LUKA 4

Zingsuv Pasupaliy Angna

(Mat 4.1-11; Mar 1.12-13)

1Zingsuv ca Thlaapa Pathe ta a bi pata Jordan cavaa taa khata vya kaa te Thlaapa ta ruocaapa luo kha a sikhyi. 2Capa lie ca khachie ta ning sawliy chung a pasupaliy. Capa chung bangkhuo ca khaapahmuo ning li pata a aw nakawta capa cuo a chuo pahne ta a nang khuopuv ta a diy. 3Khachie ca ta, “Khazing sacapaa ta na cuo kieca hingpa alung hing viechuo ta aa li riypata naw pi tie,” a ta. 4#Pbp 8.3 Zingsuv ta palie te, “Caapathe lieta, ‘Cawsaa hing sa dyi ta hring vyi,’ ta pata a capepa kha,” a ta.

5Cakhutaata khachie ta aa suona luo kiekhyi te sungkhata lieta chuelyi pena bangkhuo kha a pahmung sa. 6Khachie ta, “Nama kha iema rungnaana hne nawhnyina bangkhuo hing ica pi aa; tahematapakieca hingpa hing kama'a luo pipa cuo tli te, i khingpa ahunghmuo i pi khu yi. 7Cakhutaata inaa bie ca kieca na huopa tana a cuo diy aa,” a ta. 8#Pbp 6.13 Zingsuv ta palie te, “Caapathe lieta,

‘Abyipa, na Khazing kha abie la,

ama re dyi kha hrie tie,'

ta pata aa capepa kha,” a ta.

9Cakhutaata khachie ta Jerusalem luo kha sikhyi te Biena-ing dawthlue lie kha a chi khutaata, “Khazing Sacapaa ta na cuo kieca hingpa taa hingta a thawpathla tie; 10#Slm 91.11-12 tahematapakieca Caapathe ta,

‘Khazing ta nama cuo hingta

aa vuoming kha naw pi'a yi te,

11iema ta ama kuv ta aca caba'a nakaw yi te, na phyi kha alung lie a phaw'a vaciy,’ a ta,” a ta.

12 # Pbp 6.16 Zingsuv ta, “Caapathe ta, ‘Abyipa, na Khazing kha dyapasya khah,’ a ta,” ta pata a palie. 13Khachie ca pasupaliyna phangphang a pachuo khutaata cuophaa a hmung pakhaana te ta cuo kha chung Zingsuv kha a thuse.

Zingsuv Ta Galilee Lie Rehrie Aa Pathu

(Mat 4.12-17; Mar 1.14-15)

14Cakhutaata Zingsuv ca Thlaapa Pathe cahrana hne a bi pata Galilee luo kha a kaa. A thuohlaa ca capa ruo bangkhuo lie ca a pathuo diy. 15Apungna-ing chunglie kha pacuv yi te cawsaa mekaa ta ama pathuosa.

Nazareth Lie Zingsuv Cuhluo Va Yi

(Mat 13.53-58; Mar 6.1-6)

16Zingsuv ca a za lethawnapa Nazareth luo kha vaa te, a tue tawpa haata Sabbath ning kha apungna-ing luo a vaa. Caapathe ri riypata a daa te, 17profet Isaiah caataw kha ama pi. Caataw ca pathluo te:

18 # Isa 61.1-2 “Abyipa Thlaapa ca i cunglie a aw,

tahematapakieca kama kha

a siypasapa tie'a luo thuophaa phya riypata

sathu ina pathuv.

Sii ta a ziypa tie'a lie lawna bie pathyi riypa hne

mingcuepa tie ta ama hmung pakhaa khu riypata cuose,

hrisaapa tie hya pazang riypa hne

19Abyipa thluechiy kung kha

pathyi riypata ina pathlie,”

ta pata aa capenapa kha a ri.

