သဓဳဖဳး 14

အံၤကနံၤအူးနံၤဘဲာ်တဲၤသိၣ်တဲၤသီ

1စဲာ်တစီာ်ထာ်ကဲၤဒဳယူဒၤဖဳးအဘူၣ်ဘျီၣ်အပူၤ အအီၣ်ဒဳ အံၤကနံၤအူးနဳၤ, အစာ်ဘိစမဲၤကဲၤဒဳအၣ်တံၤအီာ်အပူၤနဳၤ, စဲာ်တစီာ်ဘဲာ် နံၤပီၤနံၤကဲၤပွ့ယူဒၤဖိးကၱာ် ကြံးခ်ဖဳး အီၣ်အဲးအီးအီးဖၱထာ်ကဲၤအဘူၣ် တဲၤတစီာ်နဳၤ. 2ပရၤဆါယူဒၤဖဳးတစီာ်စီာ်တဘူၣ် ကဲၤ နီး, မၱာ်စမဲၤပၠါပွဲၤသူကူာ်ဖပးတစီာ်အတဲၤကမဳၤ အကထာ်ဒ့ဒီၣ်သဲပူၤသဲဝ့ၤတစီာ် နဳၤ. 3စီၤပီလူးကၱာ်စီၤဘၢ်နါဘၤအီၣ်ဝ့ၤတဒဳးတဆး, စဒီထိးဒီတလဲၤခူသကျးကဘၱာ်စဲာ်အနံၤခံ, ကၱာ် ဒီဘၱာ်စဲာ်သိထိးတပွဲးစဲာ်တစီာ် ကၱာ် စလှူၣ်စတါ အကမဲၤတဲၤပီၤတဲၤပၤအစီးကျၱးစီးရှဲအမဳမဳၤ နဳၤ. 4ပၠၤအအီၣ်ဒဳအူးပူၤတစီာ်ပ့ၢ်ဖးကဲၤ အန့ၤကၠံၢ်ကီလၢ်, အသိထိးယူဒၤဖဳး အီၣ်တစီာ်, အလဝ့ၤတစီာ်မၱာ်အသိထိးပွဲၤသူကူာ်ဖဳးတစီာ်နဳၤ.

5အီၣ်ယၱၢ်တပျာ်ပွဲၤသူကူာ်ဖဳးတစီာ် ကၱာ်ယူဒၤဖဳးတစီာ် ကဳ ထာ်ကၠးလၤယံၢ်ပျဳာ်ကဲၤ အခဳးအန့ၤတစီာ်အကမဲၤထၱးမဲၤပဳၤကၱာ်ဝှ့သဓဳ ဖဳးတစီာ်ကၱာ်လဳၤ. 6ဘ့အပျဲၢ်အဘီၣ်တစီာ်သၱာ် ဟဲတဲၤအယဳၤဒဳၣ်, စဲာ်တစီာ် စွဲးလ့ၤအီၣ်ကိာ် ကဲၤဒဳအူးလူစတြၤကၱာ်ဒ့ၢ်ဘ့ၤအူးကၱာ်ဒဳဖါအအီၣ် ဘိးထၱးဘိးဝၤတစီာ်နဳၤ. 7ဒဳနဳၤစဲာ်တစီာ် ဒီၣ်အူဒီဆးကဲၤတဲၤ သးလဳၢ်သးလၤအံာ်အဝၱၤအကဲ.

