YouVersion Logo
Search Icon

ရိမ့ၤ 11

11
က​ဘၱာ်​စဲာ်​အ​တဲၤ​သး​ခီၣ်​ဝဲၤ​အံၣ်​စ​ရ့​လး​ဖဳး
1ယ​က​ဒဲ​စာ်​မိၢ်​ကိာ်​သံ​တ​မဳၤ​ပ့ၤ, က​ဘၱာ်​စဲာ်​ပၢ်​ဖျီး မၱ​ကဲၤ​အ​ပၠၤ​ခွံ​ဖဳး​ဧါ. စ​တ​ပၢ်​ဖျီး​မၱ​နီး. ယ​သဲ​န့ၤ​မၱာ်​အံၣ်​စ​ရ့​လး​ဖဳး, စီၤ​အၤ​ဘြၤ​ဟၣ်​အ​ဖဳး​ဒဳ​စီၤ​ဘံၣ်​ယၤ​မံၣ်​အ​ခွံ​သ​လဲ​အ​ပူၤ​နဳၤ. 2က​ဘၱာ်​စဲာ်​တ​ဝှ့​ဖျီး​မၱ​ပံ​ပံး​အ​ပၠၤ​ခွံ​ဖဳး​စ​ရိၤ​ထာ်​ကဲၤ​လှ့​အ​ခၣ်​ထံး​ခၣ်​ဘီ​နဳၤ. သံ​က​မဳၤ​ထာ်​နံၤ​စဲာ်​စါ​ထံ​ဒီ​ဆး ဝံ​အ့ၤ​လံ​ယၤ​အ​ဝၱ​အ​ကဲ​နဳၤ​ဧါ. စ​ဒီ​ဆး​က​ဘၱာ်​စဲာ်​အံၣ်​စ​ရ့​လး​ဖဳး​တ​စီာ်​အ​တဲၤ​ဖံး​တဲၤ​မဲၤ​ကၱာ်​စ​ဒီၣ်, 3“​အဳ​ဘၱာ်​စဲာ်, စဲာ်​တ​စီာ်​မဲၤ​သံ​ဝှါ​နဳၤ​ဝံ​တ​စီာ်​နဳၤ. စ​တ့ၤ​လၤ​တ့ၤ​ဖး​ကဲၤ​န​တဲၤ​သ​ဘဲ​ခဳး. ယဲၤ​တ​ပွဲၤ​လီၤ​အီၣ်​တၤ​ဝ့ၤ, ကၱာ်​စဲာ်​တ​စီာ်​သး​အဲး​မဲၤ​သံ​တ​ပွဲး​ယဲၤ,” စ​ဒီၣ်​ဒဳၣ်. 4က​ဘၱာ်​စဲာ်​ဒီၣ် ဒီ​စဲာ်​စာ်​တဲၢ်. “​ယ​လဲၢ်​လၤ​ကဲၤ​ယ​နံၤ​ခံ​ပၠၤ​အ​ပွဲၤ​သါ​သိး​တ​ထီး​ထဲၢ်​အ​တ​ဓဳၢ်​နှဳ​လၤ​ဘ​ဧၤ​လး​အ​လှီ​မီၢ်​နှၱ​နီး​နဳၤ.” 5ခဳ​နူၤ​ယဳၤ​မၱာ်​တဲၤ​မဲၤ​အ​န့ၤ က​ယဳၤ လီၤ. ဒဳ​ခ​ရၱာ် အ​ခဳး​အ​စဲ​ပၠၤ​အ​ဘဲာ်​ရိၤ​ထာ်​အ​ခဳး​လၤ​ကါ​ဆဲး အီၣ်​ဝ့ၤ​တ​ပွဲး. 6သံ​စာ်​ထၱး​တ​ပွဲး​ထဲၢ်​အ​မၱာ်​ခ​ရၱာ်, တ​ဘဲာ်​တဲၤ​မဲၤ အ​ဝၱၤ​အ​အဲး​နီး, တ​မၱာ်​နီး​ဒဳၣ်, ခ​ရၱာ်​တ​မၱာ်​တ​ပွဲး​ခ​ရၱာ်​အ​နှဲး​နှဲး​နီး.
