မတဲ 27

ဗွေႏယေသျုခံႏဗာႏဟဲ့ꩻလွေꩻခွန်ပိလတ်ထျꩻ

(မာကု ၁၅:၁။ လုကာ ၂၃:၁၊ ၂။ ယောဟန် ၁၈:၂၈–၃၂)

1မွူးရဝ်ꩻခိုႏ စဝ်းစဝ်း ယဇ်ပရောဟိတ်တန်ဖုံႏ ကားကအဝ်ႏတွမ်ႏ လိုꩻတန်ဖုံႏ ကားကအဝ်ႏ ဖေႏကမာꩻသီ ဝွေꩻဗွေႏနဝ်ꩻ ဝွေꩻသီးမာꩻ အစီႏအစဲဉ်ႏတွော့ꩻ ဆန်စွဉ်ႏ ဗွေႏယေသျုနဝ်ꩻသွူ။ 2စွဉ်ႏပသီႏချင်ꩻဖုံႏနဝ်ꩻ ဝွေꩻသီးစွိုင် ဝွေꩻဗွေႏတွော့ꩻ အွဉ်လွေꩻဝွေꩻဗွေႏတဲင် ဝွေꩻဗွေႏနဝ်ꩻ အပ်သော့ꩻစွဉ်ႏ ရောမခွန်ခံႏ ပိလတ်စူကိုနဝ်ꩻသွူ။

ယုဒသီထိုꩻ

(တမန်ႏတောႏ ၁:၁၈–၁၉)

3 # တ ၁:၁၈၊ ၁၉။ စီႏရင်ႏသီထိုꩻလဲဉ်း ဗွေႏယေသျုနဝ်ꩻ ယုဒသစ္စာႏဖေါက် ထွိုင်ႏသေချိန်ႏ ဝွေꩻလꩻချာ ထာꩻကော့ꩻမာႏတဲင် ရွဉ်ဒင်္ဂါꩻ အဗီႏသွံဆီနဝ်ꩻ ထူႏသဲင်ꩻဖေႏချာစွဉ်ႏ ယဇ်ပရောဟိတ် တန်ဖုံႏတွမ်ႏ လိုꩻတန်ဖုံႏထျꩻနဝ်ꩻသွူ။ 4ဝွေꩻဒေါ့ꩻ၊ “လိုꩻစွို့ꩻစွဉ်ႏတဖြာꩻ ဖေႏကသီထိုꩻနဝ်ꩻ ခွေပဲစ်မာႏ သစ္စာႏဖေါက်ထိုꩻလဲဉ်း” နုဲင်းနဝ်ꩻသွူ။

ဝွေꩻသီးလဝ်းချာ၊ “နီမွော့ꩻအွဉ်ႏရေꩻဗာႏတွိုႏ နဝ်ꩻခရာႏ နုဲင်းမုဲင်ꩻဟောင်း။ နဝ်ꩻနဝ်ꩻ နာꩻထာꩻမာꩻဒျာႏ” နုဲင်းနဝ်ꩻသွူ။

5ရွဉ်ဒင်္ဂါꩻနဝ်ꩻ ယုဒနုဲင်ႏလင်ꩻသော့ꩻစွဉ်ႏ ဗိမာန်ႏတောႏ ကျောင်ꩻကိုတဲင် ထန်ႏလွေꩻထိုꩻနဝ်ꩻသွူ။ နဝ်ꩻထွူ ဝွေꩻလွေꩻတဲင် အွဉ်ႏဟွဲစို့ꩻသီချာစွဉ်ႏ အနမ်းနဝ်ꩻသွူ။

6ယဇ်ပရောဟိတ်တန်ဖုံႏနဝ်ꩻ တွမ်ထူႏ ရွဉ်ဒင်္ဂါꩻဖုံႏတဲင်ဒေါ့ꩻ၊ “ယိုနဝ်ꩻထွာ သွီႏရွဉ်ဒျာႏတဲင် ရွဉ်နဝ်ꩻ ကအီႏအွဉ်ႏသော့ꩻ ဗိမာန်ႏတောႏကျောင်ꩻ ဘဏ္ဍာႏတွိုက်ကိုနဝ်ꩻ တမဲဉ်ႏတဝ်း ဆန်ထိုꩻနီ ပညတ်ကျမ်ꩻ” နုဲင်းနဝ်ꩻသွူ။ 7နဝ်ꩻထွူ ပွိုင်းဝွို့တွမ်ႏ နဝ်ꩻကိစ္စနဝ်ꩻ သဘော်ꩻတူႏလို့ဝင်ꩻ တစွိုးတဲင် ရွဉ်နဝ်ꩻနဝ်ꩻ ဝွေꩻသီးသွုံꩻ ဖြေꩻအီထိုꩻ ဖွိုင်ꩻဟံႏမာꩻသား ခြံယာႏတွော့ꩻ မာꩻထိုꩻစွဉ်ႏ ခမ်းလင်သားဖုံႏတာႏ သဲင်ႏခဲင်ꩻ ခင်ႏလမ်းသွူ။ 8နဝ်ꩻမꩻ ခြံယာႏနဝ်ꩻ ဗꩻတွိုႏစွဉ်ႏ ဟန်ႏနီꩻယို အဝ်ႏဟဲ့ꩻတွင်ႏဒျာႏ၊ “သွီႏဟံႏ” နုဲင်းနဝ်ꩻသွူ။။

