انجیل متی 22

ویوه جشنه مثال

1عیسی هَنی اَوانش مثالانه لاوَه بکه، باتشه: 2«آسمانه پادشاهی، شاهی شواره که اِشتن زار را ویوه کَتَر. 3پادشاه اِشتن نوکرش بخرسانسنده تا ویوَه دعوت بیارانه باجه باینده ویوَه، امّا اَوان نگَوسشانه باینده. 4پس علوده نوکرانی بِخِرسانسشه و باتشه: ”دعوت‌ آبییارانه باجا دیسا جشنه سِفرَمه حاضر کَردا، گوُان و پَرواره گوگ آنی سر آبرییمه و همه چی آمادیه. بایا ویوه.“ 5امّا اَوان اعتنا نِکَرده و هر کامین اِشتن راه بِشنده، ای بشه اِشتن زمین سر و اَدَرین بشه اِشتن کسب و کار پشه. 6علوده نی، پادشاه نوکَرشان بِکَتِنده و اَوانِشان بی حرمتی بکرده و بوکوشتشاننده. 7شاه وختی اِمش بَشنَوِس، عصبانی آبه، اِشتن سربازش بخرسانسنده و اَ قاتلِش بوکوشتنده و چوان شهرش وَش بیزی. 8چاوَش اِشتن نوکرانه باتشه: ”ویوَه آمادیه، امّا دعوت آبیاره لیاقت نداشتشانه. 9پس شهره کوچه بازاران بِشا و هر کی ران بینده ویوَه را دعوت بکرا.“ 10نوکره بشنده کوچَه سران و هر کیشان که بینده، چِه چاک و چِه بد اِشتنشان بوعرده ایزه که ویوَه میهماننه فت آبه.

11«امّا وختی که پادشاه میهمانان ویندن را مجلسه دلَه بامه، ایگله مردکیش بینده که خَلوعی که ویوه را چاک بیبی، دِکردش نبه. 12پادشاه اَوکش آپرسس: ”ای رفق چُنجوره بدون ویوَه خلوع یا آمییِش؟“ اَ مردکه جواویشی نِداشته. 13اَدمی پادشاه اِشتن نوکران نه باته: ”لنگ پَرش دِوَندا و اَوه بَره تایریکیک درنا، یاگایی که بِرمنده و دندان دندانان سرک سخ دینده.“ 14چون دعوت‌ آبییاره پر اِسنده، امّا انتخاب بییاره کَم اِسنده.»

اِمپراتوره مالیات آدیین

15چاوش فَریسی فرقه علما بِشنده بر و نقشه شان بکشس تا بیننده چنجوره تاننده عیسی اِشتن لاوان نه گیریفتار بکرنده. 16فریسیان اِشتن شاگردشان هیرودیسه طرف دارانه بخرسانسنده عیسی وَر و باتشانه: «استاد، آما زانسرام صادقه مردکی اِسِش و خدا راهه درستی نه آموتری و هیچ کسیک نترسی، چون که ظاهره توجه نکری. 17پس اِشته نظره آمانه باجه؛ آیا رومه امپراطوره مالیات آدیین درسته یا نه؟» 18عیسی که چَوان بده نیتش زانسه، باتشه: «ای دو دیمان، چیه را من امتحان کردرا؟ 19سکه‌ای که اَونه مالیات آدَيا، من آمانا.» اَوان ایگله ای دیناریه سکه ای اَوِشان آدا. 20عیسی اَوانکش آپرسس: «چیکی نقش و نام اَ سکه سرکه؟» 21جواو آداشانه: «رومه امپراتور کین.» عیسی اَوانش باته: «پس امپراتوره ماله، امپراتوره آدیا و خدا ماله، خدا آدَیا.» 22وختی اِمشان بشنوس، پِر تعجب شان بکه و عیسی شان اَگا ول آکه و بشنده.

سوال داوریه روجِه درباره

23هَ روجک، صَدّوقیان فرقه عالمانک که مَردان زنده آبیینه منکر بنده، عیسی وَر بامنده و سؤالی اَوکشان آپرسس، 24باتشانه: «استاد، موسی پیغمبره چاما را اِم فرمانش نیویشته که اَگم مَردکی بی خُردن بِمَره چَوه برا گه اَ ویوه زلی بِبَره تا اَوک اِشتن برار را نسلی بنیه. 25اِسا، چاما میانک هفت گله برا بِنده. اولین برا ایگله زنی شی ببردا و بِمَرد و چون خُردَنی شی نداشته، اِشتن ویوه زلیشه اِشتن برار را بَشتا. 26دوّمین و سوّمین برا، تا هفتمین برا نی ایزه بِبِنده. 27آخِر سر نی اَ زلییه بمردا. 28اِسا، اَ روجک که مَرده زنده آبینده، اَ زلیه کامین اَ هفت گله براران زن بیه، چون همه‌ی براره اَوشانه برده بیا؟»

29عیسی جواب بدا: «شاما پِر اشتباه فکر کردرا، چون نه خدا کلامک خبر دارا و نه خدا قدرتک! 30چون که اَ روجک که مَرده زنده آبینده هیچکی نه زن بره نه شو کره، بلکم همه آسمانه فرشتان شوار اِسنده. 31امّا مَردَان زنده آبیین درباره، مگم توراتکران خوانده نی که خدا شاما نه چِه واتَشه؟ 32خدا واته که، ”از ابراهیمه خدا و اسحاق خدا و یعقوب خدا اِسم“. اَ مَردَان خدا نییه، بلکم زِندهان خدایه.» 33مردم اِم لاوَهان اَشنوسننه، چَه تعلیمک مات آبنده.

پیله ترین حکم

34امّا وختی فَریسیان بَشنوِسِشانه که عیسی چنجوره اِشتن جواب آدییننه صدوقیان گَرش دِوَسَه، هندیگره نه بیدا آبنده. 35ای نفر اَوانک که شریعت قاضی به، چِمه واسنه که عیسی امتحان بکره اَوکش آپرسس: 36«ای استاد، شریعته پیله ترین حکمه کامینا؟» 37عیسی جواو بدا: «‌”خداوندْ اِشته خدا تمام دل و تمام جان و تمام اِشته فکر نه خَش ببش.“ 38اِم اولین و پیله ترین حکم اِسه. 39دوّمین حکمَه نی اولین حکمه شوآرا: ”اِشته قونشو نه نی اِشتن شوار خَش ببش.“ 40اِم دو گله حکم تورات و پیغمبران نیوشته هان پایه و اساس اِسنده.»

مسیح موعود چیکی زا اِسه؟

41وقتی که فَریسی فرقه علما هندیگرنه بیدا آبییه بنده، عیسی اَوانکش آپرسس: 42«شاما نظر مسیح موعوده درباره چیه؟ اَ چیکی زایه؟» اَوان جواو آداشانه: «داوود پادشاه زا.» 43عیسی باته: «پس چنجوریه که داوود پادشاه خدا روح الهام نه، مسیح نه خداوند واجه: چون اَ‌ زبور کتابک واتشه:

44«‌”خداونده چِمن خداوند نه باته:

«چِمن راست دسک بِنِش

تا وقتی که اِشته دشمنان اِشته پا جیرک دِرَنم.»“

45اگم داوود اَونه خداوند واجه، پس چنجوره اَ تانه داوود زا بیبی؟» 46هیچکسه نتانس ای کَلمه جواب بدیه و اَ روجَه پش دَ هیچ کسه جرعت نکه اَوک سوالی آپرسه.

Currently Selected:

انجیل متی 22: TIT

Highlight

Copy