မးသဲ 17
17
ယ့ၣ်ရှူးဘါချဲးစီးကျၱးထာ်အန့ၤ
(မၢ် ၉:၂-၁၃, လူၤ ၉:၂၈-၃၆)
1ကၱာ်ဒီအနံၤသါသိးဝှါဒဳၣ်, ယ့ၣ်ရှူးယဳၤ စီၤပ့းတရူး, စီၤယၤ ကိာ် ကၱာ်စပၱးကီ စီၤယိၤဟၣ် ကၱာ်စထာ်အံာ်တပီၤလၢ်ဝၤဒဳ ခီးလီအထာ် ယၱၤတမဲ အခဳးနဳၤ. 2ကၱာ်ဒီစန့ၤဘါချဲးထာ်စီးကျၱးကဲၤ လၢ်ဝၤတစီာ်အလှီမီၢ်. စမူၢ်ကၢ်ဓူဗူလှၱဆ့းကတြီၤ ကဲၤအစာ်ဘိလူၤမူၤနဳၤ, ကၱာ်ဒီစတဲၤကိတဲၤသီးဘိ တၡံး အစာ်ဘိတဲၤၡံးဖီနဳၤ. 3ကၱာ်ဒီစာ်ပီၢ်, စီၤ မိၤၡ့ကၱာ်ဝံအ့ၤလံယၤပီၤထာ်ထၱးစဲာ်တစီာ်အလှီမီၢ်, စတီၤတီၢ်ထၱးယ့ၣ်ရှူး. 4ဘ့နဳၤစီၤပ့းတရူးဒီၣ် ထာ်ပဳၤကဲၤယ့ၣ်ရှူးကယဳၤ, “ဘၱာ်စဲာ်, ဝၤ အီၣ်ဘ့ယဳၤအမီၤပီၢ်ဒီ, အကဘဲာ်ဘ့ာ်မ့နသးဒဳၣ် ဝၤကပြးဒီဧဲၤရှံၣ်ဖဳး သဳဝၤ, နနံၤခံတဝၤ, စီၤမိၤၡ့အနံၤခံတဝၤ ကၱာ် စီၤအ့ၤလံယၤအနံၤ ခံတဝၤနၢ်.”
5စတဒီၣ်ဝှါဓဲၤနှၱနီး, ကလိၢ်ကလ့ၤ, တဲၤသဘဳာ်အကဲၢ်ကပြီၤ တချဳးလၤကၢ်ဘံာ်စဲာ်တစီာ်, ကၱာ်ဒီ ဒဳတဲၢ်တဘဳာ်အကျဲ တဲၤလ့ၢ်သဲာ် ထာ်ကဲၤတဓဲ အဒီၣ်, “အယဳၤမၱာ်ယဖဳးခဳယဘဲာ်လီၢ်ကဓူၤ, ထဲၢ်အဘဲာ် သဳးဘဲာ်သးယဲၤတပွဲၤနဳၤ. ဆီးခ့န့းပီၢ်စလ့ၢ်.”
6စပျဲၢ်စဘီၣ်တစီာ်သၱာ်ဟဲဒဳၣ်, စလၤခူးတကဳး လၤ ကၱာ်သး ဖူးသးကနၢ်ကဲၤအဇၱၢ်အဇိၢ်. 7မၱာ် ယ့ၣ်ရှူးလ့ၤဘိးထၱးစဲာ်, စတီး ဝဲၢ်လၢ်ဝၤအလီၤ, “ဝဲၢ်ထဳး, ၡံးဆါမဲး” စဒီၣ်လၢ်ဝၤဒဳး. 8ကၱာ်ဒီစစာ်ထာ်တစီာ်ဒဳၣ် စတကဲာ်ထၱးပ့ၤပၠၤတဗွဲနီး, မၱာ်ယ့ၣ်ရှူးတပွဲၤလီၤ.
အ့ၤလံယၤအတဲၤဓဳၤလ့ၤ
9ကၱာ်ဒီဘ့စက့ၤလၤကိာ်ခီးလီနဳၤ, ယ့ၣ်ရှူးမှဲး လၤစဲာ်တစီာ် ကယဳၤ, “ပၠၤအဖဳးတထာ်ပဳၤက့ၤတဲၤသံ အကျဲနှၱနီးအသူသရ့ ဒီဆးမဲးပၠၤ သံစာ်ထၱးတဲၤအယဳၤ တပွဲမဲး.”