9-10 # ဇာ ၁၁:၁၂၊ ၁၃။ နုဲင်းပရောဖဲစ် ယေရမိ ကဒေါ့ꩻဟော်ꩻ သေꩻခါꩻဒါႏအတွိုင်ꩻ “ဣသရေး လိုꩻမျိုꩻဖုံႏအကို ကအဝ်ႏသဘော်ꩻတူႏခါꩻဒါႏ အီႏဖေႏဝွေꩻအတာႏ ရွဉ်ဒင်္ဂါꩻ အဗီႏသွံဆီနဝ်ꩻ ဝွေꩻသီးထူႏတွော့ꩻ၊ နုဲင်းထာဝရဘုရာꩻ ကမိန်းဖေႏဒါႏ ခွေအတွိုင်ꩻ ရွဉ်နဝ်ꩻ သွုံꩻဖြေꩻအီထိုꩻ ဖွိုင်ꩻဟံႏမာꩻသား အခြံယာႏ၊” ကရိုꩻဒါႏငဝ်းနဝ်ꩻ တွိုႏနဝ်ꩻ မဲဉ်ႏလွဉ်ꩻစွဉ်ႏသွူ။

ခွန်ပိလတ်စဲစ်ရီဗွေႏယေသျု

(မာကု ၁၅:၂–၅။ လုကာ ၂၃:၃–၅။ ယော ၁၈:၃၃–၃၈)

11ဗွေႏယေသျု အုံထွိုင်ႏ ရောမခွန်ခံႏ ဆꩻငါတွော့ꩻ စဲစ်ရီစွဉ်ႏ ဝွေꩻဗွေႏတဲင်

ဝွေꩻရီ၊ “နာꩻထွာမွေး ယုဒခွန်တန် မွေးနေဟောင်း” နုဲင်းနဝ်ꩻသွူ။ ဗွေႏယေသျု လဝ်းချာ၊ “နုဲင်းနာꩻကရိုꩻလဲဉ်း အတွိုင်ꩻနဝ်ꩻမွေး” နုဲင်းနဝ်ꩻသွူ။ 12ကွဲႏတွော့ꩻ ယဇ်ပရောဟိတ်တန်ဖုံႏ ကစွဲꩻတရာꩻဒါႏနဝ်ꩻ ဝွေꩻဗွေႏ တဒေါ့ꩻချာတဝ်း တမုဲင်ꩻမုဲင်ꩻနဝ်ꩻသွူ။

13နဝ်ꩻမꩻ ခွန်ပိလတ်ဒေါ့ꩻဖေႏ ဝွေꩻဗွေႏ၊ ဝွေꩻသီး ကအဝ်ႏစွဲꩻတရာꩻဒါႏနာꩻ ယိုဖုံႏ ကားကအဝ်ႏနဝ်ꩻ နာꩻတဟွိုန်တဝ်းနဲ့ဟောင်း” နုဲင်းနဝ်ꩻသွူ။

14ကွဲႏတွော့ꩻ ဗွေႏယေသျု တလဝ်းချာတဝ်း ငဝ်းတငွါငွါသွူ။ ကွပ်နုဲင်းနဝ်ꩻမꩻ ခွန်ခံႏနဝ်ꩻ အံႏဖြာႏငါႏနဝ်ꩻသွူ။

ဗွေႏယေသျုခံႏဗာႏစီႏရင်ႏသီထိုꩻ

(မာကု ၁၅:၆–၁၅။ လုကာ ၂၃:၁၃–၂၅။ ယောဟန် ၁၈:၃၉—၁၉:၁၆)