7မဲၤ​က​နဳၤ​က​ဒီၣ်​ဒီ​စာ်​တဲၢ်. အံၣ်​စ​ရ့​လး​ဖဳး​တ​စီာ်​တ​ပာ်​ထၱး တဲၤ​ထဲၢ်​စဲာ်​တ​စီာ်​ဝၢ်​လှဲး​ကဲၤ​နဳၤ​နီး. ပၠၤ​အ​စာ်​ထၱး​အီၣ်​တ​ကၱး ဖဳး​ပွဲၤ​ထဲၢ် က​ဘၱာ်​စဲာ်​ရိၤ​ထာ်​ကဲၤ​တ​စီာ်​နဳၤ, မၱာ်​အ​လ​ဝ့ၤ​တ​စီာ်​အ​နံၤ​ကူၤ​တ​အီၣ် ကၱာ်​တ​သၱာ်​ဟဲ​က​ဘၱာ်​စဲာ် အ​တဲၤ​ယဳၤ​နီး. 8အ​စာ်​ဘိ​စဲာ်​စါ​ထံ​ဒီၣ်, “​က​ဘၱာ်​စဲာ်​အံာ်​လၤ​စဲာ်​တဲၤ​သဳး​ထဳး​သး​ပၤ, ကၱာ်​ထိ​ခဳ​နူၤ​ယဳၤ, တ​သၱာ်​ဟဲ နီး​နီး.” 9စီၤ​ဒၤ​ဝံး​ဒီၣ်,
“​စဲာ်​တ​စီာ်​က​ဘဲာ်​သ​ကွါ​နံၤ​ကီ​ဓ့ၢ်​ခး​ဘ့​ဒၱ​ဝၢ်​ထၱး​နဳၤ,
စ​က​လၢ်​တ့ၤ​လှဳ​ကီ​ကၱာ်​ဘဲာ်​ဖီး​ဘဲာ်​စီ​ခီ.
10စ​ကၢ်​ဓူ​က​ခံး​ကၱာ်​က​တ​စာ်​ထၱး​ဇၤ​ကီ​တဲၤ​နီး,
စ​ယၤ​တ့ၢ်​ကိၢ်​စ​ခူ​ကီ​ဒဳ​တဲၤ​ဘံာ်​တဲၤ​ဇၢ်​ထဳး​အ​စဲ​နဳၤ,” စ​ဒီၣ်​ဓဳၤ.
11မဲၤ​က​နဳၤ​ယ​ဒဲ​စာ်​ကဲၤ, ယူ​ဒၤ​ဖဳး​တ​စီာ်​ထဲ​သ​ကူ​ဒဳၣ်, စ​လၤ​ခူး​ကၱာ်​ကဲ​အီၣ်​လဳၢ်​ကဲၤ​ဧါ. တ​ဘဲာ်​က​နဳၤ​နီး. မၱာ်​စဲာ်​တ​စီာ်​မဲၤ​တဲၤ​ခီၣ်​ဝဲၤ​အ​စဲ​တဲၤ​လှိ​ထာ်​က့ၤ​ဓဳၤ​ထၱး​ပွဲၤ​သူ​ကူာ်​ဖဳး​တ​စီာ်​စာ် ဘိ​ထဲၢ်​စဲာ်​တ​စီာ်​က​သး​ကျး​ဘဲာ်​ပီၢ်​လၢ်​ဝၤ​နဳၤ. 12ယူ​ဒၤ​ဖဳး အ​တဲၤ​ခီၣ်​ဝဲၤ​လ့ၤ​အံာ်​စဲာ်​တ​စီာ်​တဲၤ​ဟိး​ဝၱၤ​အီၣ်​အဲး​အီး​အီး​ဒဳ​လၢ်​ခဳး, ကၱာ်​စ​တဲၤ​ဆဲး​ညဲ​ပ​တီၤ​ဒဳ​သဳး​သး​လ့ၤ​အံာ်​ပွဲၤ​သူ​ကူာ်​ဖဳး​တ​စီာ် တဲၤ​ဟိး​ဝၱၤ​အီၣ်​အဲး​အီး​အီး​လီၤ. မဲၤ​က​နဳၤ​ဒဳၣ်, ယူ​ဒၤ​ဖဳး​က​ဖၱး​နံၤ မၤ​တဲၤ​လှိ​ထာ်​က့ၤ​လဳ​စါ​စဲး​ဒဳၣ်, ဒဳၣ်​လံ​ကၱာ်​အ​နီၤ​စ​က​နံၤ​ဘဲာ်​ကီ တဲၤ​ဟိး​ဝၱၤ.
