Жаратылыу 20

Ибрахим бла Абимелек

1Ибрахим ол жерден Негеб жери таба кёчюп, Кадешни бла Шурну арасында тохтагъанды. Сора бир кесек заманнга Герар шахарда жерлешгенди. 2Андагъы адамлагъа Ибрахим къатыны Сараны юсюнден: «Бу мени эгечимди», – деп айтханды. Герарны патчахы Абимелегʼа адамларын ийип, Сараны кесине келтиртгенди. 3Алай а Аллах кече Абимелекге тюшюнде кёрюнюп:

– Ол тиширыуну алгъанынг ючюн, сен ёллюксе, нек десенг, аны эри барды, – дегенди.

4Абимелегʼа Сарагъа тиймеген эди. Ол себепден:

– Бийим! Терслиги болмагъан миллетни Сен къалай жоюп къоярса? – дегенди. – 5Ол, бу тиширыу мени эгечимди деп, кеси айтмагъанмыды манга? Тиширыу да, бу адам мени къарындашымды деп, айтмагъанмыды? Мен муну хыйласыз жюрек бла эм таза къолларым бла этгенме.

6Дагъыда Аллах Абимелекге тюшюнде:

– Муну хыйласыз жюрек бла этгенинги билеме, – дегенди, – ол себепден сени Манга къажау гюнях этиуден тыйгъанма, сени анга тиерге къоймагъаным да аны ючюндю. 7Энди уа къатынны эрине къайтар, нек десенг, ол файхамбарды. Сора ол сени ючюн тилек этер да, сен да сау къалырса. Къайтармасанг а, сен да, битеу жууукъларынг да ёлмей къалмазлыгъыгъызны билип къал.

8Абимелек эрттенликде эртте туруп, битеу къулларын чакъыргъанды да, битеу бу сёзлени алагъа ангылатханды. Адамла бек къоркъгъандыла. 9Сора Абимелек Ибрахимни чакъырып:

– Сен бизге алай нек этдинг? – дегенди. – Сен мени да, мени къыралымы да уллу гюняхха тюшюрюрге аздан къойдунг! Мен санга не аманлыкъ этгенме? Манга жарамагъан ишни этгенсе.

10Дагъыда Ибрахимге:

– Сен бу ишни не оюм бла этгенсе? – деп сорду Абимелек.

11Ибрахим жууапха былай айтханды:

– Мен, бу жерде Аллахдан къоркъуу жокъду, къатыным ючюн мени ёлтюрюп къоярла деп, ойлагъан эдим. 12Ол кертиси да манга эгечди, атамы къызыды, анамы къызы тюйюлдю ансы. Сора мени къатыным болгъанды. 13Аллах манга ата юйюмден чыгъып, кёчюп айланыргъа буюргъан заманда, къатыныма: «Манга бу ахшылыкъны эт, биз не жерге барсакъ да, мени юсюмден, бу мени къарындашымды деп айт», – деген эдим.

14Абимелек къой-эчки да, тууар мал да, къулла да, къарауашла да алып, Ибрахимге бергенди, аны къатыны Сараны да къайтаргъанды.

15Сора Абимелек:

– Ма, битеу жерим сени аллынгдады; къайда сюйсенг да, жаша, – дегенди.

16Сарагъа да:

– Ма, мен сени къарындашынга минг шекел кюмюш бергенме, – дегенди. – Бу сени таза болгъанынгы сизни адамларыгъызгъа кёргюзтюр эм сени ариулар.

17Сора Ибрахим Аллахдан тилек этгенди да, Аллах Абимелекни да, аны къатынын да, къарауашларын да сау этгенди, ала да къозлап башлагъандыла. 18Нек дегенде, Раббий Ибрахимни къатыны Сара ючюн Абимелекни юйюнде битеу тиширыуланы къаратон этген эди.

Currently Selected:

Жаратылыу 20: МалкъСК

Highlight

Copy