JOHAN 11

Lazaru Thiyna

1 # Luk 10.38,39 Mary hne a uvtanung Martha ama awnapa Bethani khy lie a awpa Lazaru ama tapa paa kha a pasa. 2#Jhn 12.3 Mary ca Abyipa phyi kha ziyhmyi ta bya te a suo ta a hruv nung khata a cuo; a pasapa Lazaru ca a caapaapa ta a cuo. 3Caacuonakawta a sietanung tie ta Zingsuv'a luo kha biephyatuv pathlie yi te, “Abyipa, na duesapa kha na a pasa,” ama ta. 4Cuorasala Zingsuv ta capa bie ca a thyi tiyta, “Hingpa pasana hing thiyna te cuo'a vyi; Khazing rungnaana aa luona riypa hne hingpa thue hingta Khazing Sacapaa zaw rungnaana a hmungna riypa tana a cuo aa,” a ta. 5Zingsuv ta Martha hne a nutanung hne Lazaru kha a duesa raalaa pa yi ta 6Lazaru a pasapa thuo a thyi khutaata a awnapa lie kha ning hning a aw siy kalie.

7Cakhutaata ziytuv tie kha, “Judea luo si pakhaa'a ung puv,” a ta yi. 8Ziytuv tie ta, “Rabbi, a ru hluota lie Judah ming ta alung ta aca vaa nangpa yi khata ma capa luo ca vaa pakhaa naa ting?” ama ta. 9Zingsuv ta, “Ning kha ta siymaluo hlyihning a aw cuo va ma? Ningchung ta a cakuopa ca chuelyi khena kha ama hmung nakawta a pachiy va vyi. 10Cuorasala zuo ta a cakuopa ca khena a aw li nakawta amaa pachiy,” a ta. 11Capa bie ca a ri khutaata iema kha, “Ma viesaapa Lazaru ca aa hmung tli, cuorasala pathu riypata capa luo ca i vaa aa,” a ta. 12Ziytuv tie ta, “Abyipa, aa hmung kieca a tluo aa,” ama ta. 13Zingsuv ta Lazaru a thiyna kaw kha a ri raalaa pata, iema ta ca aa hmung sasawpa kaw khana a ri ta pata ama rue. 14Caacuonakawta Zingsuv ta siephele khata, “Lazaru ca a thiy tli. 15Niema nama zang thena riypata capa lie i za aw lipa ca i palung a tluo, thu ung la ama'a luo ca vaa ung puv,” a ta yi. 16Mingphie#11.16 Gk Didymus ama tapa paa Thomas ta a viesaa ziytuv tie kha, “Ama hne thiyhne riypata vaa ra ung siy,” a ta yi.

Zingsuv Ca Thupakhaana Hne Hringna Tana A Cuo

17Zingsuv a va pha ning kha Lazaru ca thluo chunglie ning paliy a za aw tli. 18Bethani ca Jerusalem taata me hning#11.18 Gk stadia suohraahlyipangaa hraw dyi a hla te, 19Judah ming hluvpuv ca ama caapaapa ta a thiysepa Martha hne Mary hnaa panguo riypata amaa vaw. 20Martha ta Zingsuv na a vaw tapa a thyi pahne ta pya te a vaa taw, cuorasala Mary ca ing lie kha a aw. 21Martha ta Zingsuv kha, “Abyipa, nama na hingpa lie hing a aw ciy tapa kieca i caapaapa hing thiy'a vyi. 22Cuorasala ata hingta hmuo na hiepa bangkhuo ca Khazing ta aca pi aa tapa kha i pachang,” a ta. 23Zingsuv ta, “Na caapaapa ca a thu pakhaa aa,” a ta. 24Martha ta, “Ningchuona ning lie khiy a thu pakhaa aa tapa ca i pachang,” a ta. 25Zingsuv ta, “Kama ca thupakhaana hne hringna tana i cuo. Kama naa zangpa ca a thiy hmuo thiy yi sala ama hring aa; 26cakhutaata hring te kama naa zangpa mekaa ca thiy'a va tli yi. Hingpa hing na zang ma?” a ta. 27Ama ta, “A cuo, Abyipa, nama ca chuelyi luo a zuvpa, Khazing Sacapaa, Messiah#11.27 Khrih na cuopa kha ica zang,” a ta.

