай эди.

9Сора Якъуп тилек этгенди:

– Я Аллах, атам Ибрахимни эм атам Исхакъны Аллахы, манга: «Жеринге, туугъан журтунга къайт, Мен санга ахшылыкъ этерикме», – деген Раббий! 10Сен къулунга кёргюзтген битеу ахшылыгъынга эм тюзлюгюнге тийишли да тюйюлме мен. Бу Иордан суудан мен жаланда къолумдагъы таягъым бла ётген эдим; энди уа менде эки къонуш барды. 11Тилейме сенден, мени къарындашым Эсауну къолундан къутхар. Ол келип, мени да, сабийлени да аналары бла бирге ёлтюрюр деп, къоркъама. 12Сен а: «Мен санга ахшылыкъ этерикме эм туудукъларынгы, тенгизни юзмези кибик санаялмазча кёп этерикме», – деп айтханса.

13Ол кече Якъуп алайда къалгъанды. Кесини болгъан затындан къарындашы Эсаугъа саугъагъа 14экижюз эчки, жыйырма теке, экижюз къой, жыйырма къочхар, 15балалары бла бирге отуз саулукъ тюе, къыркъ ийнек, он бугъа, жыйырма тиши эшек, он эркек эшек айыргъанды. 16Къулларыны къолларына хар сюрюуню энчи берип, алагъа:

– Аллымда барыгъыз эм сюрюуню бла сюрюуню араларында жер къоюгъуз, – дегенди.

17Сора биринчисине былай буюргъанды:

– Къарындашым Эсау санга тюбеп: «Сен кимникисе? Къайры бараса? Бу аллынгда сюрюу да кимникиди?» – деп сорса, 18сен жууапха: «Къулунг Якъупну. Бу, бийим Эсаугъа жиберилген саугъады. Ма, ол кеси да ызыбыздан келе турады», – деп айт.

19Экинчисине да, ючюнчюсюне да, сюрюулени ызларындан баргъанланы барына да ол былай буюргъанды:

– Эсаугъа тюбеген заманыгъызда, сиз да анга алай айтыгъыз. 20Дагъыда: «Ма, къулунг Якъуп да бизни ызыбыздан келе турады», – дегиз.

Якъуп: «Аллымда баргъан саугъала бла аны жюрегин жумушатырма да, бетин андан сора кёрюрме. Мени къабыл этерге да болур эсе уа», – деп ойлай эди. 21Алай бла саугъала аны аллында кетгендиле, кеси уа ол кече къонушда къалгъанды.

Якъуп Аллах бла кюрешеди

22Ол, кече туруп, эки къатынын да, эки къарауашын да, онбир уланын да алып, Яббок сууну кёчюуюнден ётгенди. 23Аланы алып, суудан ётдюргенден сора, кесини битеу болгъан затын да ётдюргенди.

24Якъуп кеси жангыз къалгъанды. Сора, танг жарыгъы чыкъгъынчы, аны бла Биреу кюрешгенди. 25Якъупну хорлаялмагъанын кёрюп, Ол аны бла кюреше тургъанда, Якъупну базыкъ бутуну жигине тийгенди да, аны бутуна къыяу салгъанды. 26Сора:

– Жибер Мени, танг жарыгъы чыкъгъанды, – дегенди.

Якъубʼа:

– Сен манга алгъыш бергинчи, Сени жиберлик тюйюлме, – дегенди.

27– Атынг неди? – деп соргъанды Ол.

– Якъуп, – дегенди.

28Ол а:

– Бюгюнден арысында атынг Якъуп тюйюл, Исраил#32:28 Исраил атны магъанасы – «Аллах бла кюрешген». боллукъду, – дегенди, – нек десенг, Аллах бла эм адамла бла кюрешип, хорлагъанса.

29– Тилейме, атынгы айт, – дегенди Якъуп.

– Сен атымы неге сораса? – дегенди Ол.

Сора алайда Якъупха алгъыш бергенди. 30Якъуп: «Мен Аллахны бетден бетге кёргенме, алай болгъанлыкъгъа жаным сау къалгъанды», – деп, ол жерни атына Пениел#32:30 Пениел атны магъанасы – «Аллахны бети». атагъанды.

31Якъуп Пенуэлден кетип баргъан заманда кюн чыкъгъан эди; ол базыкъ бутундан акъсай бара эди. 32Якъуп бла Кюрешген аны бутундагъы жикни сингирине тийгени себепли, Исраил улулары эндиге дери да базыкъ бутну жигиндеги сингирни ашамайдыла.

Currently Selected:

Жаратылыу 32: МалкъСК

Highlight

Copy