یوحنا 11

ایلعازَری مرگ

1ایلَه مِردی که چَیی نوم ایلعازَر بَه مریض بَه. ایلعازَر اَهل بِیت‌عَنْیا بَه، هَ دِهی که مریم و چَیی خالا مارتا اوآکا زندگی بَکَردین. 2مریم هَ ژِنی بَه که خِداوندی عَطری نَه تدهین کَردِشه و اِشتَن گیسه اون نَه چَیی پایون خِشک آکَردِشه. حِسَه چَیی بِرا ایلعازَر مریض آبَه بَه. 3بَس ایلعازَری خالا اِن عیسی را ایلَه پَیغوم ویسا آکَردِشونَه، واتِشونَه: «آقا، اِشتِه عزیز رَفِق مریضه.» 4امّا وختی عیسی اِمی دَرَسِشَه، واتِشه: «اِم مریضی بِه مرگ خَتم نییَب، بَلکَم خِدا شکوه و جلال دوعِه رایَه، تا خِدا زوعَه نی چَیی واسطه نَه جلال پیدا بِکَرِه.» 5عیسی، مارتا و چَیی خالا و ایلعازَری نَه خِش بَه. 6بَس وختی دَرَسِشَه که ایلعازَر مریضه، دِ روز دییَر نی اَ جِگایی کا که بَه، مَندَه.

7دومله اِشتَن شاگِردون نَه واتِشه: «بایَن هَنی بِشَم یهودیَه ولایتی را.» 8شاگِردِن واتِشونَه: «اُستاد، خَیلی وخت گِذشته نی که یهودییِن پیستِشون بَه تِه سِنگسار بِکَرِن، و تِه هَنی بَشیش اوآ؟» 9عیسی جَواو دوشَه: «مَگم روز، دونزَه ساعت نییَه؟ اَگم کسی روزی کا راه بِشو چَیی پا جِگایی کا گیر نِکَرِه که بَلَکِه، چوم اِم دنیا نوری بَویندی. 10امّا کسی که شَوی کا راه بِشو، بَلَکِه، چوم اَیی کا نوری نییَه.» 11اِم گَفون پَش عیسی اَوون نَه واتِشه: «چَمَه رَفِق، ایلعازَر خِتَه، امّا اَز بَشیم تا اَیی پِرِزاوونِم.» 12شاگِردِن اَیی نَه واتِشونَه: «آقا، اَگم خِتَه، وَج آبو.» 13عیسی، ایلعازَری مرگی کا گَف ژَنی، امّا شاگِردِن خَیال بَکَردین که چَیی گفی منظور اِمَه که ایلعازَر خِتَه تا اِستراحت بِکَرِه. 14اَ موقع عیسی آشکارا اَوون نَه واتِشه:«ایلعازَر مَردَه. 15و شِمَه واسی شادیمَه که اوآ کا نِبیمَه، تا ایمان بواَرَه. امّا بایَه بِشَم چَیی وَر.» 16بَس توما، که اَیی نَه دوقلو بَواتین، دییَر شاگِردون نَه واتِشه: «بایَه اَمَه نی بِشَم تا اَیی نَه بِمِرَم.»

اَز قیامَت و زندگی اِستیمَه

17وختی عیسی آرَستَه اوآ، زونِستِشه حِسَه چار روزه که ایلعازَری نوعشونَه مَقبره دیلَه. 18بِیت‌عَنْیا دِه، اورشلیمی نِزدیکی کا بَه، تقریبا سه کیلومتر فاصله ش اِستبَه. 19وِرَه یهودییِن اومَه بینَه مریم و مارتا وَر تا اَوون، چَوون بِرا مرگی واسی تَسلی بِدَن. 20وختی مارتا دَرَسِشَه که عیسی بومَی، شَه چَیی پیشواز، امّا مریم کَ کا نِشتَه. 21مارتا عیسی نَه واتِشه: «آقا، اَگم تِه اییا کا مَندَه بیش چِمِن بِرا نِمِری. 22امّا بَزنیم که حِسَه نی هر چِه خِدا کا بِپیش، بَه تِن آدَه.» 23عیسی اَیی نَه واتِشه: «هَنی اِشتِه بِرا زِنده آبو.» 24مارتا عیسی نَه واتِشه: «بَزنیم که قیامَت روزی کا هَنی زِنده آبو.» 25عیسی واتِشه: «قیامَت و زندگی اَزیمَه. کسی که بَه مِن ایمان بواَرِه، حتی اَگم بِمِرِه، هَنی زِنده آبو. 26و هَر کسی که زِنده یَه و بَه مِن ایمان هِستِشه، هرگِز نیَیه مَرد؛ اِمی باوَر بَکَردیش؟» 27مارتا واتِشه: «ها آقا، اَز باوَر هِستِمَه که تِه مسیح موعودیش، خِدا زوعَه، هَ کسی که بَسی بای اِم دنیا دیلَه.»

