Жаратылыу 19

Аллах Содомну бла Гомораны кюйдюреди

1Ол эки мёлек ингирликде Содомгъа жетгендиле. Лут а Содомну къабакъ аллында олтуруп тура эди. Лут аланы кёргенде, ала бла тюбеширге жеринден къопханды, сора, башын жерге дери ийип, 2алагъа:

– Жюйюсханларым! Тилейме, къулугъузну юйюне киригиз. Аякъларыгъызны жууарсыз, кече да къалырсыз. Сора эрттенликде туруп, жолугъузгъа атланырсыз, – дегенди.

Ала жууапха:

– Угъай, биз кече майданда къаллыкъбыз, – дегендиле.

3Алай а Лут аладан бек тилегенинден, ала аны бла барып, юйюне келгендиле. Лут алагъа ашарыкъ да этгенди, ачымагъан ётмекле да биширип салгъанды. Ала ашагъандыла. 4Алай а ала жукъларгъа жатхынчы, Содом шахарны кишилери – жашы-къарты, шахарны битеу халкъы – юйню тёгерегин алгъандыла. 5Ала Лутну чакъырып, анга:

– Кече къалыргъа сени юйюнге келген адамла къайдадыла? Аланы бизге чыгъар, биз аланы сынагъан этерикбиз, – дегендиле.

6Лут алагъа тышына чыгъып, эшикни артындан этгенди.

7Сора алагъа:

– Къарындашларым, тилейме, аманлыкъ этмегиз, – дегенди. – 8Ма, эр сынамагъан эки къызым барды. Сизге аланы чыгъарайым, алагъа не сюйсегиз да этигиз, бу адамлагъа тиймегиз ансы, ала мени къонакъларымдыла.

9Ала уа:

– Къора былайдан! – дегендиле. – Бу тышындан келген адам оноу этергеми кюрешеди? Энди уа биз санга, алагъа сынатырыгъыбыздан да аман этербиз.

Сора Лутха бек къадалып кюрешип, эшикни сындырыр умут бла жууукълашхандыла. 10Ол заманда юйдеги эки киши, Лутну тутуп, юйню ичине алгъандыла да, эшикни бегитгендиле. 11Эшик аллында адамланы уа – жашны, къартны да – сокъур этип къойгъандыла, алай бла ала эшикни табалмазча болгъандыла.

12Ол эки киши Лутха:

– Сени мында энтта киминг барды? – дегендиле. – Киеулерингми, жашларынгмы, къызларынгмы, шахарда сени киминг бар эсе да, барысын да бу жерден чыгъар. 13Биз бу жерни жокъ этерикбиз. Бу халкъны юсюнден Раббийге къаты тарыгъыу этилгенинден, Раббий бизни аны жокъ этерге ийгенди.

14Лут тышына чыгъып, къызларын къатыннга аллыкъ киеулюклери бла сёлешип:

– Хайдагъыз, бу жерден кетигиз! – дегенди. – Раббий бу шахарны къырып бошарыкъды.

Алай киеулюклери ол аны ойнап айтхан суннгандыла.

15Танг жарыгъанда уа, мёлекле да Лутну ашыкъдырып башлагъандыла:

– Хайда, къатынынгы да, юйюнгдеги эки къызынгы да алып къач, шахарны аманлыкълары амалтын сен да жоюлюп къалма, – дегендиле.

16Лут а, заманны созуп, ашыкъмай эди. Раббий анга жазыкъсыннганы себепли, эки мёлек, аны къолундан тутуп, къатынын да, эки къызын да аны бла бирге чыгъарып, шахардан тышында сюегендиле. 17Аланы шахардан тышына элтген заманларында уа, аладан бирлери Лутха:

– Къач, жанынгы къутхар! – дегенди. – Артха айланып къарама! Бу тёгерекде бир жерде да тохтама. Таугъа къачып къутул, алайсыз, сен жоюлуп къалырса.

