ကမ္ဘာႏစ 26
26
ဣသဲစ်အုံဂေရာဝေင်ꩻ
1ခမ်းနဝ်ꩻကိုနဝ်ꩻ နုဲင်းအဗြာဟံစိုး ရီးခါ ထာꩻအံႏအွꩻ ခြောလွဉ်ဖျင်သွူ။ ဣသဲစ် လွေꩻဖိလိတ္တိခွန်တန် အဗိမလဲက်ထျꩻ ဂေရာဝေင်ꩻနဝ်ꩻသွူ။ 2ထာဝရဘုရာꩻ ပေါႏနယ်ထင်ႏသျာꩻဖေႏ ဣသဲစ်တဲင်မိန်း၊ “တွမ်ႏလွေꩻမွိုန်း အီဂျစ်ခမ်း၊ နာꩻလွေꩻအုံသွော့ ခွေကအွဉ်ႏနယ်ဒါႏနာꩻ ခမ်းနဝ်ꩻဟုဲင်း ။ 3#ကမ္ဘာႏ ၂၂:၁၆–၁၈။ အုံသွော့ ခမ်းယိုကိုတဲင် ခွေတဲ့ အီႏအဝ်ႏငီꩻတွမ်ႏနာꩻ အီႏဖေႏနာꩻမင်္ဂလာႏ၊ နယ်ႏယို ကားကအဝ်ႏနဝ်ꩻ ခွေအီႏဖေႏနာꩻတွမ်ႏ နာꩻပိုလီꩻ စွိုးခွိုꩻဖုံႏ နုဲင်းခွေကအွဉ်ႏဂတိခါꩻဒါႏ နာꩻဖါ အဗြာဟံ အတွိုင်ꩻနဝ်ꩻ ခွေအီႏအွဉ်ႏတီႏ ဂတိသွူ။ 4ခွေအီႏဖေႏအာနာꩻ ပိုလီꩻစွိုးခွိုꩻ ဗွိုန်နုဲင်းဆာႏ မို့ꩻလောင်းကီတဲင် နယ်ႏဖုံႏ ကားကအဝ်ႏနဝ်ꩻ ခွေအီႏဖေႏ ဝွေꩻသီးသွူ။ နုဲင်းခွေကဖေႏနာꩻ ပိုလီꩻစွိုးခွိုꩻဖုံႏ မင်္ဂလာႏအတွိုင်ꩻ လိုꩻမျိုꩻဖုံႏ ကားကအဝ်ႏနဝ်ꩻတဲ့ꩻ အီႏကွီနုဲင်းနုဲင်း မင်္ဂလာႏ ခွေထျꩻသွူ။ 5အဗြာဟံနဝ်ꩻ လွောက်ꩻနာႏမာꩻလွဉ်ꩻ နုဲင်းခွေပညတ်ကျမ်ꩻ တွမ်ႏဥပဒေႏဖုံႏ ကားကအဝ်ႏ နဝ်ꩻမꩻ ခွေအီႏဖေႏနာꩻ မင်္ဂလာႏ” နုဲင်းနဝ်ꩻသွူ။
6နဝ်ꩻမꩻ ဣသဲစ်နဝ်ꩻ အုံသော့ꩻဒျာႏ ဂေရာဝေင်ꩻကိုသွူ။ 7#ကမ္ဘာႏ ၁၂:၁၃၊ ၂၀:၂။ လိုꩻခို ကအဝ်ႏနဝ်ꩻကိုဖုံႏရီ ဝွေꩻမာခရာႏတဲင် ဝွေꩻဒေါ့ꩻ ဝွေꩻမူႏနဝ်ꩻထွာဒျာႏ ဝွေꩻဖူးမူႏ နုဲင်းနဝ်ꩻသွူ၊ ဝွေꩻတဒေါ့ꩻတဝ်းထွာ ဝွေꩻမာနဝ်ꩻ ကွပ်ပွိုး