မးသဲ 19
19
တဲၤဖၱးစူၤအတဲၤလၤဖြး
(မၢ် ၁၀:၁-၁၂)
1ကၱာ်ဒီတဲၤဖၱထာ်ကဲၤထဲၢ်ဘ့ယ့ၣ်ရှူးဒီဆးဝှါ တဲၤယၱၢ်ဘဲာ်အယဳၤတစီာ်နဳၤ, စဟဲးထာ်ကဲၤကၤလံၤလဲ အက့ၤ ကၱာ်လ့ၤနံၢ်ကဲၤဒဳယူဒၤ အလၢ်ခဳး ထဲၢ်အအီၣ် ယၢ်ဒ့ၣ်ကီၤလီၢ်အလဝ့ၤတခီဝဳၢ်နဳၤ. 2ကၱာ် ဒီပၠၤ အပဳၤအဟီးလိၤကိာ်စလ့ၤ, ကၱာ်စမဲၤမှးက့ၤတပွဲး လၢ်ဝၤ ဒဳနဳၤ.
3ကၱာ်ဒီဖၤရံၤၡဲဖဳးတစီာ်လ့ၤထၱးစဲာ်, စဘဳာ်သး လၢ်ဝၤကၱာ်စဒီ ဝလၢ်ဝၤကယဳၤ, “တဲၤအရါအခဳးအစဲ အမံၤခဳပၢ်ဖျီးမံဇၤပီၢ်အမှဲဧါ.”
4စဒီၣ်က့ၤလၢ်ဝၤကယဳၤ, “လှ့အကါထၱးနဳၤ အဘီာ်လၤပၠၤ တပွဲၤ ဘီၣ်လၤကဲၤအမံၤခဳတပွဲၤကၱာ် အမံၤမှူးတပွဲၤ 5ကၱာ်စဒီၣ်, ‘အယဳၤအခဳးအစဲ အမံၤခဳကဟဲးပၢ်ကီအမဳၤအပာ်, ကၱာ်စကအီၣ်ပျဳာ် ကီ စမှဲ, ကၱာ်ဒီစဲာ်ကၠံၢ်ပွဲၤကဖၱထာ်ကီ တဲၤဖ့းတဲၤ ဟၱးတဓဲလီၤနဳၤ,’ သံတဖး ဘဲာ်စဲာ်ပူၤနှၱနီးဧါ. 6တဲၤမဲၤအန့ၤကနဳၤဒဳၣ်, စတမၱာ်ပ့ၤကၠံၢ်ပွဲၤနီး, မၱာ်တဲၤဖ့း တဲၤဟၱးတဓဲလီၤ. အယဳၤအစဲဒဳၣ် တဲၤထဲၢ်ကဘၱာ်စဲာ် လဲၢ်ပျဳၤ နဳၤပၠၤတမဲၤပၢ်ဒီဧဲၤနီး,” စဒီၣ်လၢ်ဝၤဓဳၤ.
7ပၠၤဒဲစဲာ်, “မဲၤကနဳၤ, စီၤမိၤၡ့မှဲးလၤမၤအမံၤခဳ ကအံာ်ဝှါ အမံၤမှူးတဲၤလၤဖြးအစဲာ်, စနှးဟဲးဇၤ လၢ်ဝၤနဲၢ်.”
8စဒီၣ်ကဲၤလၢ်ဝၤတစီာ်, “အဝၱၤအကဲမၱာ် သံ သဳးဆးသး ဆးအခဳးအစဲ, စီၤမိၤၡ့ အံာ်ကဲၤသံ ပၢ်ဖျီး မံသံမှဲ, ပရၤဆါလှ့အခၣ်ထၱး နဳၤ တဲၤတမၱာ်ကဲၤကနဳၤ နီး. 9မၱာ်ယဒီၣ်သံ, ထဲၢ်ပၠၤအရါ, ကတမၱာ်တဲၤ လၤကမဲာ်အခဳးအစဲနီး, စကပၢ်ဖျီးမံစမှဲကၱာ်စကဖၱး အလဝ့ၤတပွဲၤဒဳၣ်, မၱာ်စလၤကမဲာ်လီၤ. ကၱာ်ဒီ အမံၤခဳ ထဲၢ်အကဖၱးကီအမံၤ မှူးအဘဲာ်ပၢ်ဖျီးမံတပွဲၤနဳၤ, စလၤကမဲာ်ပၠၤမှဲလီၤလီၤ.”
10စပျဲၢ်စဘီၣ်ဒီၣ်စဲာ်, “အမံၤခဳကၱာ်စမှဲအဇဳၤ တဲၤကမၱာ်ကနဳၤဒဳၣ်, တဖၱးဖဳးဖၱးမှဲနီးအဲးဒဳၣ်ချဳတခီ.”