15ပွယ်ꩻပတ္တခါစွုမ်ႏလဲင်ႏ လိုꩻစွိုꩻဖုံႏ ကကွီဒါႏအတွိုင်ꩻ ရောမ အစိုႏရခွန်ခံႏနဝ်ꩻ အဝ်ႏအွဉ်ႏစွꩻလွစ်ဖေႏ သေႏသေႏ ထောင်ႏသား တဖြာꩻနဝ်ꩻသွူ။ 16အချိန်ႏနဝ်ꩻ လိုꩻကအဝ်ႏ သေငါꩻစဲင်းဒါႏ ထောင်ႏသား မဉ်ꩻကဟဲ့ꩻ ယေသျုဗာရဗ္ဗနဝ်ꩻ အဝ်ႏတဖြာꩻနဝ်ꩻသွူ။ 17နဝ်ꩻမꩻ လိုꩻစွိုꩻဖုံႏ ကအဝ်ႏစုဗူႏလို့ဝင်ꩻချိန်ႏ၊ ခွန်ပိလတ်ရီဝွေꩻသီး၊ “သီအတာႏ သီမဉ်အွဉ်ႏခွေ အွဉ်ႏစွꩻလွစ်ဖေႏ အဖြာꩻမုဲင်ꩻဟောင်း။ ယေသျုဗာရဗ္ဗနဲ့ မဉ်ႏတမွေးတဝ်း ယေသျုကဟဲ့ꩻဒါႏ မေသျိယနဝ်ꩻနဲ့ဟောင်း” နုဲင်းနဝ်ꩻသွူ။ 18ယုဒအာဏာႏပဲင်ႏသားဖုံႏ ကဆွမ်ꩻဗွေႏယေသျု ကအပ်ဖေႏ ဝွေꩻစူကိုနဝ်ꩻ ကွပ်ပွိုး ဝွေꩻသီး တကေးကျောင်ꩻ၊ ခွန်ပိလတ် အဝ်ႏသေစဲင်ႏသွူ။

19ခွန်ပိလတ် အဝ်ႏအုံလင်ꩻသော့ꩻထာꩻ တရာꩻစီႏရင်ႏခန်ꩻကိုကျာꩻ ဝွေꩻမာနဝ်ꩻ အွဉ်ႏစွꩻလွဉ်ဖေႏဝွေꩻ သတင်ꩻတစွိုး၊ “လိုꩻစွို့ꩻစွဉ်ႏနဝ်ꩻ တွမ်ႏမာꩻမွိုန်း တမုဲင်ꩻမုဲင်ꩻဟုဲင်း၊ ပွိုးတွော့ꩻဟန်ႏနာꩻ ထာꩻဗေင်ႏမင်းကိုနဝ်ꩻ ကွပ်ဝွေꩻတဲင် ခွေခံႏဒုက္ခဗာႏ မွေးနေးစွဉ်ႏ” နုဲင်းနဝ်ꩻသွူ။

20ဖေႏကကွီ ခွန်ပိလတ် ဖေႏကအွဉ်ႏစွꩻလွစ် ဗာရာဗတဲင် ဖေႏကမာꩻသီထိုꩻ ဗွေႏယေသျုနဝ်ꩻ ယဇ်ပရောဟိတ် တန်ဖုံႏတွမ်ႏ လိုꩻတန်ဖုံႏနဝ်ꩻ တမာဖေႏအာႏ လိုꩻစွိုꩻဖုံႏနဝ်ꩻသွူ။ 21ကွဲႏတွော့ꩻ ခွန်ပိလတ်ရီ လိုꩻစွိုꩻဖုံႏ၊ “ဝွေꩻသီးဝင်ꩻနီယို သီမဉ်အွဉ်ႏ ခွေအွဉ်ႏစွꩻလွစ်ဖေႏ သီတာႏ အဖြာꩻမုဲင်ꩻဟောင်း” နုဲင်းနဝ်ꩻသွူ။

ဝွေꩻသီးလဝ်းချာ၊ “ဗာရဗ္ဗ” နုဲင်းနဝ်ꩻသွူ။

22ခွန်ပိလတ်ရီဝွေꩻသီး၊ “ပေါ့ꩻနုဲင်းနဝ်ꩻ ယေသျုကဟဲ့ꩻဒါႏ မေသျိယနဝ်ꩻ ခွေအီႏမာꩻဗာႏ နုဲင်းမုဲင်ꩻဟောင်း” နုဲင်းနဝ်ꩻသွူ။

ဝွေꩻသီး ကားကအဝ်ႏ လဝ်းချာ၊ “တွဲႏဒပ်ဝွေꩻ ကင်းထွန်ႏလောင်းဟုဲင်း” နုဲင်းနဝ်ꩻသွူ။

23ကွဲႏတွော့ꩻ ခွန်ပိလတ်ရီ၊ “ဝွေꩻပဲစ်မာႏလဲဉ်း ရာႏဇဝွတ်မု တမုဲင်ꩻဟောင်း” နုဲင်းနဝ်ꩻသွူ။

တွိုႏနဝ်ꩻ ဝွေꩻသီး ခြောဝ်သန် စမွေးနေးစွဉ်ႏ ဝွေꩻသီးငဝ်း၊ တွဲႏဒပ်ဝွေꩻ ကင်းထွန်ႏလောင်းဟုဲင်း” နုဲင်းနဝ်ꩻသွူ။

24 # ဟော်ꩻ ၂၁:၆–၉။ ခွန်ပိလတ်ထွိုင်ႏထီႏ မာꩻသွုပ်တမုဲင်ꩻမုဲင်ꩻ အီႏတလꩻတဝ်းဒွုမ်ချိန်ႏ၊ ယိန်းသျွုတ်တရေင်ရေင် သန်လွဉ်ထဲင်းတဲင် ဝွေꩻထူႏထီတစိꩻ ဟွာႏဝွေꩻစူ လိုꩻစွိုꩻဖုံႏ ဆꩻငါတဲင်ဒေါ့ꩻ၊ “ပါꩻယို ကသီထိုꩻဗာႏအတာႏ ခွေတာႏဝွန်ႏ တအဲဉ်ထဝ်းကွေး၊ ယိုနဝ်ꩻ သီမာꩻဒျာႏ” နုဲင်းနဝ်ꩻသွူ။

25လိုꩻစွိုꩻတစွိုꩻလွုမ်း လဝ်းချာ၊ “ဝွေꩻကသီထိုꩻဗာႏ အတာႏ တာႏဝွန်ႏနဝ်ꩻ အွဉ်ႏထဲ့လူးသွော့ နီအလောင်းတွမ်ႏ နီပိုဖုံႏအလောင်း” နုဲင်းနဝ်ꩻသွူ။

26နဝ်ꩻထွူ ဝွေꩻသီးတာႏနဝ်ꩻ ခွန်ပိလတ် အွဉ်ႏစွꩻလွစ်ဖေႏ ဗာရဗ္ဗတဲင် ဝွေꩻအွဉ်ႏတွဲႏ ဗွေႏယေသျု ထွူတွော့ꩻ ဖေႏကတွဲႏဒပ် ကင်းထွန်ႏလောင်းနဝ်ꩻ ဝွေꩻအပ်စွဉ်ႏ ဝွေꩻဗွေႏသွူ။

စဲ့ꩻသားဖုံႏပျက်သွမ်ꩻဗွေႏယေသျု

(မာကု ၁၅:၁၆–၂၀။ ယောဟန် ၁၉:၂–၃)

27နဝ်ꩻထွူ ခွန်ပိလတ် စဲ့ꩻသားဖုံႏနဝ်ꩻ ဟဲ့ꩻနွို့လွေꩻဗွေႏယေသျု ခွန်ခံႏဟော်နန်ꩻကိုတဲင် လိုꩻတစွိုꩻလွုမ်းနဝ်ꩻ စုဗူႏခူစွဉ်ႏ ဝွေꩻဗွေႏနဝ်ꩻသွူ။ 28ဝွေꩻသီးဗွောင်ႏထိုꩻ ဝွေꩻဗွေႏဆဲင်ꩻဖုံႏတဲင် အွဉ်ႏကꩻဖေႏဝွေꩻဗွေႏ ဆဲင်ꩻယွုံးတန် တနျာႏဆွာꩻနဝ်ꩻသွူ။ 29နဝ်ꩻထွူ ဝွေꩻသီးမာꩻပန်ꩻကုံꩻ ထာꩻဆူႏပင်ဖုံႏတွော့ꩻ အွဉ်ႏဆုပ်ꩻ ဝွေꩻဗွေႏကတူႏလောင်းတဲင် ခွဥ်းတလီးနဝ်ꩻ အွဉ်ႏသော့ꩻဖေႏစွဉ်ႏ ဝွေꩻဗွေႏ စူထွေဖဲ့ꩻနဝ်ꩻသွူ။ နဝ်ꩻထွူ အွပ်ꩻလင်ꩻ ဝွေꩻဗွေႏဆꩻငါတဲင် ပျက်သွမ်ꩻဝွေꩻဗွေႏ၊ “ဂျူးခွန်တန် သက်တောႏ ယံကထိုꩻ စိုးကဆွာꩻသွော့”ဝွေꩻသီး ဒေါ့ꩻနုဲင်းနဝ်ꩻသွူ။ 30တွမ်ႏယုဲင်ꩻထီ ဝွေꩻသီးပထိုလူး ဝွေꩻဗွေႏတဲင် ထူႏခွဉ်းတလီးတွော့ꩻ တွဲႏစွဉ်ႏ ဝွေꩻဗွေႏကတူႏနဝ်ꩻသွူ။ 31ဝွေꩻသီး ထွိုင်ႏပျက်သွမ်ꩻထွူ ဝွေꩻဗွေႏချိန်ႏ ဝွေꩻသီးဗွောင်ႏထိုꩻစွဉ်ႏ ဆဲင်ꩻယွုံးတန် တနျာႏတဲင် အွဉ်ႏကꩻချာ ဝွေꩻဗွေႏ အဆဲင်ꩻလီꩻနဝ်ꩻသွူ။ နဝ်ꩻထွူ အီႏတွဲႏဒပ်လူး ကင်းထွန်ႏလောင်းနဝ်ꩻ ဝွေꩻသီး အွဉ်ထန်ႏ ဝွေꩻဗွေႏနဝ်ꩻသွူ။

တွဲႏဒပ်ဗွေႏယေသျုကင်းထွန်ႏလောင်း

(မာကု ၁၅:၂၁–၃၂။ လုကာ၂၃:၂၆–၄၃။ ယောဟန် ၁၉:၁၇–၂၇)

