نامَه رومی کلیسا را 8

خِدا روح نَه زِندگی کَردِه

1بَس حِسَه کسونی را که مسیحْ عیسی کا مَندینه، دِ هیچ محکومیتی نییَه، 2چوم شریعتی که روح زِندگی یَه مسیحْ عیسی کا، شِمَه، گناه شریعت و مرگی کا آزاد آکَردِشه؛ 3چوم که شریعت اَ چیی، اِمی واسی که آدَمی جِسم ضعیفَه، نِشاستِشه اَنجام بِدَه، خِدا اَنجام دوشَه. اَ اِشتَن زوعَه، ایلَه گناه کارَه جِسمی شیوار ویسا آکَردِشه تا ’گناه را قِربونی‘ بِبو، و اِنتَه جِسمی دیلَه کا، گناه محکوم کَردِشه. 4تا اَ دُرُستَه چیونی که شریعت پیستِشَه، چَمَه دیلَه کا اَنجام بِبو، چَمَه دیلَه کا که مطابق خِدا روح زِندگی بَکَردیمون نِه مطابق جِسم.

5کسونی که جِسمانی اِینه، اِشتَن فیکری بَناین چیی را که جِسمی کایَه، امّا کسونی که خِدا روح اِستِشونه، اِشتَن فیکری بَناین چیی را که روح کایَه. 6چوم اَ آدَمی عاقبت که اِشتَن فیکری اَ چیونی را بَنای که جِسمانی اینه، مَرگَه، ولی اَ فیکری که خِدا روح دومله یَه زِندگی و سلامتی یَه. 7چوم که اَ آدَمی که اِشتَن فیکری جِسمی را بَنای خِدا نَه دِشمَنی بَکَردی، چیرا که خِدا شریعتی کا اِطاعت نِکَرِه و نیمَشا نی بِکَرِه، 8کَسونی که جِسم اَوون را حُکم بَکَردی، نیمَشان خِدا راضی آکَرِن.

9امّا شِمَه را جِسم حُکم نِکَرِه، بَلکَم خِدا روحَه که حُکم بَکَردی، البته اَگم خِدا روح شِمَه دیلَه کا بِبو. کسی که مسیح روح مَدارِه، اَ، مسیح شِن نییَه. 10امّا اَگم مسیح شِمَه دیلَه کا یَه، هَر چَن شِمَه بَدن گناه واسی مَردَه یَه، امّا چوم صالِح حساب بَییرونه، خِدا روح شِمَه را زِندگی یَه. 11اَگم روحی که عیسی مَردَه اون دیلَه کا زِنده آکَردِشه شِمَه دیلَه کا بومونِه، اَیی که مسیح عیسی مَردَه اون دیلَه کا زِنده آکَردِشه، اِشتَنِش روح واسطه نَه که شِمَه دیلَه کایَه، شِمَه مَردَه بَدَنون نی زِندگی آدَه.

12بَس اِی بِرااِن، اَمَه مَدیونیمونه، امّا نِه جِسمی مَدیون، تا مطابق جِسم زِندگی بِکَرَم. 13چوم اَگم مطابق جِسم زِندگی بِکَرَه، بَمَردیرون؛ امّا اَگم خِدا روح واسطه نَه، کارونی که بَدن بَکَردی بِکِشَه، زِندگی بَکَردیرون. 14چوم کسونی که خِدا روح چَوون راهنمایَه، خِدا زوعَه اِنی نه. 15چیرا که شِمَه بَردَگی روح بِه دَس وَردَه نیرونه تا هَنی بِتَرسه، بَلکَم شِمَه زوعَه اون مقامی کا فرزند خوندَگی روح بِه دَس وَردَرونه، که چَیی واسطه نَه خِلِع بَکَردیمون: «دَده، چِمِن دَده.» 16خِدا روحْ اِشتَن، چَمَه روح را شهادتی بَدای که اَمَه خِدا خِردَنونیمونه. 17اَگم خِدا خِردَنویمونه، بَس وارثون نی اِستیمونه، یعنی خِدا وارثِن و مَسیح نَه اِرثی کا شریکیمونه. بِه شرطی که اَمَنی اَیی نه عذاب بِکَشَم، تا اَمَه نی اَیی نَه جلال بِگِرَم.

آینده جلال

18چِمِن نظر اِمَه که، اِم دنیا عَذابِن، اَ جلالی نَه که چَمَه دیلَه کا آشکار بَبی، نییَب مقایسه کَردِه. 19چوم که خِلقت، تمون اِشتیاقی نَه خِدا زوعَه اون ظاهر آبییِه منتظرَه. 20چوم خِلقت اِشتَن باطل آکَردِشَه، نِه اِشتَن پیستَه نَه، بَلکَم کسی پیستَه نَه که اَیی تسلیم کَردِشه، اِم اُمیدی نَه که 21خِلقت اِشتَن نی بَردَگی فِسادی کا آزاد بَبی و خِدا خِردَنِن پُرجلالَ آزادی کا سهم بَبَردین.

