မတဲ 3
3
ဗတ္တိဇံႏဆရာႏယောဟန်ဟော်ꩻတရာꩻ။
(မာကု ၁:၁–၈။ လုကာ ၃:၁–၁၈။ ယောဟန် ၁:၁၉–၂၈)
1အတွင်ꩻနဝ်ꩻ ဗတ္တိဇံႏဆရာႏ ယောဟန်လွဉ် ယုဒတခြာကိုတဲင် ဟော်ꩻစတရာꩻသွူ။ 2#မ ၄:၁၇၊ မာ ၁:၁၅။ ဝွေꩻဒေါ့ꩻ၊ “ကွပ်ပွိုး ခမ်းထီမို့ꩻလောင်း အီႏတယ်ႏသွူ နဝ်ꩻမꩻ သီအဝ်ႏမာꩻအပဲစ်နဝ်ꩻ လꩻချာသွော့ ထာꩻကော့ꩻမာႏဟုဲင်း” နုဲင်းနဝ်ꩻသွူ။ 3#ဟေသျာ ၄၀:၃ (LXX)။ ပရောဖဲစ် ဟေသျာယစိုး ဝွေꩻကဒေါ့ꩻဒါႏ၊
“ပွိုင်းဝွို့တွမ်ႏ ပါꩻတဖြာꩻ အဝ်ႏခြောဝ်သန်အငဝ်း တခြာကို၊
‘ဖျင်ရဲဉ်ꩻဖေႏသွော့ ထာဝရဘုရာꩻတာႏ တဖူꩻ၊
ဝွေꩻဗွေႏ ကအီႏထောင်လွေꩻတာႏ တဖူꩻနဝ်ꩻ မာꩻစွဉ်ႏဖေႏသွော့’” နုဲင်းနဝ်ꩻနဝ်ꩻ ထွာပါꩻ ယောဟန်ယိုသွူ။
4 # ၂ရာႏ ၁:၈။ ယောဟန်နဝ်ꩻ ကွဉ်ကꩻစွဉ်ႏ ခွမ်ꩻလာꩻ ကထꩻဒါႏတွမ်ႏ ကလာအုတ်ဆွဉ်ႏ၊ ဝွေꩻငင်းဒေင်နဝ်ꩻ စွိုင်စွဉ်ႏ ငင်းဒေင်စီႏ တဖြို့ꩻတဲင် ဝွေꩻထာꩻအံႏနဝ်ꩻ ထွာဒျာႏ ကိပ်ပုဲင်ႏစွဉ်ႏ တမူထီသွူ။ 5လိုꩻဖုံႏ အဝ်ႏဝေင်ꩻယေရုသလမ်ႏ၊ အဝ်ႏယုဒ တခမ်းလွုမ်း နယ်ႏဖုံႏစွဉ်ႏ ဟံႏနယ်ႏကအဝ်ႏ ယော်ဒန် ထီခြောင်တန် ဖင်ႏထျꩻကားကအဝ်ႏနဝ်ꩻ လွဉ်ဝွေꩻထျꩻသွူ။ 6ဝွေꩻသီးဝွန်ႏခံႏချာ ဝွေꩻသီးနမ်း အပဲစ်တဲင် ဝွေꩻဖေႏဝွေꩻသီး ဗတ္တိဇံႏထီမင်္ဂလာႏ ယော်ဒန် ထီခြောင်တန်ကို နဝ်ꩻသွူ။
7 #
