LUCUOTUV 3

Piter Ta A Phyi Cabiepa A Patluo Sa

1Ning kha ca zuoluo siymaluo pathung, thlaachuo cuo lie kha Piter hne Johan ca thlaachuo riypata Biena-ing luo ama cakuo. 2A puv baataata a phyi cabiepa pakha kha amaa vya puvle. Biena-ing chung luo a ngiepa tie kha tuokaa a hie khu naase yi ta pata Thlake Puvthe tapa biena-ing thlake lie kha ningting ta ama chi taw. 3Piter hne Johan kha biena-ing luo amaa ngie'a nangpa a hmung tiy yi ta aa hie yi. 4Ama kha taapuo pata mang yi te, “Malie mang tie,” ama ta. 5Suokhakha ca ina pi thlu'a yi tapa anguopuona hneta iema kha ming vy li pata a mang yi. 6Cuorasala Piter ta, “Kama ca siy cuose, ngu cuose hnyi va ang, cuorasala i hnyipa na ica pi; Nazareth Zingsuv ming ta thu la cakuo tie,” a ta. 7A cacuoluo kuv ta patuv te a padaa ca a phyi hra hning hne a cakhawruv zaw ca sungkha ta a thaa a vya ruv. 8A cathlu te a daa te a cakuo, iema hne cata biena-ing chung luo kha a ngie te, cakuole a cathlule te Khazing kha a pathuosa. 9Khazing pathuosa te a cakuopa kha cawsaa bangkhuo ta ama hmung. 10Biena-ing Thlake Puvthe lieta a tu te a hie tawpa kha ama pachang nakawta a cunglie hmang a tlungpa kawlie kha ama kharue haa te ama nang dyi a uo.

Solomon Hmiechue Lie Piter Bieripa

11Cawsaapa ca Solomon hmiechue tapa lie, Piter hne Johan athaalieta a awlepa kha ama hmung tiyta cawsaazaapuv ca kharuehaasa pata iema'a luo kha ama vaa. 12Piter ta iema kha a hmung tiy yi ta, “Niema Israel ming,#3.12 Gk Cawsaa zaw, Israel ming khaapanakawma hingpa hmang kawlie hing nama kharue haa te kiema tlaku kiema cahrana hne phana ta a cakuo sa khupa haata ming vy li pata malie nama mang? 13#Pya 3.15 Abraham Khazing, Isak Khazing, hne Jakob Khazing, ima mingchingmingvuo tie Khazing ta ama rungnaana ca a changtaapa#3.13 saata Zingsuv'a lieta a pi tli. Ama ca Pilat kuv luo pi ung cate ama ta pathlie riypata bie a chi raalaa pata Pilat hmielie hrahring kha nama thaw ngiethie. 14#Mat 27.15-23; Mar 15.6-14; Luk 23.13-23; Jhn 19.12-15 Niema ta a pathepa hne aa dangpa kha thaw ung cate lie a nawpa tlaku kha aca pathliepa riypa yi ta namaa hie. 15Cakhutaata hringna luo cawsaa a chiytuvpa ca nama thie. Cuorasala Khazing ta ama kha thiyna taata pathu pakhaa te kiema hing capa kaw ca a pachangkhyituv ta ma cuo. 16Cahaacata a ming kha a zang nakawta, a ming mamaapa khata nama hmungpa hne nama pachangpa hingpa paa hing cahrana a pi. Capa Zingsuv zangnapa ca ta ama kha niema hmiekunglie hrahring ta tluopasingna a pi.

17“Viesaa zaw,#3.17 Gk Viesaa zaw ata zaw hing, niema hne nama uvtuv tie ta nama tuepa hing nama pachang li nakaw tana a cuo tapa i pachang. 18Messiah#3.18 Khrih ca a te-ang aa ta pata profet tie'a taata a za rilupa bie kha Khazing ta hing haa hingta a patling sa. 19Caacuonakawta nama suenapa ca pathesapa nama cuo riypata a ngiepachiy ung la Khazing'a luo kha a pali tie ung. 20Cakhutaata Abyipa ta thaazuo thaa lana cuo kha ca pi'a yi te niema cuota a tlaw ciepa Messiah, Zingsuv kha niema'a luo aca pi'a yi. 21Ama ca Khazing ta hluo ning baataata a profet tie zaw cung taata a za ripa, hmangting bangkhuo sapathiyna cuo a tlung hluo li vuoruo lieta a aw aa. 22#Pbp 18.15,18 Moses ta, ‘Abyipa nama Khazing ta na cawsaa zaw chung taa hingta kama haapa profet pakha a papuv sa aa. Niema ta aca changpa mekaa yi kha nama naathlie aa. 23#Pbp 18.19 Capa profet bie a naathlie lipa bangkhuo ca mingphang chungtaata thaw pata ama cuo aa.’ a ta. 24Profet Samuel hne ama hnang taata a vawpa profet zaw bangkhuo ta hingpa ning hne cuo kaw hing ama ri diypa ta a cuo. 25#Sah 22.18 Niema ca profet tie ciypathla ta cuo ung cate, Khazing ta nama mingchingmingvuo zaw a pipa yi, Abraham'a lie a ripa, ‘Nama samingsahlaa chung taa hing tana chuelyi ming bangkhuo hing thluechiy i pi'a yi,’ a tapa biekuona a hraw rapa tana nama cuo. 26Khazing ta a changtaapa kha a pathu pakhaa tiyta, niema pakha cyicuo hing nama pha lina taata vya kaa pata thluechiy pi riypa tana a sacapaa kha niema'a luo hmietaa ce ta a vya pathlie,” a ta.

Currently Selected:

LUCUOTUV 3: LNT

Highlight

Copy