မတဲ 2
2
ထဉ်ႏဖုံႏအဝ်ႏခမ်းကွဉ်ႏလွဉ်
1ဟေရုဒ် ကအဝ်ႏထွာ ခွန်တန်ချိန်ႏ ဗွေႏယေသျု လွူးဖွာꩻလွဉ် ယုဒခမ်း ဝေင်ꩻဗဲက်လဟဲမ်ကို နဝ်ꩻသွူ။ တညတဝ်း မာဂုဉာဏ်ႏတန်သား ကအဝ်ႏလေ့လာ ထွားဒါႏ ဆာႏဖုံႏနဝ်ꩻ အဝ်ႏခမ်းကွဉ်ႏ ဖျော်လွဉ် ဝေင်ꩻယေရုသလမ်ႏ တဲင်ရီ၊ 2“ကလွူးလွဉ်ဒါႏ လိုꩻပေႏ ဂျူးခွန်တန်နဝ်ꩻ အဝ်ႏမုဲင်ꩻကိုဟောင်း။ နီထီႏလဲဉ်း ဝွေꩻဆာႏ ပေါႏလွဉ်ထာꩻ အွိုးခမ်းကွဉ်ႏသူꩻတဲင် နီအီႏလွဉ် ဝုဲင်ႏကိုꩻကွယ်ႏ ဝွေꩻဗွေႏ” နုဲင်းနဝ်ꩻသွူ။
3ခွန်တန်ဟေရုဒ် ထွိုင်ႏဟွိုန် ငဝ်းနုဲင်းယို ဝွေꩻတွမ်ႏလိုꩻလင် ကအဝ်ႏသော့ꩻ ဝေင်ꩻယေရုသလမ်ႏကိုသား စွုမ်ႏဖြာꩻနဝ်ꩻ သꩻကုဲင်ငါႏနဝ်ꩻသွူ။ 4ခွန်တန်ဟဲ့ꩻစုဗူႏလို့ ယဇ်ပရောဟိတ် တန်ဖုံႏတွမ်ႏ ကျမ်ꩻဒါႏဆရာႏဖုံႏတဲင် ရီဝွေꩻသီး၊ “မေသျိယ ခရစ်တောႏနဝ်ꩻ အီႏလွူးလွဉ် မုဲင်ꩻကိုဟောင်း၊” နုဲင်းနဝ်ꩻသွူ။
5ဝွေꩻသီးလဝ်းချာ၊ “အီႏလွူးယုဒခမ်း ဝေင်ꩻဗဲက်လဟဲမ်ကို နုဲင်းပရောဖဲစ် ကတဲမ်းသေꩻခါꩻဒါႏနဝ်ꩻ နုဲင်းယို၊
6 #
မိတ် ၅:၂။ ‘ယုဒခမ်းကို ဝေင်ꩻဗဲက်လဟဲမ်၊
ကအဝ်ႏအွဉ်ငါဒါႏ ယုဒခမ်း ဝေင်ꩻတောႏတန်ဖုံႏ၊ နာꩻနဝ်ꩻ ဝေင်ꩻပေႏတမွေးတဝ်း၊
ကအီႏအွဉ်ဖေႏဒါႏ ခွေလိုꩻမျိုꩻ ဣသရေးဖုံႏနဝ်ꩻ
ပွိုးအဝ်ႏနာꩻအကို ခေါင်းဆောင်တပါꩻ အီႏပေါႏလွဉ်’” နုဲင်းနဝ်ꩻသွူ။
7တွိုႏနဝ်ꩻ ခွန်တန်ဟေရုဒ် ဟဲ့ꩻလွဉ် မော့ꩻခွဲတေ့ꩻ ထဉ်ႏအဝ်ႏခမ်းကွဉ်ႏ လွဉ်တဲင် ရီစဲင်းစွဉ်ႏ ဆာႏကပေါႏလွဉ် အချိန်ႏနဝ်ꩻသွူ။ 8နဝ်ꩻထွူ ဝွေꩻအွဉ်ႏစွꩻလွေꩻ ဝွေꩻသီး ဝေင်ꩻဗဲက်လဟဲမ် တွမ်ႏငဝ်းထွန်ႏ နုဲင်းယို၊ “လွေꩻတဲင် ထုမ်ႏမော့ꩻမော့ꩻသွော့ လိုꩻပေႏဟုဲင်း။ နဝ်ꩻမꩻ သီမဉ်ႏမော့ꩻဝွေꩻချိန်ႏ၊ ဖေႏနေး ခွေတဲ့လွေꩻတွော့ꩻ ကဝုဲင်ႏကိုꩻကွယ်ႏဗာႏ ဝွေꩻနဝ်ꩻ အွဉ်ႏဟွိုန်ပါသွော့ ခွေဟုဲင်း” နုဲင်းနဝ်ꩻသွူ။