မ ၁၂:၃၄၊ ၂၃:၃၃။ ယောဟန်ထွိုင်ႏထီႏ ဖါရိသဲအာဖုံႏတွမ်ႏ သာဒုကဲဖုံႏ အဝ်ႏလွဉ်ထေ့ ဝွေꩻထျꩻတွော့ꩻ အီႏခံႏဗတ္တိဇံႏ ထီမင်္ဂလာႏနဝ်ꩻ ဝွေꩻဒေါ့ꩻဖေႏဝွေꩻသီး၊ “သီထွာ ရူးတကုဲင်ႏခွိုꩻဖုံႏ ကအီႏသျောင်ႏလဲ့လꩻဒါႏ ဗွေႏဘုရာꩻ ထာꩻစီႏရင်ႏ အပဲစ်တံႏနဝ်ꩻ ပါꩻမုဲင်ꩻ အွဥ်ႏဒေါ့ꩻနယ်ဖေႏ သီဟောင်း။ 8လꩻလဲဉ်း ထာꩻကော့ꩻမာႏကျောင်ꩻ စွဉ်ႏထာꩻကံကျင်ꩻနဝ်ꩻ အွဉ်ႏနယ်သွော့။ 9#ယော ၈:၃၃။ တွမ်ႏသီကအဝ်ႏရိုꩻဒါႏ အဗြာဟံနဝ်ꩻ ထွာသီဖါဖြားတွော့ꩻ သီအီႏသျောင်ႏလဲ့လꩻနွောင်ꩻ ထာꩻစီႏရင်ႏ အပဲစ်တံႏနဝ်ꩻ တွမ်ႏထင်းမွိုန်း၊ ခွေဒေါ့ꩻဖေႏသီ ဗွေႏထာဝရဘုရာꩻနဝ်ꩻ အဝ်ႏလုံးတူႏဖုံႏယိုနဝ်ꩻ မာꩻထွာနွောင်ꩻ အဗြာဟံ ပိုလီꩻစွိုးခွိုꩻဖုံႏ။ 10#မ ၇:၁၉။ ကအီႏဖဲ့ꩻဝꩻထိုꩻ သေင်ႏမွူးဖုံႏနဝ်ꩻ အွဉ်ႏသေꩻမꩻလဲဉ်းခွါ အခင်ႏထျꩻ၊ အရာႏ တရာႏဟဝ်တဝ်း သေင်ႏစွုမ်ႏမွူးမွူးနဝ်ꩻ အီႏဖဲ့ꩻဝꩻတဲင် အီႏနုဲင်ႏသော့ꩻထိုꩻ မေႏကိုနဝ်ꩻသွူ။ 11အွဉ်ႏနယ် သီလꩻလဲဉ်း ထာꩻကော့ꩻမာႏ ကျောင်ꩻနဝ်ꩻ ခွေဖေႏသီ ဗတ္တိဇံႏ မင်္ဂလာႏစွဉ်ႏထီ၊ ကွဲႏတွော့ꩻ ပါꩻအဖြာꩻ ကအီႏကျွꩻလွဉ် ခွေဆꩻချာနဝ်ꩻ အီႏဖေႏသီ ဗတ္တိဇံႏမင်္ဂလာႏ စွဉ်ႏကြောင်းစင် ဝိညာဉ်ႏတောႏ တွမ်ႏမေႏနဝ်ꩻသွူ။ ဝွေꩻနဝ်ꩻ တန်မျတ်ကယ်ꩻကခွေတဲင် ခွေအီႏခွုမ်လွေꩻငါ ဝွေꩻအခင်ႏဖါႏငါတဲ့ တထွိုက်တဝ်းနဝ်ꩻသွူ။ 12ဝွေꩻဗွေႏအီလွဉ်ပါ ဝီꩻဝင်းတွော့ꩻ အီႏဝင်းထန်ႏထိုꩻ ဗွူသိုႏ ကားကအဝ်ႏသွူ။ ဗွူဆꩻနဝ်ꩻ ဝွေꩻဗွေႏ အီႏစုဗူႏသော့ꩻဝင်ꩻ ဗွူတရွောင်ကို၊ ကွဲႏတွော့ꩻ ဗွူသိုႏနဝ်ꩻ အီႏလဲ့ꩻထိုꩻ တဖေ့နွောင်ꩻတဝ်း မေႏကို” နုဲင်းနဝ်ꩻသွူ။
ဗွေႏယေသျုခံႏဗတ္တိဇံႏထီမင်္ဂလာႏ