ပွဲၤ​သူ​ကူာ်​ဖဳး​အ​တဲၤ​မဲၤ​လှိ​ထာ်​က့ၤ
13အဳ​ပွဲၤ​သူ​ကူာ်​ဖဳး​တ​စီာ်, အံာ်​ပီၢ်​ယ​ဒီ​ဆး​သံ​တဲၤ​တ​ကၱာ်. ယ​ဘဲာ်​သ​ဓဳ​လ့ၤ​ကဲၤ​ဒဳ​ပွဲၤ​သူ​ကူာ်​ဖဳး​တ​စီာ်​အီၣ်, အ​စာ်​ဘိ​အ​ပျဲၢ်​အ​ဘီၣ် တ​ပွဲၤ​နဳၤ​ကၱာ်​ယ​ဖၱး​ဓဳၤ​ဖၱး​မူၤ​တ​ပွဲး​ယ​န့ၤ​အ​စဲ. 14ပ​ရၤ​ဆါ အ​ဝၱၤ အ​ကဲ​မၱာ်​အ​က​မဲၤ​ယ​ပၠၤ​ခွံ​ဖဳး​သး ကျး​အံာ်​သံ​တ​စီာ်​နဳၤ, အ​က​မၱာ်​ပီၢ် အ​က​မဲၤ​လှိ​ထာ်​က့ၤ​စဲာ်​တ​စီာ် စီာ်​နဳၤ. 15က​ဘၱာ်​စဲာ်​အ​တဲၤ​ပၢ်​ဖျီး​မံ သံ​မၱာ်​တဲၤ​မဲၤ​သဲ​က့ၤ လၢ်​ခဳး​ကၱာ်​သၱာ်​ဟဲ​ပီၢ်​စ​တဲၤ​ဘဲာ်​သ​ဓဳ​မၱာ်​တၤ​နဲၢ်​နဳၤ​ဧါ. တ​ဘဲာ် တဲၤ​အ​လ​ဝ့ၤ​တ​မံ​နီး, မၱာ်​တဲၤ​ထာ်​ပဳၤ​က့ၤ​တဲၤ​သံ​အ​ကျဲ​လီၤ.