9-10နဝ်ꩻမꩻ ဝွေꩻသီး ထန်ႏလွေꩻတွော့ꩻ တဖူꩻလောင်းနဝ်ꩻ ဝွေꩻသီး ထီႏဗာႏစွဉ်ႏဆာႏ နုဲင်းဝွေꩻသီး ကထီႏလဲဉ်းဒါႏ ခမ်းကွဉ်ႏနဝ်ꩻသွူ။ ဝွေꩻသီးထွိုင်ႏထီႏ ဆာႏနဝ်ꩻ ဝွေꩻသီးပျောႏငါႏ ခွိုင်းကားမုဲင်ꩻ၊ ဝွေꩻသီးအဝ်ႏစွဉ်ႏ ထာꩻသꩻဟဝ် သꩻရေꩻ၊ ဆာႏနဝ်ꩻ အွဉ်လွေꩻငါရီး ဝွေꩻသီး ဗꩻတွိုႏစွဉ်ႏ လိုꩻပေႏ အဝ်ႏခင်ႏလမ်း ဆꩻကီနဝ်ꩻတွော့ꩻ အုံထွိုင်ႏစွဉ်ႏသွူ။ 11ဝွေꩻသီးနွို့ငါသော့ꩻ လမ်းကိုတဲင် ဝွေꩻသီးထွိုင်ႏထီႏ လိုꩻပေႏတွမ်ႏ ဝွေꩻအမွိုး မာရိနဝ်ꩻ ဝွေꩻသီး အွပ်ꩻလင်ꩻတဲင် ဝုဲင်ႏကိုꩻကွယ်ႏစွဉ်ႏ ဝွေꩻဗွေႏ နဝ်ꩻသွူ။ ဝွေꩻသီး ထူႏထန်ႏလွဉ် ဝွေꩻသီး မေတ္တာႏ လက်ဆောင်ႏ ခံꩻ၊ လော်ဗန်၊ မုရန် နံꩻသာႏဟွမ်တဲင် လူႏစွဉ်ႏ ဝွေꩻဗွေႏနဝ်ꩻသွူ။
12နဝ်ꩻထွူ တယ်ႏစွဉ်ႏ ဗွေႏဘုရာꩻ ဖေႏသတိလဲဉ်း ဝွေꩻသီး ထာꩻဗေင်ႏမင်းကို ဖေႏကသဲင်ꩻထေ့ချာမွိုန်း ဟေရုဒ်ထျꩻ အတွိုင်ꩻ ဝွေꩻသီး သဲင်ꩻချာအခမ်း၊ တွမ်ႏတဖူꩻ အလင်တလီး နဝ်ꩻသွူ။
ဖင်းသျောင်ႏလဲ့လွေꩻအီဂျစ်ခမ်း
13ဝွေꩻသီး ထန်ႏလွေꩻထွူ၊ ထာဝရဘုရာꩻ မို့ꩻလောင်းတမန်ႏ တပါꩻနဝ်ꩻ ပေါႏလွဉ်ထေ့ ယောသပ် ထာꩻဗေင်ႏမင်းကိုတဲင်ဒေါ့ꩻ၊ “ကအီႏမာꩻသီဗာႏ လိုꩻပေႏနဝ်ꩻ ခွန်တန်ဟေရုဒ် အဝ်ႏထုမ်ႏဝွေꩻသွူ။ ထွိုင်ႏတဲင် ထူႏလိုꩻပေႏတွမ်ႏ အမွိုးတွော့ꩻ ဖင်းသျောင်ႏလဲ့သော့ꩻ အီဂျစ်ခမ်းတဲင် ဗꩻတွိုႏစွဉ်ႏ ခွေကဒေါ့ꩻနယ်နာꩻ အွဉ်ႏထန်ႏထိုꩻနဝ်ꩻ အုံသွော့နဝ်ꩻကို” နုဲင်းနဝ်ꩻသွူ။
14ယောသပ်ထွိုင်ႏတဲင် ဟဲ့ꩻလိုꩻပေႏစွဉ်ႏ အမွိုးတွော့ꩻ ထန်ႏလွေꩻခေ့ꩻ ထိုꩻစွဉ်ႏ အီဂျစ်ခမ်းနဝ်ꩻသွူ။ 15#ဟော ၁၁:၁။ ဝွေꩻအုံနဝ်ꩻကို ဗꩻတွိုႏစွဉ်ႏ ဟေရုဒ် ကသီထိုꩻနဝ်ꩻသွူ။ ယိုနဝ်ꩻ “ခွေဟဲ့ꩻထန်ႏ ခွေပိုခို အီဂျစ်ခမ်း၊” နုဲင်းထာဝရဘုရာꩻ ကမိန်းဖေႏစွဉ်ႏ ပရောဖဲစ်နဝ်ꩻ ဗွေမဲဉ်ႏလွဉ်ꩻစွဉ်ႏ နဝ်ꩻသွူ။
မာꩻသီထိုꩻလိုꩻပေႏဖုံႏ
