ROM 2
2
Khazing Biechina Aa Dangpa
1 #
Mat 7.1; Luk 6.37 Caacuonakawta ahung nama cuo zaw ta a sie khu'a va ung ciy; tahematapakieca malie cunglie bieripana nama hnyi tiyta, ama tuepa kha nama tue ra thluo nakawta niema mamaapa khana sue bie namaa ripa pata a cuo. 2“Niema ta, hing haapa hmang a tuepa tie cunglieta Khazing biechina hing aa hmuopa tana a cuo,” nama ta. 3Ahungtama i cuo tapa kha namaa rue buo ma? Malie kha bie nama ripa tiyta iema tuepa kha nama tue ra thluo nakawta Khazing bieripana taata ima law thlu aa ta pata namaa rue ma? 4Acuolikie a lepa a duena hne a palungpasiyna hne a ngiechina hing siysaa ri li pata aw kanaa ung ciy? Khazing duena ca sue a ngiepachiyna luo caa chiytuv tana a cuo tapa kha pachang va ung ca ma? 5Cuorasala nama palung a le tuv nakawta Khazing ta adangna hne bie a chi ning, Khazing hihaana ning thueta nama cunglie a tlung riypa khana namaa pacung chiy tyly pata a cuo. 6#Slm 62.12; Ptb 24.12 Pakha cyicuo kha ama tuena haata a thung'a yi. 7Hmang phapa kha palung pasiysa pata tue yi te rungnaana, pa-uvsathyina hne a ra khu lipa chuozaa hringna a huvpa tie ca Khazing ta chuozaa hringna kha a pi'a yi. 8Ama kaw dyi a pacuo te biehmisipa kha thuse pata pha lina a tuepa tie cunglie ca Khazing pathiylingna hne a ie ta a iepa a hihaana kha a tlung aa. 9Pha lina a tuepa bangkhuo ca ruvnaana hne te-angna ama hmung aa; Judah ming ta hmung taa'a yi te Jentail ming ta ama paziy aa. 10Cuorasala phana a tuepa bangkhuo ca rungnaana hne pa-uvsathyina hne thlaalungna kha ama hmung aa. Judah ming ta hmung taa'a yi te Jentail ming ta ama paziy aa. 11#Pbp 10.17 Khazing ca ahung hmie hmuo mang vyi.
12Phungbie li pata suena a tuepa tie ca phungbie li pata ra'a yi te, phungbie rawlieta a suepa tie ca phungbie ta bie ripa pata ama cuo aa. 13Tahematapakieca Khazing hmiekunglie aa dangpa tie ca phungbie a thyipa tie khata cuo va yi, phungbie a ziypa tie kha na duopacu pata a cuo yi. 14Phungbie a hnyi lipa Jentail ming ta, phungbie hmuo hnyi li pata aw raalaa yi sala, phungbie ta tue ung la a tapa kha palung thusa pata ama tuepa ca iema cuota phungbie na a cuo thluo. 15Phungbie ta tue ung la a tapa kha ama palung chungliena aa cape tapa kha iema ta ama paluo sa. Ama chiepha thleduona khata ama tuepa hing aa hmuo ta pata aa daakhyi ning yi aw te, ama ruenapa khata sue a be ning yi hne a paduo ning yi a aw. 16Kama i phupa thuophaa haa hingta, Khazing ta Zingsuv thueta cawsaa palungruv ruena kha bie a ripa ning thue ca cahaaca tana a cuo aa.
Judah Ming Hne Phungbie
17Caacuonakawta niema hne niema kha Judah ming a ta ung cate, phungbie lie kha a daa ung cate, Khazing hne namaa pazuena kawlie kha namaa pale. 18Cakhutaata a khingna kha pachang ung cate phungbie ta pacuvpa nama cuo nakawta khaapama a pha ce tapa kha namaa tlaw the. 19Niema hne niema kha mingcue tie luochiytuv, a zingna lie a awpa tie cuota khena, 20a ngaapa tie pasiypa-yatuv hne haatiy tie pacuvtuv tana ma cuo tapa kha namaa pachang, tahematapakieca phungbie chunglie hing pachangna hne biehmisipa a tling pata ma hnyi nama ta. 21Cakhutaata niema malie a pacuvtuv saya zaw, niema'a na niema ca haw a pacuv'a nang va ung ca ma? Paruv khah ung ta pata ri ung cate ma niema ta nama paruv? 22Nungvaathingsuena tue khah ung ta ung cate ma niema ta nungvaathingsuena nama tue? Kuvtuezuv ca duvsa ung cate ma biena-ing chechiy ca nama paruv? 23Phungbie lie a palepa tie, phungbie para ung cate ma Khazing ming nama pachie? 24#Isa 52.5 Caapathe lieta, “Niema Judah ming kawlie tana Jentail ming hrawlie Khazing thuo a chi,” a ta.
25Phungbie nama ziy kie muo nama vangdaw a tena ca muo a hnyi'a ta; phungbie nama para kieca vangdaw a te lipa hne tana namaa lu aa. 26Caacuonakawta, vangdaw a te lipa paa ta phungbie kha a ziy kieca vangdaw a tepa paa haata rue pata cuo'a va ma? 27Saapa lie vangdaw aa te li thluo pata phungbie a ziypa tie ta phungbie caa-uv hnyi te vangdaw aa te raalaa pata phungbie a parapa tie kha suebie aca ripa'a yi. 28Caacuonakawta leluo cuonapa taa dyi ta Judah ming a cuopa ca Judah ming hmisipa ta cuo li pata leluo saapa ta vangdaw a tena ca vangdaw a tena hmisi ta cuo vyi. 29#Pbp 30.6 A chung luo taata Judah ming a cuopa kha Judah ming hmisipa ta cuo te, vangdaw a tena hmisipa ca pathiypalung hne aa patuvpa hmang tana a cuo, thlaapa hmang ta cuo te caa ta capepa bie ta cuo vyi. Cahaapa cawsaa ca a hrang taata cuo li pata Khazing'a taata pathuosana kha a hmung aa.
Lutuv Holy Bible © Bible Society of Myanmar, 2023.