MARKA 15

Pilat Hmiekunglie Zingsuv

(Mat 27.1-2,11-14; Luk 23.1-5; Jhn 18.28-38)

1Mawdiychie ta tluobyi lepa tie ca uvthyi tie, phungbie saya tie hne bieripatuv phuv tie hne khata a hmya yi te khue ama khuo. Zingsuv ca cakhiy yi te, a dale yi te Pilat kuv luo kha ama pi. 2Pilat ta, “Judah ming siepahruo ta na cuo ma?” a ta. Zingsuv ta, “Na ripa haata i cuo,” a ta. 3Tluobyi lepa tie ta Zingsuv kha sue a hluvsa ama phaw. 4Pilat ta, “Palie riypa hnyi va ca ma? Kha tluv tama sue aca phaw yi tapa hing mang tie,” a ta pakhaa. 5Cuorasala Zingsuv ta a palie ngiethie li nakawta Pilat ca a nang ta a uo.

Pilat Ta Zingsuv Kha Vieluo Lie Thie Riypata A Pi Yi

(Mat 27.15-26; Luk 23.13-25; Jhn 18.39—19.16)

6Lawsena pyi kyry ta Pilat ta thaw a tlapa tie chungtaata zaapuv ta ama hiepa pakha kha a pathliepa taw yi. 7Capa cuo ning ca Barabbas ama tapa, rie thu ningta cawsaa zaa thiepa paa ca rie a thu rapa a hrangpa tie hne khata thaw ama tla. 8Caacuonakawta cawsaazaapuv ca a vya hmya yi te Pilat kha iema cuota a tue tawpa haata tue riypata amaa hie. 9Pilat ta, “Judah siepahruo hing ca pathliepa yi ang sala nama khing ma? a ta yi. 10Tluobyi lepa tie ta a kuv chung luo Zingsuv ama vya pipa hing i-aw ama hnyi nakaw tana a cuo tapa kha Pilat ta a phasa pata a pachang. 11Cuorasala tluobyi lepa tie khata cawsaazaapuv kha Barabbas kha pathliepa hriy riypata Pilat'a luo hie riypa kha ama pasu. 12Pilat ta cawsaazaapuv kha, “Caacuokieca Judah siepahruo nama tapa paa hing tuokhaata tue se tapa ma ina khing ung ciy?” a ta. 13Iema ta, “Vieluo lie thie tie!” ta pata khuopuv ta ama khi. 14Pilat ta, “Khaapanakawma? Khaapa suena ma a tue?” a ta yi. Cuorasala, “Vieluo lie thie tie!” ta pata khuo vie ta ama khi. 15Pilat ta cawsaazaapuv palung kha a patling khing nakawta Barabbas kha a pathliepa yi. Zingsuv ca sungpe ta a chi khutaata vieluo lie thie riypata a pi yi.

Rieka Tie Ta Zingsuv Ama Tue Hyalya

(Mat 27.27-31; Jhn 19.2-3)

16Rieka tie ta Zingsuv ca muokiy byipa tlawhmie luo kha a ngiekhyi yi te, (uvtuv byi zung lepa) ama riekaphuv viesaa bangkhuo kha ama u ra. 17Zingsuv ca pang sepa kha ama pabuv; ahling ta byilakhuv kha phie yi te a luv lie ama pakhuv. 18Saluo pi yi te, “Judah siepahruo ca a hringtaa pasiy se!” ama ta. 19Asung ta a luv lie kha chi yi te, ama paciy ta ama pacha, a hmiekunglie ama pakhuv pane yi te amaa bie. 20Ama tue hyalya khutaata a pang sepa kha hlepa yi te ama a caw kha ama pahryi pakhaa. Cakhutaata vieluo lie thie riypata ama pyakhyi.

Zingsuv Vieluo Lie Ama Thie

(Mat 27.32-44; Luk 23.26-43; Jhn 19.17-27)

21 # Rom 16.13 Khyta taata khypuv luo a vaw te amaa thaalie a vya cakuolepa, Sairin khy ming, Alekzandar hne Rufas paa, Simon kha Zingsuv vieluotung ca hripuo yi te ama papuv sa. 22Cakhutaata Zingsuv ca Golgotha ama tapa hmang luo kha ama phakhyi (Golgotha a siyluo ca luvruv hmang tanapa tana a cuo). 23Capa hmang lie ca mura hne ama pyapa mingsuvtiy kha ama pi; cuorasala dang khing vyi. 24Cakhutaata ama ca vieluo lie kha thie yi te, a caw kha vyisung a da yi te amaa re.#Slm 22.18

