JOHAN 6

Cawsaa Thawpangaa Saduona

(Mat 14.13-21; Mar 6.30-44; Luk 9.10-17)

1Cakhutaa cata Zingsuv ca Tiberias riyliy ta pata zaw ama ku rapa Galilee riyliy huesuo luo kha a vaa. 2A pasapa tie a patluo sapa yi kharuehaa hmang kha ama hmung nakawta cawsaa hluvpuv ta ama kha ama ziy. 3Zingsuv ca tluocung luo kha kie te a ziytuv tie hneta amaa tu. 4Judah ming Lawsena Pyi cuo kha aa ngie tli. 5Zingsuv ca hmiehmie pase te cawsaazaapuv ama'a luo amaa vawpa kha a hmung tiyta Filip kyihuo kha, “Hingpa cawsaa bangkhuo ning riypa viechuo hing khaapaliema ma calyi aa?” a ta. 6Hing haa hingta a hiehriypa hing Filip kha a dyapasya khing nakawta a cuo. Khaapama i tue aa tapa kha ama ta ca a pachang thluo. 7Filip ta, “A cawta law ta amaa ky riypata hmuo denarii zahning#6.7 Denarii zahning denarii phiekha ca kuliy re a hriepa pakha ning kha thavie tana a za cuo muo viechuo ta a zu'a vyi,” a ta. 8Ziytuv hrangpa pakha, Simon Piter nuta Andru ta, 9“Hingpa lie hing barli viechuo tluo pangaa hne ngaa sahning a hnyipa haatiypa pakha a aw, cuorasala cawsaa hingpa zaa hing ca a zu the riypata cuo vyi,” a ta. 10Zingsuv ta, “Cawsaa kha patu sa tie ung,” a ta yi. Capa hmang lie ca aphuv a chaasa; cawsaa bangkhuo ca a tu yi te thawpangaa tluv ama ta. 11Zingsuv ta viechuo kha la te, palungtluona bie a hluo khutaata, capa lie a tupa tie kha a re yi. Cahaacata ngaa zaw kha tue te cawsaa bangkhuo ta ama riy bisa pata ama ning. 12Ama ning khutaata ziytuv tie kha, “Aa ngaapa a zungpepa kha pakhaw tie ung, a cawta hmuo a vievuv li riypata,” a ta yi. 13Caacuonakawta barli viechuo tluo pangaa taata aa ngaapa a zungpepa kha ama pakhaw diy ca beke ta zung hraa hlyihning a bi. 14Cawsaa ta kharuehaa hmang a tuepa kha ama hmung tiyta, “Chuelyi luo a vaw riypa profet tapa ca ama hrahring hing tana a cuo,” ama ta.

15Zingsuv ta iema kha a vaw'a yi te, na patuv'a yi te siepahruo cuo riypata hruohra ta ina hripuo'a yi tapa kha a pachang nakawta ama se ta zuvpathla te tluocung luo kha a kie.

Zingsuv Tiy Cunglie A Cakuo

(Mat 14.22-33; Mar 6.45-52)

16Zuoluo ning aa ngie tiyta ziytuv tie ca riyliy luo kha zuv yi te, 17sawkawpalaw kha a khang yi te, Kapernaum luo vaa riypata riyliy kha ama va te. Khy a zing tli, cuorasala Zingsuv ca iema'a luo kha a vaw valie. 18Thliy aa hruo nakawta riyliy lie ca tiylaw a thu. 19Sawkawpalaw ca me thung me paliy#6.19 Gk stadia suokiysuopangaa acuolikie sawthung tluv tluv ama va mawpa khata Zingsuv ca riyliy cunglie kha vya cakuo te sawkawpalaw luo aa vya ngiepa yi kha ama hmung ca ama thlaa a zangsa. 20Cuorasala Zingsuv ta, “Ciy khah ung, kama tana i cuo,” a ta yi. 21Zingsuv ca sawkawpalaw luo kha pakie sa yi te amaa tingna hmang kha sungkha ta ama va pha.

Vuoruo Taata Viechuo

22A mawluopa ta riyliy huesuo lie a awpa cawsaazaapuv khata, capa lie ca sawkawpalaw suokha dyi aw te, Zingsuv kha capa sawkawpalaw khata ziytuv tie hne si li pata, iema selaw ta ama sipa kha ama hmung. 23Tiberias taata a vya chiypa sawkawpalaw hrangpa tie ca, Abyipa ta palungtluona bie hluo te cawsaazaapuv viechuo ama ningnapa athaalie kha amaa vya pahy. 24Cawsaazaapuv ta Zingsuv hne ziytuv tie ama aw lipa kha ama pachang tiyta, Zingsuv huv riypata sawkawpalaw kha a khang yi te Kapernaum khy luo kha ama si.