10ကၱာ်ဒီ စပျဲၢ်စဘီၣ်တစီာ်ဒီၣ်စဲာ်ကယဳၤ, “မဲၤကနဳၤပၠၤသၱာ် ယူဒၤအတဲၤသီတစီာ်ဒီၣ်မၤ, အ့လံယၤကလၤအူဆူးဘဲာ်မၤနဲၢ်.”
11မၱာ်ယ့ၣ်ရှူးဒီၣ်က့ၤစဲာ်တစီာ်, “အ့ၤလံယၤကလၤနှဲးနှဲးကီ ဟဳ ကၱာ်စပြးနှဲး ကီတဲၤလဳစါစဲး. 12ပရၤဆါ ယဒီဆးသံထဲၢ် အ့ၤ လံယၤလၤဝှါထဳတခီနဳၤ, မၱာ်ပၠၤတသၱာ်ဟဲစဲာ်နီး, ကၱာ်ဒီပၠၤမဲၤအံာ်တရၤ ဇါ ကဲၤစဲာ် အစာ်ဘိအဘဲာ်ပၠၤ အသးနဳၤလီၤ. ပၠၤအဖဳးကခးဘဲာ်ကီကနဳၤ နဳၤ.”
13ဘ့နဳၤစပျဲၢ်စဘီၣ်တစီာ်သၱာ်ဟဲကီ ထဲၢ်စယၱၢ် ဘဲာ်အယဳၤမၱာ်ကဲၤအဖဳးစူထံ စီၤယိၤဟၣ်အဝၱၤအကဲ နဳၤ.
ယ့ၣ်ရှူးမဲၤမှးက့ၤနှဲးဖၱးဘဲာ်အမံၤခဳဖဳးတပွဲၤ
(မၢ် ၉:၁၄-၂၉, လူၤ ၉:၃၇-၄၃)
14ကၱာ်ဒီဘ့စဓဳၤလ့ၤထၱးပၠၤအပဳၤအဟီးနဳၤ, ပၠၤတပွဲၤလ့ၤ ထၱး စဲာ်, စဓဳၢ်နှဳလါ လၣ်ဝၤအလှီမီၢ် ကၱာ်စဒီၣ်, 15“ဘၱာ်စဲာ်, ခီၣ်ဝဲၤ ပီၢ်ယဖဳးခဳတကၱာ်. မၤနဲၢ်ကဒီၣ်ဓဳၤဒဳၣ်, စသၱရှၱးထာ်ကၱာ် စခးဘဲာ်ဆိးဇၱၢ် ကဲၤ. စလၤခူးနံၢ်တပွဲးမှၱးကျဲကၱာ်ထံကျဲတယွဲၤယွဲၤလီၤ. 16ယလ့ၤ အံာ်စဲာ်နအပျဲၢ်အဘီၣ်တစီာ်အီၣ်, မၱာ် စတမဲၤ မှး က့ၤကဲာ်ထာ်လၢ်ဝၤ နီး.”
17ဘ့နဳၤယ့ၣ်ရှူးဒီၣ်က့ၤစဲာ်ကယဳၤ, “အဳပၠၤအတဘူၣ်တဲၤနီး ကၱာ်အဟဲးဖြီးတခွံ, ယကအီၣ်ကိာ် ဘဲာ်သံကါဓၢ်ဓဲၢ်. ယကခီးသး ဒီဘဲာ် သဲဓၢ်ဓဲၢ်. လ့ၤအံာ်စဲာ်ယအီၣ်ဘ့ယဳၤ.” 18ကၱာ်ဒီယ့ၣ်ရှူး ဟီစဲာ် ကၱာ်တဲၤနှဲးဟဲးထာ်ကဲၤစဟၱးကျဲ ကၱာ်ဘ့နဳၤ အခၠၱးဖျီအလှီမီၢ်အပံၤ စဖဳးမှး က့ၤကဲၤ.
19အလ့ၤကါ စပျဲၢ်စဘီၣ်တစီာ်လ့ၤထၱးလၤဓူၢ် ယ့ၣ်ရှူးကၱာ် စဒီၣ်, “ဝၤတနှးဟဲးထာ်ကဲကဲာ်ထာ်မၤ တဲၤနှဲးနီးနဲၢ်.”
20ယ့ၣ်ရှူးဒီၣ်စဲာ်တစီာ်ကယဳၤ, “မၱာ်သံတဲၤဘူၣ် တအီၣ်နီး အခဳးအစဲ. မၤနဲၢ်ကဒီၣ်ဓဳၤဒဳၣ်, ယဒီၣ်သံအတၱၢ်အမှး, သံတဲၤဘူၣ်ကအီၣ်မၤထ့သပျဲာ်ဖျဳးနဳၤဒဳၣ်, သံကဒီၣ်ခီးလီအယဳၤတမဲ, ‘ဟဲးဖျီမံဘ့ယဳၤ ကၱာ် လ့ၤပီၢ်ဒဳနဳၤ,’ ဒဳၣ်အကဟဲးဖျီမံတပွဲး. ကၱာ်ဒီသံနံၤခံ တဲၤအတကဲာ် ထာ်ဇၤနီးကတအီၣ်တပွဲးတမံနီး.”