ဘ့လူစတြၤအူး

8ဘ့လူစတြၤအူးနဳၤ, ပၠၤအခၣ်ခီး ဇ့ၤကၱာ် အတခဲသၱးနီးလှ့ အအီၣ်လၤတ့ၢ် သဲနဳၤ အီၣ်ကဲၤတပွဲၤ. 9စဆးနါလၤအီၣ်ကၱာ် ဆီးခ့န့း ကဲၤစီၤပီလူးဒီထိးတဲၤကၱာ်စီၤပီလူး စာ် ထၱးကဲၤစဲာ်. စီၤပီလူး စာ် လၤတံၤလၤဆးဝှါစဲာ်, စစာ်ထၱးကဲၤလၢ်ဝၤအတဲၤဘူၣ် အကမဲၤမှးက့ၤ စဲာ်နဳၤဒဳၣ်, စကဲာ်ဧဳၤထာ်ကၱာ်ဒီၣ်လၢ်ဝၤ, 10“ဝဲၢ်ထဳးကၱာ်ဆီထဳး အီၣ်ပီၢ်,” စဒီၣ်လၢ်ဝၤဓဳၤ ကၱာ်အနဳၤတပွဲၤခဲလ့ၤခဲက့ၤကဲၤ. 11ဘ့ ပၠၤတစီာ်စာ် ထၱး စီၤပီလူးမဲၤတဲၤအယဳၤဒဳၣ်, စဲာ်တစီာ်ကဲာ်ဧဳၤထာ်ဒဳလူၤ ကီၤနံဖဳးအလ့ၢ်ကယဳၤ, “ပၠၤအယဳၤတစီာ်မၱာ်ဘၱာ်စဲာ်အသိပျိၤထာ်အန့ၤ ပၠၤကၱာ် အအလၤထၱးဝၤတစီာ်နဳၤ,” စဒီၣ်ဓဳၤ. 12စယဳၤကဲၤစီၤဘၢ် နါဘၤအမံၤဘၱာ်စဲာ်စူ, စီၤပီလူး မၱာ်အယၱၢ်ဘဲာ်အံာ်တပွဲၤနဳၤဒဳၣ်, စယဳၤ လၢ်ဝၤ ဘၱာ်စဲာ်ဟ့ၢ်မ့ၤ. 13ဘၱာ်စဲာ်စူအပၠၤလှူၣ် ဘၱာ်စဲာ်, အဇရၢ်အီၣ်ဒဳအူးအခး ကျဲၢ်ချဳတစီာ်လ့ၤအံာ်ကဲၤဗဳၤဖဲကၱာ်ဖီသကွါဒဳခး ကျဲၢ် ထၱး, ပျဳာ်ပျဳာ်ကၱာ်ပၠၤအပဳၤအဟီး, စာ်ဘိထဲၢ်စဲာ်တစီာ် ကလှူၣ်ထာ်အံာ်အပျဲၢ်အဘီၣ်တစီာ်အနံၤခံနဳၤ.

14ဘ့အပျဲၢ်အဘီၣ်စီၤဘၢ်နါဘၤကၱာ် စီၤပီလူး သၱာ်ဟဲဘဲာ် တဲၤဖၱထာ်ကနဳၤဒဳၣ်, စထဳး ထဲးလဲးစရှံာ်ဒဳ, စွဲးလ့ၤဒဳ ပၠၤအပဳၤကျဲကၱာ်ဟး ဖူး ထာ်, 15“အသီၣ်တစီာ်, သံကမဳၤမၱာ်သံ မဲၤကဲၤတၤနဲၢ်. ဝၤ မၱာ်ပၠၤအစာ်ဘိသံလီၤ. ဝၤ လ့ၤအံာ်သံတဲၤသးလဳၢ်သးလၤအံာ်အဝၱၤအကဲ အကမဲၤနံၤသံ အကပၢ်ဖျီးမံတဲၤယီၤတဲၤယၤ အနှးနှါတစီာ်ကၱာ် အကဓဳၤ ထၱးကဘၱာ်စဲာ် အဘီာ်လၤမီၢ်ခဳး, လၢ်ခဳး, ပဲာ်လဲာ်ကၱာ်တဲၤအီၣ်အပူၤလဳ စါစဲးတပွဲၤနဳၤ. 16လှ့အကါထၱနဳၤ စအံာ်ပၠၤလဳစါစဲးအကလ့ၤအကျဲးကၱာ်အန့ၤလီၤ. 17မဲၤနီၣ်သီဓဳၤနှီနူၤ, စတလဲၢ်လၤဓီသံ အကသၱာ်ဟဲ စမဲၤနံၤကဲၤသံနံၤခံတစီာ်နဳၤနီး. စအံာ်လၤနံၤသံ ဝှဲးဒဳမီၢ်ခဳးနဳၤ, စမဲၤနံၤသံဘူၣ်ဟူ ကကဲာ်ထာ်, စအံာ်သံတဲၤအဲးတဲၤအီကၱာ် စမဲၤ နံၤသံ တဲၤမီၤ,” စဒီၣ်လၢ်ဝၤဓဳၤ. 18စဲာ်တစီာ်ဒီၣ်ယၢ်ယၢ်နီၣ်သီတဲၤယၱၢ် ဘဲာ်ကယဳၤနှီနူၤ, စတမဲၤဒၱာ်ဒါကဲာ်ထာ်ရှဳကးကၱးတပွဲး ပၠၤအပဳၤ အဟီး အလ့ၢ်လှူၣ်ထာ်အံာ်စဲာ်တစီာ်နီး.