22چوم اَمَه بَزنیمون که گِردِ خِلقت تا حِسَه ایلَه داجی کا ناله بَکَردی که زَندِه داجی شیوارَه. 23و نِه فقط خِلقت، بَلکَم اَمَه اِشتَن که خِدا روح نوبری هِستِمونه، چَمَه دیلی دیلَه کا ناله بَکَردیمون، هَتَه که اِشتیاقی نَه زوعَه اون مقامی کا، فرزند خوندَگی مُنتظریمونه، یعنی چَمَه بَدَنون رهایی. 24چوم هِم اُمیدی نَه نجات پیدا کَردِمونه. حِسَه اُمیدی که ویندَه بَبی، دِ اُمید نییَه. چوم که چِنتَه ایی نفر بَشای چیی که بَویندی اُمید دَوَندِه؟ 25امّا اَگم ایی چیی که حَلا ویندَمون نییَه اُمید دَوَستَمونه، صبری نَه چَیی منتظر بَمَندیمون.

26اَته نی خِدا روح چَمَه ضَعفی کا چَمَه کمکی را بومَی، چوم که نیمَزنَم چِنتَه بَسی دعا بِکَرَم. امّا خِدا روح، اَ ناله اونی نَه که عَمیقَ و نییَب واتِه، چَمَه را شفاعت بَکَردی. 27و اَ که دیلون دیلَه بَگردِستی، روح فیکری بَزنی، چوم که روح، مطابق خِدا پیستَه، مقدّسون را شفاعت بَکَردی.

28بَزنیمون کسونی حقی کا که خِدا نَه خِشی نَه و طبق چَیی پیستَه دعوت بَیینه، گِردِ چییِن یَندی نَه چَوون خیریَتی را کار بَکَردین. 29چوم کسونی که خِدا پیشتَری آزونِستَشه، پیشتر، اَوون مُعیین کَردِشه تا چَیی زوعَه شیوار بِبون، تا اَتَه مسیح، اِشتَن وِرَه بِرااون دیلَه کا، اَوّلین خِردَن بِبو. 30و کسونی که پیشتَری تعیین کَردَشه نی، دَخوندَشه؛ و کسونی که دَخوندَشه، صالِح بِه حساب وَردِشه؛ و کسونی که صالِح بِه حساب وَردِشه نی، جلال بَخشِستِشه.

31بَس گِردِ اِم چییون درباره چِه بَشایمون بوآجَم؟ اَگم خِدا اَمَه نَه یَه، کییَه که بَشای چَمَه ضِد بِبو؟ 32اَ که اِشتَن زوعَه دریغ نِکَردِشه، بَلکَم اَیی، چَمَه گِردی راه کا فیدا کَردِشه، چِنتَه، اَ، دَس و دیل بازی نَه گِردِ چییون بَمون آنِدَه؟ 33کییَه که خِدا اِنتخاب بییَه اون بُختون بِژَنه؟ خِدایَه که اَوون صالِح بِه حساب بواَردی! 34کییَه که اَوون محکوم بِکَرِه؟ مسیحْ عیسی که مَردَه، اَیی کا وِرتَر مَردَه اون دیلَه کا نی زِنده آبَه و خِدا راست دَسی کا نِشتَه، اَ اِستَه که راس راسی اَمَه را شفاعت بَکَردی! 35کییَه که اَمَه مسیح محبتی کا جِدا آکَرِه؟ مصیبت یا پریشونی، اذیت آزار، قحطی، لُختی، خطَر یا قَمَّه؟ 36هَتَه که مزموری کیتابی کا نیویشته بییَه: «اَمَه، گِردِ روز، اِشتِه واسی مَرگی را بَشیمون؛ و گوسَندونی شِیوار که سَرآبِردِه را حاضیر آبون حساب بَبیمون.»

37نِه، گِردِ اِم کارون کا اَمَه کسونی کا که پیروزی نَه سَرتریمونه، چَیی واسطه نَه که اَمَه محبت کَردِشه. 38چوم مُطمئنیمَه که نِه مرگ و نِه زِندگی، نِه ملائیکه اِن و نِه رئیسِن، نِه چییِنی که حِسَه اِستینه و نِه چییِنی که آینده کا اینه، نِه هیچ قدرتی، 39و نِه پَستی بِلَندی، و دِ نِه هیچ چیی که گِردِ خِلقتی کا یَه، نیمَشا اَمَه خِدا محبتی کا که چَمَه خِداوند مسیحْ عیسی کایَه، جِدا آکَرِه.

Currently Selected:

نامَه رومی کلیسا را 8: ITB

Highlight

Copy