18Лут а жууапха:

– Угъай, Бийим! – дегенди. – 19Ма, Сен къулунга ыразылыгъынгы кёргюзтдюнг, мени жанымы къутхарып, манга уллу ахшылыкъ этдинг. Алай а мен таугъа къачаллыкъ тюйюлме, ол палах ызымдан жетер да, мен ёлюп къалырма. 20Ма, бу шахаргъа къачаргъа жууугъуракъды, кеси да гитче шахарды. Мен ары къачып барайым, ол гитчеди да; сора мени жаным сакъланыр.

21– Ахшы, – дегенди Ол. – Бу тилегинги да толтурурма. Ол сен айтхан шахарны къурутмам. 22Ашыкъ, ары къачып къутул; сен ары жетгинчи, Мен бир зат да этерге болаллыкъ тюйюлме, – дегенди.

Ол шахаргъа уа Соар#19:22 Соар деген сёзню магъанасы – «гитче». деп, аны ючюн аталгъанды.

23Лут Соаргъа келгенинде кюн чыкъгъан эди. 24Сора Раббий Содомгъа бла Гоморагъа кёкден, кукурт#19:24 Кукурт – орус. сера. бла от жаудуруп къуйгъанды. 25Ол шахарланы да, битеу ол ёзенни да, битеу ол шахарлада жашагъанланы да, жерни ёсюмлюклерин да жер башындан къоратып къойгъанды. 26Лутну ызындан келе тургъан къатыны уа артына бурулуп къарагъанды да, туз чигинжи болуп къалгъанды.

27Ол кюн Ибрахим эрттенликде эртте туруп, ол алгъын Раббийни аллында сюелген жерине баргъанды. 28Содомгъа бла Гоморагъа эм битеу ол ёзеннге къарап, ожакъдан чыкъгъан тютюнча жерден бужукъ тютюн чыкъгъанын кёргенди.

29Аллах ол ёзенни шахарларын жокъ этгенде, Ибрахим эсинде эди да, Лутну чыгъарып, ол жашагъан шахарланы къурутхан палахдан къутхаргъанды.

Лут бла къызлары

30Лут Соарда жашаргъа къоркъгъанды да, эки къызы бла бирге Соардан кетип, тауда жерлешгенди. Эки къызы бла бирге дорбунда жашап болгъанды.

31Сора тамата къызы кичисине былай айтды:

– Атабыз къартды, бу жерде уа битеу дунияны адети бла бизге къошулургъа эр киши жокъду. 32Кел, атабызгъа чагъыр ичирип, эсиртейик да, аны бла жатып, тукъумубузну атабыздан бардырайыкъ.

33Ол кече аталарына чагъыр ичирип эсиртгендиле да, тамата къыз барып, атасы бла жатханды. Лут а аны жатханын, къопханын да билмей къалгъанды. 34Экинчи кюн таматасы кичисине:

– Ма, мен тюнене атам бла жатханма, – дегенди. – Бюгечеге да анга чагъыр ичирип, эсиртейик, сен да барып, аны бла жат, сора тукъумубузну атабыздан бардырайыкъ.

35Бу кече да аталарына чагъыр ичирип эсиртгендиле. Кичи къызы да барып, аны бла жатханды. Лут а аны жатханын, къопханын да билмей къалгъанды.

36Алай бла Лутну эки къызы да аталарындан бууаз болгъандыла. 37Тамата къыз улан табып, анга Моаб#19:37 Моаб атны магъанасы – «атадан». атагъанды. Ол бюгюннгю моаблыланы аталарыды. 38Кичи къыз да улан табып, анга Бен-Амми#19:38 Бен-Амми атны магъанасы – «Мени халкъымы уланы». атагъанды. Ол бюгюннгю аммонлуланы аталарыды.

Currently Selected:

Жаратылыу 19: МалкъСК

Highlight

Copy