25Vieluo lie ama thiena cuo ca maw siymaluo pacaky cuo lieta a cuo. 26Zingsuv sue ama phawnapa caa ca, “Judah Siepahruo,” ta pata a cuo. 27Damie tie pahning kha a cacuoluo kuo ta pakha, a cavyiluo kuo ta pakha vieluo lie ama taa ra. 28#Isa 53.12 #15.28 Kuvtie caataw chekha tie lie ca tluo 28 hing a bechiy (Cahaacata Caapathe ta, “A suepa zaw hrawlie ripuopa ta a cuo,” a tapa ca a tling.) 29#Slm 22.7; 109.25; Mar 14.58; Jhn 2.19 A hmungpaapa tie khata ama ama luv tisue yi te, ama bieke ta, “Biena-ing kha pacing diy'a angte ning thung chung ta i sa pakhaa diy aa a tapa, 30nama hne nama kha a khuo la vieluo cung taa khata za cung tie nie!” ama ta. 31Cahaacata tluobyi lepa tie hne phungbie saya tie zaw ta Zingsuv kha tue hyalya yi te, “Malie ca a khuo yi, ama hne ama ca a khuo khu vyi. 32Israel ming Siepahruo ca ata hingta vieluo cung taata za cung sala muo, hmung'a pate ma zang'a ta,” ama ta. Vieluo lie ama taa rapa pahning tie zaw khata ama kha ama tue hyalya ra.

Zingsuv Thiyna

(Mat 27.45-56; Luk 23.44-49; Jhn 19.28-30)

33Ningchung khingkhuo taata zuoluo siymaluo pathung te alyicung yalya lie zingna a tlung. 34Zuoluo siymaluo pathung lie kha Zingsuv ca, “Eloi, Eloi, lema sabakthani?” ta pata khuopuv ta a khi. A siyluo ca, “I Khazing, i Khazing, khaapanakawma ina thaw ciy,” tana ta a cuo.#Slm 22.1 35A thaalie a daapa chekha ta thyi yi te, “Naathlie tie ung, Elijah na a u,” ama ta. 36#Slm 69.21 Cawsaa pakha ca vaa ruo te pangcaw kha mingsuvtiy thuepa lie a naw khutaata, aarasung daw lie kha ciypuo te Zingsuv kha dang riypata a pi. “Huo pachiy ung, ama kha vieluo cung taata pachung riypata Elijah ca a vaw'a ma tapa kha mang'a ung puv,” a ta. 37Zingsuv ca khuopuv ta khi te a huv a ci. 38Biena-ing pangzu ca a luv taata a lie te che hning ta aa che.#Pya 26.31-33 39A hmiepachaw pata a daapa riebyipa ta Zingsuv a thiynazya kha a hmung tiyta, “Hingpa paa hing Khazing Sacapaa hmisi tana a cuo,” a ta.

40Capa lie ca luohlaa taata a suopa canung chekha zaw ama aw. Iema hrawlie ca Mary Magdalin, Jeim a syi viepa hne Joses ama nung Mary, hne Salome zaw ama aw ra.#Luk 8.2-3 41Zingsuv Galilee lie a aw ning kha za ziy yi te zaa mangsang tawpa ta ama cuo. Jerusalem taata a khawpa a hrangpa canung a hluvpuv zaw capa lie ca ama aw ra.

Zingsuv Pabyna

(Mat 27.57-61; Luk 23.50-56; Jhn 19.38-42)

42Sabbath hluopa ning, Atingdawna ning zuoluo a vya chiy tiyta, 43bieripatuv uvthyi zaw hrawlieta ama pa-uvsathyipa pakha, Khazing pena a tlung riypa a huo nguoluopa, Arimathea khypa Josef ca riephasa pata Pilat'a luo kha vaa te Zingsuv riyy kha a hie. 44Pilat ca Zingsuv a thiy tli tapa kha a thyi tiyta khuopuv ta a kharue haa te, riebyipa kha u te a thiyna taata a pasiy tli ma ta pata a hiehriy. 45Riebyipa'a taata a thiy tli tapa bie a thyi khutaata Josef kha a riyy ca a pi. 46Josef ta pawruo pang zung kha calyi te a riyy kha pachung te a pahlaw khutaata alung ama ryipa thluo chunglie kha a paby. Cakhutaata lungkhaakhuv ta thluokhuepakaa ca a khaa siy pakhaa. 47Mary Magdalin hne Joses nung Mary ta ama pabyna hmang kha ama hmung.

Currently Selected:

MARKA 15: LNT

Highlight

Copy