ရီဗက္ကနဝ်ꩻ ယောင်ꩻရေꩻငါႏနဝ်ꩻမꩻ ဝွေꩻငမ်းသꩻ ပါꩻခိုနဝ်ꩻကိုဖုံႏ မာꩻသီထိုꩻဝွေꩻတဲင် ထူႏထိုꩻ ရီဗက္ကနဝ်ꩻသွူ။ 8ဣသဲစ်အုံနဝ်ꩻကို ထွိုင်ႏညနဝ်ꩻ တနီꩻသား ခွန်တန်အဗိမလဲက် အဝ်ႏဝွေꩻဟော်နန်ꩻ ပတိန်ႏပေါက် ထွားလင်ꩻတဲင်ထီႏ ဣသဲစ်တွမ်ႏ ရီဗက္က စွပ်ꩻလွူꩻလို့ဝင်ꩻနဝ်ꩻသွူ။ 9ခွန်တန်အဗိမလဲက် ဟဲ့ꩻလွဉ်ဣသဲစ်တဲင်ရီ၊ “ပါꩻမူႏယိုနဝ်ꩻ ထွာနာꩻမာဒျာႏနဲ့၊ ပွိုးတမုဲင်ꩻ နာꩻရိုꩻဗာႏတွိုႏ နာꩻဖူးမူႏ နုဲင်းမုဲင်ꩻဟောင်း” နုဲင်းနဝ်ꩻသွူ။
ဣသဲစ်လဝ်းချာ၊ “ခွေသွဉ်းမာဒျာႏ၊ မဉ်ႏနုဲင်းနဝ်ꩻနဝ်ꩻ ငမ်းသꩻ ဝင်ꩻမာꩻသီထိုꩻခွေ” နုဲင်းနဝ်ꩻသွူ။
10အဗိမလဲက်ခွန်ဒေါ့ꩻ၊ “ပွိုးတမုဲင်ꩻ နာꩻမာꩻဗာႏတွိုႏနီ နုဲင်းယိုဟောင်း၊ ခွေလိုꩻတဖြာꩻဖြာꩻ မဉ်ႏပဲစ်မာႏဗာႏမိထိုꩻ နာꩻမာနဝ်ꩻ၊ ပွိုးနာꩻထာꩻမာꩻနဝ်ꩻ အပဲစ်အီႏတွိုႏတော နီအလောင်း” နုဲင်းနဝ်ꩻသွူ။ 11အဗိမလဲက်ခွန်တန် ဖေႏသတိ အလိုꩻဖုံႏ ကားကအဝ်ႏ “ပါꩻမုဲင်ꩻမဉ်ႏပဲစ်မာႏ ပါꩻယိုတဲ့ꩻနဝ်ꩻ ဝွေꩻမာတဲ့ꩻနဝ်ꩻ အီႏခံႏဗာႏအသီ” နုဲင်းနဝ်ꩻသွူ။
12ဣသဲစ်အုံသော့ꩻ ခမ်းနဝ်ꩻကိုတွင်ꩻ ကွပ်ပွိုး ထာဝရဘုရာꩻ ဖေႏဝွေꩻ မင်္ဂလာႏနဝ်ꩻမ ဝွေꩻဆို့ꩻရုဲင်ထာꩻ အနေင်ႏနဝ်ꩻ ဝွေꩻလꩻစွဉ်ႏ အပွန်းပဉ်ရျာꩻရျာꩻသွူ။ 13ဝွေꩻစီꩻပွါꩻရေꩻ ကွိုန်ꩻဟွိုင်ꩻလွဉ်တဲင် ထွာလွဉ်စွဉ်ႏ လိုꩻခြွေတဖြာꩻသွူ။ 14ကွပ်ပွိုး ဝွေꩻနဝ်ꩻ ထာꩻသောင်ꩻထာꩻသား ကထွာသွိုꩻဖုံႏ၊ ဖိုးဖုံႏတွမ်ႏ အသွဉ်းသဲႏဖုံႏ အာငါႏနဝ်ꩻမꩻ၊ ဖိလိတ္တိ လိုꩻမျိုꩻဖုံႏနဝ်ꩻ တကေးဝွေꩻသွူ။ 15နဝ်ꩻမꩻ ဝွေꩻဖါအဗြာဟံ သက်အဝ်ႏမွန်ချိန်ႏ ဝွေꩻဖါသွဉ်းဖုံႏ ကဟူႏသေꩻခါႏဖေႏဒါႏ ထီအုံႏဖုံႏ ကားကအဝ်ႏနဝ်ꩻ ဝွေꩻသီး ထုမ်ဗွေသော့ꩻစွဉ်ႏဟံႏသွူ။
16ခွန်တန် အဗိမလဲက်ဒေါ့ꩻဖေႏ ဣသဲစ်၊ “နာꩻနဝ်ꩻ တန်ꩻခိုꩻတန်လွဉ်ကယ်ꩻလဲဉ်း နီနဝ်ꩻမꩻ ထန်ႏထိုꩻခန်း နီခမ်းကိုဟုဲင်း။ 17နုဲင်းနဝ်ꩻမꩻဣသဲစ် အဝ်ႏခမ်းနဝ်ꩻ ထန်ႏထိုꩻတဲင် ဝွေꩻလွေꩻချꩻပင်စခန်ꩻ ဂေရာထာꩻခြောင်ႏကိုတဲင် ဝွေꩻအုံနဝ်ꩻကို ညတန်သွူ။ 18အဖါအဗြာဟံစိုး ကခူႏသေꩻခါꩻဒါႏ ထီအုံႏဖုံႏနဝ်ꩻ အဗြာဟံ ထွိုင်ႏသီထွူ ဖိလိတ္တိ လိုꩻမျိုꩻဖုံႏ ကထုမ်ဗွေသော့ꩻဒါႏဟံႏနဝ်ꩻ ဝွေꩻခူႏထန်ႏချာယင်း တလဲင်ႏတဲင် ဣသဲစ်ဖန်ဟဲ့ꩻချာယင်း ထီအုံႏယိုမဉ်ꩻ နုဲင်းအဖါ ကဖန်ဟဲ့ꩻသေꩻခါꩻ အတွိုင်ꩻနဝ်ꩻသွူ။
19ဣသဲစ် သွဉ်းဖုံႏနဝ်ꩻ ခူႏယင်း ထီအုံႏတသာတဖြုံႏ ထာꩻခြောင်ႏကိုတဲင် ထီထန်ႏလွဉ်နဝ်ꩻသွူ။ 20သွိုꩻတီသားဖုံႏ ဂေရာဝေင်ꩻနဝ်ꩻဒေါ့ꩻ၊ “ထီအုံႏယိုနဝ်ꩻ နီထီအုံႏဒျာႏ” နုဲင်းနဝ်ꩻတဲင် တွမ်ႏဣသဲစ် သွိုꩻတီသားဖုံႏ ငဝ်းအာလို့ဝင်ꩻနဝ်ꩻမꩻ ထီအုံႏယိုနဝ်ꩻ ဣသဲစ်ဖန်ဟဲ့ꩻအမဉ်ꩻ “ထီအုံႏငဝ်းအာလို့ဝင်ꩻ” နုဲင်းနဝ်ꩻသွူ။
21ဣသဲစ်သွဉ်းဖုံႏနဝ်ꩻ ခူႏဖျင်ယင်းထီအုံႏ အလင်တဖြုံႏတဲင် နဝ်ꩻကိုတဲ့ꩻ ငဝ်းအာယင်းဝင်ꩻနဝ်ꩻမꩻ ထီအုံႏနဝ်ꩻနဝ်ꩻ ဝွေꩻဖန်ဟဲ့ꩻ “အွဉ်ႏရန်ႏလို့ဝင်ꩻ” နုဲင်းနဝ်ꩻသွူ။ 22အဝ်ႏနဝ်ꩻကို