32နုဲင်းဝွေꩻသီး ကအဝ်ႏထန်ႏလွေꩻချိန်ႏ ဝွေꩻသီး မော့ꩻခွဲဆွုမ်ႏ ပါꩻတဖြာꩻ အဝ်ႏကုရေနေခမ်းလွဉ် အမဉ်ꩻကဟဲ့ꩻ သိမုန်နဝ်ꩻတဲင် ဖေႏကထမ်ႏလွေꩻဖေႏ ဗွေႏယေသျု ကင်းထွန်ႏနဝ်ꩻ စဲ့ꩻသားဖုံႏ ထွဉ်ႏအံႏနွိုင်ႏဝွေꩻသွူ။ 33ဝွေꩻသီးဖျော်လွဉ် ခင်ႏလမ်းတထွောင်း ကဟဲ့ꩻဒါႏ ဂေါလဂေါတ၊ အဓိပ္ပါယ်ႏနဝ်ꩻ၊ “ကတူႏခြောက်ꩻခင်ႏလမ်း” နုဲင်းနဝ်ꩻသွူ။ 34#သာ ၆၉:၂၁။ နဝ်ꩻကိုနဝ်ꩻ ဝွေꩻသီးဖေႏအွꩻ ဗွေႏယေသျုဝုဲင်ဆျာႏ ကရော်ꩻဒါႏ စွဉ်ႏအခါႏဖုံႏနဝ်ꩻသွူ။ ကွဲႏတွော့ꩻ အွꩻစမ်ꩻနဝ်ꩻထွူ၊ ဝွေꩻဗွေႏ တအွꩻထဲင်းတဝ်းဒွုမ် နဝ်ꩻသွူ။

35 # သာ ၂၂:၁၈။ ဝွေꩻသီးတွဲႏဒပ် ဝွေꩻဗွေႏ ကင်းထွန်ႏလောင်းထွူတဲင် ဝွေꩻဗွေႏခွမ်ꩻလာꩻနဝ်ꩻ ဝွေꩻသီး အွဉ်ႏချꩻလင်ꩻနေး ထာꩻတောႏရာႏတွော့ꩻ ဝွေꩻသီး ဖန်းဖေႏစွဉ်ႏလို့ဝင်ꩻသွူ။ 36နဝ်ꩻထွူ ဝွေꩻသီးအုံလင်ꩻ နဝ်ꩻကိုတဲင် အဝ်ႏပွေါးထွား ဝွေꩻဗွေႏနဝ်ꩻသွူ။ 37ဝွေꩻဗွေႏ ကတူႏဆꩻကီနဝ်ꩻ ဝွေꩻသီး တဲမ်းကေႏညာႏ စွဲꩻခတ်ꩻဆန်ဝွေꩻဗွေႏ၊ “ယိုနဝ်ꩻထွာဒျာႏ ယေသျု၊ ဂျူးအခွန်တန်” နုဲင်းနဝ်ꩻသွူ။ 38နဝ်ꩻထွူ စွန်သားဝင်ꩻနီနဝ်ꩻ ဝွေꩻသီး တွဲႏဒပ်ငီꩻစွဉ်ႏ ဗွေႏယေသျု၊ တဖြာꩻနဝ်ꩻ ဝွေꩻဗွေႏစူထွေဖဲ့ꩻတွော့ꩻ အလင်တဖြာꩻနဝ်ꩻ ဝွေꩻဗွေႏစူစေႏဖဲ့ꩻသွူ။

39 # သာ ၂၂:၇၊ ၁၀၉:၂၅။ လိုꩻဖုံႏ ကဖျတ်ကာႏလွေꩻ နဝ်ꩻကိုသားနဝ်ꩻ တရွူꩻ ဝွေꩻသီးကတူႏတဲင် ခြောဝ်သဲ့ꩻသွမ်ꩻစွဉ်ႏ ဗွေႏယေသျုသွူ။ 40#မ ၂၆:၆၁၊ ယော ၂:၁၉။ “နာꩻအင်းယားကုဲင် ဗိမာန်ႏတောႏကျောင်ꩻတဲင် သွံနီꩻယံတွင်ꩻ အင်းတယ်ႏဟဝ်ချာယင်းရိုꩻ၊ နာꩻမဉ်ႏထွာမွေး ဗွေႏဘုရာꩻ ပိုခိုနဝ်ꩻ ကယ်ႏချာနာꩻနမ်းဟုဲင်း။ အဝ်ႏကင်ႏထွဉ်ႏလောင်းနဝ်ꩻ လင်ꩻလွဉ်ဟုဲင်း” နုဲင်းနဝ်ꩻသွူ။