16ထဉ်ႏဉာဏ်ႏတန်သား ခမ်းကွဉ်ႏ၊ လဲဉ်ထိုꩻလဲဉ်းဝွေꩻကျောင်ꩻ ဟေရုဒ် ထွိုင်ႏသေစဲင်းနဝ်ꩻ၊ သꩻလျား မွေးနေးစွဉ်ႏထာꩻ နဝ်ꩻသွူ။ နုဲင်းဝွေꩻ ကသေဗာႏလဲဉ်း ထဉ်ႏဖုံႏထျꩻ ဆာႏကပေါႏလွဉ်ဒါႏ အချိန်ႏအတွိုင်ꩻ ဖေႏကမာꩻသီထိုꩻလို့ လိုꩻခိုပေႏ ဝေင်ꩻဗဲက်လဟဲမ်စွဉ်ႏ အသောင်အထျꩻ သက်နီနေင်ႏမာꩻလနဝ်ꩻ ဝွေꩻဖေႏအမိန်း နဝ်ꩻသွူ။
17ယိုနဝ်ꩻ ဗွေမဲဉ်ႏလွဉ်ꩻစွဉ်ႏ အနယ်ꩻ နုဲင်းပရောဖဲစ် ယေရမိ ကဟော်ꩻသေꩻခါꩻဒါႏ၊
18 #
ယေ ၃၁:၁၅။ “ရာမအရပ် ခင်ႏလမ်းကိုနဝ်ꩻ ဟွိုန်ဗာႏ ငဝ်းတစွိုး၊
ငဝ်းသောင်ခြင်ꩻ ငွိုးအွီႏမွေး နေးစွဉ်ႏထာꩻ၊
ရာခေလနဝ်ꩻ အဝ်ႏငွိုးဖေႏ ဝွေꩻမူႏ အပိုဖုံႏတာႏ၊
ပွိုးဝွေꩻသီး သီထိုꩻအတွက်၊
ဝွေꩻမူႏငွိုးထာꩻနဝ်ꩻ တပြေႏနွောင်ꩻတဝ်း” နုဲင်းနဝ်ꩻသွူ။
အဝ်ႏအီဂျစ်ခမ်းသဲင်ꩻလွဉ်ချာ
19ဟေရုဒ်သီထွူနဝ်ꩻ ထာဝရဘုရာꩻ တမန်ႏတပါꩻပေါႏလွဉ် ယောသပ် ထာꩻဗေင်ႏမင်း အီဂျစ်ခမ်းကို၊ 20တဲင်ဒေါ့ꩻ၊ “ပွိုးတွော့ꩻ ပါꩻကအဝ်ႏကျံႏ မာꩻသီဒါႏ လိုꩻပေႏနဝ်ꩻ သီထိုꩻလဲဉ်းနဝ်ꩻမꩻ ထွိုင်ႏတဲင် ထူႏလိုꩻပေႏတွမ်ႏ အမွိုးနဝ်ꩻတွော့ꩻ သဲင်ꩻချာသွော့ ဣသရေးခမ်းဟုဲင်း” နုဲင်းနဝ်ꩻသွူ။ 21နဝ်ꩻမꩻ ယောသပ်နဝ်ꩻ ထွိုင်ႏတဲင် ဟဲ့ꩻထူႏ လိုꩻပေႏတွမ်ႏ အမွိုးတွော့ꩻ သဲင်ꩻချာ ဣသရေးခမ်း နဝ်ꩻသွူ။
22ကွဲႏတွော့ꩻ ယောသပ် ထွိုင်ႏဟွိုန် အာခေလနဝ်ꩻ ထင်ႏလဲဉ်း ဝွေꩻဖါ ဟေရုဒ်ခြောင် နုဲင်းယုဒခမ်း ခွန်တန်အရာႏ နဝ်ꩻမꩻ၊ ဝွေꩻတလွေꩻဗွိုန်ႏတဝ်း နဝ်ꩻကိုတဲင် ဝွေꩻလꩻဖျင်ယင်း ငဝ်းထွန်ႏချက် ထာꩻဗေင်ႏမင်းကို တစွိုး၊ နဝ်ꩻမꩻ ဝွေꩻလွေꩻထိုꩻ ကာလိလဲနယ်ႏတဲင် 23#မာ ၁:၂၄၊ လု ၂:၃၉၊ ယော ၁:၄၅။ ဝွေꩻသီး လွေꩻအုံစွဉ်ႏ ဝေင်ꩻမဉ်ꩻ နာဇရဲစ်သွူ။ နဝ်ꩻမꩻ ၊ “ဝွေꩻနဝ်ꩻ အီႏဟဲ့ꩻဗာႏ နာဇရဲစ်ဝေင်ꩻသား” နုဲင်းပရောဖဲစ် ကဟော်ꩻသေꩻခါꩻဒါႏနဝ်ꩻ မဲဉ်ႏလွဉ်ꩻစွဉ်ႏနဝ်ꩻသွူ။
Currently Selected:
မတဲ 2: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.