ရောမ 5
5
စွို့ꩻစွဉ်ႏတွမ်ႏဗွေႏဘုရာꩻ
1ယိုခါ စွဉ်ႏထာꩻယွုမ်းနဝ်ꩻ နီလꩻလဲဉ်း ထာꩻစွို့ꩻစွဉ်ႏခွင်ꩻ ဗွေႏဘုရာꩻထျꩻ၊ စွဉ်ႏနီဗွေႏယေသျု ခရစ်တောႏနဝ်ꩻ နီလꩻလဲဉ်း ထာꩻငိမ်ꩻချမ်ꩻသာႏ ဗွေႏဘုရာꩻထျꩻသွူ။ 2စွဉ်ႏထာꩻယွုမ်းနဝ်ꩻ ဝွေꩻဗွေႏ ဟဲ့ꩻသော့ꩻနီ ဖေႏကမော့ꩻခွိုတ်ꩻဗာႏ ဗွေႏဘုရာꩻ ကေꩻဇူꩻတောႏကို နဝ်ꩻမꩻ ယိုခါ နီအဝ်ႏစံႏစာꩻဗာႏသွူ။ နဝ်ꩻမꩻ နီကျွားဗာႏဒျာႏ စွဉ်ႏထာꩻအဝ်ႏမောင်ꩻ နီကလꩻဖဒါႏ ဗွေႏဘုရာꩻ အဘွုန်ꩻသရေႏတောႏ နဝ်ꩻသွူ။ 3နီကျွားဗာႏပါက နီထာꩻဒုက္ခသွူ။ ပွိုးတွော့ꩻ နီအဝ်ႏသေ ထာꩻဒုက္ခနဝ်ꩻ မာꩻထွာလွဉ် ထာꩻသယ်ꩻခံႏ၊ 4ထာꩻသယ်ꩻခံႏနဝ်ꩻ အီလွဉ်ဖေႏ ဗွေႏဘုရာꩻ ထာꩻကျွိုက်နစ်သက်တဲင်၊ ဝွေꩻဗွေႏ ထာꩻကျွိုက်နစ်သက်နဝ်ꩻ မာꩻထွာလွဉ်ဖေႏ ထာꩻအဝ်ႏမောင်ꩻသွူ။ 5ထာꩻအဝ်ႏမောင်ꩻယိုနဝ်ꩻ တမာꩻသꩻကုဲင် ထိုꩻတဝ်းနီ၊ ပွိုးဗွေႏဘုရာꩻ ကဖေႏဒါႏ နီဆုကေꩻဇူꩻတွမ်ႏ ကြောင်းစင် ဝိညာဉ်ႏတောႏနဝ်ꩻ အဝ်ႏထောက်ꩻထန်ႏဖေႏ ဝွေꩻဗွေႏ ထာꩻရက်မေတ္တာႏ နီသꩻကိုသွူ။
6နီထာꩻအာႏကွိုꩻ တအဲဉ်ထဝ်းဒွုမ်ချိန်ႏ၊ ဗွေႏဘုရာꩻ ကလွိုက်သေꩻခါꩻ အချိန်ႏကာႏလနဝ်ꩻ လိုꩻမွိုက်ကုဲင်ဖုံႏ တွက်တာႏ ဗွေႏခရစ်တောႏ ခံႏသီဖေႏသွူ။ 7လိုꩻပုဂ္ဂိုလ်ႏစွို့ꩻစွဉ်ႏ တဖြာꩻတာႏ ပါꩻတဖြာꩻဖြာꩻ ကအီႏခံႏသီဖေႏနဝ်ꩻ ထွာထာꩻယပ်ꩻခုဲင်ႏ ခရာႏတစွိုးသွူ။ လိုꩻပုဂ္ဂိုလ်ႏဟဝ် တဖြာꩻတာႏ ပါꩻတဖြာꩻဖြာꩻ ကအီႏခံႏသီဗွိုန်ႏဖေႏနဝ်ꩻ လဲင်ꩻအီႏအဝ်ႏဒါႏသွူ။ 8ကွဲႏတွော့ꩻ နီအဝ်ႏထွာနေက အပဲစ်သား ယံꩻတွင်ꩻ ဗွေႏခရစ်တောႏ ကခံႏသီဖေႏ နီတာႏနဝ်ꩻ ဝွေꩻဗွေႏ ရက်ငါႏနီ ခွိုင်းကားမုဲင်ꩻကျောင်ꩻ ဗွေႏဘုရာꩻ အွဉ်ႏနယ်ဖေႏနီသွူ။ 9စွဉ်ႏဝွေꩻဗွေႏ အသွီႏတောႏနဝ်ꩻ ယိုခါ နီစွို့ꩻစွဉ်ႏလဲဉ်း တွမ်ႏဗွေႏဘုရာꩻနဝ်ꩻသွူ။ နဝ်ꩻလွုမ်ꩻတကာႏတဝ်း အဝ်ႏဗွေႏဘုရာꩻ ထာꩻသꩻလျားကို၊ စွဉ်ႏဗွေႏနဝ်ꩻ အီႏလွစ်ကင်ꩻဗာႏတဲင် နီအီႏလꩻလွို ထာꩻကယ်ႏတင်ႏ ခွိုင်းကားမုဲင်ꩻ။ 10နီနဝ်ꩻထွာလဲဉ်းသွူ ဗွေႏဘုရာꩻ အရန်ႏသူႏဖုံႏ၊ ကွဲႏတွော့ꩻ စွဉ်ႏဝွေꩻဗွေႏ အပိုခိုတောႏ ခံႏသီဖေႏ နဝ်ꩻမꩻ ဝွေꩻဗွေႏမာꩻထွာနီ ဝွေꩻဗွေႏအသွꩻသွူ၊ နဝ်ꩻလွုမ်ꩻတကာႏတဝ်း စွဉ်ႏဗွေႏခရစ်တောႏ အသက် ကအဝ်ႏမွန်ဒါႏနဝ်ꩻ နီအီႏလꩻ ထာꩻကယ်ႏတင်ႏနဝ်ꩻသွူ။ 11နဝ်ꩻလွုမ်ꩻတကာႏတဝ်း ကွပ်ပွိုး ဗွေႏဘုရာꩻ အဝ်ႏမာꩻလဲဉ်း စွဉ်ႏနီဗွေႏဘုရာꩻ ယေသျု ခရစ်တောႏနဝ်ꩻ ယိုခါ ဗွေႏမာꩻထွာလဲဉ်းနီ အသွꩻအတွက် နီသꩻပျောႏသွင်ႏဗာႏသွူ။
အာဒံတွမ်ႏခရစ်တောႏ
12စွဉ်ႏလိုꩻတဖြာꩻအတွက် အပဲစ်တရာꩻနဝ်ꩻ ဖျော်လွဉ်သော့ꩻ ကမ္ဘာႏလောကကိုတဲင် ဝွေꩻအပဲစ်နဝ်ꩻ ထွာလွဉ်စွဉ်ႏ ထာꩻသီတရာꩻသွူ။ အကျိုꩻနဝ်ꩻ ကွပ်ပွိုး လိုꩻစွုမ်ႏဖြာꩻ အပဲစ်အဝ်ႏအတွက် ထာꩻသီတရာꩻနဝ်ꩻ စွစ်ꩻလီထိုꩻစွဉ်ႏ လိုꩻဖုံႏ တဟံႏတန်လွုမ်း နဝ်ꩻသွူ။ 13ခလားကဖေႏ ပညတ်ကျမ်ꩻခါကာႏနဝ်ꩻ အပဲစ်အဝ်ႏသော့ꩻလဲဉ်း ကမ္ဘာႏလောကကိုသွူ။ ကွဲႏတွော့ꩻ အချိန်ႏနဝ်ꩻနဝ်ꩻ ပညတ်တရာꩻ အဲဉ်ထဝ်းဒွိုန်း နဝ်ꩻမꩻ အပဲစ်ဖုံႏနဝ်ꩻ တမတ်ခါꩻတဝ်းဒွိုန်းသွူ။ 14ကွဲႏတွော့ꩻ တယ်ႏအာဒံစိုး ဗꩻတွိုႏလွေꩻ မောသျေစိုး လိုꩻဖုံႏကားကအဝ်ႏ လွုမ်ꩻတကာႏတဝ်း လဲင်ꩻအုပ်စိုꩻ ဗွိုန်နုဲင်း အာဒံ တလွောက်ꩻနာႏတဝ်း ဗွေႏဘုရာꩻ အမိန်းတွော့ꩻ လိုꩻတမာꩻတဝ်း အပဲစ်ဖုံႏတဲ့ ထာꩻသီတရာꩻ လဲင်ꩻအုပ်စိုꩻလို့စွဉ်ႏသွူ။
အာဒံနဝ်ꩻထွာ ပွုံႏခွိုင်ꩻအီ ဗွေႏအပါ ကအီႏကျွꩻလွဉ်နဝ်ꩻသွူ။ 15ကွဲႏတွော့ꩻ ပွိုးဗွေႏဘုရာꩻ ကဖေႏခြေင်ဒါႏ ဆုကေꩻဇူꩻနဝ်ꩻ စွဉ်ႏအာဒံအပဲစ်နဝ်ꩻ တဗွိုန်တဝ်းဝင်ꩻ အတွိုင်ꩻ ဝွေꩻသီး ဝင်ꩻနီနဝ်ꩻ တဗွိုန်လို့တဝ်းဝင်ꩻသွူ။ ကွပ်ပွိုး လိုꩻတဖြာꩻ အပဲစ်တဲင် လိုꩻအာဖုံႏ သီဗာႏနဝ်ꩻ မွေးဒျာႏ။ ကွဲႏတွော့ꩻ ပါꩻတဖြာꩻ ကထွာ ဗွေႏယေသျု ခရစ်တောႏ ဝွေꩻဗွေႏ ကဖေႏခြေင်ဒါႏ လိုꩻအာငါႏဖုံႏ ဆုကေꩻဇူꩻစွဉ်ႏ ဗွေႏဘုရာꩻ ဆုကေꩻဇူꩻနဝ်ꩻ ကယိန်းတန်မျတ်သွူ။ 16တဲင်နဝ်ꩻကိုနဝ်ꩻ ဗွေႏဘုရာꩻ ဆုကေꩻဇူꩻတရာꩻ တွမ်ႏလိုꩻတဖြာꩻ အပဲစ်တရာꩻနဝ်ꩻ တဗွိုန်လို့တဝ်းဝင်ꩻသွူ။ လိုꩻတဖြာꩻ အပဲစ်တရာꩻနဝ်ꩻ စီႏရင်ႏချ “အပဲစ်အဝ်ႏ” နုဲင်းနဝ်ꩻသွူ။ ကွဲႏတွော့ꩻ ဆုကေꩻဇူꩻတရာꩻနဝ်ꩻ အပဲစ်ဖုံႏအာငါႏ တထွိုက်တန်ႏတဝ်း ဆုကေꩻဇူꩻစွဉ်ႏတဲ့ စီႏရင်ႏချဒျာႏ “အပဲစ်အဲဉ်ထဝ်း” နုဲင်းနဝ်ꩻသွူ။ 17ပါꩻတဖြာꩻ အပဲစ်နဝ်ꩻ ထာꩻသီအုပ်စိုꩻ လွဉ်စစွဉ်ႏနဝ်ꩻမွေး၊ ကွပ်ပွိုး ပါꩻတဖြာꩻအတွက်သွူ။ ကွဲႏတွော့ꩻ ပါꩻတဖြာꩻကထွာ ဗွေႏယေသျု ခရစ်တောႏ ကမာꩻလဲဉ်း အကျိုꩻနဝ်ꩻ တန်မျတ်ကယ်ꩻက