دوّمین نامَه قرنتیانی کلیسا را 8
8
تشویق کَردِه دَس دیل بازی بییِه را
1بِرااِن، اَمَه پیستِمونه شِمَه اَ فیضی دیلَه کا که خِدا، مقدونیه کلیسااون آدوشَه، خَوَردار بِکَرَم. 2چوم که اَوِن مصیبتی واسی، بَرک آزمایش بینَه، ولی بی حَد و اَندازه شادی نَه و با اِم که وِر فقیری نَه، ولی دَس دیل بازی نَه. 3چوم که از شاهِدیمَه که اِشتَن توانی قَدَر حتی اَیی کا نی وِرتَر- پا پیش نوشونه، 4بیدون دِدیمی وِر اَمَه مِنت کَردِشونه و پیستِشونَه اِم خِدمتی کا که مُقدسون را یَه شریک بِبون. 5اَوِن نِه فقط اَته که اَمَه اِنتظار داریمون بَلکَم اوّل اِشتَن خِداوندی را وقف کَردِشونه، و دومله طبق خِدا اِراده اِشتَن چَمَه را وقف کَردِشونه. 6اِمی واسی، اَمَه تیتوسی کا پیستِمونه هَتَه که پیشتری اِشتَن اوّلین قدمون پِگِتَش بَه، حِسَه نی اَ خیرَه کاری شِمَه دیلَه کا تَمون آکَرِه. 7ولی هَتَه که گِردِ چییون کا سَرتَریرونه- ایمانی کا، گَف ژَندِه کا، دانایی کا، دِ دیم نِبییِه کا، و شِمَه محبتی کا نسبت بِه اَمَه- بَس اِم خیرَه کاری کا نی گِردی کا سَرتَر بِبییَه.
8از اِمی شِمَه را حکم نِکَرِم، بَلکَم پیستِمَه دییَرون غیرتی واسطه نَه ثابت بِکَرِم که شِمَه محبت بیدون دِدیمی یَه. 9چوم چَمَه خِداوند عیسایِ مسیح فیضی کا خَوَر دارَه که هَر چَن دولتمند بَه، شِمَه واسی نَدار آبَه تا شِمَه چَیی نَداری کا دولتمند بِبییَه.
10از چِمِن نظری اِم جریانی درباره بَواتیم: اِم بِه نفع شِمَه یَه، پارسال، شِمَه نِه فقط اِم خِیرَه کاری اَنجام دوعِه کا، بَلکَم چَیی اَنجام دوعِه ذوق و شوقی کا نی پیش دَلَکیرونه. 11بَس حِسَه اِم کاری تمون آکَرَه، تا ذوق و شوقی که اِم کاری را داریرون، چَیی تمون آکَردِه نی، شِمَه تَوان مالی نَه جور بِبو. 12چوم اَگم ذوق و شوق بِبو، اَ آدَمی هدیه مُطابق اَ چی که دارِه قَبول بَبی، نِه مطابق اَ چی که نیشَه.
13چوم چَمَه منظور اِم نییَه که خَلک آسایشی کا بِبون و شِمَه فِشاری کا بِبییَه، بَلکَم پیستِمونه منصفانَه بِبو، 14که حِسَه شِمَه وِر داشتِه چَوون اِحتیاجاتی بَرطرف بِکَرَه، تا ایی روز نی چَوون وِر داشتِه شِمَه اِحتیاجاتی بَر طرف بِکَرِه که اِنتَه اِنصاف بَرقرار بِبو. 15هَتَه که توراتی کا نیویشته بییَه: «اَ کسی که وِر جمع آکَردَش بَه، اِضافه نِداریسته، و اَ کسی که کم جمع آکَردَش بَه، کَم و کَسریشی نِبَه.»
پولس، تیتوسی سفارش بَکَردی
16ولی خِدا را شُکر بَکَردیم که اَ غیرتی که از شِمَه را هِستِمَه تیتوسی دیلی کا نی اِستَه. 17چوم که اَ نِه فقط چَمَه پیستَه قبول کَردِشَه، بَلکَم اِشتَن وِرَه ذوق و شوقی نَه، شِمَه وَر اومِه واسی پیش دَلَکَه. 18اَمَه ایلَه دییَر بِرایی تیتوسی همرا ویسا آکَرَم که گِردِ کلیسااِون کا اِنجیلی موعظه کَردِه واسی سَرشناسَه. 19و نِه فقط اِم، بَلکَم اَ بِرا کلیسااون طرفی نَه مُعیَن بییَه تا اِم خِیرَه کاری اَنجام دوعِه و اِدارَه کَردِه کا که چَمَه وظیفه یَه اَمَه نَه هَمسَفَر بِبو. اَ کاری که خِداوندی جلالی رایَه و چَمَه خیرخواهی نیشون بَدای. 20اَمَه وِر، ویرا ایمونه اِم خدمتی کا که هدیه اون جمع آکَردِه که دیلی کا یَه و چَمَه واسطه نَه اِداره بَبی هیچکس اَمَه کا ایرادی مَگِرِه. 21چوم تَقَّلا بَکَردیمون نِه فقط خِداوندی نظری کا، بَلکَم مردمی دیدی کا نی اَ چیی که چاکَه اَنجام بِدییَم.
22و اِمون نَه چَمَه بِرا نی ویسا آکَرَم که وِر اَیی اِمتحان کَردَمونه و فَهمِستَمونه که وِر چیون کا ذوق و شوق هِستِشه، ولی حِسَه اَ بِرا، اَ وِرَه اِطمینانی واسی که بِه شِمَه دارِه پیشتری کا نی وِرتر ذوق و شوق هِستِشه. 23تیتوسی درباره بَسی بوآجِم که اَ خِدمتی کا که شِمَه بَکَردیرون چِمِن شریک و همکارَه؛ و چَمَه برااون دربارَه نی بَسی بوآجِم که اَوِن کلیسااون ویسا آکَردَه و مسیح جلالی نَه. 24بَس شِمَه، اَ محبت و اِفتخاری که اَمَه شِمَه را بَکَردیمون، کلیسااون پیشی کا اَ آدَمون را ثابت بِکَرَه.
Currently Selected:
دوّمین نامَه قرنتیانی کلیسا را 8: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