41ဗွိုန်နုဲင်းနဝ်ꩻနေနေ ယဇ်ပရောဟိတ်တန်ဖုံႏ၊ ကျမ်ꩻဒါႏဆရာႏဖုံႏတွမ်ႏ လိုꩻတန်ဖုံႏနဝ်ꩻတဲ့ ပျက်သွမ်ꩻစွဉ်ႏ ဝွေꩻဗွေႏသွူ။ 42ဝွေꩻကယ်ႏဒါႏ လိုꩻလင်ဖုံႏ၊ ကွဲႏတွော့ꩻ ဝွေꩻနမ်းနဝ်ꩻ ဝွေꩻတကယ်ႏချာနွောင်ꩻတဝ်း၊ ဝွေꩻနဝ်ꩻ ဣသရေးခွန်တန် တမွေးတဝ်းဟောင်း။ ဝွေꩻမဉ်ႏအဝ်ႏ ကင်းထွန်ႏလောင်း လင်ꩻလွဉ်ယိုခါနဝ်ꩻ နီအီႏယွုမ်းအံႏဝွေꩻ။ 43#သာ ၂၂:၈။ ဝွေꩻနဝ်ꩻ ယွုမ်းအာႏကွိုꩻဒျာႏ ဗွေႏဘုရာꩻတဲင် အဝ်ႏကေႏညာႏဒျာႏ အီႏထွာ ဗွေႏဘုရာꩻ ပိုခိုနဝ်ꩻသွူ။ မွေးလဲဉ်းသွူ၊ ယိုခါ နီထွားစမ်ꩻတွမ်၊ ဗွေႏဘုရာꩻ မဉ်ကယ်ႏနေ ဝွေꩻဟောင်း” နုဲင်းနဝ်ꩻသွူ။

44ပါꩻစွန်သားဖုံႏ ကခံႏဗာႏ တွဲႏဒပ်ငီꩻ ဝွေꩻဗွေႏ ကင်းထွန်ႏလောင်းနဝ်ꩻတဲ့ လဲင်ꩻကဲ့ꩻရဲ့ꩻစွဉ်ႏ ဝွေꩻဗွေႏ ဗွိုန်နုဲင်းနဝ်ꩻ နေနေသွူ။

ဗွေႏယေသျုသီ

(မာကု ၁၅:၃၃–၄၁။ လုကာ ၂၃:၄၄–၄၉။ ယောဟန် ၁၉:၂၈–၃၀)

45မွူးယာခိုႏတိန်ႏတိန်ႏ တခမ်းလွုမ်းနဝ်ꩻ ထာꩻခေ့ꩻကရစ်ꩻ အဝ်ႏလုမ်ႏဗဉ်ႏ ညစွဉ်ႏ သွံနားရီႏသွူ။ 46#သာ ၂၂:၁။ သွံနာႏရီႏရပ်နဝ်ꩻ ဗွေႏယေသျု ခြောဝ်ထန်ႏသန် အငဝ်း၊ “ဧလိ၊ ဧလိ၊ လီမာသာဗာတနိ” အဓိပ္ပါယ်ႏနဝ်ꩻ “ခွေဗွေႏဘုရာꩻ၊ ခွေဗွေႏဘုရာꩻ၊ ပွိုးတမုဲင်ꩻ နီဗွေႏစွဉ်ꩻကုဲင် ထိုꩻဗာႏတွိုႏခွေဟောင်း” နုဲင်းနဝ်ꩻသွူ။

47လိုꩻဖုံႏ အဝ်ႏအုံထွိုင်ႏ နဝ်ꩻကိုသား ယင်ဟန်ႏ ဟွိုန်ဝွေꩻဗွေႏငဝ်း တဲင်ဒေါ့ꩻ၊ “ဝွေꩻအဝ်ႏဟဲ့ꩻ ဧလိယတန်” နုဲင်းနဝ်ꩻသွူ။ 48#သာ ၆၉:၂၁။ ဝွေꩻသီးကို ပါꩻတဖြာꩻနဝ်ꩻ ဖင်းထွိုင်ႏ တလဲင်ႏချင်ꩻတဲင် ထူႏကစုပ်ꩻအီဒါႏ ထီနဝ်ꩻတွော့ꩻ စုပ်ꩻသော့ꩻ ဝုဲင်ထီဆျာႏကို အွဉ်ႏဖွို့ ခွဉ်းဆွာꩻနာလောင်းတွော့ꩻ ကျိုꩻစာꩻအွဉ်ႏမိုး ဝွေꩻဗွေႏ ဖေႏကအွꩻဝုဲင်နဝ်ꩻသွူ။

49ကွဲႏတွော့ꩻ အလင်ဖုံႏနဝ်ꩻဒေါ့ꩻ၊ “အုံပွေါးဒွိုန်းကဟုဲင်း၊ နီအွဉ်ဝင်ꩻထွားစမ်ꩻ ဧလိယ အီႏလွဉ်ကယ်ႏနေ ဝွေꩻဟောင်းနဲ့” နုဲင်းနဝ်ꩻသွူ။