Zingsuv A Caa

28Hingpa bie a ri khutaata Martha ca vaa te a nutanung Mary kha a paruvta tah a va u. “Saya kha a vaw te nama na a ca padang,” a ta. 29Mary ta a thyi pahne ta thu te ama a taw riypata a catlisa pata a cakuo. 30Zingsuv ca khy chung luo kha vya chiy valie, Martha ta a vaa tawnapa hmang lie khana a aw kalie. 31Ama hne ing chunglie aw yi te hnaa a panguopa Judah ming ta Mary thu te a catlisa pata a cakuopa kha ama hmung. Thluo luo na a va caa'a nang thlu aa ta pata ama rue nakawta ama paziy. 32Mary ca Zingsuv awna luo kha va pha te a hmung pahne ta a phyi thabaw lie kha a pakhuv pane te, “Abyipa nama na hingpa lie hing a aw ciy tapa kieca i caapaapa hing thiy'a vyi!” a ta. 33Zingsuv ta Mary a caapa hne ama hne a vaw rapa Judah ming ama caapa kha a hmung tiyta, khuopuv ta a palung pasa te a ngie a chi. 34“Khaapaliema nama paby?” a ta yi. Iema ta, “Abyipa, a vaw la vya mang tie,” ama ta. 35Zingsuv ca a caa. 36Caacuonakawta Judah ming ta, “Mang tie ung, kha tluv tama a due,” ama ta. 37Cuorasala chekha ta, “Mingcuepa hmuo a pahmung sa pakhaa khupa paa ta Lazaru hing thiy li riypata tue khu va ma?” ama ta.

Lazaru Hringna Luo A Pathu

38Zingsuv ca a palung pha hringhruo li pata thluo luo kha a vaa. Capa thluo ca lungkaraw cuo te a pakaa ca lungphie suokha ta ama khaa. 39Zingsuv ta, “Lungphie hing hnyi tie ung,” a ta yi. Athiypa paa sietanung Martha ta, “Abyipa, a pahnuosa'a tli, tahematapakieca a thiyna taata ning paliy a ta tli,” a ta. 40Zingsuv ta, “Na zang kieca Khazing rungnaana kha na hmung aa, ta pata ica chang tli cuo va ma?” a ta. 41Caacuonakawta lungphie ca ama hnyi. Zingsuv ca vuopaa luo kha ang te, “I Paa, i bie ina naathliepa nakaw ca ta icaa law. 42I bie ina naathlie pari ciy tapa i pachang, cuorasala hingpa lie a daapa cawsaazaapuv hingta nama ta na pathliepa i cuopa kha ama zang thena riypata i ripa tana a cuo,” a ta. 43Hingpa bie a ri diy khu pahne ta khuopuv ta khi te, “Lazaru, kya pya!” a ta. 44Athiypa ca a kuv hne a phyi kha riyy catawnapa pang ta a cataw te a hmie zaw aa cataw cangta a kya pya. Zingsuv ta, “Pathluopa ung la cakuo se,” a ta.

Zingsuv Thie Riypata Ama Raw

(Mat 26.1-5; Mar 14.1-2; Luk 22.1-2)

45Caacuonakawta Mary hneta a vawpa Judah ming a hluvsa ta Zingsuv hmang tuepa kha hmung yi te ama kha ama zang. 46Cuorasala chekha ta Farasi tie'a luo kha vaa yi te Zingsuv hmang tuepa kha ama va chang. 47Caacuonakawta Farasi tie hne tluobyi lepa tie ca bieripatuv phuv ahmyana kha pahry yi te, “Tuokhaatama ma tue aa? Hingpa paa hingta kharuehaa hmang a hluvsa a tue. 48Hing haa hingta ma mangthluo kieca, cawsaa bangkhuo ta ama zang aa, Rom ming kha a vaw'a yi te ma hmang pathepa#11.48 ma biena-ingGrik kiema awna hmang a ta hne ma mingphang kha malie ama para diy aa,” ama ta. 49Iema chungtaata pakha, Kaiafas ama tapa, capa kung ningta tluobyi lepa a hriepa paa ta, “Nama pachangpa aw vyi! 50Mingphang phang kha yalya ta parapa laata cawsaa zaw cuota cawsaa pakha thiypa hing a pha vie tapa pachang va ung ca ma?” a ta yi. 51Hingpa bie hing ama palung chiy ta a ripa cuo vyi, capa kung ca ama kha tluobyi lepa a cuopa haata Zingsuv ca mingphang cuota a thiy aa tapa hne; 52mingphang cuo dyi cuo li pata Khazing saata aa chepatlaapa bangkhuo kha hmang kha ta pahmya riypa zaw ta a thiy aa ta pata profetbiephu a rilu pata a cuo. 53Capa ning taa cata Zingsuv thie riypa kha khue ama khuo.

54Caacuonakawta Zingsuv ca Judah ming hrawlie kha a luohuo ta cakuocavaa va tli, khapa taa khata pya te ruocaapa hne aa ngiena lie a awpa Efraim ama tapa khy luo kha vaa te capa lie ca a ziytuv tie hne khata ama aw.

55Judah ming Lawsena Pyi kha a ngie tli te cawsaa hluvpuv ca pyi hluota a pathesana tue riypata khyta taa khata Jerusalem luo kha ama kie. 56Zingsuv kha huv yi te Biena-ing lie amaa daapa khata pakha hne pakha kha, “Tuokhaatama na rue? Pyi luo hing a vaw li pata ca aw'a vyi nuo?” amaa ta. 57Tluobyi lepa tie hne Farasi tie ta Zingsuv awnapa a pachangpa nama aw kieca, ma patuv thena riypata malie nama chang aa, ta pata bie ama pi.

Currently Selected:

JOHAN 11: LNT

Highlight

Copy