16တ​ကဳာ်​အ​ကါ​ထၱး တ​ဘၱာ်​က​ဘဲာ်​လှူၣ်​ထာ်​အံာ်​မၤ က​ဘၱာ်​စဲာ်​ဒဳၣ်, သ​ဒဲ​ချဳး​မၱာ်​တ​ပွဲး​စ​အဲ​အဲ, ကၱာ်​ဘ့ာ်​မ့​သဳာ်​ခး​ဝံၤ​က​ဘဲာ်​လှူၣ်​ထာ်​အံာ်​မၤ​က​ဘၱာ်​စဲာ်​ဒဳၣ်, သဳာ်​မ့ၢ်​သဳာ်​ဖါ​တ​စီာ်​မၱာ်​တ​ပွဲး စ​အဲ​အဲ. 17သဳာ်​စၤ​ယံး​အ​ဖါ​ဖဳး​တ​စီာ်​စီာ်​ဘဲာ်​ကျၤ​ကဲ​ထဳ​ကၱာ်​စာ်​ဘိ​သဳာ် စၤ​ယံး​အ​မံၤ​အ​ဖါ​ဖဳး​တ​စီာ်​ဘဲာ်​ဖဳး​ဒီး​ကျဳၤ​မၤ​ဒဳ သဳာ်​စၤ​ယံး​အ​ဒဳ​အ​လီၤ​နဳၤ, ထဲၢ်​အ​ခၣ်​ဝံၤ​မၱာ်​သဳာ်​စၤ​ယံး​အ​ဒဳ​အ​ခၣ်​ဝံၤ နဳၤ​ဒဳၣ်, အ​နံၤ​ဘဲာ်​သဳာ်​စၤ​ယံး​အ​ဒဳ​အ​ခၣ်​ဝံၤ​အ​ထဳး​အ​စါ​အ​ခီ, သံ​ပွဲၤ​သူ​ကူာ် ဖဳး​တ​စီာ်​တ​သိ​ထိး​က့ၤ​သဳး​ခၣ်​ဝံၤ​ထဲၢ်​ယူ​ဒၤ​ဖဳး​နီး, ယူ​ဒၤ​ဖဳး​သိ​ထိး​က့ၤ​သံ​ဒဳၣ်​ကီ. 18မဲၤ​က​နဳၤ​ဒဳၣ်, က​မဳၤ​ရှံး​ဖဳး​ပီၢ်​မဲး​အ​မ့ၢ်​ဖဳး​ဖါ​ဖဳး​အ​ထဲ​ဓူၢ်​တ​စီာ်​နဳၤ​မဲး. သံ​က​ပဲၢ် ထာ်​ယၱၤ​ဒီ​သံ​န့ၤ​စာ်​တဲၢ်. သံ​မၱာ်​အ​ဖါ​လီၤ. သံ​တ​အံာ်​ခဳး​အံာ်​အါ ဇၤ​မဲၤ​အ​ခၣ်​ဝံၤ​နီး, မၱာ်​ခၣ်​ဝၱၤ​အံာ်​အါ​သံ​တ​ခီ.
19သံ​က​ဒီၣ်​ဝ့ၤ​မီၢ်. “​သဳး​မ့ၢ်​သဳး​ဖါ​အ​ဘဲာ်​ပ့ၢ်​ထဲ​ဓူၢ် တ​စီာ်​မၱာ် ယ​က​ဘဲာ်​ဒဳ​ဖါ​အ​နံၤ​ခံ​လီၤ.” 20အ​ဘဲာ်​တ​ပွဲး. စ​တဲၤ​ဘူၣ်​တ​အီၣ်​နီး အ​ခဳး​အ​စဲ​စ​ဘဲာ်​ပ့ၢ်​ကဲ​ဒး​ကဲ​ကီ, သံ​က​အီၣ်​မှ့း အီၣ်​ကျဳၤ​ဝ့ၤ​မၱာ်​ဒဳ​သံ​တဲၤ ဘူၣ်​အ​စဲ​လီၤ. သ​ရိ​တဲၤ​အ​ယဳၤ​က​မဲၤ​သွံၣ်​ဓဳၤ​သံ​နဳၤ, အ​မီၤ​မဲၤ​ရှံး​ဆါ​သံ တ​ခီ. 