20Zingsuv ca caataw kha kalang pakhaa te a mangchiytuv kha pi te aa tu. Apungna-ing lie a awpa bangkhuo ta ama ca ming vy li pata ama mang. 21Cakhutaata iema kyihuo khata, “Ataning hingpa Caapathe hing nama thyina lieta a tling mangtli,” a ta yi. 22Ama bangkhuo ta ama kha ri thuophaa yi te, a pakaa taata a pyapa vihnyina bie kha ama kharue ta a haa. Iema ta, “Hingpa paa hing Josef sacapaa khata cuo va ma?” amaa ta. 23Zingsuv ta, “'Siyybyipa, nama hne nama a patluo sa tie law,’ tapa phungthluv kha ina risue'a ung ciy, tapa kha a phasa pata i pachang. Cakhutaata, ‘Kapernaum khy liena a tue ta pata ma thyipa zaw kha na puvnapa khy lie hing tue ra tie,’ ina ta'a ung ciy,” a ta yi. 24#Jhn 4.44 Cakhutaata, “Biehmisi tana ica chang yi, ahung profet hmuota a puvna khy lie cuhluo pata cuo buo vyi. 25#1Sie 17.1 Cuorasala a hmisipa ca chang'a yi ang, Elijah chuo ning kha kung thung angkha a che khy kuo te ruo bangkhuo ta cakuo a tlung ning kha Israel ruo lie nunghlyi ama za hluvsa; 26#1Sie 17.8-16 cuorasala Elijah ca Sidon pe Zarefath khy lie a awpa nunghlyinung'a luo ta li pata a ahung'a luo hmuo pathlie pata cuo vyi. 27#2Sie 5.1-14 Elisha chuo ning zaw kha Israel ruo chunglie caahminghmaa#4.27 Caahminghmaa tapa biesuo hing pasana phangphang tana zaw a cuo khu ta a pasapa a hluvsa ama za aw, cuorasala Siria ming Naaman ta li pata pakha hmuo patluo sapa cuo va yi,” a ta yi. 28Capa bie ca ama thyi tiyta, apungna-ing lie a awpa bangkhuo ca ama hi a haasa. 29Thu yi te, Zingsuv kha khyle luo a dale yi te, ama khydaw tluo lungkuo taa khata nuopathla amaa nang. 30Cuorasala Zingsuv ca iema hraw taa khata zuvpathla te a cakuo.

Thlaapa Chiepa A Hnyipa Paa

(Mar 1.21-28)

31Zingsuv ca Galilee pe Kapernaum khypuv luo kha si te Sabbath ning ta a pacuv yi. 32#Mat 7.28-29 A pacuvnazya kha ama kharue a haasa, tahematapakieca nawhnyina hneta bie a ri nakawta a cuo. 33Capa apungna-ing lie ca a pyalyipa khuevuo ta aa hryipa paa pakha aw te, 34“Nazareth khypa Zingsuv, kiemata tah aw thluo pase! Tuokhaatama malie na tue khing? Kiema para riypata ma naa vaw? Nama ca a ahungtama na cuo tapa kha ica pachang. Khazing Cawsaa Pathepa tana na cuo,” ta pata khuopuv ta a khi. 35Cuorasala, Zingsuv ta, “A dieta tah aw! Hingpa paa chung taa hingta pya,” ta te a chuo. Khuevuo ta cawsaapa ca ama hmiekunglie kha vaapatyi te, ruvnaana khaapahmuo pi li pata a chungtaata a pya. 36Ama bangkhuo ta ama nang uosa te pakha hne pakha kha, “Hingpa bie hing tuokhaapa bie tama a cuo? Hingpa paa hingta nawhnyina hne cahrana ta bie pi te thlaapa chiepa tie ca ama pya!” a maa ta. 37Zingsuv kaw ca capa ruo chung hmangting luo kha a pathuo.

Simon Ing Lie Patluosana

(Mat 8.14-17; Mar 1.29-34)

38Zingsuv ca apungna-ing taa khata pya te Simon ing luo kha aa ngie. Simon piynung a nge ling te a pasana kaw kha ama ca ama chang. 39A thaalie kha vaa daapuo te, a ngelingna kha a chuo ca a nge kha a cakaa. Sungkhata kya thu te iema kha a mangsang yi.

40Ning a tla ca a pasapa a hnyipa bangkhuo khata pasana a phangphang ta a pasapa tie kha Zingsuv'a luo ama vya chiykhyi; iema pakha cyicuo luv cunglie kha a kuv khang te a patluo sa yi. 41Khuevuo zaw kha cawsaa hluvpuv chungtaata pya yi te, “Nama ca Khazing Sacapaa tana na cuo!” ta pata khuosa ta ama khi. Cuorasala iema kha chuo yi te bie pari sa va yi, tahematapakieca iema ta Messiah#4.41 Khrih a cuopa kha ama pachang.

Zingsuv Ta Apungna-ing Lie A Pacuv Yi

(Mar 1.35-39)

42Khy a kya vuo pahne ta Zingsuv ca khy taa khata pya te ruoduona luo kha a cakuo. Cawsaa ta ama kha huv yi te ama hmung ca, a thuse li riypa yi ta ama thlu. 43Cuorasala ama ta, “Khazing pena thuophaa ca khy hrang luo zaw i ri ra hrahring riypata a cuo, tahematapakieca hingpa repa hing tana pathlie pata i cuo,” a ta. 44Caacuonakawta Judea#4.44 Kuvtie caataw chekha tie lie ca Galilee a ta ruo chung apungna-ing zaw chunglie kha bie ca a phule.

Currently Selected:

LUKA 4: LNT

Highlight

Copy