نامَه رومی کلیسا را 2

خِدا عادلانۀ داوری

1بَس تِه اِی آدَمی که ایی نفر دییَری داوری بَکَردیش، هَر کسی که بِبی هیچ بهونه ای نییرَه. چوم وختی ایی نفر دییَری داوری بِکَری، اِشتَن محکوم کَردَرَه؛ چوم که تِه، اِی داور، اِشتَن نی هَ کاری بَکَردیش. 2اَمَه بَزنیمون که خِدا داوری کَسونی را که اِنتَه رَه کارون بَکَردین، حَقّه. 3تِه، اِی آدَمی که اَلباقی داوری بَکَردیش و اِشتَن نی هَ کاری بَکَردیش، خَیال بَکَردیش که خِدا داوری کا بَشای دَوزی؟ 4یا اِم که خِدا میهرَوونی، تاو و تحمل و چَیی بَرکَ صَبری روک بَزنیش و نیمَزنیش که خِدا میهرَوونی اِمی واسی یَه که تِه راهنمایی بِکَرِه تا توبَه بِکَری؟

5امّا تِه، اِشتِه سَرسختی و اِشتِه دیلی واسی که نِپیستِشه توبه بِکَرِه، خِدا غَضَبی بَه تِرا غَضَبی روزی را اَنبار بَکَردیش، اَ روزی که اَیی کا خِدا عادلانۀ داوری آشکار بَبی. 6خِدا «هَر کسی طبق چَیی اِشتَن کارون جَزا بَدای.» 7خِدا، اَبَدی یَه زندگی کَسونی آدَه که صبری نَه چاکه کارون اَنجام دوعِه کا، جلال و حُرمت و اَبَدی یَه زندگی دومله اینه؛ 8امّا خودخواهَ آدَمون را و کسونی را که حقیقتی کا اِطاعت نِکَرِن، بَلکَم ناراستی کا اِطاعت بَکَردین، غیض و غَضَبی ویکَرِه. 9هَر کسی که بَدَه کارون اَنجام بِدَه، رَنج و عَذاب چَیی نصیب بَبی، اوّل یَهود و دومله غِیریَهود. 10امّا خِدا جلال و حُرمت و صُلح و سلامتی اَ کسونی نصیب بَبی که چاکی بَکَردین، اوّل یَهود و دومله غِیریَهود. 11چوم که خِدا فرقی نِنَه.

12چوم گِردِ کسونی که بیدون موسی شریعت گناه بَکَردین، بیدونِ شریعت نی هلاک بَبین؛ و گِردِ کسونی که شریعتی جیری کا گناه بَکَردین، شریعتی نَه داوری بَبین. 13چوم کسونی که شریعتی دَرَسِن خِدا نظری کا صالِح نینَه، بَلکَم کَسونی صالِح حساب بومَین که شریعتی اَنجام بِدَن. 14چوم وختی غیریهودی اِن که شریعت نیشونه، شریعتی اَعمالی طِبق غَریزَه بِه جا بواَردین، اَوِن با اِمکه شریعت نیشونه، امّا اِشتَن، اِشتَن را شریعتی اِستینه. 15اَوِن نیشون بَداین که شریعتی اَعمال چَوون دیلی دیلَه کا نیویشته بییَه، جوری که چَوون وِجدان نی اِمی گواهی بَدای چوم که چَوون فیکرِن، یا اَوون محکوم بَکَردی یا حتی تبرئه بَکَردی. 16اِم، اَ روزی کا اِتِفاق دَلکِه که خِدا بینا‌ بَر اَ اِنجیلی که اَز اِعلام بَکَردیم، اِنسانون سِرّون، مسیح عیسی واسطه نَه داوری بِکَرِه.

17ولی تِه اِی که اِشتَن یَهودی بَزنیش و شریعتی کا تَکیه بَدایش و اِمی واسی که خِدا آزونی، بَه تِرا پوز بَدایش، 18و چَیی اِراده بَزنیش و چوم شریعتی کا تعلیم گِتَرَه، چاکترین چییون اِنتخاب بَکَردیش، 19و اَگم مُطمئِنیشَه که تِه کورون راهنماییش و کَسونی را که ظلمتی کا اینه نوریش، 20نادونون مربی و خِردَنون مُعلمیش، تِه، شریعتی که دانایی و حقیقَتَه هِستِرَه، 21بَس تِه که خَلکی تعلیم بَدایش، اِشتَن یاد نِدَیش؟ تِه که دِزدی ضِد موعظه بَکَردیش، اِشتَن دِزدی بَکَردیش؟ 22تِه که بَواتیش زِنا مَکَه، اِشتَن زِنا بَکَردیش؟ تِه که بُتون کا بیزاریش، تِه اِشتَن، معبدون غارت بَکَردیش؟ 23تِه که شریعتی داشتِه را پُوز بَدایش، شریعتی چاکِندِه نَه، خِدا بی‌ حرمتی بَکَردیش؟ 24چوم هَتَه که پِیغمبرون کتابی کا نیویشتَه بییَه: «شِمَه واسی، غِیریَهودیون دیلَه کا خِدا نومی کُفر بَواتین.»

25خَتنه کَردِه اَ موقعی اِرزِش هِستِشه که شریعتی بِه جا بواَرَه، امّا اَگم شریعتی بِچاکِنَه، اِمی شیواره که خَتنه بَه نیرونَه. 26بَس اَگم ایلَه مِردی که خَتنه بَه نییَه، شریعتی حُکمون بِه جا بواَرِه، مَگم چَیی خَتنه نِبییِه خَتنه‌ بییِه حساب نِبو؟ 27بَس اَ کسی که جِسمی کا خَتنه بَه نییَه، امّا شریعتی بِه جا بواَرِه، تِه محکوم بَکَردی، تِه ایی که هَم شریعتی نیویشته بییَه حُکمون هِستِرَه، و هَم خَتنه بییِه، ولی خِدا شریعتی چاکِنی.

28چوم که یهودی اَ کسی نییَه که بِه ظاهر یَهودی بِبو، و خَتنه نی کاری نییَه که جِسم و ظاهری کا بِبو. 29بَلکَم یَهودی اَ کسی یَه که باطِنی کا یَهودی بِبو و خَتنه نی کاری یَه دیلی، که خِدا روح اَیی اَنجام بَدای، نِه ایلَه نیویشته واسطه نه. اِنتَه رَه کسی، خِدا تحسین بَکَردی، نِه آدَم.

Currently Selected:

نامَه رومی کلیسا را 2: ITB

Highlight

Copy