11စဒီၣ်က့ၤလၢ်ဝၤတစီာ်, “ပၠၤတဖၱးကဲာ်ထာ် တဲၤယၱၢ်ဘဲာ်အယဳၤကိအပွဲၤနီး. အဖၱးကဲၤထာ်မၱာ်ပၠၤ ထဲၢ်တဲၤအံာ်လၤတစီာ်လီၤ. 12မၤနဲၢ်ကဒီၣ်ဓဳၤဒဳၣ်, ပၠၤအီၣ်လၤအဆီတဒံၣ်အမဳၤအဖူပူၤအီၣ်တစီာ်, ပၠၤ ဆီ တဒံၣ်ထဲၢ်ပၠၤမဲၤဖၱထာ်နဳၤအီၣ်တစီာ်စီာ်, ကၱာ်ဒီပၠၤအမဲၤအန့ၤဆီတဒံၣ်က့ၤအနံၤခံအီၣ်တစီာ်စီာ်. ပၠၤအဖၱး ကဲာ်ထာ်တဲၤအယဳၤတပွဲၤကဖၱး ဒီ ဧဲၤ.”
ယ့ၣ်ရှူးဟိးဝၱၤအပံၤစဖဳးတစီာ်
(မၢ် ၁၀:၁၃-၁၆, လူၤ ၁၈:၁၅-၁၇)
13ဘ့နဳၤပၠၤလ့ၤအံာ်အပံၤစဖဳးစအီၣ်, စာ်ဘိထဲၢ် စကထဲးလၤ စစူးခီးလၢ်ဝၤတစီာ်အခဳးကၱာ်စသဘဲပီၢ် နဳၤ. မၱာ်စပျဲၢ်စဘီၣ်တစီာ်ဟီကဲၤ ပၠၤ. 14ပရၤဆါ ယ့ၣ်ရှူးဒီၣ်စဲာ်တစီာ်, “ခီးသးဒီပီၢ်အပံၤစဖဳးတစီာ်ကၱာ် မဲၤဒၱာ်ဒါပီၢ်စလ့ၤထၱးယဲၤမဲး. မၤနဲၢ်ကဒီၣ်ဓဳၤဒဳၣ်, မီၢ်ခဳး အထံအက့ၤမၱာ်စဲာ်တစီာ်အနံၤခံ.”
15ကၱာ်ဒီစထဲးလၤဝှါ စစူးခီး လၢ်ဝၤတစီာ်အခဳး ဒဳၣ်, စဟဲး ထာ်ကဲၤဒဳနဳၤ.
တဲၤနံၤအီယီၤအၣ်အတဲၤဘဲာ်ရှဳ
(မၢ် ၁၀:၁၇-၃၁, လူၤ ၁၈:၁၈-၃၀)
16ကၱာ်ဒီစာ်ပီၢ်, ပၠၤတပွဲၤလ့ၤဒီၣ်စဲာ်ကယဳၤ, “ဆရၣ်အအဲး, စာ်ဘိထဲၢ်ယကနံၤဘဲာ်တဲၤအီၣ်သမိ လၤထူလၤပျဳၤနပၤ, ယကမဲၤဘဲာ် တၤအဝၱၤအအဲးနဲၤ.”
17စဒီၣ်လၢ်ဝၤ, “နဒဲမၤယဲၤတဲၤအဘဲာ်ကၠး အဝၱၤအအဲးနဲၢ်. တဲၤဝၱၤတဲၤအဲးအီၣ်တဓဲလီၤ, ထဲၢ်ကဘၱာ်စဲာ်နဳၤ. ပရၤဆါနသးအဲးလ့ၤ နံၢ်တဲၤအီၣ်သမိလၤ ထူလၤပျဳၤအပူၤဒဳၣ်, အီၣ်အံာ်ပီၢ်တဲၤမှဲးလၤတစီာ် နဳၤ.”
18စဒဲလၢ်ဝၤ, “ဒီၣ်လဲၢ်တစီာ်စီာ်.”
ကၱာ်ဒီ ယ့ၣ်ရှူးဒီၣ်, “နတမဲၤသံဘဲာ်ပၠၤနီး. နတလၤကမဲာ်ဘဲာ် နီး. နတအၣ်ဟူၣ်ဘဲာ်နီး. နတခး ဘဲာ်သဲသၱးတဲၤလှီး တဲၤပျဲးအပူၤနီး. 19ဒဳဘဲာ်ယးဘဲာ်ပီၢ်နမဳၤကၱာ် နပာ်. ကၱာ်ဒီနဘဲာ်လီၢ်ဘဲာ်နခီအစာ်ဘိနန့ၤနဳၤ.”
20အဘီာ်လီးဖဳးဒီၣ်စဲာ်, “ယတီၤနံၤတဲၤမှဲးလၤ အယဳၤလဳစါ စဲးလှ့ယပံၤစဖဳးဝ့ၤနဳၤ. ဘဲာ်ဝ့ၤဒီယနံၤခံတၤနဲၢ်.”
