نامَه رومِه کلیسا را 14
14
هندیگره قضاوت مکرا
1کسی که چَوه ایمان ضعیفه، شاما دلک راه بدیا، ولی نه چوه واسنه که چوه عقیدهان درباره اَونه جروبحث بکرا. 2ای نفره ایمان اَوه اجازه دَیه که هر غذایی بِخَره، امّا اَدرین که ضعیفه، فقط سبزیجات خَره. 3اَ کسی که همه چی خَره، گه اَ کسی که نخره ویلی مکره؛ و اَ کسی که همه چی نِخَره، گه اَ کسی که همه چی خَره، قضاوت مکَره. چون خدا اَوش قبول کرده. 4ته کییش که کسی دیگری نوکری قضاوت بکری؟ اَ اِشتن ایمانه سر بمانه یا ممانه چَوه اربابه مربوط بی. و اَ نی اِشتن پا سرک مانه چون خداوند تانه اَوه سرپا نیا بداره.
5ای نفر ایی روجِه، اَدرین روجانک چاکتر زانه؛ ولی جِدا نفری، همهی روجان ای جور زانه. هر کسی اِشتن فکرک اِشتن عقیدهان درباره خاطرجمع بیبی. 6اَ کسی که ایگله مخصوصه روجه احترامه نیا داره، خداونده احترامه را اَ کاره کره. اَ کسی که خَره، خداونده احترامه را خَره، چون خدا شکر کَره. و اَ کسی نی که نِخره، اَو نی خداونده احترامه را اِم کاره کره و خدا شکر کره. 7چون آما هیچ کامین چاما را زندگی نکرام و آما هیچ کامین اِشتن را نِمَرام. 8چون که اگم زندگی کَرام، خداونده را زندگی کرام، و اگم مَردرام، خداونده را مرام. پس چِه زندگی بِکَرام، چه بِمرام، خداوند کینمان. 9چون که مسیح نی چِمه واسنه بِمرد و زنده آبه تا هم زِندان و هم مَردهان خداوند بیبی.
10پس تِه چیه را اِشته بِرا داوری کری؟ یا ته چیه را اِشته بِرا پست زانی؟ چون آما همه خدا داوریه تخته پَرانک حاضر بام. 11چیه را که اشعیای پیغمبره کتابک نویشته بییه که:
«خداوند واجه: چِمن زندگی سر قسم که
هر زانویی چِمن پرانک قات بی
و هر زوانی خدا اقرار کَره.»
12پس آما هر کامین اِشتن حسابه پس آدیه خدا.
13پس، بایا چِمه اَور هندیگره قضاوت مَکرام. بلکم، تصمیم بیگیرا که شاما برا راه سرک هیچ سِگی لغزش خردنه را یا مانعی مَنیا. 14از عیسای خداوندک زانم و قانع اِسم که هیچ چی اِشتن را نجس نییِه، امّا اگم ای نفر چیزی نجس زانِه، چَوه را نجس بی. 15اگم اِشته غذا خردننه اِشته برا اذیت بکری، دَ محبت نه رفتار نِکَری. اِشته غذا نه، اِشته برا که مسیح چَوه واسنه بِمرده، هلاک مَکه. 16پس مرزا اَ چی ای که شاما چاک زانا، بد واته بیبی. 17چون خدا پادشاهی خَردن و آخردن نییِه، بلکم صالح بییِن، صلح و سلامتی و شادی روح القدسک اِسه. 18هر کسی ایزه مسیحه خِدمَت بکره، خدا اَوه قبول داره و مردم نی اَوه تایید کرنده.
19پس بایا اَ چیانی پَشه ببام که صلح و سلامتی باعث بینده و هندیگره ایمانه تقویته باعث بی. 20غذا خردنه واسِنه خدا کاره خراب مَکه! راس راسینه همهی غذاهان پاک اِسنده، امّا هر غذایی که باعث بی ای نفر جیگینه، کار درستی نیه. 21چاکتره که گوشته مخری یا شرابه آمخَردی یا کاری مکری که اِشته برا لغزشه باعث بیبی.
22اِشته ایمان اِم چیان درباره، اِشته و خدا میانک نیا بدا. خَسه ببا اَ کسی که اَ چیانی واسنه که اِشتن درباره تایید کره، اِشتن داوری نِکَره. 23امّا کسی که ایگله غذا خَردنه را شک داره، اگم اَ غذا بخَره محکوم بی، چون ایمان نه خَردش نییِه و اَ چی که ایمان نه مَبی، گناهِه.
Currently Selected:
نامَه رومِه کلیسا را 14: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company