28وختی که اِمی واتِشه، شَه و اِشتَن خالا مریمی دَخوندِشونَه، خَلوَتکه اَیی نَه واتِشه: «اُستاد اییارَه و تِه دَخونه.» 29وختی مریم اِمی دَرَسِشَه، اَلبَحَل پِرِشته و شَه عیسی وَر. 30عیسی دِه دیلَه دَشه نِبَه و حَلا اوآ کا بَه که مارتا چَیی ویندهِ را شَه بَه. 31یهودیونی که مریمی نَه کَ کا بینَه و اَیی تَسلی بَداین، وختی ویندِشونَه مریم اَلبَحَل پِرِشته و شَه بِرون، چَیی دومله شینَه. اَوِن خَیال بَکَردین مریم بَشی مَقبره سَر تا اوآ کا داد بِکَرِه. 32وختی مریم آرَستَه اوآ که عیسی مَند بَه و اَیی ویندِشه، چَیی پا دَلَکه و واتِشه: «آقا، اَگم تِه اییا کا مَند بیش چِمِن بِرا نِمِری.» 33وختی عیسی مریمی داد کَردِه و یهودیون داد کَردِه که چَیی همراه بینَه ویندِشه، روح کا بَرک غمگین و پریشون آبَه. 34دَفَرسِشه: «مِیِتی کییا کا نوعَه رونَه؟» واتِشونَه: «آقا، بِری و بِوین.» 35عیسی داد کَردِشَه. 36بَس یهودییِن واتِشونَه: «دَیِسَه چِندی ایلعازَری نه خِش بَه!» 37امّا بعضی اَوون کا واتِشونَه: «کسی که اَ کورَه مِردی چِمون آکَردِشه، نیمَشای ایلعازَری مرگی پیشی بِگری؟»

عیسی ایلعازَری زِندَه آکَرِه

38دومله عیسی، هَنی هَتَه که بَرک غمگین بَه، اومَه مَقبره سَر. مَقبره، ایلَه غاری بَه که چَیی گَ کا ایلَه سِنگ نوعَه شون بَه. 39عیسی واتِشه: «سِنگی پِگِرَه.» مارتا، مِیِتی خالا واتِشه: «آقا، حِسَه دِ بو گِتَشه، چوم چار روزه مَردَه.» 40عیسی اَیی نَه واتِشه: «مَگم تِنَه نِواتِمه که اَگم ایمان بِداریش، خِدا شکوه و جلالی بَویندیش؟» 41بَس سِنگی پِگِتِشونَه. اَ موقع عیسی آسِمونی دَیشتَه و واتِشه: «دَده، تِه شُکر بَواتیم که چِمِن گفی دَرَسِرَه. 42اَز بَزنیم که همیشه چِمِن گفی دَرَسی. امّا اِمی، کَسونی واسی واتِمَه که اییا کا مَندینَه، تا باوَر بِکَرِن که تِه مِن ویسا آکَردَرَه.» 43وختی اِم چییون واتِشه بِلندَه سَسی نَه خِلِع ژَندِشَه:«ایلعازَر، بِری بِرون!» 44بَس اَ مَردَه، دَس و پا کَفنی کا دَوَستَه و دَسمالی نَه که چَیی دیمی دُوری کا دَپیچِستَه بَه، اومَه بِرون. عیسی اَوون نَه واتِشه: «اَیی آکَرَه و بِدارَه بِشو.»

عیسی قتلی توطئه

45بَس وِر کَسِن یهودیون کا که مریمی نَه اومَه بینَه و عیسی کاری ویندَشون بَه، اَیی ایمان وَردِشونَه. 46امّا بعضی اَوون کا شینَه فریسی فِرقه عُلما وَر و کاری که عیسی کَردش بَه اَوون را واتِشونَه. 47بَس سَران کاهِنن و فریسی اِن جلسه تشکیل دوشونَه، یَندی نَه واتِشونَه: «چِه بِکَرَم؟ اِم مِرد وِر علامت و معجزه اون بَکَردی. 48اَگم بِدارَم هِنتَه پیش بِشو، گِرد اَیی ایمان بواَردین، و رومی یِن بومَین، هَم چَمَه معبدی و هم چَمَه میلّتی چَمَه دَسی کا ویگِرِن.» 49امّا ایی نفر اَوون کا که چَیی نوم قیافا بَه، و اَ سالی کا معبدی کاهن اعظم بَه، اَوون نَه واتِشه: «شِمَه هیچ دَرک نِکَرَه 50و فیکر نِکَرَه که شِمَه صَلاح اِمی کایَه که ایی نفر مردمی را بِمِرِه، تا اِم که گِرد میلّت نابود آبون.» 51امّا اِم گف اِشتَن کاش نِبَه، بَلکَم چوم اَ سالی کا کاهن اَعظم بَه، اِنتَه نَبوت کَردِشه که عیسی میلّتی را بَمَردی، 52و نِه فقط میلّتی را، بَلَکم خِدا خِردَنون نی که دنیا کا پخش و پَلایی نَه جَمع آکَرِه. 53بَس، هَ روزی نَه عیسی قتلی نَخشه کَشِشونَه.

54اِمی واسی عیسی دِ آشکارا یهودیون دیلَه کا دَوییَر آوییَر نِکَری، بَلکَم شَه ایلَه شهری را که چَیی نوم اِفرایِم بَه و وییاوونی نِزدیکی کا بَه، اِشتَن شاگردون نَه اوآ کا مَندَه.

55وختی یهودیون پِسَخ عید نِزدیک آبَه، وِرَه گروهی جور بَه جوره جِگااون کا پیش اَز عید شینَه اورشلیمی شهری را تا پیش اَز اِم که پِسَخ عید شروع بِبو پاکی رَسم و رسوماتی اَنجام بِدَن. 56اَوِن عیسی دومله بینَه و هَتَه که معبدی سِرا کا مَند بینَه، یَندی نَه بَواتین: «چِه فیکر بَکَردیرون؟ یعنی اَصلا، عیدی را نا؟» 57امّا سَران کاهِنِن و فریسی اِن دَستور دوعَه شون بَه که هَر موقع کسی بِزونِه عیسی کییارَه، اَوون خَوَر بِدَه تا اَوِن عیسی دَستگیر بِکَرِن.

Currently Selected:

یوحنا 11: ITB

Highlight

Copy