21ယ့ၣ်ရှူးဒီၣ်စဲာ်, “နသးအဲးနံၤလ့ၢ်ဓူၢ်ဒဳၣ်, က့ၤ ဆဲကဲပီၢ်နတဲၤလဳစါစဲးကၱာ်အံာ်ပီၢ်အဆဲးညဲဖဳး တစီာ်, ကၱာ်ဒီနတဲၤလံၢ်ဓဳၤပွၱၤသဲကအီၣ်ကီဒဳမီၢ်ခဳးနဳၤ. ဝှါဒဳၣ်, က့ၤဘးလိၤကိာ်ပီၢ်ယလ့ၤ.”
22အဘီာ်လီးဖဳးသၱာ်ဟဲဘဲာ်တဲၤယၱၢ်ဘဲာ်အယဳၤ ဒဳၣ်, စက့း အဳးသဳးအဳးသးကဲၤ, မၤနဲၢ်ကဒီၣ်ဓဳၤဒဳၣ်, စအူစာ်လဲၤခၠါအီၣ်အဲးအီးအီး ကဲၤ.
23ဘ့နဳၤယ့ၣ်ရှူးဒီၣ်ကဲၤအပျဲၢ်အဘီၣ်တစီာ် ကယဳၤ, “ယဒီ ဆးသံအတၱၢ်အမှး, ပၠၤအယဲၤဓၢ်တပွဲၤ ကလ့ၤနံၢ်ဘဲာ် မီၢ်ခဳးအထံ အက့ၤနဳၤ, အပၤဇၱၢ်ကဲၤ လီၤ. 24ကၱာ်ဒီယဒီဆးသံတပျာ်ပ့ၤ, ကီၤ လၤအူ ကလ့ၤနံၢ်နှါဒဲးအကးဇဲအပူၤဒဳၣ် အကၡဳလံ ပၠၤအယဲၤ ဓၢ်တပွဲၤ ကလ့ၤနံၢ်မီၢ်ခဳးအထံအက့ၤအပူၤတခီ.”
25အပျဲၢ်အဘီၣ်တစီာ်သၱာ်ဟဲဘဲာ်ဝှါအယဳၤဒဳၣ်, စထဲးတမိၢ် တမှါကဲၤအဇၱၢ်အဇိၢ်ကၱာ်စဒီၣ်, “မဲၤကနဳၤ ပီၢ်ပွဲၤကနံၤဘဲာ်ဇၤ ဒီတဲၤယဳၤ က့ၤစာ်က့ၤတပွဲၤပွဲၤ.”
26ယ့ၣ်ရှူး စာ်ဝဲၢ်စဲာ်တစီာ်ကၱာ်စဒီၣ်လၢ်ဝၤ, “ပၠၤအနံၤခံအယဳၤတဖၱထာ်ဇၤနီး, ပရၤဆါ ကဘၱာ်စဲာ် အနံၤခံ တဲၤဖၱထာ်ဇၤကိမံၤမံၤ လီၤ.”
27ဘ့နဳၤစီၤပ့းတရူးဒီၣ်ထာ်ကဲၤကယဳၤ, “စာ်ပီၢ်, ဝၤလဲၢ်လၤ တၤကဲဝှါတဲၤလဳစါစဲး, ဝၤလိၤကိာ်ထဳနလ့ၤ. မဲၤကနဳၤဝၤကနံၤဘဲာ်ပီၢ် တၤနဲၢ်.”
28ကၱာ်ဒီ ယ့ၣ်ရှူးဒီၣ်စဲာ်တစီာ်, “ယဒီဆးသံ အတၱၢ်အမှး, ဒဳတဲၤအီၣ်လၤအသဲအပူၤ, ဘ့ပၠၤအဖဳးကဆးနါအီၣ်အတီၤအသ့းအနၤ ပူၤနဳၤ, သံထဲၢ်အလိၤကိာ် ယလ့ၤတစီာ်နဳၤ, သံကဆးနါအီၣ်ဘဲာ်ကီကါ တီးၡံးကၠံၢ် ဒဳအခဳးကၱာ်သံကစံးရးဘဲာ်ကီအံၣ်စရ့လးဖဳးၡံးကၠံၢ်ခွံ. 29ကၱာ်ဒီပၠၤအရါအလဲၢ်လၤတ့ၢ်ကဲအရှံၣ်အဖါ မၱာ်ဝၱၤ, အပူၤအဝ့ၤမၱာ်ဝၱၤ, အမဳၤအပာ်မၱာ်ဝၱၤ, အဖဳးအမှဲမၱာ်ဝၱၤ, အလၢ်ခဳးဓဳၤကျဲမၱာ်ဝၱၤ, ယမံၤအခဳး အစဲတပွဲၤ, ကနံၤဘဲာ်က့ၤကီအလံၢ်အပျာ်တကယဲၤကၱာ် စကနံၤ ဘဲာ်ကီ တဲၤအီၣ်သမိလၤထူလၤပျဳၤ. 30ကၱာ်ဒီ ပၠၤအီၣ်အဲပွဲၤထဲၢ်အမၱာ် ကဲၤအအူဆူးကမၱာ်ကီအကဓူၤလါကၱာ်ဒီအကဓူၤလါကမၱာ်ကီအအူဆူး.”
Currently Selected:
မးသဲ 19: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
