نامَه رومِه کلیسا را 11
11
خدا قومه باقیماند هان
1پس آپرسم: مگم خدا اِشتن قومش رد آکرده؟ هرگز؛ چون از اِشتن خدا قومه کینم، ابراهیمه پیغمبره نسلک و بِنیامین طایفه. 2خدا اِشتن قومش که پرانتر جداش آکرده به، ردش آنِکرده. مگم نِزانا که مقدسه نیویشته ایلیا درباره چِه واجه؟ اِم که اَ چُنجوره، خدا قومه ضد خدا وَرک گلایش بِکه و باتشه: 3«خداوندا، اَوه اِشته پیغَمبرانشان کوشتَنده و اِشته قربانه یاگاشان ویرانه کَرده. تینا از ماندِم و اِسا رایشانه من نی بوکوشنده.» 4امّا خدا چه جوابی اَوش بدا؟ اِم که «از چِمن را هفت هزار نفر کنار نییمه که بَعَله بُته پَرانکشان زانو نیزیَیه.» 5ایزه نی، هم اِسا نی الباقی اِسنده که خدا فیضه راه نه انتخاب بیَینده. 6امّا اگم فیض راه نه بیبی، دَ اعماله واسِنه نییِه؛ وگرنه فیض دَ فیض نی. [امّا اگم اعماله واسِنه بیبی، دَ فیض واسِنه نییِه؛ وگرنه عمل دَ عمل نییه.]
7چاوش چه؟ اِم که خدا قوم اَ چیانی که ذوق و شوقنه چَوان اَرَکتنه پَشه بِه، به دسَش ناوَرده. انتخاب بییَیِه هان به دسَ بوعَردشانه، ولی الباقی سختدلی گریفتار ببِنده، 8اَجوره که مقدسه نیویشته هانک نیویشته بییَه:
«تا اُوری خدا اَوانش لسه روح آداشه
و چَشمانی که مَتاننده بیننده
و گوشانی که مَتاننده بَشنونده.»
9و داوود پادشاه واجه:
«چَوان سِفره چَوان را دام و تله بیبی
سِگی که اَوان گل ارکوعه چوان را مکافات بیبی.
10چوان چَشمه تار بیبینده تا مَتاننده بیننده
و چَوان کمره همیشه دوقات بیبینده.»
11پس آپرسم: یعنی اوه بِلغزسِنده تا همیشه را جیگیننده؟ هرگز! بلکم چَوان نافرمانی نه، غیریهودییِه نی نجاتشان بینده، تا خدا قومه غیرتی بیبینده. 12اما اگم چوان تقصیره دنیاش ثروتمند بکرده و چوان دِباختن غیریهودیانش ثروتمند بکرده، پس وقتی قوم یهود کاملا نجات پیدا بکرنده چنده پرتر فراوانی باعث بی؟
13اِسا شاما غیریهودیان نه لاوَه کردرم. اَگاردنه که از غیریهودیان رسولم، چِمن خِدمَته پِر افتخار کَرم، 14اِم امید نه که چِمن همنژادان غیرتی بکرم و بعضی از اَوان نجات بِدَیم. 15چون اگم چوان رد آبیینه معنی، خدا آشتی دنیا نه اِسه، چوان قبول بییَن معنی چِه بی، مَردنه پَش زنده آبیینه غیراز؟ 16اگم ای تیکه اَ خمیرک که نوبری را خدا تقدیم بی، مقدّس بیبی، ایزه، همه ی اَ خمیر مقدّسه؛ و اگم بِنه مقدّس بیبی، پس لاخَان نی مقدّس اِسِنده.
17و اگم بعضی از لاخه هان بِرییَه بِبِنده و ته که وحشیه زیتون داره لاخه بِش، عَلوده لاخه هاننه زیتونه دارنه پیوند ببِش و اِسا زیتونه داره بِنه مُقَویه شیرَهک خردری، 18اَ لاخه هان را پوز مده. اگم ایزه کَری، ویرکر بیبی که ته نییش که بِنه داری، بلکم بِنه ته داره. 19شاید باجی: «لاخه هان بِرییَه ببنده تا از پیوند بیبیم.» 20راس واجی. امّا اَوه بیایمانی واسنه بِرییَه بِبِنده و ته فقط ایمان نه پابرجایش. پس مغرور مَبش بلکم بِترس. 21چون اگم خدا، داره طبیعیه لاخه هان را رحمش نکرده، اِشته را نی رحم نکره.
22پس خدا مهربانی و سختگیری ویر بمرکه؛ سختگیری کسانی را که ایمانک جیگیسنده، امّا تنه مهربانه، البته اِم شرط نه که چَوه مهربانیک ثابت بندری؛ وگرنه ته نی بِرییَه بی. 23و اگم اَوه نی بیایمانی ادامه مَدینده، هنی پیوند بینده، چون خدا تانه اَوان هنی پیوند بِزنه. 24چون اگم ته وحشیه زیتونه دارک برییَه ببِش و برخلاف اِشته طبیعت، زیتونه دارِنه که آزاده پیوند ببش، پس چنده پرتر اصلیه لاخه تاننده اَ زیتونه داری که اَوک برییَه بییَنده، پیوند بخرنده.
خدا قومه نجاته سِر
25ای براران، نِگَمه اِم سِرک غافل ببا - مبادا اِشتن دانا بِزانا - که سختدلی بعضی از خدا قومان سر حکمفرما بییَه، تا کسانی تعداد که قراره غیریهودیان دلک به مسیح ایمان بوعَرنده کامل بیبی. 26و ایزه تمان خدا قوم نجات پیدا کره. اَجوره که مقدسه نیویشته هانک نویشته بییه:
«صهیون نه ای نفر آیه که نجات دیه
و بیدینی یعقوبه جدک اَگیره.
27و ام چِمن عهد اَواننه بی
اَدمی که چَوان گناهان اگیرم.»
28از لحاظ اِنجیل یهودیان شاما واسنه، دشمن اِسنده؛ امّا از لحاظ خدا انتخاب، اجداده واسنه، خدا عزیز گرامینده. 29چون خدا هرگز اِشتن هدیه هان و اِشتن دعوته پس اَنِرگیره. 30درست اَجوره زه که شاما ای موقعی نسبت به خدا نافرمانیران کرد، امّا اِسا یهودیان نافرمانی واسِنه، شاما خدا مورد رحمت اِسران، 31پس اِسا اَوان نی نافرمان بییَنده تا خدا رحمته واسنه شاما را، اِسا چوان را نی رَحم بیبی. 32چون که خدا همش نافرمانی اسیر کردنده، تا هَمان را رحم بِکَره.
33آه که خدا دولتمندی، حکمت و دانایی چنده دَرینه؛
چَوه داوریان نیبی گردِسَن
و چوه راه هان نیبی فهمِسن.
34«چون کیه که خداونده فکره بزانه
یا کییه که اونه مشورت کرده بیبی؟»
35کیه که ای چی ای آدییشه خدا
تا اوه پس آدیه بیبی؟»
36چون که همه چی اَوک اِسنده، و چَوه واسطۀ نه، و چَوه کین اِسه.
تا اَبد اَوه جلال بیبی. آمین.
Currently Selected:
نامَه رومِه کلیسا را 11: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company