25Iema ta Zingsuv kha riyliy huesuo lie ama va hmung tiyta, “Saya, khatiy tiy tama hingpa luo hing naa vaw?” ama ta. 26Zingsuv ta, “Biehmisi tana ica chang yi, ina huvpa ungca hing kharuehaa hmang i tuepa nama hmung nakawta cuo li pata nama riy bina te viechuo nama ning nakaw tana a cuo. 27A ra thepa sa cuota re hrie khah ung; cuorasala Cawsaa Sacapaa ta aca pi riypa yi chuozaa ta aa hmangpa hringna sa cuota re kha hrie tie ung. Tahematapakieca Paa Khazing ta ama cunglie kha palungtlingna caakhe a khe tli,” a ta. 28Cakhutaata iema ta, “Khazing ta malie aa khingkhyipa re hrie riypata khaapama ma tue aa?” ama ta. 29Zingsuv ta, “Khazing khingpa re ca ama ta a pathliepa paa zang kha tana a cuo,” a ta yi. 30Caacuonakawta iema ta, “Hmung'a pate maca zang riypata khaapa pamangsana ma na tue aa? Khaapama na tue aa? 31#Pya 16.4,15; Slm 78.24 Caapathe ta, ‘Vuoruo taata ning riypa viechuo kha a pi yi,’ a tapa haata, ma mingchingmingvuo tie ca ruocaapa lie manna kha ama za ning,” ama ta. 32Cakhutaata Zingsuv ta, “Biehmisi tana ica chang yi, vuoruo taata viechuo caa pipa yi ca Moses ta cuo vyi, vuoruo viechuo hmisipa caa pipa yi ca i Paa tana a cuo. 33Tahematapakieca Khazing pipa viechuo ca vuoruo taata zaa cungpa hing cuo te chuelyi kha hringna a pi,” a ta yi. 34Iema ta, “Abyipa, capa viechuo ca malie pi pari tie,” ama ta.

35Zingsuv ta, “Kama ca hringna viechuo tana i cuo. Kama'a luo a vawpa ca ahunghmuota a nang diy buo li'a pata kama naa zangpa ca ahunghmuota a tiy hrie buo'a va tli. 36Cuorasala ica chang yi, na hmung tli ung cate na zang va ung ciy. 37I Paa ta ina pipa bangkhuo ca kama'a luo a vaw'a yi te, kama'a luo a vawpa bangkhuo ca pakaa'a va yi ang, 38tahematapakieca vuoruo taata i za cungpa hing kama khingna tue riypata cuo li pata naa pathlietuv khingna tue riypa tana a cuo. 39Hingpa hingna naa pathlietuv khingna ta a cuo: ina pipa bangkhuo kha pakha hmuo pavie li pata ningchuonapa ning lie khiy ama palang ta hringna luo pathu riypa tana a cuo. 40I Paa khingna hmisi ca Sacapaa kha hmung te a zangpa bangkhuo ta chuozaa hringna ama hmung riypa hing tana a cuo; cakhutaata kama ta ningchuona ning lie khiy hringna luo i pathu'a yi,” a ta.

41“Kama hing vuoruo taata zaa cungpa viechuo tana i cuo,” a ta nakawta Judah ming ca a maa cie. 42“Hingpa paa hing Josef sacapaa Zingsuv kha cuo va ma? A nung hne a paa kha ma pachang yi. Khaapanakawma vuoruo taa tana i za cung a ta the?” ama ta. 43Zingsuv ta, “Namaa ciephuvluvpa ca duo tie ung. 44Naa pathlietuv i Paa na kama'a luo a vya chiy yi ta li pata ca ahunghmuota kama'a luo a vaw khu'a va yi; cahaacata kama'a luo a vawpa ca ningchuona ning lie khiy hringna luo i pathu'a yi,” a ta. 45#Isa 54.13 Profet tie caa-uv lieta, ‘Iema ca Khazing na a pacuv'a yi,’ ta pata ama cape kha. Ahunghmuota i Paa ueryi kha thyi te ama'a taata a cuvpa bangkhuo ca kama'a luo kha amaa vaw. 46Khazing'a taata zaa cungpa pakha ta li pata ahunghmuota Khazing hmung buo va yi, ama dyina Paa kha a hmung buo. 47Biehmisi tana ica chang yi, a zangpa ca chuozaa hringna a hnyi. 48Kama ca hringna viechuo tana i cuo. 49Nama mingchingmingvuo tie ta ruocaapa lie manna kha za ning yi te ama thiy ngiethie. 50Hingpa hingna vuoruo taata zaa cungpa viechuo ta a cuo, caacuonakawta a ningpa mekaa ca thiy'a va yi. 51Vuoruo taata zaa cungpa hringna viechuo ca kama hing tana i cuo. Hingpa viechuo a ningpa mekaa ca chuozaa ta ama hring aa; chuelyi hringna ama hmung riypata i pi riypa yi viechuo ca i saa hing tana a cuo,” a ta yi.