ဝွေꩻခြုဲင်းလွေꩻညာꩻတဲင် ခူႏယင်းထီအုံႏ အလင်တဖြုံႏသွူ။ ထီအုံႏနဝ်ꩻနဝ်ꩻ အလဲင်ႏယို ငဝ်းအာဗာႏဒွုမ်ဝင်ꩻ နဝ်ꩻမꩻ ဝွေꩻဖန်ဟဲ့ꩻ ထီအုံႏမဉ်ꩻ “လွစ်ကင်ꩻလဲဉ်း” နုဲင်းနဝ်ꩻသွူ။ ဝွေꩻရိုꩻ “ယိုခါ ထာဝရဘုရာꩻ ဖေႏလဲဉ်းနီ အုံအဝ်ႏ လွစ်ကင်ꩻသော့ꩻဗာႏ ခမ်းကိုယိုနဝ်ꩻမ နီစီꩻပွါꩻရေꩻ အီႏထင်ႏထို” နုဲင်းနဝ်ꩻသွူ။
23ဣသဲစ်ထန်ႏလွေꩻ ခြုဲင်းအုံတော ဗေသျာဗ အရပ်သွူ။ 24အနာꩻနဝ်ꩻ ဗွေႏဘုရာꩻ ပေါႏနယ်ဖေႏ ဝွေꩻတဲင် “ခွေနဝ်ꩻထွာ နာꩻဖါအဗြာဟံ ဗွေႏဘုရာꩻသွူ။ တွမ်ႏငမ်းသꩻမွိုန်း၊ ခွေအဝ်ႏငီꩻဒျာႏ တွမ်ႏနာꩻ ကွပ်ပွိုး ခွေအွဉ်ႏဂတိခါꩻလဲဉ်း ခွေအသွဉ်း အဗြာဟံနဝ်ꩻမꩻ ခွေအီႏဖေႏနာꩻ မင်္ဂလာႏတဲင် အီႏဖေႏအာနာꩻ ပိုလီꩻစွိုးခွိုꩻဖုံႏ” မိန်းဖေႏ နုဲင်းနဝ်ꩻသွူ။ 25ဣသဲစ် တယ်ႏယဇ်ပလ္လင်ႏ နဝ်ꩻကိုတဗာႏတဲင် ဝုဲင်ႏကိုꩻကွယ်ႏ ထာဝရဘုရာꩻသွူ။ နဝ်ꩻထွူ ဝွေꩻချꩻယင်းပင် အရပ်နဝ်ꩻကိုတဲင် ဝွေꩻသွဉ်းဖုံႏ ခူႏယင်း ထီအုံႏအလင်တဖြုံႏသွူ။
ဣသဲစ်တွမ်ႏခွန်တန်အဗိမလဲက်
26 #
ကမ္ဘာႏ ၂၁:၂၂။ ခွန်တန်အဗိမလဲက် တွမ်ႏတွိုင်ႏပင်ႏဖက် အမတ် အဟုဇာတ်တွမ်ႏ အစဲ့ꩻပိုႏချုပ် ဖိဂေါလနဝ်ꩻ အဝ်ႏဂေရာဝေင်ꩻ လွဉ်မော့ꩻခွဲစွဉ်ႏ ဣသဲစ်နဝ်ꩻသွူ။ 27ကွပ်နဝ်ꩻမꩻ ဣသဲစ်ရီ၊ “ရီးခါနဝ်ꩻ နာꩻတမဉ်မာꩻသွꩻတဝ်း တွမ်ႏခွေ နာꩻဝါးထန်ႏထိုꩻခွေ နာꩻခမ်းကိုတဲင် ပွိုးတမုဲင်ꩻ ယိုခါနာꩻ လွဉ်မော့ꩻခွဲဗာႏတွိုႏ ခွေဟောင်း” နုဲင်းနဝ်ꩻသွူ။