21က​ဘၱာ်​စဲာ်​တ​ခီး​သး​ဒီ​အံာ်​ယူ​ဒၤ​ဖဳး​ထဲၢ်​သဳး​မ့ၢ်​သဳး​ဖါ အ​လံၤ​လၤ​နီး​ဒဳၣ်, သံ​က​မဳၤ​မၱာ်​စ​က​ခီး​သး​ဒီ​အံာ်​ဒီ​သံ​ဧါ. 22ဆီး​သိ ပိၢ်​နှဲး​ပီၢ်​မဲး​ထဲၢ်​က​ဘၱာ်​စဲာ်​မၱာ်​အ​သဳး​ဆိး​သး​ဆိး​ကၱာ်​အ​ခီး​ဝဲၤ ဇၤ​တဲၤ​နဳၤ. ပၠၤ​အ​လၤ​ခူး​တ​စီာ်​နဳၤ, စ​သး​ဆး​လၢ်​ဝၤ​တ​စီာ်​အ​ခဳး, ကၱာ်​စ​သဳး​ဝၱၤ​သး မီၤ​သံ​ခဳး​နဳၤ​ပွ့​စ​သး​လဳၢ်​လီၤ, တ​မၱာ်​ဒဳၣ်​နီး​သံ​က​စာ်​ထၱး​ကီ​ထဲၢ် သံ​ဘဲာ်​ပၢ် ဖျီး​မံ​နဳၤ. 23ကၱာ်​ယူ​ဒၤ​ဖဳး​တ​စီာ်​က​ပၢ်​ဖျီး​မံ​မၤ​အ​တဲၤ​တ​ဘူၣ်​နီး​ဒဳၣ်, စဲာ်​တ​စီာ်​က​ဘဲာ်​ဖိး​ပျီၤ​က့ၤ​ပီၢ်​စ​လ့ၤ​လ့ၤ. မၤ​နဲၢ်​ဒဳၣ်, က​ဘၱာ်​စဲာ်​မၱာ်​အ​မဲၤ​ဇၤ တဲၤ​က​နဳၤ​အ​စဲ​လီၤ. 24သံ​ပွဲၤ​သူ​ကူာ်​ဖဳး​တ​စီာ်​မဲၤ​အ​စာ်​ဘိ သဳာ်​စၤ​ယံး​အ​မံၤ​ကၱာ်​ဘဲာ်​ကျါ ကဲ​လဳၢ်​ဝှါ​ဒဳ​သံ​အီၣ်​နဲၤ​နီၤ​အ​ဖါ​နဳၤ​ဒဳၣ်, သံ​ဘဲာ်​ဖိး​ပျီၤ​က့ၤ​ထဳ ဒဳ​သဳး​စၤ​ယံး​အ​ဒဳ​အ​ဖါ​လီၤ​အ​ခဳး​အ​စဲ​နဳၤ. ယူ​ဒၤ​ဖဳး တ​စီာ်​မဲၤ​အ​စာ် ဘိ​သဳး​အ​ဒဳ​တ​မူၤ​ယဳၤ​အ​စဲ, အ​က​ရှဳ​ဒဳၣ်​ဆဲး​ခီ​စဲာ်​တ​စီာ်​အ​နံၤ ခံ, မၤ​နဲၢ်​ဒဳ​စဲာ်​ဘဲာ်​ဖဳး​ဒီၣ်​ပျဳၤ​ကဲၤ​စ​မ့ၢ်​စ​ဖါ​အ​လံၤ​လၤ​အ​ခဳး​အ​စဲ​နဳၤ.