52Judah ming ca iema hne iema kha a i yi te, “Tuokhaatama hingpa cawsaa hingta a saa ca ce riypata malie a pi the aa,” ama ta. 53Caacuonakawta Zingsuv ta iema kha, “Biehmisi tana ica chang yi, Cawsaapa Sacapaa a saa kha ce li pata a thiy zaw nama dang li kieca nama chunglie hringna hnyi'a va ung ciy. 54I saa a cepa hne i thiy a dangpa mekaa ca chuozaa hringna hnyi'a yi te ningchuona lieta hringna luo i pathu'a yi; 55tahematapakieca i saa ca sa hmisipa ta cuo te i thiyse ca dang riypa hmisi ta a cuo. 56I saa kha ce te i thiy a dangpa ca kama chunglie aw yi te kama zaw iema chunglie i aw ra. 57A hringpa i Paa ta na pathlie te, i Paa thueta kama i hringpa haata kama naa ningpa mekaa ca kama thueta ama hring aa. 58Vuoruo taata zaa cungpa viechuo ca hingpa hing tana a cuo; nama mingchingmingvuo tie ta za ning yi te ama thiypa haa khata cuo vyi, cuorasala hingpa viechuo a ningpa ca chuozaa ta ama hring aa,” a ta yi. 59Hingpa bie hing Kapernaum khy apungna-ing lie a pacuv ning yi ta a ripa tana a cuo.

Chuozaa Hringna Bie

60A ziytuv hluvpuv ta capa bie ca ama thyi tiyta, “Hingpa pacuvna hing a ruv ciemuo, ahungma a cuhluo khu aa?” ama ta. 61Cuorasala, hingpa kawlieta a ziytuv tie amaa ciepa kha Zingsuv ta pachang te, iema kha, “Hingpa hingta nama palung aca para yi ma? 62Cawsaa Sacapaa hing a hluota a za awna luo a kaapakhaapa kha hmung biephung ung la tuokhaatama nama aw aa? 63Hringna malie a pipa ca Thlaapa tana a cuo; saapa hing ca khaapahmuo thlahne vyi. Niema'a lie i ripa bie hing thlaapa hne hringna bie ta a cuo. 64Cuorasala niema hrawlie chekha ta ca zang va ung ciy,” a ta. Tahematapakieca Zingsuv ta a hruothu taata ahungma naa zang li riypa tapa hne ahungma naa lyi riypa tapa kha a pachang pacie diy. 65Cakhutaata pazue te, “Hingpa nakaw hing muo i Paa ta a pa-aw li kie yi ca ahunghmuota kama'a luo a vaw khu'a va yi ica tapa yi khata a cuo ta,” a ta yi.

66Capa nakaw ca ta Zingsuv a ziytuv a hluvpuv ca kaa yi te ama kha ziy va tli yi. 67Caacuonakawta Zingsuv ta ziytuv hlyihning tie kha, “Niema haw nama cakuo ra'a ma?” a ta yi. 68#Mat 16.16; Mar 8.29; Luk 9.20 Simon Piter ta, “Abyipa, ahung'a luo ma ma cakuo aa? Chuozaa hringna bie a hnyipa ca nama tana na cuo. 69Nama ca A Pathepa Khazing#6.69 Kuvtie caataw chekha tie lie ca a hringpa Khazing Sacapaa Khrih a ta na cuopa kha zang pate ma pachang tli,” a ta. 70Zingsuv ta, “Kama na niema hlyihning tie hing caa tlaw yi ang cuo va ma? Cuorasala niema chungtaata pakha ca khachie tana nama cuo!” a ta yi. 71Hlyihning chunglie pakha ta a cuo raalaa pata ama a lyituv riypa Simon Iskariot sacapaa Judas khana a ri khingpa ta a cuo.

Currently Selected:

JOHAN 6: LNT

Highlight

Copy