28ဝွေꩻသီးလဝ်းချာ၊ “ထာဝရဘုရာꩻနဝ်ꩻ အဝ်ႏငီꩻတွမ်ႏနာꩻကျောင်ꩻ ယိုခါ နီသေလဲဉ်းတဲင် နီစဉ်ꩻစာꩻ နီနဝ်ꩻ တဖြာꩻတွမ်ႏတဖြာꩻအခါႏ တွိုင်ႏတယ်ႏ အွဉ်ႏဂတိသစ္စာႏ တွမ်လို့ဝင်ꩻ၊ နီမဉ်အွဉ်ႏနာꩻ အွဉ်ႏဂတိနီ 29နုဲင်းနီ တထုမ်ႏရန်ႏတဝ်းနာꩻ၊ နီဟဝ်နာꩻလောင်းတဲင် နီအွဉ်ႏနာꩻထန်ႏထိုꩻ ငိမ်ꩻချမ်ꩻ သာႏယာႏဒျာႏအတွိုင်ꩻ နာꩻတဲ့ꩻ အွဉ်ႏရန်ႏတဝ်းနီနဝ်ꩻ အွဉ်ႏဂတိဟုဲင်း၊ ယိုခါ ထာဝရဘုရာꩻ ဖေႏနာꩻ မင်္ဂလာႏကျောင်ꩻ ထင်ႏသျာꩻတန်” နုဲင်းနဝ်ꩻသွူ။ 30ဣသဲစ်ဖျင်ရဲဉ်ꩻဖေႏ ဝွေꩻသီး ထာꩻအံႏပွယ်ꩻတဲင် ဝွေꩻသီး အံႏအွꩻငီꩻလို့ဝင်ꩻသွူ။ 31ဆုဲင်ꩻတနီꩻ မွူးရဝ်ꩻစဝ်းစဝ်း ဝွေꩻသီး တဖြာꩻတွမ်ႏတဖြာꩻ အွဉ်ႏဂတိတဲင် ခံႏလို့ဝင်ꩻ သစ္စာႏသွူ။ ဣသဲစ် နုတ်ဆက် ဝွေꩻသီးတဲင် ဖလို့စွဉ်ႏဝင်ꩻသွူ။
32အနီꩻနဝ်ꩻ ဣသဲစ်အသွဉ်းဖုံႏ ကဟူႏထီအုံႏနဝ်ꩻ ထီထန်ႏလဲဉ်းကျောင်ꩻ လွဉ်ꩻဒေါ့ꩻနယ်ဖေႏ ဣသဲစ်သွူ။ 33ထီအုံႏနဝ်ꩻ ဣသဲစ် ဖန်ဖေႏအမဉ်ꩻ “အွဉ်ႏဂတိသစ္စာႏ” နုဲင်းနဝ်ꩻမꩻ ဝေင်ꩻနဝ်ꩻနဝ်ꩻ မဉ်ꩻတွင်ႏလွဉ်ꩻ ဗေသျာဗနဝ်ꩻသွူ။
ဧသောမာဖုံႏ
34ဧသော သက်ထွိုင်ႏလꩻ နေင်ႏလစ်ꩻဆီနဝ်ꩻ ဝွေꩻတောႏလမ်းတွမ်ႏ ဟိတ္တိလိုꩻမျိုꩻ မာမူႏဝင်ꩻနီ ဗေရိပိုမူႏ ဂျူတီတွမ်ႏ ဧလုန်ပိုမူႏ ဗာသျမတ်သွူ။ 35ပါꩻမူႏနဝ်ꩻဖုံႏနဝ်ꩻ မာꩻသꩻယပ်ꩻမွေးနေးစွဉ်ႏ ဣသဲစ်တွမ်ႏ ရီဗက္ကသွူ။
Currently Selected:
ကမ္ဘာႏစ 26: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