က​ဘၱာ်​စဲာ်​အ​တဲၤ​ခီၣ်​ဝဲၤ​မှီး​ဘဲာ်​ပၠၤ​လဳ​စါ​စဲး
25သဲ​ပူၤ​ဝ့ၤ​တ​စီာ်, တဲၤ​အ​ယဳၤ​လဳ​စါ​စဲး​အ​နံၤ​ခံ, တဲၤ​အီၣ်​ဟူး အီၣ်​တ​ဓဲ​ထဲၢ်​ယ​သး​အဲး​နံၤ​သံ​က​သၱာ်​ဟဲ​နဳၤ, တ​မၱာ်​နီး​ဒဳၣ်, သံ​က​က​မဳၤ ဒဳၣ်​လံ​ကၱာ်​သံ​မဲၤ​နဳၤ. အံၣ်​စ​ရ့​လး​ဖဳး အီၣ်​တ​စီာ်​အ​တဲၤ​သဳး​ဆိး​သး​ဆိး တ​ဘဲာ်​မၱာ်​အ​သဲး​ယိ​နီး. ပ​ရၤ​ဆါ​ဓၢ်​ပွဲၤ​သူ​ကူာ်​ဖဳး​တ​စီာ်​လ့ၤ​နံၤ​ဝှါ​အ​တဲၤ​ဒိး ပ့​ထာ်​အ​ခၠၱး​လီၤ, အ​လ့ၤ​ကါ အံၣ်​စ​ရ့​လး​ဖဳး​အ​ကါ​ဆဲး​တ​စီာ်​မၱာ်​မၱာ် က​လှိ​ထာ်​တ​ပွဲး​ဘ့​နဳၤ. 26ကၱာ်​ဒီ​အ​ယဳၤ​မၱာ်​ကျဲး​ထဲၢ်​အံၣ်​စ​ရ့​လး​ဖဳး လဳ​စါ​စဲး​က​နံၤ​ဘဲာ်​တဲၤ​လှိ​ထာ်​က့ၤ​နဳၤ. အ​စာ်​ဘိ​စဲာ်​စါ​ထံ​ဒီၣ်,
“​အ​မဲၤ​လှိ​ထာ်​က့ၤ​တဲၤ​တ​ပွဲၤ​ဟဲး​အီၣ်​ဒဳ​စံ​ယဳၣ်​ခီး​လီ​ခဳး​ကၱာ် စ​က​လၤ​ကီ.
စ​က​ပၢ်​ဖျီး​မံ​ကီ​စီၤ​ယၤ​ကဳာ်​အ​ခွံ​သ​လဲ​တ​စီာ်​နဳၤ.
27ကၱာ်​တဲၤ​အ​ယဳၤ​မၱာ်​ယ​တဲၤ​လၤ​ကျၤ​ယ​က​မဲၤ​နံၤ​စဲာ်​တ​စီာ်
ဘ့​ယ​ဖၱး​ကဲ​ဝှါ​စ​တဲၤ​ခီၣ်​ဝဲၤ​တ​စီာ်​နဳၤ.”
28ယူ​ဒၤ​ဖဳး​တ​စီာ်​ဖၱ​ထာ်​က​ဘၱာ်​စဲာ်​အ​သဲ​ဒ့​ဒီၣ်​မၱာ်​အ​ဘဲာ်​ကၠး တဲၤ​သး​လဳၢ်​သး​လၤ​အံာ်​အ​ဝၱၤ​အ​ကဲ​အ​ခဳး​အ​စဲ, ကၱာ်​သံ ခဳး​သံ​စဲ​လီၤ, ပ​ရၤ​ဆါ​အ​စာ်​ဘိ​ပၠၤ​ဘဲာ်​ရိၤ​လှဲး​အ​ခွံ​နဳၤ, က​ဘၱာ် စဲာ်​ဘဲာ်​လီၢ်​ဝ့ၤ​တ​ပွဲး​စဲာ်​ကၱာ်​ဒီ​တဲၤ​ဘဲာ်​လီၢ်​စ​ဖံ​စ​ဖူ​တ​စီာ်​အ​ခဳး​အ​စဲ စဲ. 