50ဗွေႏယေသျု ခြောဝ်သန်ဖျင် အငဝ်းတလဲင်ႏတဲင် ဝွေꩻဗွေႏထာꩻသာ သွတ်ꩻထိုꩻစွဉ်ႏနဝ်ꩻသွူ။

51 # ထလ ၂၆:၃၁–၃၃။ နဝ်ꩻထွူ ဖုဲင်ကင်း ကအဝ်ႏဖွို့သော့ꩻဒါႏ ဗိမာန်ႏတောႏ ကျောင်ꩻကိုနဝ်ꩻ အဝ်ႏအမော့ကီ ပꩻသဲ့ဗꩻလင်ꩻစွဉ်ႏ အကင်တွော့ꩻ ထွာစွဉ်ႏနီခဝ်သွူ။ ဟံႏတန်တသွိုးတဲင် လုံးတူႏတန်ဖုံႏ ပꩻခဝ်လီစွဉ်ႏသွူ။ 52သဲင်ႏခဲင်ꩻအောင်ဖုံႏ ဗွောင်တဲင် ဗွေႏဘုရာꩻ အလိုꩻကသီလဲဉ်းဒါႏဖုံႏနဝ်ꩻ ထွိုင်ႏမွန်လွဉ်ချာ အာငါႏနဝ်ꩻသွူ။ 53ဗွေႏယေသျု အဝ်ႏထာꩻသီကို ထွိုင်ႏမွန်နဝ်ꩻထွူ ဝွေꩻသီး အဝ်ႏသဲင်ႏခဲင်ꩻ ထန်ႏထိုꩻတဲင် ဝွေꩻသီး နွို့လွေꩻသော့ꩻ ဝေင်ꩻကြောင်းစင်ကိုနဝ်ꩻ လိုꩻကထီႏဗာႏ ဝွေꩻသီးသားဖုံႏ အာငါႏသွူ။

54စဲ့ꩻပိုႏတန်တွမ်ႏ စဲ့ꩻသားဖုံႏ ကအဝ်ႏငီꩻဒါႏ စွဉ်ႏဝွေꩻဗွေႏ၊ ကအဝ်ႏအုံပွေါးထွားဒါႏ ဗွေႏယေသျုသားဖုံႏနဝ်ꩻ ထွိုင်ႏထီႏ ဟံႏတသွိုးစွဉ်ႏ ထာꩻ ကထွာလွဉ်လဲဉ်းဒါႏ အလင်ဖုံႏ ကားကအဝ်ႏနဝ်ꩻ ဝွေꩻသီးငမ်းသꩻတဲင်ဒေါ့ꩻ၊ “ဝွေꩻနဝ်ꩻထွာမွေး ဗွေႏဘုရာꩻ ပိုခိုဒျာႏရင်ꩻ” နုဲင်းနဝ်ꩻသွူ။

55 # လု ၈:၂၊၃။ နဝ်ꩻကို လိုꩻမူႏဖုံႏ အဝ်ႏကာလိလဲခမ်း ကလွေꩻလွဉ်ꩻဒါႏ ဗွေႏယေသျုဆꩻချာ ကအဝ်ႏစွဲကိုဒါႏ ဝွေꩻဗွေႏသားဖုံႏနဝ်ꩻ အဝ်ႏအညာꩻ အဝ်ႏထွားနဝ်ꩻသွူ။ 56ဝွေꩻသီးကိုနဝ်ꩻထွာ မာဂဒလ ဝေင်ꩻသားမူႏ မာရိ၊ ယာကုပ်စွဉ်ႏ ယောသပ်သီးအမွိုး မာရိတွမ်ႏ ဇေဗေဒဲအမာနဝ်ꩻသွူ။

သင်္ဂြိုဟ်ႏဗွေႏယေသျု

(မာကု ၁၅:၄၂–၄၇။ လုကာ ၂၃:၅၀–၅၆။ ယောဟန် ၁၉:၃၈–၄၂)