21ပရၤဆါတဲၤနှဲးအယဳၤတမဳၤ ဘဲာ်နှးဟဲးထာ် ဇၤမၱာ် တဲၤသဘဲကၱာ်တဲၤဒူၣ်တဲၤအၣ်တဲၤအီအပူၤ လီၤ.
ယ့ၣ်ရှူးဒီဆးတီၤလီၤအတဲၤဆးညဲပီၤတီၤကၠံၢ်ပျာ်တပျာ်
(မၢ် ၉:၃၀-၃၂, လူၤ ၉:၄၃-၄၅)
22ဘ့စအီၣ်ပျဳာ်ဝ့ၤလၢ်ဝၤ ကၤလံၤလဲအက့ၤပူၤ နဳၤ, ယ့ၣ်ရှူး ဒီၣ်စဲာ်တစီာ်ကယဳၤ, “ပၠၤအဖဳးကဘဲာ် အံာ်လၤဖျီးမံကီပၠၤအစူးခီးပူၤ. 23ပၠၤကမဲၤသံကီ စဲာ်, ကၱာ်သဳနံၤတနံၤစကထာ်ပဳၤက့ၤကီ,” စဒီၣ် လၢ်ဝၤ ဒဳး.
ကၱာ်ဒီစဲာ်တစီာ်အဳးမှူအဳးရၤဆိးကဲၤ.
တဲၤအံာ်လၤတဲၤသဘဲတဲၤလှူၣ်ရှံၣ်အတဲၤမှူ
24ကၱာ်ဒီဘ့စဓဳၤလ့ၤကပ့းရနီၣ်အူးနဳၤ, ပၠၤအဟဲး တၤတဲၤ လှူၣ်ၡံၣ်ဓဳၤအတဲၤမှူတစီာ်လ့ၤထၱးစီၤပ့းတရူး ကၱာ်စဒီၣ်လၢ်ဝၤ, “သံဆရၣ်တအံာ်တဲၤလှူၣ်ၡံၣ်ဓဳၤ အနံၤခံတဲၤမှူနီးဧါ.”
25“စအံာ်ဟဳ,” စဒီၣ်ဓဳၤ. ကၱာ်ဒီဘ့စလ့ၤနံၢ် ရှံၣ်ပူၤနဳၤ, ယ့ၣ်ရှူးဒီၣ်ၡံအူဆူးကဲၤစဲာ်ကယဳၤ, “စီၤၡံမိၣ်, နကမဳၤပီၢ်စာ်တဲၢ်. လၢ်ခဳးအဆးဖြးတစီာ် ဖၱးဒဳမှူမၱာ်ဝၱၤ, က့ၤမှူမၱာ်ဝၱၤ ပီၢ်ပွဲၤအီၣ်ပွဲၤ. စဖဳးစလံၤ အီၣ်ဧါ, မၱတမၱာ်နီးတၱတမဲအီၣ်ဧါ.”
26“တၱတမဲအီၣ်,” စီၤပ့းတရူးဒီၣ်ဓဳၤ.
ယ့ၣ်ရှူး ဒီၣ်စဲာ်, “မဲၤကနဳၤ, ဖဳးလံၤတစီာ် အီၣ်လှိအီၣ်လၤတပွဲး. 27ပရၤဆါဝၤခဳး ဝၤစဲ, စဲာ်တစီာ် ကတကမဳၤကမဲးပီၢ်တဲၤနီးနဳၤ, လ့ၤပီၢ်ဒဳ ပဲာ်လဲာ်ကၱာ် ဝှ့လါပီၢ်တခွဲ, ကၱာ်ဒီဖၱးဓၢ်ဖဳးထဲၢ်အကျၢ်အူဆူးတဘီနဳၤ ကၱာ်ဒီဘ့နဘးဖးအဧီၢ်ဗူနဳၤ, နကပာ်နံၤကီ ဝှိတဘ့ၣ်. ဖၱးကၱာ်အံာ် ပီၢ်စဲာ်တစီာ် ယနံၤခံ, ကၱာ်နနံၤခံ.”
Currently Selected:
မးသဲ 17: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