29က​ဘၱာ်​စဲာ်​တ​ဖၱး​က့ၤ​စ​တဲၤ​အံာ်​လၤ​တ​စီာ်​နီး​ကၱာ်​စ​တ​ဘါ​ချဲး စ​တဲၤ​ရိၤ လှဲး​နီး​နီး 30အ​စာ်​ဘိ​သံ​ဘါ​ချဲး​ထာ်​က့ၤ​လှ့​အ​တ​ဆီး​ခ့​န့း က​ဘၱာ်​စဲာ် အ​လ့ၢ်​နီး​မၱာ်​ခဳ​နူၤ​ယဳၤ​အ​နံၤ​ဘဲာ်​တဲၤ​ခီၣ်​ဝဲၤ​မှီး​ဘဲာ်, ဒဳ​ယူ​ဒၤ​ဖဳး တ​စီာ်​တ​ဆီး​ခ့​န့း​တဲၤ​နီး​အ​စဲ​နဳၤ. 31စာ်​ဘိ​က​နဳၤ​အ​ခီ, ဒဳ​တဲၤ​ခီၣ်​ဝဲၤ မှီး​ဘဲာ်​သံ​နံၤ ဘဲာ်​ကဲၤ​အ​စဲ, ခဳ​နူၤ​ယဳၤ ယူ​ဒၤ​ဖဳး​အ​တ​ဆီး​ခ့​န့း စ​လ့ၢ်​နီး တ​စီာ်​က​နံၤ​ဘဲာ်​ကိာ်​ကီ က​ဘၱာ်​စဲာ် အ​တဲၤ​ခီၣ်​ဝဲၤ​မှီး​ဘဲာ်​နဳၤ. 32က​ဘၱာ်​စဲာ် ဘဲ​နံၢ်​ပၠၤ​လဳ​စါ​စဲး တဲၤ​ကၱ​တၱၢ်​အ​ပူၤ​ဒဳ​စ​တဲၤ​ဆီး​ခ့ န့း လ့ၢ်​သဲာ်​ဟိ​တ​အီၣ်​နီး​အ​စဲ မၱာ်​စာ်​ဘိ​ထဲၢ် စ​က​ဒဲ​လၱၢ်​ပီၢ်​လၢ်​ဝၤ​တဲၤ​ခီၣ်​ဝဲၤ​မှီး​ဘဲာ်​အ​စဲ​နဳၤ​လီၤ.
တဲၤ​ထါ​ထာ်​အံာ်​က​ဘၱာ်​စဲာ်
33က​ဘၱာ်​စဲာ်​အ​တဲၤ​ယဲၤ​ဓၢ်​မၱာ် အ​ဓဳၤ​ခီ​ပွ့း​တဲၢ်. စ​တဲၤ​ဇၤ​တဲၤ ပျၤ​ကၱာ်​စ​တဲၤ​သၱာ်​ဟဲ​ဓဳၤ​ခီ​ကီ​ပွ့း​တဲၢ်. စ​တဲၤ​ကဳ​တဲၤ​ကၠး​တ​စီာ်​မၱာ်​အ​စီး​ကျၱး ကီ​ပွ့း​တဲၢ်. 34စဲာ်​စါ​ထံ​ဒီၣ်,
“​ပီၢ်​ပွဲၤ​သၱာ်​ဟဲ​ဇၤ​က​ဘၱာ်​စဲာ်​အ​တဲၤ​က​မဳၤ​ပွဲၤ.
ပီၢ်​ပွဲၢ်​အံာ်​ကဳ​အံာ်​ကၠး​စဲာ်​ပွဲၤ.
35မၱာ်​ပီၢ်​ပွဲၤ​အံာ်​လီၤ​အံာ်​ဖၱး​စဲာ်,
စာ်​ဘိ​ထဲၢ်​စ​က​ပျ့း​က့ၤ​လၢ်​ဝၤ​အ​နံၤ​ခံ နဳၤ​ပွဲၤ.”
36တဲၤ​လဳ​စါ​စဲး​မၱာ်​အ​အီၣ်​ဒဳ​စ​အီၣ်​လီၤ. အ​ဖၱ​ထာ်​ကိာ်​စဲာ်, ကၱာ် အ​မၱာ်​စ​နံၤ​ခံ​လီၤ. တဲၤ​ဓီၤ​တဲၤ​သ့း​က​ဘဲာ် သဲာ်​ယိ​ဒီ​ဧဲၤ​စဲာ်​လၤ​ထူ​လၤ ပျဳၤ. အၤ​မ့ၣ်.

Currently Selected:

ရိမ့ၤ 11: GBA

Highlight

Share

Copy

None

Want to have your highlights saved across all your devices? Sign up or sign in