19ယူဒၤဖဳးအအီၣ်ဒဳအၣ်တံၤအီာ် အဘဲာ်ကၠးက့ၤပံၤစံၤဒံကၱာ် အံၤကနံၤအူးတစီာ် ဓဳၤလ့ၤကၱာ်သကါထာ်ကဲၤပၠၤထာ်ဒ့ဒီၣ်အပျဲၢ်အဘီၣ် တစီာ်နဳၤ. စဲာ်တစီာ်ဝှ့ဝှါစီၤပီလူးကၱာ်လဳၤ, စကမဳၤမၱာ်လၢ်ဝၤသံထဳဒဳၣ်, စစွံးတဟိးထာ်လၢ်ဝၤ ဒဳအူးအချဳနဳၤ. 20ပရၤဆါဘ့အပျဲၢ်အဘီၣ် တစီာ်လ့ၤဒဳၣ်အီၣ်ခွဲဘးစဲာ်နဳၤ, စီၤပီလူး ဝဲၢ် ထဳးကၱာ်က့ၤဘးကဲၤဒဳအူး ပူၤ နဳၤ. အလ့ၤကါတနံၤစဲာ်ကၱာ်စီၤဘၢ်နါဘၤလ့ၤကဲၤဒဳဒ့ၢ်ဘ့ၤအူးနဳၤ.

တဲၤက့ၤဘးဒဳစူၤရံက့ၤ

21စဒီထိးဒီတလဲၤဝှါတဲၤဒဳအူးအနဳၤ တအူးအပူၤကၱာ် မဲၤဖၱ ထာ်ဝှါပၠၤပွ့တမံၤအပျဲၢ် အဘီၣ်ဒဳၣ်, စဲာ်တစီာ်က့ၤဘးကဲၤဒဳလူစတြၤ အူး, အံၤကနံၤအူး ကၱာ်ပံၤစံၤဒံက့ၤအၣ်တံၤ အီာ်အူးနဳၤ. 22စမဲၤ သဲထာ်က့ၤဝှါ အပျဲၢ် အဘီၣ်တစီာ်အသး, စအံာ်ခဳးအံာ်အါလၢ်ဝၤ အကအီၣ်မှ့းအီၣ်ကျဳၤတဲၤဘူၣ်တဲၤနဲၤအပူၤ. “ဝၤကပာ်ထၱးဘဲာ်တဲၤပၤတဲၤ ဆဲ ပွ့တမံၤ, တချူ ကၱာ်ဝၤကလ့ၤနံၢ်မီၢ်ခဳးအထံအက့ၤနှၱနီးနဳၤ,” စဒီဆး လၢ်ဝၤတစီာ်ဓဳၤ. 23ဒဳတဲၤအီၣ်ပျဳာ် ကိအပျဳာ်အခဳးနဳၤ, စလဲၢ်ထာ် ကဲၤအဓဳၤအပွ့ၤ တစီာ်, စသဘဲထာ်ကၱာ်ဒူၣ်တဲၤအၣ်တဲၤအီ, ဝှါ စအံာ် လၤကဲၤလၢ်ဝၤတစီာ် ဘၱာ်စဲာ်ထဲၢ်စဘူၣ် ကဲၤတပွဲၤအစူးခီးပူၤနဳၤ.

24စီၤပီလူးကၱာ်စီၤဘၢ်နါဘၤလ့ၤနံၢ် ကိာ်ဝှါပံၤစံၤဒံက့ၤအပူၤ ဒဳၣ် ဓဳၤလ့ၤကဲၤဒဳ ပၣ် ဖူၤလံက့ၤနဳၤ. 25စဒီၣ်အူဒီဆးဝှါတဲၤဒဳ ပ့ၢ် က့ၤအူးနဳၤဒဳၣ်, စက့ၤလၤကဲၤဒဳ အးတါလံၤ အူးနဳၤ, 26ကၱာ်ဒဳနဳၤစဒီၣ်ကဲၤသဲပီၤထိဓဳၤ အၣ်တံၤအီာ်အူး, ထဲၢ်စဘဲာ်သဓဳကဲၤကၱာ်ဒီ ကဘၱာ် စဲာ်အတဲၤလှူၣ်တဲၤတါအခဳးအစဲ, စမဲၤပ့ထာ်ကဲၤခဳနူၤယဳၤနဳၤ.

27ဘ့စဓဳၤက့ၤနဳၤ, စယဳၤလၤဓ့ၢ်ပျဳာ် ကဲၤ တဲၤအီၣ်ပျဳာ်ကၱာ် ဒီ ဆးလၤကဲၤထဲၢ် ကဘၱာ် စဲာ် မဲၤနံၤကဲၤစဲာ်တစီာ်တၤနဲၢ်ကၱာ် ဘါထာ်နံၤ ကဲၤ ပွဲၤသူကူာ်ဖဳးတစီာ် တဲၤဘူၣ်အခးကျဲၢ် စာ်တဲၢ်နဳၤ. 28ဒဳနဳၤစအီၣ်ကိာ်ကဲၤအပျဲၢ် အဘီၣ်တစီာ်အကါ အီၣ်ယၱၢ်အီၣ်ကၠးဒဳး.

Currently Selected:

သဓဳဖဳး 14: GBA

Highlight

Copy