(မာကု ၁:၉–၁၁။ လုကာ ၃:၂၁–၂၂)
13အတွင်ꩻနဝ်ꩻ ဗွေႏယေသျု အီႏခံႏ ဗတ္တိဇံႏထီမင်္ဂလာႏ ယောဟန်ထျꩻနဝ်ꩻ အဝ်ႏကာလိလဲခမ်း ဖျော်လွဉ် ယော်ဒန် ထီခြောင်တန်ထျꩻနဝ်ꩻသွူ။ 14ကွဲႏတွော့ꩻ ယောဟန်ဒေါ့ꩻ၊ “ခွေသွဉ်း အဝ်ႏလိုႏခံႏဒျာႏ ဗတ္တိဇံႏ ထီမင်္ဂလာႏ နီဗွေႏထျꩻ စွဉ်ႏတဲ့၊ နီဗွေႏ ကျွꩻလွဉ်ဗာႏတွိုႏ ခွေသွဉ်းထျꩻဟောင်း” နုဲင်းနဝ်ꩻတဲင် ဝွေꩻဗွေႏသꩻ ဖေႏကပြောင်ꩻနဝ်ꩻ ယောဟန်ကျိုꩻစာꩻ တောင်ꩻပြန်ႏဆွုမ်ႏ ဗွေႏယေသျုသွူ။
15ကွဲႏတွော့ꩻ ဗွေႏယေသျု လဝ်းချာဝွေꩻ၊ “ပွိုးဗွေႏဘုရာꩻ တရာꩻဖုံႏ ကားကအဝ်ႏနဝ်ꩻ နီအဝ်ႏလိုႏကံကျင်ꩻ ထွိုက်နဝ်ꩻမꩻ ယိုခါ ဖေႏသွော့ အခွင်ꩻဟုဲင်း” နုဲင်းနဝ်ꩻသွူ။ နဝ်ꩻမꩻ ယောဟန် သဘော်ꩻတူႏစွဉ်ႏနဝ်ꩻသွူ။
16တလဲင်ႏချင်ꩻ ဗွေႏယေသျုခံႏစွဉ်ႏ ဗတ္တိဇံႏ ထီမင်္ဂလာႏနဝ်ꩻသွူ၊ ဝွေꩻဗွေႏ အဝ်ႏထီကို ထန်ႏလွဉ်ချိန်ႏ၊ ခမ်းထီမို့ꩻလောင်းနဝ်ꩻ ဗွောင်ဖေႏ ဝွေꩻဗွေႏတွော့ꩻ ဗွေႏဘုရာꩻ ဝိညာဉ်ႏကြောင်းစင် ဗွိုန်နုဲင်းဝါးလွီးနဝ်ꩻ လင်ꩻလွဉ်တွော့ꩻ ဗွို့ꩻစွဉ်ႏ ဝွေꩻဗွေႏလောင်းနဝ်ꩻ ဝွေꩻဗွေႏ ထီႏစွဉ်ႏနဝ်ꩻသွူ။ 17#ကမ္ဘာႏ ၂၂:၂၊ သာ ၂:၇၊ ဟေသျာ ၄၂:၁၊ မ ၁၂:၁၈၊ ၁၇:၅၊ မာ ၁:၁၁၊ လု ၉:၃၅။ တွိုႏနဝ်ꩻ အဝ်ႏခမ်းထီမို့ꩻလောင်း ငဝ်းသင်ႏလင်ꩻ၊ “ယိုနဝ်ꩻထွာ ခွေကရက်ငါႏ ပိုခိုရင်ꩻဒျာႏ၊ ခွေကျွိုက်နစ်သက်ငါႏဝွေꩻ” နုဲင်းနဝ်ꩻသွူ။
Pao Bible Common Language© Bible Society of Myanmar, 2019.