နဝ်ꩻသွူ။ ကလွိုင်ႏ ပြန်ꩻပြော်ꩻငါႏ ဗွေႏဘုရာꩻ ဆုကေꩻဇူꩻ တွမ်ႏကဖေႏခြေင်ဒါႏ ထာꩻစွို့ꩻစွဉ်ႏခွင်ꩻ ကလက်ခံႏလꩻလို့ဒါႏ ဗွေႏဘုရာꩻထျꩻသား ကားကအဝ်ႏနဝ်ꩻ စွဉ်ႏဗွေႏခရစ်တောႏတဲင် အီႏအုပ်စိုꩻပဲင်ႏဗာႏ အသက်မွန်သွူ။
18နဝ်ꩻမꩻ နုဲင်းပါꩻတဖြာꩻ အပဲစ်အတွက်၊ လိုꩻဖုံႏကားကအဝ်ႏ ခံႏဗာႏအပဲစ်တံႏ ထာꩻစီႏရင်ႏအတွိုင်ꩻ၊ ဗွိုန်နုဲင်း နဝ်ꩻနေနေ လိုꩻစွို့ꩻစွဉ်ႏတဖြာꩻ အထာꩻမာꩻနဝ်ꩻ အွဉ်ႏစွꩻလွစ်ဖေႏ လိုꩻဖုံႏကားကအဝ်ႏတဲင် ဖေႏဝွေꩻသီး အသက်မွန်သွူ။ 19ဗွိုန်နုဲင်း လိုꩻတဖြာꩻ တနာႏတဝ်း ငဝ်းတွော့ꩻ အမာꩻထွာထိုꩻလိုꩻဖုံႏ ကားကအဝ်ႏ အပဲစ်သား အတွိုင်ꩻ၊ ဗွိုန်နုဲင်းနဝ်ꩻ နေနေ ပွိုးလိုꩻတဖြာꩻ လွောက်ꩻနာႏငဝ်းအတွက် လိုꩻဖုံႏကားကအဝ်ႏနဝ်ꩻ လꩻထာꩻစွို့ꩻစွဉ်ႏခွင်ꩻ ဗွေႏဘုရာꩻထျꩻဖုံႏသွူ။
20ပညတ်တရာꩻယိုနဝ်ꩻ အွဉ်ႏနယ်ဖေႏဒျာႏ မာꩻမာႏထာꩻဖုံႏနဝ်ꩻ တိုꩻအာလွဉ်ငါႏသွူ။ ကွဲႏတွော့ꩻ အပဲစ်ထွိုင်ႏ တိုꩻအာလွဉ် နဝ်ꩻကိုနဝ်ꩻ ဗွေႏဘုရာꩻ ကေꩻဇူꩻတောႏ ကယိန်းတိုꩻအာလွဉ် နဝ်ꩻသွူ။ 21နဝ်ꩻထွူ ဗွိုန်နုဲင်းနဝ်ꩻနေနေ အပဲစ်တရာꩻနဝ်ꩻ စွဉ်ႏထာꩻသီတရာꩻ ကအုပ်စိုꩻအတွိုင်ꩻ၊ ဗွေႏဘုရာꩻ ကေꩻဇူꩻတရာꩻ နဝ်ꩻတဲ့ စွဉ်ႏထာꩻစွို့ꩻစွဉ်ႏ တရာꩻနဝ်ꩻ အဝ်ႏအုပ်စိုꩻတဲင်၊ စွဉ်ႏနီဗွေႏဘုရာꩻ ယေသျုခရစ်တောႏနဝ်ꩻ အွဉ်လွေꩻနီ ထာဝရ အသက်မွန်ထျꩻ နဝ်ꩻသွူ။
Currently Selected:
ရောမ 5: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