57မွူးထွိုင်ႏဟာလင်ꩻချိန်ႏ လိုꩻခြွေတဖြာꩻ အဝ်ႏဝေင်ꩻအရိမတဲနဝ်ꩻ ဖျော်လွဉ်သွူ။ ဝွေꩻနဝ်ꩻမဉ်ꩻ ယောသပ်တဲင် ဝွေꩻနဝ်ꩻတဲ့ အဝ်ႏထွာ ဗွေႏယေသျု တပဲ့တောႏ တဖြာꩻနဝ်ꩻသွူ။ 58ဝွေꩻနွို့လွေꩻသော့ꩻ ခွန်ပိလတ်ထျꩻတဲင် ကွီဗွေႏယေသျု ရုပ်ခန္ဓာႏနဝ်ꩻသွူ။ ရုပ်ခန္ဓာႏ ဖေႏနေးကဖေႏ ယောသပ်နဝ်ꩻ ခွန်ပိလတ် ဖေႏအမိန်းသွူ။ 59နဝ်ꩻမꩻ ယောသပ်ထူႏ ရုပ်ခန္ဓာႏတွော့ꩻ၊ စွဉ်ႏပိတ်ယာႏချော်ꩻ တသာတဖွူꩻ ဗဲဥ်လွမ်စွဉ်ႏ ရုပ်ခန္ဓာႏတဲင်၊ 60ရုပ်ခန္ဓာႏနဝ်ꩻ အွဉ်ႏသော့ꩻစွဉ်ႏ ဝွေꩻနမ်းပဲင်ႏ သဲင်ႏခဲင်ꩻမုခ် စတောက်ꩻဒို တသာထွူ လုံးဆွော့ꩻတန် အိုကိုနဝ်ꩻသွူ။ နဝ်ꩻထွူ ဝွေꩻအွဉ်ႏကြွီႏ လုံးတူႏတန်တဖြုံႏ၊ အွဉ်ႏပေ့ꩻခါꩻ သဲင်ႏခဲင်ꩻမုခ်ငွါတဲင် လွေꩻညာꩻထိုꩻစွဉ်ႏသွူ။ 61မာဂဒလ ဝေင်ꩻသားမူႏ မာရိတွမ်ႏ မာရိအလင်နဝ်ꩻ အဝ်ႏအုံလင်ꩻနဝ်ꩻကို အဝ်ႏခွယ်ႏတောႏထေ့ သဲင်ႏခဲင်ꩻနဝ်ꩻသွူ။

စဲ့ꩻအုံပွေါးသဲင်ႏခဲင်ꩻအောင်

62ဆုဲင်ꩻတနီꩻနဝ်ꩻ ထွာဥပုသ်မွူးနီꩻနဝ်ꩻမꩻ ယဇ်ပရောဟိတ်တန်ဖုံႏတွမ်ႏ ဖါရိသဲဖုံႏနဝ်ꩻ မော့ꩻခွဲစွဉ်ႏ ခွန်ပိလတ်တဲင်၊ 63#မ ၁၆:၂၁၊ ၁၇:၂၃၊ ၂၀:၁၉၊ မာ ၈:၃၁၊ ၉:၃၁၊ ၁၀:၃၃၊ ၃၄၊ လု ၉:၂၂၊ ၁၈:၃၁–၃၃။ ဒေါ့ꩻ၊ “ဗွေႏ၊ ပါꩻလဲဉ်တန်ယို သက်အဝ်ႏမွန်ကျာꩻနဝ်ꩻ ဝွေꩻဒေါ့ꩻ ၊ ‘သွံနီꩻထွူ ခွေအီႏထွိုင်ႏမွန် လွဉ်ချာယင်းဒျာႏ နုဲင်းနဝ်ꩻနဝ်ꩻ နီအဝ်ႏတောင်ꩻ’ နုဲင်းနဝ်ꩻသွူ။ 64နဝ်ꩻမꩻ ဝွေꩻသဲင်ႏခဲင်ꩻအောင်တာႏနဝ်ꩻ ထေအမိန်း ဖေႏနေး ကအုံပွေါးထွားဟဝ်ဟဝ် ဗꩻတွိုႏစွဉ်ႏသွံနီꩻ၊ ဖေႏနေး ဝွေꩻတပဲ့ဖုံႏ လွေꩻတဲင် ဖေႏကထူႏတခွန်ꩻ နွောင်ꩻမွိုန်း ရုပ်ခန္ဓာႏ၊ အဝ်ႏထာꩻသီကို ဝွေꩻထွိုင်ႏမွန်လဲဉ်း မဲ့အဒေါ့ꩻနယ်ထိုꩻ လိုꩻဖုံႏနုဲင်းယို။ ထာꩻလဲဉ်အဆုဲင်ꩻနဝ်ꩻ အီႏဟုဲင်းကယ်ꩻလဲဉ်းက အရီးတလဲင်ႏ” နုဲင်းနဝ်ꩻသွူ။

65ခွန်ပိလတ် ဒေါ့ꩻဖေႏဝွေꩻသီး၊ “အုံပွေါးဟုဲင်း။ နုဲင်းသီကမာꩻနွောင်ꩻနဝ်ꩻ လွေꩻတဲင် မာꩻလုမ်းဗဉ်ႏသွော့ သဲင်ႏခဲင်ꩻအောင်” နုဲင်းနဝ်ꩻသွူ။

66နဝ်ꩻမꩻ ဝွေꩻသီးထန်ႏတဲင် စွဉ်ႏ စွုမ်ႏတံꩻဆိပ်နဝ်ꩻ တောက်ꩻလူးခါꩻစွဉ်ႏ လုံးတူႏတန်လောင်းတဲင် အွဉ်ႏအုံပွေါးထွားစွဉ်ႏ စဲ့ꩻပွေါးသားတွော့ꩻ မာꩻလုမ်းဗဉ်ႏစွဉ်ႏ သဲင်ႏခဲင်ꩻအောင်နဝ်ꩻသွူ။

Currently Selected:

မတဲ 27: PBCL

Highlight

Copy